2019
O Auala e Atinae Ai le To’a ma le Faatauaina o le Tagata Lava Ia
Aokuso 2019

Na o Polokalama Faaeletonika

O Auala e Atinae Ai le To’a ma le Faatauaina o le Tagata Lava Ia

Saunia e le Tautua o le Uelefea ma le Ola Faalagolago o le Tagata ia te Ia Lava

E faaopoopo atu i le atinaeina o o tatou faatuatua, e manaomia ona tatou aoaoina tomai e fesoasoani tatou te faatoilalo ai le maualalo o le faatauaina o le tagata lava ia.

O le malamalama ia i tatou lava e taua lea i le faaleleia atili o o tatou tulaga i le olaga ma la tatou vaaiga—lea e masani ona faatatau i ai o le maualuga o lo tatou fiafia. O lea la, a o tatou aoao i tomai fou faapisinisi ma maua le aoaoina, e tatau foi ona tatou aoao e uiga i galuega i totonu o o tatou lava agaga. O le mea muamua e tatau ia i tatou uma ona iloa o le, ua tatou i ai iinei i le lalolagi e aoao ma tuputupu ae. E leai se mea e ta’u o le tāmau ma le tagata ua avea ai i tatou. E mafai ona tatou sui. E lei foafoaina i tatou ia tāmau.

E Faapefea Ona Tatou Faatoilaloina le Maualalo o le Faatauaina o le Tagata Lava Ia?

E manaomia muamua lo tatou malamalama po o fea e sau ai le maualalo o le faatauaina o le tagata lava ia. E mafai ona mauaa loloto i aafiaga a o tamaitiiti na sa leaga, lofituina, po o le le mautonu. O le tetea, faailoga tagata, ma sauaga faalefeusuaiga pe faaletino o ia mea uma e tuua ai ni o latou aafiaga tumau i o tatou luga pe a tatou matutua pe afai tatou te le sailia le fesoasoani tatou te manaomia. O le toatele o i tatou e le’i i ai lava se avanoa e atinae ai le to’a e ala i aafiaga tonu e aoao ai. O fafo atu o fesoasoaniga faapolofesa, o loo i ai ni auala e faamalosia ai lo tatou faatauaina o le tagata lava ia ma le to’a ina ia tatou saunia lelei ai ia manuia lo tatou faafetauia o luitau, tulaga le mautonu po o atugaluga fou.

O Auala e 10 e Faamalosia ai Lou To’a.

  1. Tatalo ia iloa auala e faatoilalo ai. Nai lo o le tatalo mo faafitauli ina ia foia po o le aveesea o puniala, tatalo ia malamalama ia te oe lava ma mea e ao ona e iloa faatoilalo. Tatalo ia manatua mea ua e aoaoina ma tusi i lalo ou uunaiga. Ia tagai soo i ai.

  2. Ia mafaufau mautinoa. Manatua o oe o se atalii/afafine o le Atua. Na te le’i tuu mai oe iinei ia e toilalo. E te le atoatoa, ae o loo e agai atu i le ala sa’o. Talitonu ia te oe lava. Ia iloa, po o le a lava le mea e oo mai, e mafai ona e taulimaina faatasi ai ma le fesoasoani a le Alii.

  3. Tausi lelei lou tino ma foliga vaaia. Ia manaia ma mama. Ia tofu lou ulu, auli ou lavalava, fufulu ou nifo, ma ia mautinoa ia e ataata. O le tumama o le tagata lava ia e te maua ai lagona lelei ia te oe lava.

  4. Ai meaai tatau ma faamalositino. O le iloa o loo e tausia lelei lou soifua maloloina e te maua ai se lagona o lou pulea o oe lava. Ma o le faamalositino e tuu atu ai ia te oe lena faamalosi o homone lea e te maua ai ni lagona lelei.

  5. Ia lava le moe. Sauni e moe e ala i le faia o se mea e mapu i ai—faitau se tusi, faitau au tusitusiga paia, pe tusitusi i lau apitalaaga. Alu e moe ma ni mafaufauga lelei i lou ulu, ma le iloa o taeao le isi aso, le isi amataga fou.

  6. Ia amio lelei. Ia vaai sa’o atu i isi ma ataata, fai atu se upu alofa, po o le fai o se faatinoga faatauvaa o le agalelei. “E te alofa atu i le lua te tuaoi ia pei o oe lava ia te oe” (Mareko 22:39).

  7. Ia lotofaafetai. Ia malolo i le ogatotonu o se taimi mamafatu o le aso ma faitau ou faamanuiaga. E i ai i le lotofaafetai se faatosinaga mamana i lo tatou tulaga manuia.

  8. Ia faamalo ia te oe lava. Fai se mea ua leva ona e faapafalaina, ma a uma loa, ia e faamalo ia te oe lava mo lau galuega. E mafai ona e faia se mea faigofie e pei o le faaumaina o se tusi sa e manao e faitauina po o le faaleleia o le paipa o le umukuka.

  9. Faatulaga lou tulimanu. I le fale ma i le galuega, ia faatulaga mea uma. O le a e maofa i le manaia o le lagona o le i ai o mea uma i lona tulaga tatau.

  10. Fai se lisi o ou malosiaga ma taleni. Atonu e mafai ona e talosaga atu i uo mamae ma aiga e fesoasoani atu. Ia faaaofia ai ni mea e tele atu nai lo na o uiga faaletagata—ia aofia ai mea ua ausia ma mea e te lelei ai. Ia tuu laia le lisi i se mea e mafai ona e tilotilo i ai i taeao uma. Ma ae e te le’i tuua le fale mo le aso, tootuli ma faailoa atu lou loto faafetai mo mea uma o loo i luga o lena lisi.