Tatala Lou Loto i le Agaga Paia

Saunia e Peresitene Henry B. Eyring

Fesoasoani Lua i le Au Peresitene Sili

Sii mai le “O Loʻu Filemu Ou Te Tuu Atu Faatasi ma Oe,” Liahona, Me 2017, 15–18, ma le “O Lona Agaga e Faatasi ma Oe,” Liahona, Me 2018, 86–89.

Ina ua lata ona tuua e Iesu Ona soo, sa Ia taʻu atu ia i latou pe faapefea ona Ia tuuina atu ia i latou Lona filemu:

“A o le Fesoasoani, o le Agaga Paia lea, … na te a’oa’o ia te outou i mea uma lava, e faamanatu mai foi o ia ia te outou i mea uma ua ou fai atu ai ia te outou.

“Ou te tuuina atu ia te outou le manuia, o lo’u manuia ou te avatu ai ia te outou. … Aua le atuatuvale o outou loto, aua foi tou te matatau.”(Ioane 14:26–27)

O lagona o le Agaga Paia e sili atu ona taua nai lo soo se mea e mafai ona tatou vaai i ai pe faalogo i ai. O nisi taimi latou te lagona e pei o se mu filemu io tatou loto. Mo au, e masani lava o se lagona o le malamalama.

A e papatiso ma faamauina o se tagata o le Ekalesia, ua taʻuina atu ia te oe i se faamanuiaga ia “talia le Agaga Paia.” I lena taimi, e mafai ona e mauaina le Agaga Paia e faatasi ma oe. Ae e tatau pea ona e filifili e faafeiloai o Ia i lou loto ma lou mafaufau.

Ou te tatalo ia e tatalaina lou loto i le Agaga Paia. Ou te tatalo o le a e lagona le olioli i le avea o Ia ma au soa e le aunoa.

Valiina o Mea o Loo i Lona Loto

E fesoasoani le Agaga Paia ia tatou manatua. Pe a manao Peresitene Eyring e manatua se mea, na te tusia i lalo i lana api o talaaga. O nisi taimi na te vali foi se ata e faaali ai ona lagona.

Muamua, na te faia se atatosi i le penitala. Ona ia faaopoopo atu lea o se vaega i le valivai. Na te tuuina se’i matutu ona faaopoopo ai lea o se isi vaega.
E fiafia Peresitene Eyring e vali ata o vaa ma lona aiga. O lenei ata o loo faaalia ai Sister Eyring i totonu o se tamai vaʻa ina ua valu ona tausaga.
A o auauna se tasi o fanau a lana fanau i se misiona i Farani, sa vali e Peresitene Eyring ni faifeautalai o savavali atu i se auala i Pale.
O lenei ata vali o lona faletua, o Kathleen, ma le toalua o le la fanau e toaono e faamanatu ia te ia lona alofa mo lona aiga.