O Lou Tino: O se Meaalofa Maoa’e e Faapelepele
Saunia e Peresitene Russell M. Nelson
O lou tino o se foafoaga ofoofogia a le Atua.
Ata na tusia e Scotty Reifsnyder
O le umi ou te ola ai, o le tele foi lea o loʻu iloa. O lena malamalama e fesoasoani ia te au ou te malamalama ai o le meaalofa o o tatou tino faaletino o se vavega maoae. O se tino tulaga ese ua tuuina mai ia i tatou taitoatasi e lo tatou Tama Faalelagi alofa. Na Ia faia e avea o se fale fetafai mo o tatou agaga, e fesoasoani ia i tatou taitoatasi i la tatou sailiga e faataunuu le atoaga o lo tatou foafoaga. O o tatou tino e mafai ai e i tatou taitoatasi ona iloa le fuafuaga sili o le faaolataga lea na Ia fuafuaina mo Ana fanau faapelepele uma. E finagalo o Ia ina ia tatou avea atili e faapei o Ia ma toe foi atu e mau faatasi ma Ia. O lena faamanuiaga sili o le a le mafai ona faia e aunoa ma le mauaina muamua o se tino faaletino i lenei olaga faataitai.
O le Atua, le Tama o o tatou agaga,1 ua ia te Ia se tino faamamaluina, faaatoatoaina o aano ma ivi.2 Sa tatou nonofo faatasi ma Ia i le lagi ae tatou te le’i fananau mai.3 Ma ina ua Ia faia i tatou faaletino, sa faia i tatou i le faatusa o le Atua, ua tofu le tagata ma sona lava tino faaletino.4
O i tatou o se vaega o Lona faamoemoega paia “O la’u galuega ma lo’u mamalu,” na Ia saunoa mai ai, “o le aumaia o le tino ola pea ma le ola faavavau o le tagata.”5
O i Tatou o Tagata e Itulua
O tagata taitasi e aofia ai se tino ma se agaga,6 ia e o mai uma mai le Atua. O se malamalama mausali i le tino ma le agaga o le a faatulaga ai o tatou mafaufauga ma galuega mo le lelei.
A o lei oo i lo tatou olaga faaletino iinei, o atalii ma afafine agaga taitasi sa nonofo faatasi ma le Atua. O le agaga e faavavau; sa i ai i le mama i le muai olaga7 ma o le a i ai pe a mavae le oti o le tino.8 O le agaga e tuuina mai i le tino ia aafiaga o le olaga ma uiga patino.9 “O le agaga atoa o se mea e tino, ae ua sili atu ona lelei pe mamā.”10
O le atiina ae o le agaga o se taunuuga e faavavau. O uiga auaumama o le a faamasinoina ai i tatou i se aso la le agaga.11 O nei mea e aofia ai uiga mama, faamaoni, agaalofa, alofa, ma isi.12 O lou agaga, faatasi ai ma le i ai i totonu o lou tino, e mafai ona tuputupu ae ma faaali atu nei uiga i auala e taua i lou alualu i luma e faavavau.13
O le Agaga ma le tino, pe a tuufaatasia, e avea o se tagata ola e maoae lona aoga. “O le agaga ma le tino o le tagata lea”14 E taua tele nei mea e lua. O lou tino faaletino o se foafoaga ofoofogia a le Atua. O Lana malumalu faapea foi ma oe ma e tatau ona taulimaina ma le migao. Ua tautino mai tusitusiga paia:
“Tou te le iloa ea, o lo outou tino o le malumalu lea o le Agaga Paia ua i totonu ia te outou, o loo ua ia te outou mai le≈Atua, e le aia foi outou ia te outou?
“Aua ua faatauina outou i le tau: o lenei ia outou vivii atu i le Atua i o outou tino ma o outou agaga, o mea a le Atua ia.”15
O lou tino, po o a lava ana meaalofa faalenatura, o se foafoaga mataina a le Atua. O se fale fetafa’i o le tino—o se malumalu mo lou agaga. O se suesuega o lou tino e faamaonia ai lona mamanu paia.
O Lou Tino O se Meaalofa Maoa’e
O le maofa o o tatou tino faaletino e masani ona le amanaiaina pe le faaaloaloina. O ai e leʻi feagai ma lagona o le le taua ona o lona tino poʻo foliga vaaia? E toatele tagata e moomoo i o latou tino ia tutusa ma o latou manaoga. O nisi na fananau mai ma le lauulu sasao e mananao i le migimigi. Ae o isi na fananau mai ma le lauulu migimigi e mananao i le sasao.
Mafaufau loloto i le matagofie o mea e te vaʻaia pe a e tilotilo i le faʻata. Aua e te amana’iaina togitogi [freckles], lauulu felefele, po o isi tulaga le lelei ma vaai i tala atu e iloa ai oe moni lava—o se atalii o le Atua, na faia e Ia i Lona faatusa.
A e usuina le pese “O A’u o se Atalii o le Atua,”16 mafaufau i Lana meaalofa ia te oe o lou lava tino faaletino. O le tele o uiga maoae o lou tino e faamaonia ai lau lava “amio atua.”17
O totoga taitasi o lou tino o se meaalofa tulaga ese mai le Atua. E tofu le mata ma se tioata e otometi ona taulai tonu ai le vaai. O neura ma musele e faatautaia mata e lua ia maua ai se ata se tasi e faatafa-tolu. O mata e fesootai atu i le faiai, lea e faamaumauina ia mea na vaaia.
O lou fatu o se pamu tulaga ese.18 E i ai ni ona afuala e faatautaia itu e fegasoloa’i i ai le toto. O nei afuala e matala ma tapuni e sili atu i le faa-100,000 taimi i le aso—36 miliona taimi i le tausaga. Ae, vagana ua afaina i faama’i, e mafai ona latou tatalia na ituaiga o galuega mamafa e toetoe lava e le gata.
Mafaufau i papupuni o le tino mo le puipuiga. Ina ia puipuia ai mai le faaleagaina, na te matauina le tiga. I le tali atu i siama, na te gaosia ni polotini e tetee atu i ai. O le pa’u e tuuina atu le puipuiga. E lapatai mai i manu’a e ono mafua mai i le malosi o le vevela po o le malulu.
O le tino na te faafouina ona lava sela ua le toe aoga. O le tino e fofoina ona lava lavelavea, totolia, ma ponaivi gaui. O lona mafai ona fanafanau o le isi lena meaalofa paia mai le Atua.
O le tino e mafai ona faatonuina pea lava pea le maualuga o mea e le mafaitaulia, e pei o le masima, vai, suka, polotini [protein], okesene, ma le karaponi taiokesaita [carbon dioxide]. O pulega faatonutonu e pulea e aunoa ma lo tatou iloaina o nei mea ofoofogia.
Faamolemole ia matau: E le manaomia se tino atoatoa ia maua ai se faasinomaga e faavavau. O le mea moni, o nisi o agaga e sili ona lelei o i totonu o ni tino auma’ia. O le tele o le malosi faaleagaga e masani ona atiina ae e tagata e i ai luitau faaletino—ona e matuai luitauina i latou. O tagata faapena ua agavaa i faamanuiaga uma o loo teuina e le Atua mo Ana fanau faamaoni ma usiusitai.19
O olaga faaletino taitasi ua tapunia e le oti. Mulimuli ane, o le a oo mai le taimi o le a ‘toe faatasia … agaga ma le tino i … foliga atoatoa; o lima ma vae ma soogaoivi o le a toefuataiina i ona tulaga e tatau ai.”20 Ma, faafetai ia Iesu Keriso ma Lana Togiola, e mafai ai ona faaatoatoaina i tatou ia te Ia.21 Soo se tasi e suesueina ia galuega a le tino o le tagata ua ia vaai moni “i le Atua o femaliua’i i lona mamalu ma lona mana.”22
O Tatou Agaga e Tatau ona Pulea o Tatou Tino
E ofoofogia e pei o lou tino, o lona faamoemoega autu, e pei ona taʻua muamua, e sili atu ona taua-ia auauna atu o se tulaga mo lou agaga e faavavau.
Na maua e lou agaga lou tino ma avea ai ma se tagata ola e maua se aafiaga i le olaga faitino ma tofotofoga faʻapitoa ma suʻesuʻega. O se vaega o lena suʻega o le fuafua lea pe mafai ona faʻaleleia manaoga o lou tino e le agaga o loʻo nofo i totonu.
A tatou malamalama i lo tatou natura ma o tatou faamoemoega i le lalolagi ma oo tatou tino o malumalu faaletino o le Atua, o le a tatou iloa o se mea paia le faatagaina o soo se mea e ulu atu e mafai ona faaleagaina ai le tino. E moni lava le le faʻaaloalo i le faʻafeiloaia o le vaʻai o tatou mata taua poʻo lagona o lo tatou paʻi po o le faalogo e sapalai le faiʻai ma mea e manatuaina e le mama pe le agavaa. O le a tatou faapelepele i lo tatou ola mama ma aloese mai “tuinanau valea ma le faatiga, lea e malelemo ai i [tatou] i le faafanoga ma le malaia.”23 O le a tatou “sosola ese mai nei mea; ma mulimuli i le amiotonu, amioatua, faatuatua, alofa, onosai, [ma] agamalu”24—uiga e faagaeetia ai le agaga atoa.
O mea e pei o le ava, tapaa, ma fualaau faasaina ua faasaina e le Alii. Ua faapena foi ona lapataia i tatou e uiga i leaga o ponokarafi ma mafaufauga le mama. O manaʻoga mo nei malosiaga leaga e mafai ona avea ma vaisu. I le taimi, o vaisu faale-tino po o le faale-mafaufau e faapologaina ai uma le tino ma le agaga. O le salamo mai ia mea e tatau ona tatou ausia i lenei olaga ao i ai pea ia i tatou le fesoasoani a se tino faaletino e fesoasoani ai ia i tatou e atiina ae le loto pulea.
O lo tatou Foafoa na faaosoina manaoga i totonu oo tatou tino e faaauau ai tagata soifua ma faataunuu ai Lana fuafuaga sili o le fiafia. O le mea lea, tatou te fia mananao ai mo meaai, vai, ma le alofa.
Ua iloa e Satani le mana o o tatou manaoga. O le mea lea, na te faaosoosoina ai i tatou e ‘ai mea e le tatau ona tatou aai ai, inu mea e le tatau ona tatou inuina, ma solia ai le faaaliga o le alofa aupito sili ona vavalalata i le faʻaaogaina o na mea i fafo atu o tuaoi o le faaipoipoga.
Pe a tatou iloa moni lo tatou natura paia, tatou te mananao e pulea na manaʻoga. Ma o le a taulai atu o tatou mata i mataaga, o tatou taliga i leo, ma o tatou mafaufau i mafaufauga e aoga i lo tatou foafoaga faaletino o se malumalu o le Atua. I tatalo i aso taitasi, o le a tatou faailoa atu ma le agaga faafetai o Ia o lo tatou Foafoa ma faafetai atu ia te Ia mo le matagofie o lo tatou lava malumalu faaletino. O le a tatou tausia ma faapelepele i ai e pei oa tatou lava meaalofa patino mai le Atua.
Mulimuli i le Faaola
Ina ia ausia lou taunuuga e sili ona maualuga, faataitai i le Faaola. Sa Ia fetalai mai, “O a ituaiga o tagata e tatau ona outou i ai? … Pei Lava O Au Nei.”25 O lo tatou faamoemoe sili ona maualuga o le tuputupu ae lea i le agaga ma maua “le tulaga o le atoaga o Keriso.”26
Manatua, e leai se vaitau o le olaga e mavae atu e aunoa ma se faaosoosoga, tofotofoga, poo se puapuaga pe faaleagaga pe faaletino. Ae ao e atiina ae ma le agaga tatalo le loto pulea, o manaoga o le tino e mafai ona gauai atu i lou pulea faaleagaga. Ma pe a ausia lena, e mafai ona e maua le malosi e gauai atu ai i le finagalo o lou Tama Faalelagi. Manatua, na fetalai Iesu, “Ae aua le faia lo’u loto, a o lou finagalo.”27
A oo mai tofotofoga loloto i lou ala, ia manatua le folafolaga matagofie lenei a le Faaola: “O le manumalo, ou te avatua ia te ia ma te nonofo faatasi ma au i lou nofoalii, e pei o au foi ona ou manumalo, ua ma nonofo foi faatasi ma lou Tama i lona nofoalii.”28
Tau ina ia tatou faafetai pea mo faamanuiaga maoae o se tino faaletino matagofie, o le foafoaga sili a lo tatou Tama Faalelagi alofa. E pei lava o le maoae o lo tatou tino, e le o se mutaaga ia lava. Ae, o se vaega taua o le fuafuaga sili a le Atua o le fiafia mo lo tatou alualu i luma e faavavau. Afai tatou te faamamaluina e pei ona faauuina ai e le Atua, o le a tatou tumau ai i lena “ala lauitiiti ma le vaapiapi e tau atu i le ola e faavavau.”29
O Iesu Keriso o lo tatou Faataitaiga Sili. Ou te tautino atu, o Ia o Lana molimau faapitoa, o Ia o le Alo o le Atua. O Ia “o le ola ma le malamalama o le lalolagi.”30
O i tatou o atalii ma afafine o le Atua Silisiliese. O Ia o lo tatou Tama. O i tatou o Ana fanau. O lo tatou tofi paia o le matagofie o tagata soifua. O lo tatou tofi e paia. E leai se tuaoi o lo tatou gafatia. Talosia ia tatou faamamaluina pea Ana meaalofa ma lena talatuu i mea uma tatou te faia ma tautatala ai.