10 Setema

E Mafai Faapefea Ona Ou Maua le Mafanafana ia Iesu Keriso Pe a Maliu se Tasi e Pele?

1 Korinito 14–16

Fefautuaai Faatasi

Taitaiina e se uso o le au peresitene o le korama po o le vasega; pe a ma le 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitaia lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2). Fuafua ni auala e faatino ai mea tou te talanoaina.

• Ola i le talalelei. E mafai faapefea ona fesoasoani le liliu atu i le Alii ia i tatou e taulima ai o tatou luitau ma tofotofoga?

• Tausia o i latou e lē tagolima. O ai tatou te iloa e moomia a tatou tatalo ma faauooga?

• Valaaulia tagata uma ia talia le talalelei. O a fuafuaga e faasoa atu ai le talalelei na talanoaina i le fono a le aufono a le autalavou i le uarota? E faapefea ona faaaofia ai la tatou vasega po o le korama?

• Faatasia o aiga mo le faavavau. E faapefea e le faia o galuega o talafaasolopito o aiga ona faamalosia a tatou sootaga ma le Tama Faalelagi ma Iesu?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

Pe a maliu se tasi tatou te alolofa i ai, e mafai ona lofituina. O le vavaeeseina mai e pele ia i tatou e aumaia ai lagona o le faavauvau tele ma le faanoanoa. Ae na aoao mai Paulo e faapea o le iuga “ua faaumatia le oti i le manumalo” (1 Korinito 15:54) ona o le Toetu o Iesu Keriso. I se isi faaupuga, o le “tui o le oti”--o le tiga ma le leai o se faamoemoe tatou te lagonaina i le olaga nei—“ua tofatumoanaina ia Keriso” (Mosaea 16:7–8; tagai foi i le 1 Korinito 15:54–57).

I se taimi, o le a oo ai tagata uma i le oti o se e pele. E faapefea ona e fesoasoani ia i latou o loo e aoaoina ia maua le mafanafana i na taimi faigata e ala i lo latou faatuatua ia Iesu Keriso? Mafaufau i lenei fesili a o e sauni e aoao atu e ala i le faitauina o le 1 Korinito 15, Mosaea 16:7–9, ma le Mataupu Faavae ma Feagaiga 42:44–46.

Aoao Faatasi

E mafai ona e valaaulia tagata o le vasega po o le korama e faasoa mai se taimi na latou lagonaina ai se mea e tiga matuitui. Ona mafai lea ona e fesili atu ia i latou pe aisea ua latou manatu ai na faaaoga e Paulo le upu “tui” e faamatala ai le oti (tagai i le 1 Korinito 15:54–56). Tuu atu ia i latou ni nai minute e toe faamanatu ai le 1 Korinito 15 ma faasoa mai upumoni latou te maua e uiga i le ala e faatoilalo ai le tui o le oti. Ona mafaufau lea i gaoioiga faapei o loo i lalo e fesoasoani ai i le autalavou ia malamalama atili i le ala e mafai ai e le Faaola ona faamafanafanaina i tatou pe a maliu se tasi tatou te alolofa i ai.

• E mafai ona e vaevaeina le vasega po o tagata o le korama i ni paga ma fai atu i paga taitasi e toe faamanatu faatasi nisi o fuaitau o mau i le “Punaoa Lagolago.” E mafai ona latou tusia tali i se fesili e pei o le “O a upumoni taua ou te faamoemoe e manatua pe a maliu se e pele ia te au?” Fai atu ia i latou e faaaofia ai faamatalaga mai fuaitau o mau i a latou tali. Ona valaaulia lea o i latou e faasoa mai i le vasega ia upumoni e sili ona taua ia i latou ma pe aisea foi.

• Mafaufau e iloilo faatasi se tala mai se savali o le konafesi aoao e faaalia ai le auala na maua ai e se tagata le faamoemoe ia Iesu Keriso ina ua maliu se tasi latou te popole i ai. O faataitaiga e aofia ai le savali a Sister Reyna I. Aburto “E Leai se Manumalo o le Tuugamau” (Liahona, Me 2021, 85–86) po o le savali a Elder S. Mark Palmer “O Le a Liua Lo Tatou Faanoanoa i le Olioli” (Liahona, Me 2021, 88–89). Atonu e uunaia oe e faasoa atu sou lava aafiaga pe valaaulia le autalavou e faasoa mai pe na faapefea ona latou maua le mafanafana ma le faamoemoe ia Iesu Keriso ina ua maliu se tasi e pele.

• A uma ona mafaufau i manaoga o tagata o lau vasega po o le korama, faaali atu se tasi pe sili atu o vitio i le “Punaoa Lagolago.” Valaaulia le autalavou e faasoa mai o latou lagona. E faapefea e le iloaina faapea na toetu Iesu Keriso ona aafia ai le ala tatou te vaai atu ai i le oti? Valaaulia tagata o lau vasega po o le korama e faasoa mai a latou molimau e uiga i le Faaola ma Lona Toetu ma pe faapefea e lenei malamalama ona aumaia ia i latou le faamoemoe.

• O loo faamatala mai i leIoane 11 le aafiaga o le Faaola i le maliu o sē pele—o Lana uo o Lasalo. Atonu e mafai e le vasega po o le korama ona faitau faatasi ia fuaiupu 1–45 , ma a o latou faitau, e mafai ona latou faasoa mai mea latou te aoaoina mai le faataitaiga a le Faaola. O le a se mea e mafai ona tatou aoao mai i lenei tala e mafai ona tatou maua ai le mafanafana pe a maliu se tasi tatou te alolofa i ai? E mafai faapefea ona tatou mulimuli i le faataitaiga a le Faaola o le “faanoanoa faatasi ma e faanoanoa … ma faamafanafana atu ia te i latou o e e manaomia le faamafanafanaga”? (Mosaea 18:9). O le a se mea ua tatou aoao mai le Mataupu Faavae ma Feagaiga 42:45–46 e mafai ona fesoasoani ia i tatou e faia lenei mea? Atonu e te manao e faaali le vitio “One-on-One (Ministering with Love)” (ChurchofJesusChrist.org).

O a tatou molimau i le Toetu o Iesu Keriso e aumaia ai ia i tatou le faamoemoe pe a maliu se tasi e pele.

Faatino i le Faatuatua

Ia uunai tagata o le vasega po o le korama e mafaufau loloto ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Isaia 25:8; 1 Korinito 15:20–22; Mosaea 16:7–9; Alema 7:11–12; 11:42–44; 22:14; 28:12–14; 40:11–12

• Dallin H. Oaks, “O Le A le Mea Ua Faia e lo Tatou Faaola mo i Tatou?,” Liahona, Me 2021, 75--77

• Moisés Villanueva, “Alofagia e le Alii i O‘u Aso Uma,” Liahona, Nov. 2021, 44–46

• Vitio: “Dealing with Death: Sunday Will Come,” “Finding Hope through the Resurrection of Christ,” “He Will Give You Help,” “Until We Meet Again” (ChurchofJesusChrist.org)

Aoao Atu i le Ala a le Faaola

O le aoao atu e aofia ai le auauna atu ma le alofa ma fesoasoani i isi ia maua faamanuiaga o le talalelei, ma o lenei fesoasoani e tele ina manaomia moni e se tagata e le toaga o le vasega. Tatou te manaomia uma le galulue faatasi e aapa atu ia i latou o loo tauivi, ma i le avea ai o se faiaoga e mafai ona e i ai i se tulaga ese e fesoasoani ai.