Statiu blong Kraes

10 Disemba

?Olsem Wanem Nao Jisas Kraes I Mekem Plan blong Papa long Heven I Posibol?

Revelesen 1–5

kaonsel tugeta pikja bokis

Kaonsel Tugeta

Wan memba blong klas presidensi o kworom presidensi i lidim; kolosap 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo fasin blong kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk, 10.2, 11.2). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Long wanem wei nao yumi bin luk han blong God insaed long laef blong yumi?

• Kea long olgeta we oli stap long nid. ?Olsem wanem nao yumi save sapsapotem wanwan long yumi long ol samting we yumi stap gotru long hem?

• Invaetem evriwan blong akseptem gospel. ?Olsem wanem yumi save yusum teknoloji long wan wei we i gud moa, mo olsem wan tul blong stap serem gospel?

• Joenem ol famli blong taem we i no save finis. ?Wanem nao yumi stap mekem blong helpem ol famli blong yumi blong kam long Kraes?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

tijim doktrin pikja bokis

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Long wan visen Jon man blong Revelesen i bin luk se “i no gat wan man i stap long heven, no long wol, no long Hom blong ol Dedman” we i save openem buk ia mo i mekem se hem i krae (luk long Revelesen 5:3–4). Buk ia i ripresentem “ol wok blong God,” we i tekem tu, plan blong Hem blong yumi gat wan bodi we i nomo save ded, mo kasem laef we i no save finis (luk long Doktrin mo Ol Kavenan 77:6; Moses 1:39). Be afta, long visen blong Jon, i gat wan Smol Sipsip i stap “i stret nomo blong i tekem buk ya,i brekemaot ol gris blong kandel ya we i stap holemtaet” (Revelesen 5:9). Nius blong glori ia i mekem se i gat “singsing blong plante taosen enjel we oli plante we plante, we man i no save kaontem” (Revelesen 5:11). Jisas Kraes, Smol Sipsip blong God, i bin pemaot yumi tru long blad blong Hem” (Revelesen 5:9) mo i mekem se ol blesing blong plan blong Papa long Heven oli posibol.

Tingting hevi long wanem we Jisas Kraes i bin mekem blong yu. ?Yu no bin filim samtaem se yu olsem olgeta ia insaed long visen blong Jon, we oli foldaon i go long graon mo wosipim hem? (Revelesen 5:14). Tingting long wei we yu save helpem ol memba blong klas o blong kworom blong yu blong andastanem gud moa stamba rol blong Jisas Kraes insaed long plan ia blong Papa long Heven. Antap long Revelesen 1–5, yu save ridim 2 Nifae 9; “Kraes we I Stap Laef: Testemoni blong Olgeta Aposol” (ChurchofJesusChrist.org/study?lang=bis); mo mesej blong Elda Ulisses Soares “Jisas Kraes: Man we I Givim Kea long Sol blong Yumi” (Liahona, Mei 2021, 82–84).

Stap Lan Tugeta

Bae ol memba blong klas o blong kworom blong yu bae oli laekem blong priten se oli ol muvi prodiusa, we oli askem olgeta blong mekem wan muvi abaot visen blong Jon olsem we i stap long Revelesen 5. Givim olgeta sam minit blong oli luklukbak long japta ia, mo jusum wanem ples nao bae oli laekem blong mekem film blong hem. ?Wanem nao oli filim se i ol taem we oli strong moa long stori ia? ?Olsem wanem muvi ia bae i help blong bildimap fet long Sevya? Blong gohed blong stap helpem klas o kworom blong yu blong lanem abaot rol blong Jisas Kraes long plan blong fasin blong sevem man we i kam long Papa long Heven, hemia sam tingting:

• Yu save raetem ol heding ia long bod: Laef bifo Laef long Wol Ia, Laef long Wol Ia, mo Laef afta long Ded. Invaetem ol yut blong luklukbak long ol skripja anda long “Ol Sapot Risos” blong lanem olsem wanem misin blong Sevya long taem blong laef blong Hem bifo laef long wol ia, long taem blong laef blong Hem long Wol, mo afta long Laef Bakegen long Ded blong Hem i mekem se plan ia i kam posibol. Oli save raetem wanem we oli lanem anda long ol heding long bod. Givim wan janis long ol memba blong klas o blong kworom blong yu blong serem ol filing blong olgeta abaot wanem Sevya i bin mekem blong olgeta.

• Blong helpem ol yut we yu stap tijim blong oli andastanem moa gud wanem we Jisas Kraes i bin mekem blong plan blong Papa long Heven i posibol, droem wan rod long bod, we i ripresentem wokbaot blong olgeta i gobak long Papa we i stap long Heven. Droem sam samting long rod ia, we oli blokem rod, olsem ded blong bodi mo ded blong spirit. (Sapos i nid, ol yut oli save ridim ol mining we oli stap anda long “Ded, blong Bodi” mo “Ded, blong spirit” insaed long Gaed long Ol Skripja [olskripja.ChurchofJesusChrist.org]). ?Olsem wanem nao Sevya i bin mekem i posibol long yumi blong winim ol samting ia we oli kam blokem rod? (luk long 2 Nifae 9:7–10). Ol yut oli save luklukbak long mesej blong Elda Ulisses Soares “Jisas Kraes: Man we I Givim Kea long Sol blong Yumi” mo raetem ol sentens we oli kamaot long mesej long saed blong rod ia we i soem olsem wanem Jisas i helpem yumi blong gobak long God.

• Taem we ol nara pipol oli askem yumi ol kwestin abaot ol bilif mo ol joes we yumi stap mekem, yumi save tekem janis ia blong serem from wanem Jisas Kraes i impoten long yumi. Wan wei blong mekem ol yut oli rere from ol kaen janis olsem, hem i blong invaetem olgeta blong luklukbak long mesej blong Elda Dieter F. Uchtdorf: “Behold the Man!” (Liahona, May 2018, 107–10) stap lukaotem ol trutok blong serem abaot Jisas Kraes. Yu save mekem wan lis blong samfala trutok ia long bod. Afta, yu save givim ol yut wan taem blong praktis blong eksplenem long wanwan long olgeta from wanem oli nidim Jisas Kraes, mo olsem wanem laef blong olgeta i bin gat blesing from se oli save Sevya.

Taem Kraes I Hang Antap long Kros, i kam long Louise Parker

Taem Kraes I Hang Antap long Kros, i kam long Louise Parker

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Jon 1:1–3, 10; Ita 3:14; Moses 4:1–2 (Misin blong Sevya long laef bifo laef long wol ia)

• Mosaea 3:5–11; Alma 7:11–13; Doktrin mo Ol Kavenan 19:16–19 (Misin blong Sevya long taem blong laef long wol ia)

• Jon 14:2–3; 2 Nifae 9:15–17; Doktrin mo Ol Kavenan 45:3–5; 138:28–31 (Misin blong Sevya afta long ded blong Hem mo Laef Bakegen long Ded)

Tij Folem Wei blong Sevya

Wanwan man o woman insaed long klas blong yu, i wan rij ples blong testemoni, niu tingting, mo eksperiens blong fasin blong laef folem gospel. Invaetem olgeta blong serem ol ansa blong olgeta long wanwan long olgeta, mo blong oli leftemap tingting blong wanwan long olgeta.