O Le Auala ua Mafai ai Nei e le Seminare ona Faaleleia le Aafiaga o le Sau, Mulimuli Mai ia te A’u a Lou Aiga
O tusitala o ni faiaoga seminare i Iuta, ISA.
Matua, o le auala lenei o le a mafai ai ona faaleleia atili e le seminare la outou suesuega o le talalelei faaleaiga.
I le taimi ua tuanai, atonu na tauivi aiga e faaogatusa le suesueina o tusitusiga paia i le Ekalesia, seminare, ma le aiga. O suiga talu ai e mafai ona fesoasoani ina ia faaleleia atili talanoaga o le talalelei mo tagata uma o le aiga.
Ata na tusia e Richard Mia
Ia Mati 2019 na faasilasila atu ai e le Au Peresitene Sili se suiga tele i le seminare. O loo suesueina nei e vasega seminare i le lalolagi atoa le tusitusiga paia lava e tasi o loo suesueina e tagata taitoatasi ma aiga i le fale ma le lotu o se vaega o le Sau, Mulimuli Mai ia te A’u. I le avea ai ma ni faiaoga seminare (ma ni matua), e leai se mea e sili ona matou fiafia i ai!
O se tasi o faamanuiaga manino o le auala lea o le a faafaigofieina ai olaga o a tatou talavou. E le gata i aoga, taaloga, galuega, taimi faaleaiga, ma le olaga faaagafesootai, o le toatele o talavou i le taimi ua tuanai na taumafai e suesue mai tusitusiga paia eseese e tolu: tasi mo le seminare, tasi mo le Aoga Sa, ma le isi tasi mo suesuega faaleaiga. Ua tele naua lena mea.
Na tuufaatasia loa e taitai o le Ekalesia suesuega faaleaiga ma le Aoga Sa i le tusitusiga paia e tasi, o le faaogatusaina atu i ai ma le seminare sa avea ma se faaiuga talafeagai. Ua mafai ai e le autalavou ona suesue ma le loloto i se tusi e tasi o tusitusiga paia. Peitai o le faafaigofieina ua na o se amataga.
Faamalosia o le Aiga
Na aoao atu e Sister Bonnie H. Cordon, Peresitene Aoao o Tamaitai Talavou faapea ao talosagaina le autalavou e avea ma “se vaega o le aoaoga, ina ia avea ma se vaega o lena gaoioiga maoae i le aiga,” o le a latou fesoasoani i le “faamalosia o le aiga.”1
Ua galala le autalavou mo le upumoni ma ua naunau e faasoa atu! Atonu e fai sina faigata o le talitonu i ai i lena mea pe afai na e mauaina se sioa gaogao mai se talavou. I le avea ai ma matua ma faiaoga, na tupu foi ia i tatou uma! I le avea ai ma ni faiaoga seminare, tatou te tuina atu ni fesili i le autalavou i taimi uma. O nisi taimi e toe foi mai ai ia i tatou se sioa gaogao talu ai ona e le o maua e la tatou autalavou ni tali. Ae ina ua faaogatusaina le mataupu aoaoina a le seminare ma le Sau, Mulimuli Mai ia te A’u, ua faigofie atu mo a tatou fanau e i le vaitausaga o le seminare ona faaaoga mea sa latou aoaoina i le seminare i se talanoaga o le talalelei faaleaiga po o le fesuiai foi. Ua uma ona matou vaaia i a matou vasega seminare.
Aumaia o Suesuega o Tusitusiga Paia mai le Fale i le Seminare
I le amataga o le 2019, i le faatoa amataina o le Sau, Mulimuli Mai ia te A’u fou, sa matou lagonaina le naunautaiga o tagata aoga. E ui lava sa matou suesue mai le Mataupu Faavae ma Feagaiga i le seminare, sa amata ona latou faasoaina mai ni mea sa latou aoaoina mai le suesueina o le Feagaiga Fou faatasi ai ma o latou aiga. Sa latou matua fiafia lava i ai. Ina ua matou suesueina le Mataupu Faavae ma Feagaiga 89 (o le Upu o le Poto) i le seminare, o le taimi lava foi lea sa matou suesueina ai le Ioane 2 (lea na faaliliuina ai e Iesu Keriso le vai i le uaina) i le Sau, Mulimuli Mai ia te A’u. O le mauaina o ni mataupu faavae ma ni manatu masani i le va o faitauga e lua na mafai ai ona fefaasoaai tagata aoga ma a latou uo i mea sa latou aoaoina i le fale. Ua sili atu ona latou punouai, ma ua sili atu ona ola talanoaga aua sa i ai mea sa talanoa i ai tagata aoga. Sa mafai ona latou faaaogaina mea sa latou aoaoina i le fale i mea sa matou aoaoina i le seminare.
Aumaia o le Seminare i le Fale
I le 2020, o le suesueina o le Tusi a Mamona i le fale, i le seminare, ma i le Aoga Sa o le a tatalaina lautele atu ai le faitotoa mo tagata aoga e faasoa atili atu ai mea latou te aoaoina i na nofoaga.
E i ai ni nai auala faaleaoaoga tatou te faaaogaina i le seminare lea e mafai ona fesoasoani i suesuega o tusitusiga paia a lou aiga. O le iloaina e uiga i ai e mafai ona fesoasoani e te vaai ai i ni auala ia faaaofia atili ai lau autalavou i au suesuega o tusitusiga paia e faatotonugalemu-i-le-aiga.
Ao outou saofafai ai i lalo o se aiga, atonu ua uma ona suesueina e au fanau talavou ia mataupu faavae lava e tasi mai le tusi lava e tasi o tusitusiga paia, ma o le a i ai ni o latou malamalamaaga pe afai ua uma ona latou suesue i na mataupu faavae i le seminare. O le a latou le lagona le “tuuina i le tulaga” pe a e fai atu ia i latou e faasoa mai aua o le a i ai moni lava ni mea latou te faasoa mai. O a latou aafiaga i le seminare o le a fesoasoani e faamalosia i latou e talanoa e uiga i le talalelei i le fale. O le a avea atili afiafi faaleaiga ma suesuega o tusitusiga paia faaleaiga ma se taimi e faasoa mai ai ni malamalamaaga faaletagata lava ia i le tasi ma le isi.
O nisi nei o fesili e tatala mai ai manatu atonu e te faaaogaina e valaaulia ai lau tupulaga talavou e faasoa mai i lou aiga:
-
O le a se aafiaga faaleagaga sa e mauaina i le seminare ananei?
-
O le a se mea na sili ona uunaia ai oe ananei?
-
O le a le mataupu faavae na e aoaoina i le seminare e te lagona e mafai ona fesoasoani ia i tatou o se aiga?
-
O le a se tala faatusipaia sa e aoaoina ananei e te lagona e mafai ona e faasoa mai ia i matou?
-
O le a se tala faatusipaia na aafia ai lou olaga i le seminare?
-
Na faapefea ona uunaia oe i le seminare ina ia lelei atili ananei?
-
O le a se mea sa e aoaoina e uiga i le Faaola ona o mea sa e aoaoina i le seminare?
Atonu e i ai taimi e muamua ai suesuega a lou aiga mai mea o loo suesueina i le seminare. I taimi faapenei, e mafai ai e faiaoga seminare ona fetuunai fesili o loo i luga e faaaoga ai mea o loo aoaoina e talavou i le fale.
Atamai i Aoaoga Faavae
O le metotia a le seminare i le suesueina o tusitusiga paia e le na o le taulotoina. Tatou te taulai atu i le atamai i aoaoga faavae—fesoasoani i tagata aoga ia malamalama, faaaoga, ma maua se molimau e uiga i le aoaoga faavae na aoao mai i tusitusiga paia. E matele atu i le faamalosia o le liuaina i aoaoga faavae moni ma le iloaina pe faapefea ona aoao atu ma le mana.
Mo se faataitaiga, afai e aoao atu se fuaitau e uiga i le Aiga Atua, pe a tatou suesueina lena mau i le seminare, tatou te sue mo isi mau o loo aoao atu e uiga i le Aiga Atua. Ona tatou uunaia lea o tagata aooga e tagai mo mea e mafai ona tatou aoaoina e uiga i le Aiga Atua mai na fuaitau. Ma le mea mulimuli, tatou te fatuina ni tulaga lea e faatino ai i se tala e tagata aoga le auala latou te ono faamatala ai o tatou talitonuga e uiga i le Aiga Atua e faaaoga ai na mau.
E mafai ona e faaaogaina le auala lenei i le fale ma valaaulia au talavou e:
-
Aoao atu mataupu faavae i le mau.
-
Fefaasoaai mau faasino i isi mau e uiga i le autu.
-
Fesoasoani i lou aiga e tauloto pe manatua le auala e saili ai ia mau.
-
Talanoa pe faapefea ona faatatau ia aoaoga i o outou olaga?
Sauniuniga mo le Aoaoina Loloto
E i ai se faamamafa lapoa i le seminare i se mea tatou te ta’ua o le aoaoina loloto—o le aoaoina lea e taitai atu ai i le liuaina. O se mea e tasi e sili ona taua i le aoaoina loloto o le faaleleia lea o sauniuniga e aoao ai. O le faaleleia o sauniuniga a tagata aoga e eseese mo vasega seminare uma, ae o le mea e tasi o loo taumafai ai nisi o vasega seminare o se tofiga mo sauniuniga. Tatou te auina atu tagata aooga i le fale ma ni poloka mau ua atofaina ma ni fesili suesue ina ia latou faitau ai i mau lea o le a matou suesueina i le vasega. Afai e tutusa vaega o loo suesueina e mataupu aoaoina a le seminare ma le Sau, Mulimuli Mai ia te A’u, e mafai ona tufa atu ia galuega atofaina mo sauniuniga mo le seminare i le aiga a le tagata aoga. O le a avatua i aiga se isi auala e tasi e aoao faatasi ai.
E mafai ona e valaauliaina lau autalavou e:
-
Fefaasoaai galuega atofaina mo sauniuniga ma le aiga.
-
A uma le lesona o le seminare, faasoa atu seisi mea sa ia aoaoina i le autu.
Faatuina o ni Sini Patino
Atonu na e matauina le uunaia soo o i tatou e le mataupu aoaoina o le Sau, Mulimuli Mai ia te A’u e faatu ni sini. O se mea o loo matou faamamafaina foi i le seminare. O loo matou aoaoina a matou tagata aoga e faatu ni sini patino, e le na o ni sini lautele e pei o le “Ia soifua maloloina atili.” A faatu e se tagata aoga se sini, latou te fuafuaina po o afea, o fea, ma pe faapefea ona latou ausiaina lena sini.
Mo se faataitaiga, afai e faatu e se talavou se sini ina ia atiinae atili le onosai, o le laasaga e sosoo ai o le fuafuaina o le auala o le a latou atiinaeina ai. O a ni auala po o tulaga latou te lagona o loo latou tauivi ai ma le onosai? Sa filifili se tagata aoga se toatasi e mafai ona ia faaaogaina atili le onosai ao aveina lana taavale. Ina ua ma talanoa e uiga i le auala e mafai ona ia faataitai ai le onosai i lena taimi, sa ia mafaufau i se fuafuaga o le faalogologo i musika malū i le taavale ma tuu se faamatalaga i luga o le dashboard e faamanatu atu ai ia te ia le tatalo mo le onosai i taimi uma na te alu ai i totonu o le taavale.
E mafai ona e valaauliaina lau autalavou e:
-
Talanoa e uiga i ana sini.
-
Faasoa mai pe mafai faapefea ona e faatuina ma ausiaina ni sini talitutusa faatasi ai o se aiga.
Faamalosia Lau Fanau e Faamalosia Lou Aiga
Ua ia te oe se avanoa ofoofogia e faaaogaina ai se naunautaiga tele i le suesueina faaleaiga o tusitusiga paia, ma i le taimi nei i le mataupu aoaoina ua faaogatusaina, e mafai ona e valaauliaina lau fanau e i le vaitausaga seminare e faasoa mai ni mea sa latou aoaoina. Pe a latou suesue i mau e tutusa i le seminare ma o latou aiga i le Sau, Mulimuli Mai ia te A’u, o le a mafai atili ona latou faamalosia o latou aiga i o latou malamalamaaga i le talalelei.
O le isi laasaga e sosoo ai i taumafaiga a le Ekalesia ina ia avea “o se Ekalesia e faatotonugalemu-i-le-aiga, ma lagolagoina e mea o loo tutupu i totonu o o tatou falelotu o paranesi, uarota, ma le siteki”2 o le a mafai ai e le autalavou ona saofaga atili atu i le faamalosia o o latou aiga. Matou te malilie faatasi ma Elder Jeffrey R. Holland o le Korama a Aposetolo e Toasefululua i lana saunoaga: “Matou te manatu o se atinaega maoae lea i lenei taimi lea e manaomia ai e o tatou tagata talavou le malosi sili atu. Matou te manatu o se faaogatusa matagofie lenei mea e tuufaatasia ai ma mea o loo faia e le isi vaega o le Ekalesia, ma e matou te talitonu o se faalaugatasia matagofie ma lagolago e le Ekalesia—ma o lea ua matou faaopoopo i ai i le taimi nei le lagolagoina-e-le-seminare—o suesuega o le talalelei e faatotonugalemu-i-le-aiga.”3