24 Setema

E Mafai Faapefea Ona Ou Mulimuli i le Faataitaiga a le Faaola i le Fesoasoani atu ia i Latou e Le Tagolima?

2 Korinito 8–13

Fefautuaai Faatasi

Taitaiina e se uso o le au peresitene o le korama po o le vasega; pe a ma le 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona Ona taitaia lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2). Fuafua ni auala e faatino ai mea tou te talanoaina.

• Ola i le talalelei. O a mea na tatou talanoaina talu ai, ma o a valaaulia po o tofiga na faia? O le a se mea ua tatou faia e faatino ai nei valaaulia po o tofiga?

• Tausia o i latou e lē tagolima. O le a se mea e mafai ona tatou faia pe ta’u atu e aapa atu ai ia i latou o e atonu ua lagona le tuuatoatasi pe ua taumamao mai le Tama Faalelagi?

• Valaaulia tagata uma ia talia le talalelei. O a nisi auala e mafai ona tatou fesoasoani ai i isi ia lagona le alofa o Iesu Keriso?

• Faatasia o aiga mo le faavavau. O a ni manatu e mafai ona tatou faasoa atu i le tasi ma le isi e fesoasoani e faamalosia ai o tatou aiga?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

O a avanoa o ia te oe ma tagata o lau vasega po o le korama e auauna atu ai ia i latou e le tagolima o siomia oe? I se taimi na puapuagatia ai le Au Paia i Ierusalema ma manaomia le fesoasoani, sa tusi atu ai Paulo i Korinito e fautuaina i latou e foai atu ma le limafoai, “aua le faatauanau, po o mea e tatau ai: aua e alofa le Atua i le ua foai ma le lotomalie.” Sa ia folafola atu a o latou faia lenei mea, o le a “faateteleina le alofa tunoa uma ia te i [latou]” ina ia mafai ona latou “manuia ai i galuega lelei uma” (2 Korinito 9:7–8).

Sa faasino atu foi Paulo i le faataitaiga a Iesu Keriso, o le “e ui ina mauoa o ia, a e peitai ona o outou, ua mativa o ia, ina ia mauoa outou i lona mativa” (2 Korinito 8:9). Sa ositaulagaina ma le naunautai e le Faaola oa o le lagi ina ia mafai ai ona Ia auauna mai ia i tatou ma faatamaoaigaina i tatou e faavavau. Mafaufau i faataitaiga mai Lona soifuaga ina ua Ia aapa atu e auauna atu ia i latou na siomia o Ia. E faaopoopo atu i le faitauina o le 2 Korinito 8–9 a o e sauni e aoao atu, mafaufau e faitau le savali a Sister Michelle D. Craig “Mata e Vaai” (Liahona, Nov. 2020, 15–17).

Aoao Faatasi

Ina ia amata lau talanoaga, fai atu i le vasega po o le korama e fai se lisi o nisi o mafuaaga atonu e le auauna atu ai se tasi i isi o manaomia le fesoasoani. O le a se mea ua tatou aoao mai aoaoga a Paulo i le 2 Korinito 8:9; 9:7–8 ua musuia ai i tatou e faia nisi mea e tele atu e auauna atu ai ia i latou e le tagolima? O gaoioiga nei e mafai ona fesoasoani ia i latou o loo e aoaoina ina ia malamalama lelei ai i le auala e fesoasoani atu ai e tausia i latou o siomia ai latou.

• I le tele o taimi i tusitusiga paia, na aoao mai ai e le Alii Ona lagona e uiga i le tausiga o e matitiva ma e le tagolima. O nisi o faataitaiga o loo lisiina atu i le “Punaoa Lagolago.” O se tasi o auala e toe faamanatu ai nei aoaoga o le vaevae lea o lau vasega po o le korama i ni paga ma fai atu i paga taitasi e suesue nisi o mau. Fai atu ia i latou e talanoaina mea o loo aoao mai e fuaitau e uiga i le tausiga o e matitiva ma e le tagolima. Aisea e taua tele ai le tausiga o e matitiva ma e le tagolima i le Tama Faalelagi ma Iesu Keriso? Valaaulia le autalavou e fuafua ni auala e mafai ai e i latou taitoatasi ona fesoasoani ia i latou e le tagolima.

• O nisi taimi tatou te pisi tele ai i o tatou lava atugaluga lea tatou te le iloa ai manaoga o i latou o siomia i tatou. I lana savali “Mata e Vaai,” sa toe faamanatu mai ai e Sister Michelle D. Craig le tala i le faapupulaina e le Atua o mata o se alii talavou (tagai i le 2 Tupu 6:15–17). O le a le aoaoga tatou te aoao mai i lenei tala? O le a se mea e mafai ona tatou aoao mai i isi tala sa ia faasoa mai e uiga i le iloaina o manaoga o isi ma aapa atu ia i latou? (tagai foi i le vitio “Pray for Eyes to See as He Sees” i le ChurchofJesusChrist.org). E mafai foi e tagata o le vasega po o le korama ona faasoa mai ni aafiaga i se taimi na iloa ai e se tasi o latou manaoga ma auauna atu ia i latou. O anafea na tatou iloa ai manaoga o isi ma auauna atu ia i latou? O a ni o tatou lagona pe a mauaina pe tuuina atu sea auaunaga?

• Pe o malamalama tagata o lau vasega po o le korama i le auala e faataunuu ai o latou tiute e fesoasoani e tausia i latou e le tagolima? Mafaufau e talanoaina faatasi le Mosaea 4:16–21 ma le 18:8–10, faapea foi ma vaega talafeagai o le Tusitaulima Aoao (10.2.2 mo korama a le Perisitua Arona po o le 11.2.2 mo tamaitai talavou). O le a se mea ua musuia ai tatou e fai o se taunuuga o lou suesueina o nei aoaoga? Mafaufau e fuafua ni auala e mafai ona outou galulue faatasi ai e aapa atu ia i latou e le tagolima i lau vasega po o le korama, uarota, po o le nuu. O vitio i le “Punaoa Lagolago” e mafai ona maua mai ai ni nai manatu. Mo avanoa auauna atu i la outou eria, tagai i le JustServe.org.

O la tatou auaunaga faa-Keriso e mafai ona faamanuiaina ai olaga o i latou o siomia i tatou.

Faatino i le Faatuatua

Ia uunai tagata o le vasega po o le korama e mafaufau loloto ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Mataio 25:31–45; Iakopo 1:27; Mosaea 2:17; Alema 34:27–28; Mamona 8:35–39; Mataupu Faavae ma Feagaiga 104:14–18 (O le taua o le tausia o e matitiva ma e le tagolima)

• Jeffrey R. Holland, “Pe Le o i Tatou Uma Ea O Ni Tagata Aisi?,” Liahona, Nov. 2014, 40–42

• “Michelle’s Story,” “Caring for the Poor and Needy,” “I Was a Stranger: Love One Another,” “Fast Offerings: Are We Not All Beggars” (vitio), ChurchofJesusChrist.org

Aoao Atu i le Ala a le Faaola

O tusitusiga paia ma upu a perofeta o aso e gata ai ma aposetolo o punaoa o upumoni o loo tatou aoaoina. I avanoa uma, musuia i latou e te aoaoina e liliu atu i afioga a le Atua mo se taitaiga, tali i fesili, ma le lagolago.