Autalavou Matutua
Lagonaina “Ua Lava Lelei”: Auala e 3 e Faatoilaloina ai le Vaaiga Le Lelei Faaletagata
E alala le tusitala i Iuta, ISA.
O le popole ma le atuatuvale na taitai atu ai au i lalo o se ala o le le atoatoa o le soifua maloloina faaletino ma na sili atu foi ona leaga lau vaai ia te au lava ia. Ae e tolu mea na fesoasoani ou te toe alofa ai ia te aʻu lava ia.
“E le’o lava lou lelei.”
O upu na o loʻo tautau i luga o se puipui i loʻu potu a lalo. O loʻo i ai se potu laitiiti iina i le mea ou te faamalositino ai, ma a oʻo mai mafaufauga leaga i loʻu mafaufau, ou te tusia i lalo ma faapipii i luga o le laupapa. O se faamanatu o tauiviga na feagai ma a’u ma le ituaiga tagata tuai ua ou tuua.
Mo se taimi umi na ou fai ifo ai ia te au lava e le o lava lou lelei. Sa ou lagona le lofituina i le popole ma le atuatuvale, lea na iu ai ina le lelei le soifua maloloina faaletino. Sa ou malemo. Sa ou lagona le faatauvaa. Sa ou lagona le leai o se faamoemoe. Sa ou talitonu ou te lei agavaa mo le alofa o le Atua po o soo se tasi lava.
I le avea ai ma talavou matutua, e toatele i tatou e ono aafia i taimi tatou te lagona ai e le o lelei tele i tatou, e tusa lava pe o a tatou amioga, taleni, po o, i loʻu tulaga, foliga faaletagata lava ia. Talu ai nei, na ou luitauina ai aʻu e tatala ma tafi ese le pefu mai itulau sili ona natia i laʻu lava tusi o le olaga. I le taimi o au faigamalaga, na ou maua ai ni nai mea na atiina ae le vaaiga le lelei o le tagata lava ia na ou taofia i totonu mo se taimi umi. Ae na ou iloaina foi auala nei e tolu e faatoilaloina ai.
1. Aveese Faatusatusaga
Na ou faitauina muamua se upusii mai ia Theodore Roosevelt lea na faapea mai, “O le faatusatusa o le gaoi lea o le fiafia.” I totonu o se lalolagi lea e maua fua ai le soifuaga o tagata uma i ala o faasalalauga faaleagafesootai, sa ou lagonaina le uunaia pea e faatusatusaga le talafeagai i uo, aiga, ma tagata lauiloa lautele. O oʻu vaivaiga sili ona loloto na faafetaui ma mea sili na ausia e le tasi, ma e masani lava ona tuua ai au ua le atoatoa. I lenei taimi o mafaufauga le lelei o le tagata lava ia, na ou iloaina ai e tatau ona suia loʻu mafaufau.
Sa ou faia se malologa mai ituaiga uma o ala o faasalalauga faaleagafesootai ma amata loa ona ou galue i le tulaga o le faaleleia o manatu ma lagona e patino ia te au ma vaaia le mea sili i isi. I se taimi puupuu, na amata ona suia oʻu mafaufauga. Na vave ona ou tuu le faatusatusaina o oʻu tulaga le lelei i tulaga lelei a isi e pei ona masani ona ou faia muamua. O le mea moni, na amata ona ou faamanuia faalilolilo le manuia o isi! O lenei faiga masani na tafiesea le puipui o le faamaualuga ma le fuā na ou fausia i le aluga o le taimi. O le mea na sosoo ai o se mafaufau manino ma le mafai ona vaai i isi mea mai se vaaiga e faavavau.
2. Ogatasi ma le Finagalo o le Atua
O lo tatou aafiaga i le lalolagi o nisi taimi e ufitia i le mamafa o le iloaina o tatou o tagata le atoatoa faaletino. Mulimuli ane o le auala le lelei na ou vaai ai ia te aʻu lava ma loʻu tino na faaleagaina ai vaega uma o loʻu olaga. A ou lagonaina le mamafa o le tuputupu a’e o o’u le atoatoaga, ou te liliu atu i amioga faataumaoi nai lo le Alii. O nei amioga na fatufatuina ai se lagona o le le atoatoa lea na matua mamafa tele i taimi na ou lagona ai le le aoga o le ola. I le faaiuga, na o le pau le mea ou te liliu i ai o le Alii. E ala i le lotomaualalo ma le salamo, sa ou faia ai se taumafaiga ina ia sili atu le tumau i le faitauina o upu a perofeta ma se faamoemoega ma tatalo ia malamalama i oʻu siosiomaga i mata faalelagi.
E leai se tofotofoga e sili atu pe a tatou liliu atu i le Alii ma talia Lona finagalo, e tusa lava po o le a le taunuuga. I se tulaga faigata, o tofotofoga e masani ona lagona ai le mamafa pe a tatou taumafai e faamalosi o tatou loto nai lo Lona finagalo. O le taliaina o Lona finagalo, na ou maua ai se manino tulaga maualuga, ma na amata ona ou vaai i le taua o le tagata sa ou i ai ae le o le ola pea i se tulaga o le le agavaa.
3. Atiaʻe le Alofa Atoatoa
I le Moronae 8:16 ua taʻu mai ia i tatou “e lafo ese i fafo e le alofa ua atoatoa le fefe uma.” O le alofa atoatoa o le meafaigaluega sili lea ona malosi e mafai ona tatou faaaogaina ao tatou vaai atu i o tatou ata i le faaata ma malamalama i le taua e faavavau oi tatou lava ma tagata uma o siomia ai i tatou. O le vaai ia i tatou lava po o ai i tatou nai lo le lafoina oa tatou mea sese i lalo o le masini e faalapopoa ai le vaai [microscope]. E le o se tulaga i foliga vaaia. O le faʻamagaloina oi tatou lava ma isi i mea sese ua tuanai ma agai i luma ma o tatou mata ua taulai atu i le malamalama o le mamalu e faʻavavau.
Na ou iloa e le mafai i le na ona ou taumafai e alofa; e tatau ona ou faʻatagaina e faatumulia ai a’u ma avea ma se vaega o loʻu tagata. I totonu o puipui o le alofa atoatoa tatou te maua ai le natura moni o le Atua—ma faaopoopo i ai lo tatou lava natura paia—ma le ala na Ia foafoaina mo i tatou.
O laʻu faigamalaga i le faaleleia o le mafaufau, itu faaletino, ma le soifua maloloina faaleagaga ua faamalosia ai loʻu faatuatua i le taimi a le Atua ma Lona alofa e faavavau mo au. I nisi o taimi sa matua maualalo lava le tulaga ou te oo i ai, ae ina ua ou le toe faatusatusaina aʻu i isi, faaogatusa loʻu loto ma le Atua, ma aoao e alofa moni ia te aʻu lava ia, o foliga o loʻu taunuuga e faavavau na oo mai i le taulaiga ma sa ou maua le filemu. O le alofa o le Atua e silisili lava lona malosi. A tatou faʻagesegese ma faʻaalu le taimi e iloa ai, o le a Ia fesoasoani ia i tatou ia tatou iloa ua lava lo tatou lelei, e oʻo lava i taimi tatou te vaivai ai.