O Se Aiga o Fitafita-Talavou

Saunia e Sister Michelle D. Craig

Fesoasoani Muamua i le Au Peresitene Aoao o Tamaitai Talavou

“E ao ina outou ave i o outou luga le suafa o Keriso, o lou igoa lea” (3 Nifae 27:5).

Sa ou asiasi i se tasi taimi i se aiga i Chile. Na maliu lo latou tama i se faalavelave i le masina ae ou te lei sau. O se tasi o tamaiti o se tamaitiiti e igoa ia Peniamina. Sa 10 ona tausaga.

A o lei oo i le faalavelave faafuasei o lona tama, sa faia e Peniamina se lesona o le afiafi faaleaiga. Sa faatatau i le autau talavou mai le Tusi a Mamona (tagai Alema 53:16–22; 56:42–57). Na ia talanoa e uiga i le lototoa ma le auala na latou faatuatua ai i le Atua.

Ina ua faalogo le tina o Peniamina e uiga i le faalavelave, na mafaufau o ia i le lesona a Peniamina. Sa ia faapea atu i lona aiga, “E tatau ona tatou lototoa e pei o le autau talavou. Ua i ai se isi taua tatou te tau ai.”

Sa faigata mo le aiga a Peniamina. Sa foliga mai ua suia uma o latou olaga. Sa tatau ona latou me’i atu i se isi fale e nonofo faatasi ma lo latou tina matua. Ma sa latou misia moni lava lo latou tama. Ae na latou iloa o le a latou toe faatasi ma ia i se aso. Na latou filifili e avea ma se aiga o le autau talavou. Sa ta’u mai e Peniamina ia i matou, “O loo ou lototoa.”

Sa ou savali atu i le latou fale ma le manao e faamafanafana ia i latou. Ae o aʻu na tuua le latou fale ma le lagona o le faamanuiaina. O Peniamina ma lona aiga o loo tauivi ma lenei taua ma le lotototoa. Ua musuia a’u i lo latou faatuatua.

E mafai ona tatou lototoa uma e pei o Peniamina. O le lototoa e le faapea o le leai o se fefe po o le faanoanoa. O lona uiga o le i ai o le faatuatua o le a fesoasoani mai le Tama Faalelagi ia i tatou i taimi faigata. Pe a oo mai mea faigata i o tatou ala, e mafai ona tatou filifili e faalagolago ia te Ia. E mafai ona avea uma i tatou ma autau talavou!