150 itulau i le Aso Tofi?
Ata na tusia e Anna Godeassi
Sa ou i ai i le tulaga sili ona maualalo o loʻu olaga. Na talosaga mai loʻu toalua mo se teteʻaga ina ua tuua aʻu mo se isi alii. Sa 30 o’u tausaga ma sa ma nonofo faatasi ma lo’u tina. Sa ou latalata foi i le le toe mauaina o la’u galuega.
O le faatonu sinia o le nusipepa lea na ou galue ai, na lapatai mai ia te au, “Afai e te toe sau i le galuega ona, o le a vave ona faateʻaina oe.” A o ou alu i le fale, sa ou mafaufau pe faapefea ona ou le toe inu.
I le taimi lena, na tutu ai ni faifeautalai se toalua ma talanoa mai ia te au e uiga i Le Ekalesia a Iesu Keriso o le Au Paia o Aso e Gata Ai. Sa ou fai atu ia i laua ou te le fia faalogo. Talu ai o a’u o se tusitala, o lea na uunaia ai a’u e avatu ia i laua la’u kata [lea e i ai lo’u igoa ma la’u numera].
I ni nai aso mulimuli ane, na fai mai ai loʻu tina e toalua ni Amerika sa i ai iina e vaai aʻu.
“E i ai ia i laua se tasi o au kata,” o lana tala lea.
O i laua lava o faifeautalai mai nai aso na muamua atu. Na tuu mai e se tasi oi laua se tamai tusi ma talanoa e uiga i le Perofeta o Iosefa Samita. Ona tuuina mai lea e lana soa se Tusi a Mamona. Sa ia fesili mai pe e mafai ona ou faitauina ni nai mataupu. Ina ua ou malie e faia, na tilotilo lelei mai o ia ma fesili mai pe o le a ou faitauina itulau e 150.
“E le mafai!” Na ou fai atu ai.
“Ia, ma te toe foi mai i le Aso Tofi,” o lana tala lea. Ua na o ni nai aso oo i ai. Ou te lei manatu e mafai ona ou faitauina na itulau i lena taimi.
Ina ua ou manava i le aso na sosoo ai, na malosi le uunaiga e sue a’u uo ma o e inu pia. Ona ou manatuaina ai lea o le lapataiga a le faatonu sili ma itulau e 150 lea na fesiligia au e faitau. Sa ou alu i le fale ma amata ona ou faitauina le Tusi a Mamona. Sa ou faitauina foi le tamai tusi e faatatau ia Iosefa Samita.
Sa paʻi mai le Agaga i loʻu loto ao ou faitau e uiga ia Iosefa Samita. Na ou lagonaina foi le moni o le Tusi a Mamona ao ou faitau ma aoao atili e uiga i le Faaola. E le’i umi ae ou faitauina itulau e 150. I le aso Tofi, na foi mai ai faifeautalai ma fesili mai pe na ou faitauina.
“Ioe!” Na ou fai atu ai. “Itulau uma e 150!”
Sa ou fia iloa atili. Ina ua la aoaoina au e uiga i le Upu o le Poto, sa ou fai atu ia i laua ua ou sauni e lafoai le ava malosi.
O le Aso Sa na sosoo ai, na ou alu ai i laʻu uluai sauniga anapogi ma molimau. Sa ou faasoa atu laʻu molimau fou e uiga ia Iosefa Samita ma le Tusi a Mamona. I se taimi puupuu mulimuli ane, sa papatisoina ma faamauina a’u o se tagata o le Ekalesia.
I le 48 tausaga talu ona ou papatiso, sa ou taumafai ai e tausi poloaiga ma tumau latalata i le Ekalesia. Na ou toe faaipoipo ma faamisiona ma loʻu toalua. I le aluga o tausaga, sa ou taliaina le tele o valaauga. O loo ou auauna atu nei i le malumalu. O taimi uma lava ou te i ai iina, ou te faafetai i le Alii mo le tosoina mai o aʻu mai le pogisa ma aumai au i totonu o le malamalama.