Mauaina o le Olioli ia te Oe Lava

Aubrey Johnson

E faapefea ona tatou iloa ona alolofa ia i tatou lava ma uiga laiti uma lea ua avea ai i tatou, o i tatou?

E alala le tusitala i Idaho, ISA.

I le avea ai ma talavou matutua, ou te manatu o le toatele o i tatou e tauivi ma le alofaina o i tatou lava ma le mauaina o le olioli i totonu o o tatou lava loto. E amata i le le mafaufau lelei e uiga i o tatou tino, o tatou uiga faaalia, po o tatou tomai. O le taimi lava tatou te iloa tonu ai le mea tatou te le fiafia ai (o le mea e faanoanoa ai, e faigofie naua), ona tatou taumafai loa lea e sui na mea. Ae atonu e le vave tele ona tupu lena suiga po o, o le auala foi sa tatou faamoemoe i ai. Pe amata foi ona tatou faatusatusaina i tatou lava i isi i luga o ala o agafesootai, ona tatou toe lagonaina foi lea o le le fiafia. O le mea e faanoanoa ai, o le toatele o i tatou o le a soona popole e uiga i lo tatou le fiafia ma o tatou “faaletonu” tatou te mafaufau i ai nai lo o le taumafai ia maua le fiafia i totonu o i tatou lava.

E le o le ala lena e ola ai. Ae ona ua siomia i tatou e ala o fesootaiga ma tagata e faaosofia o tatou manatu i mea e “tatau” ona tatou foliga ai, galulue a’i, ma mafaufau a’i, e leitioa a tatou tauivi ia maua le olioli i o tatou lava tagata taitoatasi! E masani ona ou mafaufau: E faapefea ona tatou aoao e alolofa ia i tatou lava ma uiga faaalia laiti uma ua avea ai i tatou, o i tatou, ae o loo taumafai e le aunoa le lalolagi e tulei i tatou ia ogatasi ma ni manatu e le tauamiotonuina?

Ia, tatou te amata i le sailia o le olioli i totonu o i tatou lava, i o tatou tagata taitoatasi, ma i o tatou talitonuga ma tulaga faatonuina.

Ae o le fesili la, e faapefea ona tatou faia lena mea?

Ou te manatu e eseese mo i tatou uma lava. Ae ou te manatu e i ai ni nai faatinoga e mafai ona tatou faia e faatatau i tagata uma lava.

Muamua, fai le mea e fesoasoani i lou manuia! Mo se faataitaiga, sa masani ona ou ita e koleni—sa ou ita lava i ai. Ae talu ai nei, ua amata moni lava ona ou fiafia e koleni. O le koleni ua ou maua ai le taimi mo a’u lava (a le o le savali sopo po o le alu i le faletaalo). Ou te lagona ai le malosi, e le ona o loo ou taumafai e faalusi o’u pauna po o le ia ou foliga i se vaaiga faapitoa, ae ona ou te maua ai lagona lelei e uiga ia te a’u lava. Ua ou aumalosi atu ma to’alelei, ma o lena mea ua oso ai le olioli tele i totonu o lo’u loto.

E le faapea e nao lou faamalositino e faaleleia ai lou manuia e ui—atonu o le ‘ai i meaai maloloina, mafaufau loloto, vave alu e moe, po o le faia foi o se mea faatauvaa e pei o le manava tele i totonu ma le falōlō e te lagona ai le malosi.

Lona lua, iloa po o ai oe! O le mea lenei e alu ai sina taimi, ae a e iloa o ai oe, e faia ai se eseesega atoa lava! Ua ou iloa o au o se afafine o le Atua. O Ia—o se tagata atoatoa—na foafoaina a’u! E faapefea ona ou iloa lenei mea? Sa ou tatalo, e faitau a’u tusitusiga paia, ma siomia a’u lava i tagata o e e tutusa mea matou te talitonu i ai! Sa ou fesili foi, “O le a se finagalo faaalia o le Atua e uiga ia te a’u?” pe a ou faitau i tusitusiga paia, ma ou iloa ai, afai na popole o Ia i Lona nuu i aso ua mavae, e faapena foi Lona finagalo ia i tatou i aso nei.

E le’i faia e le Tama Faalelagi ni mea sese i le foafoaina o i tatou. I le tele o tulaga, o mea e mafai ona mafaufau i ai oe ma a’u o ni faaletonu, o ni avanoa moni ia e liliu atu ai ia Keriso ma ia faaatoatoaina ia te Ia. O lenei, ou te matuai mamao lava mai le atoatoa! Ae e silasila mai le Atua ia te a’u o Lona afafine, ma e alofa o Ia ia te a’u e pei lava o le ala na Ia foafoaina ai a’u. O le iloaina o Le na foafoaina lagi ma le lalolagi na filifili na manaomia e le lalolagi se tagata e pei o a’u, e mafai ona fesoasoani i soo se tagata ia lagona le olioli ia i latou lava.

Lona tolu, ia taulai atu i ou malosiaga! E tofu i tatou uma ma le anoanoai o tomai eseese, ae o nisi taimi e faigata ai ona iloa mea tatou te lelei ai. Mafaufau e uiga i ou mausa—o loo i ai ni taleni ma ni malosiaga eseese ia atonu o loo sopoloa i lau vaai. E mafai foi ona e fai atu ia i latou e pele ia te oe e ta’u atu ou malosiaga. E masani ona manino atu la latou vaai i au taleni nai loo oe. Suesue lou faamanuiaga faapeteriaka ia iloa ai nisi o meaalofa ma gafatia faapitoa ua faamanuiaina ai oe e le Atua.

Ma afai e te fia iloa atili, tatalo e uiga i ai! Ua saunia le Tama Faalelagi e fesoasoani ia e iloa au meaalofa paia. Ma le isi, e mafai ona e ole atu ia te Ia e faaali mai ni mea e mafai ona e faaleleia atili. O le iloa o o tatou vaivaiga ma le sailia o le malosi o le Alii e fesoasoani tatou te tuputupu ae ai—ia aua la le lotovaivai ai. E le gata ina faatagaina oe e le Atua ia i ai ni vaivaiga, ae ua faamanuiaina foi oe i malosiaga. A o e taulimaina ma le lotomaualalo, saili le taitaiga a le Alii, e mafai ona e tuputupu ae ma maua le olioli i lou tagata!

E finagalo le Atua ia tatou lagona le olioli i le olaga nei. Ou te talitonu a tatou faia nei mea e tolu, o le a tatou maua le olioli faateleina ia i tatou lava. Ou te iloa ua ou lagona le olioli ma faaauau ona lagona le olioli pe a ou faatinoina nei mea i aso uma lava.