O Le Lasagna o le Aso Fanau
Ata na tusia e Allen Garns
Mo se taimi umi, sa ou lagonaina le naunau e tao falaoa pe fai ni meaai faaopoopo ma na ona momoli ifo lava i se tasi i la matou uarota e faasoa atu ai loʻu alofa ma le alofa o le Alii ia i latou, ae ou te lei faia lava.
Ou te fiafia e kuka, ae na o maua ma loʻu toalua o loʻo i le fale i le taimi nei. O lea ou te faia ai ni taumafataga laiti ona o le tele o taumafataga e masani lava ona alu ai ni nai aso e maeʻa ai.
I se tasi po sa ou filifili ai e fai ni lasagna. Nai lo le faia o se apa lapoa e tasi, sa ou faia ni tamai apa se lua. O le auala lena matou te aia ai leisi mo le ‘aiga o le afiafi, ma e mafai ona ou tuʻuina atu le isi apa i se tasi o manaʻomia.
Sa ou valaau atu i le peresitene o le Aualofa e vaai pe i ai se tasi e manaomia se meaai e momoli atu ia i latou. Sa ia taʻua se tina nofotoatasi e faigaluega ma e toalua lana fanau. O lena aoauli, na ou auina atua se feau tusitusia i le tina ma taʻu atu ia te ia na ou faia se isi lasagna faaopoopo ma ou te manao e avatu ia te ia ma lona aiga.
Sa ia toe tali mai te au ma fai mai, “E matua ese lava! Ua lelei, manaia tele la” Sa i ai pea o ia i le galuega, ae o lana fanau lae ua i le fale, e mafai ona ou alu e momoli i ai i soo se taimi.
E le’i umi lava, ae toe fesili mai i se feau tusitusia i luga o le telefoni, “Na e iloaina o nei lo’u aso fanau?” Sa ou faamautinoa atu ia te ia ou te lei iloaina. Sa tali mai o ia, “Ia, manuia le aso fanau ia te aʻu!”
Ina ua ou alu e momoli le taumafataga, na faatoa manava o ia mai le galuega. Sa matua’i fiafia o ia, faapena foi lana fanau.
I le Aso Sa, sa ia maua au i le lotu, ma na maligi ona loimata, na ia fai mai ia te au o tausaga uma i lona aso fanau, e faia ai e lona tinamatua lana taumafataga—ma o le lasagna foi e masani ona kukaina. O lona tinamatua na maliu i le tausaga ua mavae atu nei, ma o le aso fanau muamua lea na le i ai iinei lona tinamatua e faia se lasagna mo ia.
Ina ua ou alu atu e momoli le lasagna i lona aso fanau, na faamalosia ai lana molimau o loo silafia ma alofa le Alii ia te ia. Ma na faamalosia ai laʻu molimau afai tatou te tuuina atu i tatou lava e avea ma meafaigaluega i aao o le Alii, o le a Ia faaali mai ia i tatou le mea e mafai ona tatou auauna atu ai.