O Le a le Tulafono o le Legaviā?
Sei o tatou talanoa sao e uiga i lenei poloaiga e sili ona paia.
A e faalogo i le fuaitau “le tulafono o le ola mama,” e te iloa le uiga? Atonu e tele ni feʻau fefiloi e te mauaina e faatatau i ai. O ituaiga uma o ala o faasalalauga, ma o nisi taimi e oo lava i uo ma aiga, e eseese manatu e uiga i ai. Ma o loo aoao malosi e le lalolagi mea e feteenai ma mea o loo aoao mai e le Alii.
Ae o le a tonu le uiga o le tulafono o le ola mama?
O le tulafono o le ola mama o le faaupuga a le Alii mo Lana poloaiga ia ola i se olaga o le mama a’ia’i mai feusuaiga ma le mama.
E le o manino atoatoa pea? Ia, sei o tatou maua se faʻamatalaga sili atu ma le fesoasoani a le Mo le Malosi o le Autalavou.
O le Ola Mama o le Mama A’ia’i mai Feusua’iga
I lona faaupuga e sili ona faigofie, o le ola i le tulafono o le legavia o lona uiga o oe “e aua lava nei e faia ni sootaga feusuai a o le i faaipoipo, ma [ia e] faamaoni atoatoa i lou toalua pe a uma le faaipoipoga.”1
Ae o le amiomama ma le legavia e sili atu nai lo na o le feusuaʻi. “Ia taulimaina isi ma le faaaloalo, ae le o ni mea e faaaogaina e faamalie ai le tuinanau ma manaoga manatu faapito. A o lei faaipoipo, ia aua lava nei faia ni kisi faananau loto, pe taoto i luga o se isi tagata, pe tago i vaega lilo, po o itutino sa o se isi tagata, pe o fai ofu pe leai foi. Aua lava nei e faia soo se mea e faaosoina ai ni lagona feusuai. Aua nei e faaosoina na lagona i lou lava tino.”2
Ia maitauina o tulaga faatonuina a le Alii e le suia ona e toalua tagata e fiafia le tasi i le isi ma ua malilie uma i le amio. A e faaaloalo i isi tagata, o le Alii, ma oe lava ia, o le a e tausia poloaiga--ma o lona uiga e leai ni sootaga faalefeusuaiga po o le faatupuina o lagona feusuai i fafo atu o le faaipoipoga, i soo se taimi.
E matua faamamafa lava le Alii i lenei mea. “Sa aoao mai le perofeta o Alema o le agasala tau feusuaiga e sili atu ona matautia nai lo isi lava agasala vagana ai le fasioti tagata ma le faafitia o le Agaga Paia (tagai Alema 39:3–5).”3
Afai o loo e mafaufau pea po o le a le uiga o le “kisi faananau” po o le uiga o le “faatupuina lagona feusuai,” talanoa i ou matua, epikopo, po o se isi tagata matua faatuatuaina. O talanoaga ma i latou e mafai ona fesoasoani ia te oe ia malamalama ai i amioga tatau ma le le talafeagai ma fesoasoani ia e ola ai i se olaga mama mai feusuaiga.
Pe a oo mai i le faia o faaiuga, saili le Agaga. Tatalo e le aunoa i le Tama Faalelagi. Afai o e lelei i le faaleagaga, o le a sili atu ona faigofie le faia o filifiliga saʻo.
Afai na e faia se solitulafono tau feusuaiga, saili le fesoasoani mai lau epikopo ma ou matua, o le a fesoasoani ia te oe e maua le malosi ma le filemu ao e salamo. Atonu e le o se faiga faigofie, ae e matua taua lava!
O le Lagonaina o le Tosina Atu E Lelei
Atonu e te mafaufau pe e sese le mafaufau o se tasi e aulelei. Aua le popole tele i ai. O se mea masani. E moni lava!
Ae e tatau ona e faʻaeteete i ou mafaufauga. Na lapatai mai le Faaola “Ai se vaai atu i le fafine [po o se tamaloa] ina ia manao i ai, ua uma ona mulilua … ma ia i lona loto.” (Mataio 5:28). O lona uiga e tatau ona e puleaina ou mafaufauga ma lagona ae aua neʻi tuʻuina e pulea oe e na manaʻoga.
O se ki lenei e fesoasoani ai ia te oe: taumafai e aua le faia le manatu faapito. Aua le tuinanau i se tasi, mafaufau e uiga ia i latou i se tulaga le talafeagai, pe faia ni mea e faaosofia ai lagona feusuai ia oe lava poo isi.4
O le mafuaaga foi lena e taua tele ai le le auai i ponokalafi po o isi ala o faasalalauga mataga. O na mea e masani ona manatu faapito, tuliesea le Agaga i taimi uma, ma faaosoosoina oe i mea e le tatau ona e faia.
Ae e le o lona uiga o le i ai o lagona i se tasi pe lagona le tosina atu i se tasi e avea ai oe ma se tagata leaga. O le mea moni, o le lagona lea o le tosina o se vaega o le fuafuaga a le Atua ma o se vaega o le faaipoipoga. O tane ma ava o loo i ai ni mafutaga lelei e lagona le malosi o faatosinaga o le tasi i le isi ma naunau e auauna atu ma faamanuia e le tasi le isi.
“O sootaga vavalalata faaletino i le va o le tane ma le ava e matagofie ma paia. Ua faauuina e le Atua mo le foafoaga o fanau ma mo le faaalia o le alofa i le va o le tane ma le ava.”5
Fesootaiga Mafana Faaletino—i le Nofoaga ma le Taimi Sa’o
O le fesootaiga mafana faaletino o se mea e tulimatai atu i totonu o lau faaipoipoga i le lumanai. E paia ma matagofie.
A o e taumafai e ola i se olaga mama ma le mama aiai, o le a e lagonaina le latalata atu i le uunaiga a le Agaga Paia, o le a sili atu ou lagona e uiga ia te oe lava, ma o le a e saunia mo faamanuiaga matagofie i le lumanai.