bebi Jisas

I Kam Fri, i kam long Jenedy Paige

24 Disemba

?Olsem Wanem Jisas Kraes I Stap Soem Lav we Hem I Gat long Mi?

Krismes

kaonsel tugeta pikja bokis

Kaonsel Tugeta

Wan memba blong klas presidensi o kworom presidensi i lidim; kolosap 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo fasin blong kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk, 10.2, 11.2). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Olsem wanem nao yumi stap gat glad taem yumi stap biaen long Jisas Kraes?

• Kea long olgeta we oli stap long nid. ?Huia long wod o blong komuniti blong yumi i nidim help blong yumi? ?Olsem wanem nao yumi save helpem olgeta?

• Invaetem evriwan blong akseptem gospel. ?Olsem wanem yumi save helpem wanwan long yumi blong rere from misinari seves?

• Joenem ol famli blong taem we i no save finis. ?Olsem wanem nao yumi save tekpat long ol hadwok blong wod blong mekem wok blong famli histri mo tempol?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

tijim doktrin pikja bokis

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Bifo we Hem i bon i kam long wol ia, Jisas Kraes, oli bin save Hem olsem hae Jehova. Hem, “Hem we Mi bin Lavem Tumas mo Hem we Mi bin Jusum stat long stat” (Moses 4:2), i fulap long glori, gladhat, mo trutok (luk long Jon 17:5; Doktrin mo Ol Kavenan 93:11). Be yet, taem Hem i bon i kam long wol ia, Meri i mekem Hem i slip insaed long bokis blong fidim animol, from se i no bin gat wan rum blong olgeta i stap long hem (Luk 2:7). ?From wanem Jisas Kraes i glad blong akseptem rol ia blong Hem olsem Sevya, iven we i minim blong kam long wol ia long wan ples we i daon evriwan? Simpol ansa, hem i we, Hem i lavem yumi. Taem we Nifae i luk long wan visen, we Sevya i bon i kam long wol ia, hem i testifae se “lav blong God, we i seraotem hemwan i go long evri ples long hat blong ol pikinini blong ol man; taswe, hem i samting we evri man i wantem moa i bitim evri narafala samting” (1 Nifae 11:22).

Krismes i wan spesel taem blong tingting hevi long wei we Sevya i bon i kam long wol ia, mo sakrifaes blong Hem we i pem praes, we i soemaot lav we Hem i gat long yu. Taem yu stap rere blong helpem ol yut we yu stap tijim blong oli filim lav ia blong Sevya, tingting blong luklukbak long Luk 4:16–21; Jon 3:16–17; 3 Nifae 27:13–16; mo mesej blong Elda D. Todd Christofferson “Lav blong God” (Liahona, Nov 2021, 16–19).

Stap Lan Tugeta

Taem we klas o kworom blong yu i stap kam kolosap long en blong Niu Testeman stadi long yia ia, yu save askem ol yut blong serem sam long ol fevret stori blong Niu Testeman, we insaed long olgeta, Sevya i bin soem lav blong Hem long olgeta we oli stap raon long Hem. Yufala i save ridim sam long ol stori ia tugeta. ?Wanem nao ol stori ia oli stap tijim yumi abaot lav we Sevya i gat long yumi? Blong helpem yu blong toktok raon long lav blong Sevya i go moa, yusum ol aktiviti olsem olgeta ia.

• Invaetem ol memba blong klas o kworom blong yu blong tingting abaot lav we Papa long Heven mo Jisas Kraes oli gat long yumi olsem wan naes bandel flaoa (luk long Russell M. Nelson, “Divine Love,” Ensign, Feb. 2003, 24). Tingting blong givim long wanwan, wan flaoa we oli katem long pepa mo askem olgeta wanwan blong ridim wan skripja we i stap long “Ol Sapot Risos.” Askem olgeta blong raet long ol flaoa blong olgeta, wanem nao we oli bin lanem abaot lav we Papa long Heven mo Jisas i gat long yumi. Taem oli serem wanem we oli bin lanem, oli save putum flaoa blong olgeta i go tugeta blong mekem wan naes bandel. ?Olsem wanem nao yumi save kam blong luksave moa ol wei we Papa long Heven mo Jisas oli soem lav we Tufala i gat long yumi?

• Samfala hym oli stap tokbaot ol wei we Sevya i soem lav blong Hem long yumi (eksampol, luk long “Mi Save Ridima Hem i Laef,” STSP, pej 38). Ol memba blong klas o blong kworom oli save jusum wan hym mo serem ol eksperiens blong wan taem we oli bin filim lav ia blong Sevya long ol wei we oli semmak long olgeta we oli tokbaot long hym ia. ?Wanem nao sam nara wei we Sevya i bin soem lav we Hem i gat long yumi? Olsem ol man we i stap folem Kraes, ?olsem wanem nao yumi save helpem ol narawan blong oli filim lav blong Hem?

• I gat plante giaman aedia long wol ia abaot lav we God i gat long yumi. Olsem wan ia, we ol man oli ting se taem ol pipol oli rij, o oli gat fulap samting, i minim se God i lavem olgeta moa i bitim ol narawan. Sam oli filim se sapos God i rili lavem yumi, bae Hem i akseptem yumi olsem we yumi stap, mo bae i no askem yumi blong jenis. ?Wanem giaman mesej nao abaot lav blong God yumi bin harem? Blong help blong agensem ol giaman mesej ia, yu save askem ol yut blong luklukbak long mesej blong Elda D. Todd Christofferson: “Lav blong God” o mesej blong Presiden Dallin H. Oaks: “Lav mo Loa” (Liahona, Nov. 2009, 26–29). ?Wanem trutok nao yumi faenem insaed long ol mesej ia, we i helpem yumi andastanem lav ia we God i gat long yumi?

ol flaoa

Lav blong Papa long Heven mo Jisas Kraes, oli save komperem long wan naes bandel flaoa.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Jon 3:16–17; 15:9–13; Rom 8:35–39; Hibrus 12:5–6, 9–11; 1 Nifae 11:21–23; Alma 7:11–12; 3 Nifae 11:13–17; Moronae 7:45–48

• Michael John U. Teh, “Sevya blong Yumiwan,” Liahona, Mei 2021, 99–101

• Taniela B. Wakolo, “God I Lavem Ol Pikinini blong Hem,” Liahona, Mei 2021, 94–96

Tij Folem Wei blong Sevya

Evri samting we Sevya i bin mekem truaot long seves blong Hem long wol ia, lav nao i bin stap biaen long hem—lav we Hem i gat long papa, mo lav we Hem i gat long yumi evriwan. Wetem lav olsem hemia blong Kraes insaed long hat blong yumi, bambae yumi lukaotem evri posibol wei blong helpem ol narawan blong oli lan aot long Kraes mo go long Hem. Lav bae i risen mo wanem bae i stap biaen long ol tijing blong yumi.