O ATATOSI o le Faatuatua
Tomicka Barnes
Alabama, ISA
A uma le lotu, e fiafia Tomicka e taaalo ma lona tei pepe, o Aiden, e lua masina i lenei ata.
“Afai o e tauivi ma e te le fiafia e tatalo pe faitau i tusitusiga paia pe alu i le lotu, ia fai seia e fiafia i ai,” o le tala lea a Tomicka, o le e fiafia e tusiata e fesoasoani e faamama ai avega. “O se togafiti lelei le fatu o se mea.”
Mo le tele o tausaga, na pese ai Tomicka o se oloto i se vaega e toatolu, i le lotu ma i faaipoipoga ma koneseti ma isi lotu mo le fanau mai o le Faaola. “Na ou pikiina le ukulele aua sa ou manao e aoao e taina se meafaifaaili,” o lana tala lea. “O se tasi o vaega i la’u lisi o mea e fia faataunuu. Ou te le lelei i le taimi nei, ae ou te fiafia i ai.”
E le o le aoao e uiga i le faasaina o le perisitua na maluelue ai le faatuatua o Tomicka; o le taumatematega i tua o lena tapulaa na tuuina atu e nisi o le Au Paia o Aso e Gata Ai. Na feagai Tomicka ma se filifiliga: savali ese mai le Ekalesia pe piimau i le ai uamea. Faafetai i le Tusi a Mamona, sa ia piimau ai.
Leslie Nilsson, tagata pueata
Sa ou ola a’e i le Ekalesia. Sa ou auai i le Peraimeri ma ou auai i le polokalama a Tamaitai Talavou. Na ou fiafia i ai. O aʻu uo mamae o le Au Paia o Aso e Gata Ai. Peitai, ina ua ou alu i le kolisi, , sa le maoa’e tele so’u auai i le Ekalesia e pei ona tatau ai.
Ou te lei masalosalo lava i le moni o le talalelei, ae ina ua uma le kolisi na ou faitau e uiga i le faasaina o le perisitua i tagata Aferika-Amerika. Na amata ona faalavelave ia te aʻu--e le tele i le faasaina, ae o mea na fai mai ai tagata o mafuaaga ia o le faasaina.
O nisi tagata na latou fai mai mea e pei o le, “E le’i lava lou lototoa i le taua i le lagi” po o le, “E te le atamai pe faamaoni.” O na mea e le ogatasi ma mea na ou iloa e moni mai loʻu tina, mai isi tagata uli o le Ekalesia, o ni faataitaiga lelei o le faatuatua, ma e oo lava mai tagata uli faamaoni i fafo atu o le Ekalesia.
Sa ou maua sina taimi, o se tulaga faigata o le faatuatua, ina ua ou mafaufau e mafai lava ona ou savali ese mai ai. Ae i lena taimi, sa ou mafaufau ai, “Pe moni le Tusi a Mamona? E te talitonu e moni?”
E mafai ona ou tali, “Ioe, e aunoa ma sina masalosalo, ou te talitonu e moni.” Ona taʻu mai lea e le Agaga ia te aʻu, “Ia, afai e moni le Tusi a Mamona, e faapea foi ma mea uma lava.”
Na ou maua le uunaiga e faapea o le talalelei e atoatoa, ae o tagata e leai. Ma o lea, e tatau ona ou toe faamanatu ia te aʻu lava ia, o nisi taimi e faia ai e tagata mea ma fai mai mea e le fetaui ma mea o taʻu mai e le talalelei ia i tatou.
O nisi tagata o le Ekalesia o le a fai mai mea e sese. O le talalelei e atoatoa, ae o tagata e le atoatoa. O le Ekalesia e mo tagata le atoatoa. Tatou te taumafai ia atoatoa, ae o loʻo tatou mamao lava mai lea mea.
Na fesili mai se uo ia te aʻu, “Na faapefea ona e nofo, ma le iloaina o nei mea uma?” Sa ou fai atu, “O laʻu molimau i le Tusi a Mamona.” Ou te talitonu e moni. Ou te iloa e moni.
O le mafuaaga lena na mafai ai ona ou nofo.