Malumalu o Indianapolis Initiana

27 Aokuso

E Mafai Faapefea Ona Ou Faaali Atu Ua Ou Iloa o Lo‘u Tino o se Meaalofa Paia mai le Atua?

1 Korinito 1–7

Fefautuaai Faatasi

Taitaiina e se uso o le au peresitene o le korama po o le vasega; pe a ma le 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitaia lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2). Fuafua ni auala e faatino ai mea tou te talanoaina.

• Ola i le talalelei. O a ni aafiaga lata mai nei ua tatou latalata atili atu ai i le Tama Faalelagi ma Iesu Keriso?

• Tausia o i latou e lē tagolima. O i ai se tasi na siitia mai talu ai nei i le tatou uarota pe faatoa auai i le Ekalesia? E faapefea ona tatou fesoasoani ia i latou ia lagona le taliaina?

• Valaaulia tagata uma ia talia le talalelei. O i ai ni gaoioiga o loma nei e mafai ona tatou valaaulia ai a tatou uo e auai ai?

• Tuufaatasia o aiga mo le faavavau. O a ni taumafaiga e mafai ona tatou faia e faamaumau ai a tatou talafaasolopito patino?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

Mo le lelei sili atu po o le sili atu ona leaga, o Au Paia o Aso e Gata Ai e foliga mai ua lauiloa mo mea tatou te le faia. O le tele o na [mea tatou te] “le” faia e faatatau i le ala tatou te taulimaina ai o tatou tino faaletino. I tua atu o na filifiliga taitasi e uiga i le mea e fai ia nisi o upumoni e faavavau—o mea ua tatou iloa. Pe a taialaina e upumoni e faavavau a tatou filifiliga, o le a faigofie atu ona faia na filifiliga, olioli atili, ma sili atu ona tumau. E fesoasoani foi upumoni e faavavau ia i tatou e faamalamalama ai a tatou filifiliga i a tatou uo. Atonu e faaopoopo atu i le lauiloa i mea tatou te le faia, e ono mafai ona sili atu ona lauiloa i tatou i mea ua tatou iloa.

Mafaufau i upumoni e faavavau e te iloa e uiga i o tatou tino faaletino—aisea ua i ai ia i tatou, pe faapeī lagona o le Atua e uiga i ai, ma le ala ua Ia finagalo ia tatou lagona e uiga i ai. Na faapefea e le iloaina o nei upumoni ona faamanuiaina ai oe ma uunaia ai au filifiliga? E mafai faapefea e lenei malamalama ona faamanuiaina ai tagata o lau vasega po o le korama? A o e mafaufau loloto i lenei mea, faitau le Kenese 1:27; 1 Korinito 6:19–20; ma le tusiga a Peresitene Russell M. Nelson “O Lou Tino:O Se Meaalofa Ofoofogia e Faatauaina” (Liahona, Aok. 2019, 50–55).

Aoao Faatasi

A o suesue e tagata o lau vasega po o le korama ia tusitusiga paia i lenei vaiaso, atonu sa i ai ni o latou mafaufauga i aoaoga a Paulo e uiga i o tatou tino o loo i le 1 Korinito 6. O se tasi o auala e valaaulia ai i latou e faasoa mai na manatu o le tuu atu lea ia i latou taitoatasi o se fasi pepa ma fai atu ia i latou e tusi ia le itiiti ifo ma le tolu ni tali talafeagai i le fesili “E faapefea ona pei o tatou tino o malumalu?” Fautuaina i latou e faitau le 1 Korinito 6:19–20 a o latou mafaufau loloto i lenei fesili. Ona mafai lea ona fefaasoaai a latou tali o le tasi ma le isi. E faapefea e aoaoga a le Faaola e uiga i o tatou tino ona tosina ai filifiliga tatou te faia? O nisi nei o manatu mo gaoioiga faaopoopo e uiga i lenei autu; filifili mai nei mea, pe fuafua sau oe lava filifiliga.

• Afai e te manao e fai nisi talanoaga e uiga i le faatusatusaga a Paulo i le va o le tino ma le malumalu, mafaufau e faaali atu ata o nisi o malumalu eseese. E mafai ona e maua nisi i le temples.ChurchofJesusChrist.org. E mafai e tagata o le vasega po o le korama ona talanoaina eseesega latou te vaaia i nei malumalu, faatasi ai ma mea latou te tutusa ai. E mafai foi ona latou talanoa e uiga i o latou lagona pe a latou i ai i totonu o le malumalu. O le a le mea e avea ai le malumalu o se nofoaga faaleagaga, ma paia? Ona mafai lea ona e uunaia le vasega po o le korama e faatatau mea na latou talanoaina e uiga i malumalu i o tatou tino. E mafai faapefea e aoaoga e uiga i malumalu o loo i le Mataupu Faavae ma Feagaiga 97:15–16; 109:8, 12 ona faatatau i o tatou tino faaletino?

• Atonu na maua e tagata o lau vasega po o le korama—pe o le a maua—ni avanoa e faamatala faamalamalama ai pe aisea latou te mulimuli ai i aoaoga a le Faaola e uiga i le tausiga o o latou tino. Atonu e te fesili atu i nisi o i latou po o le a sa latou tala pe afai, mo se faataitaiga, sa fesili atu se tasi ia i latou pe aisea latou te le inu ava malosi, lauti, po o le kofe pe aisea latou te le ofuina ai isi ituaiga ofu. O a nisi o upumoni mai le talalelei a Iesu Keriso e aafia ai le ala tatou te taulimaina ai o tatou tino? E mafai e tagata o le vasega po o le korama ona vaavaai mo nisi o nei upumoni i lalo o “Punaoa Lagolago.”

• Ina ia fesoasoani ia i latou o loo e aoaoina ia loloto lo latou migao mo o tatou tino faavavega, e mafai ona e faaalia le vitio “God‘s Greatest Creation” (tagai foi i le Russell M. Nelson, “Lou Tino: O Se Meaalofa Matagofie e Faatauaina,” 50–55). O le a le finagalo o le Tama Faalelagi ma Iesu Keriso ia tatou lagonaina e uiga i o tatou tino? E mafai foi ona outou talanoaina auala e taumafai ai Satani e tauanau i tatou e tuuitiitia le faatauaina pe inoino foi i o tatou tino. O le a se mea e mafai ona tatou faia e faatoilalo ai ana pepelo ma faaosoosoga? O a upumoni o le a fesoasoani ia i tatou? O nisi o punaoa i lalo o “Punaoa Lagolago” atonu e aoga.

O o tatou tino o ni meaalofa mai le Atua, ma o upumoni o le talalelei e fesoasoani ia i tatou e tausia ai.

Faatino i le Faatuatua

Ia uunai tagata o le vasega po o le korama e manatunatu ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Kenese 1:27; 1 Korinito 6:19–20; Alema 11:42–44; 40:23; Mataupu Faavae ma Feagaiga 89; 130:22

• “O Le Aiga: O Se Folafolaga i le Lalolagi,” aemaise lava parakalafa muamua e tolu

• “Ia Tuu Mai e le Alii se Malumalu,” Tusipese a Tamaiti, 73

• Tusiga e uiga i o tatou tino faaletino i le Aokuso 2019 New Era po o le Liahona

• Na aoao mai Peresitene Russell M. Nelson: “I le tuuina mai ai ia i tatou o le meaalofa o se tino, ua faatagaina ai i tatou e le Atua ia faia se laasaga taua i le avea atili e faapei o Ia. Ua malamalama Satani i lenei mea. … O lea o le tele, pe afai e le o le anoano, o faaosoosoga na te tuu i o tatou ala e mafua ai ona tatou faaleaga o tatou tino po o tino o isi. … O lou tino o lou malumalu patino lea, na foafoaina e nofo ai lou agaga e faavavau [tagai i le 1 Koronito 3:16–17; 6:18–20]. O lou tausiga o lena malumalu e taua. Ou te fesili atu nei ia te outou, … o sili ea lou naunau e fai ou laei ma teuga o lou tino ia fiafia i ai le lalolagi nai lo le faafiafiaina o le Atua? O lau tali i lenei fesili e auina atu ai se savali tuusao ia te Ia e uiga i ou lagona e faatatau i Lana meaalofa silisili ona maoae ia te oe” (“E Mafai Ona Tatou Faia ia Lelei Atu ma Ia Tatou Lelei Atu,” Liahona, Me 2019, 68).

• Na aoao mai Elder D. Todd Christofferson: “O i latou e talitonu o o tatou tino e le mai se isi mea nai lo le taunuuga o tupuaga mai meaola, o le a lē lagonaina e tatau ona tali atu i le Atua po o soo se tasi lava mo mea latou te faia i o latou tino. Peitai, o i tatou o i ai se molimau o le moni atoa o le muai olaga, olaga faaletino ma le olaga e faavavau pe a mavae le oti, e tatau ona faailoa atu e i ai so tatou tiute i le Atua e faatatau i lenei palealii ua ausia o Lana foafoaga faaletino. … Ona o lo tatou tino o le meafaigaluega a lo tatou agaga, e taua lo tatou tausia i le ala sili tatou te mafaia. E tatau ona tatou faapaiaina lona mana e auauna atu ai ma faalautele ai le galuega a Keriso” (“Toe Manatunatuga i se olaga Faapaiaina,” Liahona, Nov. 2010, 17).

Aoao Atu i le Ala a le Faaola

Ia nofouta ia i latou i lau vasega po o le korama e i ai manaoga faapitoa po o isi luitau faaletino. Fesoasoani ia latou malamalama o tino o tagata uma e taua ma agavaa mo le faaaloalo. O le alofa faaKeriso e te faaalia i tagata uma e mafai ona i ai se faatosinaga mamana i le ala e vaai ai tagata o le vasega po o le korama i le tasi ma le isi ma i latou lava.