Jisas Kraes: Man we I Givim Kea long Sol blong Yumi
Taem yumi sakem ol sin blong yumi wetem tru tingting, yumi stap letem sakrifaes ia blong Kraes, we i blong pemaot man, i wok fulwan insaed long laef blong yumi.
Ol dia brata mo sista blong mi. Long Ista moning ia we i saen, hat blong mi i glad taem i tingbaot aksen ia we i moa naes, i moa hae, we wan i no save makem, we i bin hapen long histri blong man—i sakrifaes we i pem praes from yumi, we i kam long Lod blong yumi, Jisas Kraes. Ol bigfala toktok blong profet Aesea oli talem bigwan bigfala aksen, we i no selfis blong Sevya, we Hem i kam daon mo i mekem sakrifaes long bihaf blong evri pikinini blong God:
“I tru se hem i bin tekem ol soa long hat blong yumi mo hem i bin tekem ol harem nogud blong yumi; be stil, yumi ting se hem i bin kasem panis, panis ia we i kam long God, mo hem i bin gat hadtaem.
“Be hem i bin kasem kil from ol fasin blong yumi blong brekem loa, skin blong bodi blong hem i bin kasem ol mak blong kil from ol rabis fasin blong yumi; mo fasin blong stretem yumi we i givim pis, i bin stap long hem; mo tru long ol mak blong kil blong hem, yumi kam oraet.”1
Taem Hem i volontia blong tekem long Hemwan ol sin blong evri kaen man, we, wetem rabis fasin, oli nilim Hem long kros, mo wetem viktri i winim ded long nambatri dei,2 Jisas i givim wan moa tabu mining long odinens blong Pasova we i bin stap long Isrel long ol taem bifo.3 Blong mekem profesi i kamtru, Hem i bin givim bodi mo blad blong Hem olsem las mo bigfala sakrifaes,4 i mekem se ol simbol ia we oli stap yusum long Pasova blong Lod, oli ol truwan.5 Taem Hem i mekem olsem, Kraes i gotru long safaring blong bodi mo spirit, we i no posibol blong man i andastanem. Sevya Hemwan i bin talem:
“From luk, mi God, mi bin safa evri samting ia blong evriwan, blong oli no save safa sapos oli sakem sin, …
“We safaring ia i mekem mi, we mi God, we mi hae long evriwan, mi seksek from soa long bodi, mo blad blong mi i ronaot long evri hol blong skin blong mi, mo mi safa tugeta long bodi mo long spirit—mo mi no wantem dring kap ia we i konkon, mo mi wantem holemtaet mi—
“Nomata long hemia, Hem i bin givim glori i go long Papa, mo Hem i bin dring mo finisim wok blong Hem blong mekem rere evri samting blong ol pikinini blong man.”6
Wetem gladhat, Kraes i bin mekem tingting blong Papa7 tru long sakrifaes blong Hem we i no gat en mo i gat sore. Hem i bin winim ded long saed blong spirit mo bodi,8 we i kam long wol ia tru long Foldaon9 we i givim glori janis ia long yumi blong kasem fasin blong sevem man we i no save finis.10
Jisas i wan Man ia nomo we i save mekem sakrifaes ia we i no save finis mo i stret evriwan long bihaf blong yumi.11 God i bin jusum Hem mo odenem Hem finis long Bigfala Kaonsel long Heven, iven bifo oli mekem wol ia.12 Antap long hemia, taem Hem i bon long wan woman long wol ia, Hem i minim tu se Hem i save fesem ded blong bodi; be aot long God, olsem Wan Stret Pikinini Ia Nomo blong Papa, Hem i kasem paoa ia blong givim stret laef blong Hem, mo tekembak laef ia bakegen.13 Antap long hemia, Kraes i bin laef long wan stret laef, we i no gat mak long hem, mo from hemia, Hem i fri long wanem jastis i askem.14 Long sam taem, Profet Josef Smit tijim:
“Fasin blong sevem man i no save kam long wol ia sapos Jisas Kraes i no stap olsem medelman.
“God i bin mekem wan sakrifaes i rere, we presen ia we i stret Pikinini blong Hem, we i sapos blong openem wan doa, we taem man i kamtru long hem, i kam blong stap wetem Lod.”15
Nomata we, tru long sakrifaes blong Hem, Sevya i karemaot risal blong ded blong bodi,16 Hem i no bin karemaot responsabiliti blong yumiwan blong sakem ol sin we yumi stap mekem.17 Be, Hem i givim wan invitesen wetem lav blong yumi stretem yumi wetem Papa blong yumi we I No Save Finis. Tru long Jisas Kraes mo sakrifaes blong Hem we i pemaot man, yumi save gat wan bigfala jenis long maen mo hat, we i tekem wan fres fasin,wetem God mo wetem laef.18 Taem we yumi sakem sin tru, mo tanem hat mo tingting blong yumi long God mo ol komanmen blong Hem, yumi save kasem fogivnes blong Hem mo filim paoa blong Tabu Spirit blong Hem i bigwan fulap taem moa. Wetem sore, yumi traem blong no gotru hamas safaring Sevya i bin gotru long hem.19
Presen ia, we i fasin blong sakem sin, i wei we God i soemaot fasin we i kaen long ol pikinini blong Hem mo hem i wei blong soemaot paoa blong Hem, we oli no save komperem, blong helpem yumi winim ol sin we yumi stap mekem. Mo tu, hem i pruf we Papa long Heven we i gat lav, i gat longfala tingting mo fasin blong safa longtaem from ol wiknes blong yumi long wol ia, mo fasin blong yumi no stap strong. Presiden Russell M. Nelson, profet we yumi lavem, i tokbaot presen ia, se hem i “ki blong hapines mo pis long maen.”20
Ol dia fren blong mi. Mi testifae long yufala se, taem yumi sakem ol sin blong yumi wetem tru tingting,21 yumi stap letem sakrifaes blong pemaot man, blong Kraes, i wok fulwan insaed long laef blong yumi.22 Bambae yumi kam fri long rop blong sin, bae yumi faenem glad long wokbaot blong yumi long wol, mo bae yumi kam blong save stap blong Lod i sevem yumi blong taem we i no save finis, fasin ia we oli bin rere long hem stat long stat blong wol ia, blong evriwan we bambae oli biliv long Jisas Kraes, mo bae oli kam long Hem.23
Antap long hae presen ia we i fasin blong sevem man, Sevya i givim spel mo kamfot, taem yumi stap fesem ol hadtaem, ol temtesen, mo ol wiknes blong laef long wol ia, wetem ol situesen we yumi bin gotru long hem long wol sik ia. Mi save stret long yufala se, Kraes i savegud long ol samting we oli kam agensem yufala long laef long wol ia. Hem i andastanem evri konkon samting, bigfala harem nogud, mo sobodi, mo tu, ol jalenj long filing mo spirit we yumi stap fesem. Insaed long Sevya, i fulap long sore, mo Hem i rere oltaem blong givhan long yumi. Hemia i posibol, from se, Hemwan bakegen, i bin gotru mo i bin tekem long Hemwan, taem Hem i gat bodi, soa ia blong ol wiknes mo ol samting we yumi no strong long olgeta.24
Wetem wan hat we i no flas mo i stap daon, Hem i bin kamdaon i daon bitim evri samting mo Hem i bin akseptem blong man i talem nogud Hem, blong man i sakemaot mo daonem Hem, mo karekil from yumi stap brekem loa mo gat rabis fasin. Hem i bin safa tru evri samting ia, i tekem long Hemwan ol sin blong wol ia,25 mo long wei ia, Hem i kam stamba Man blong givim kea long spirit blong yumi.
Taem yumi stap go kolosap long Hem, we yumi raonem spirit blong yumi wetem kea blong Hem, bambae yumi save putum yok blong Hem, we i isi, mo hevi samting blong Hem, we i no hevi, mo long wei ia, faenem kamfot mo spel we Hem i bin promesem. Moa long hemia, bambae yumi kasem paoa we yumi evriwan i nidim, blong winim ol had samting, ol wiknes, mo ol harem nogud blong laef, we oli had tumas blong gotru long hem sapos yumi no gat help mo hiling paoa blong Hem.26 Ol skripja oli tijim yumi blong “Yufala i mas putum ol trabol blong yufala long Hae God, nao hem bambae i blokem yufala.”27 “Mo afta, bae God i mekem ol hevi samting blong [yumi] oli nomo hevi, tru long glad blong Pikinini blong hem.”28
Kolosap long en blong las yia, mi bin lanem se wan dia kapol, Mario mo Regina Emerick, we tufala i fetful tumas long Lod, tufala i ded, wan fo dei afta narawan, from risal blong KOVID 19.
Wan long ol boe blong tufala, we i stap olsem wan bisop long Brasil, i talem hemia long mi: “i bin had tumas blong luk papa mo mama blong mi i lego wol ia long wei ia, be mi bin save filim han blong Lod long laef blong mi long medel blong nogud taem ia, from se mi kasem paoa mo pis we i bitim save blong mi. Tru long fet blong mi long Jisas Kraes mo Atonmen blong Hem, mi bin kasem help blong heven blong mekem ol memba blong famli blong oli kam strong moa mo givim kamfot long taem blong tes ia. Iven we merikel we evriwan i bin hop i no bin hapen, miwan, mi witnesem plante nara merikel we oli hapen long laef blong miwan, mo long laef blong ol memba blong famli blong mi. Mi filim wan pis ia we mi no save eksplenem we i stikim i go insaed long hat blong mi, i givim mi hop mo tras long lav ia we Sevya i gat long mi, mo long plan blong hapines we God i gat long ol pikinini blong Hem. Mi bin lanem se long ol dei we bigfala harem nogud i stap, ol han blong lav blong Sevya oli open i stap oltaem taem yumi lukaotem Hem wetem ful hat, paoa, maen, mo paoa blong bodi.
Ol dia brata mo sista. Long Ista Sandei ia, mi talem tabu witnes blong mi se Jisas i bin girap long ded, mo we Hem i stap laef. Mi testifae long yufala se, tru long Hem mo Atonmen blong Hem we i no gat en, Sevya i bin givim yumi rod ia blong winim ded, long bodi mo long spirit. Antap long ol bigfala blesing ia, Hem i givim kamfot mo stret save long taem blong hadtaem. Mi talem kwaet long yufala se, taem yumi stap putum tras blong yumi long Jisas Kraes mo sakrifaes ia blong Hem we i pem praes from sin, we i no gat man i save mekem, taem yumi stap strong kasem en wetem fet, bambae yumi glad long ol promes blong Papa long Heven we i lavem yumi, we i mekem evri samting long paoa blong Hem blong helpem yumi gobak stap wetem Hem wan dei. !Hemia hem i wok mo glori blong Hem!29 Mi testifae long yufala, se Jisas Hem i Kraes, i Ridima blong wol ia, i Mesaea we God i promesem, Hem i Laef Bakegen long Ded mo Hem nao i Laef ia.30 Mi serem ol trutok ia wetem yufala, long tabu nem blong Hem, Wan Stret Pikinini Ia Nomo blong Papa, Lod blong yumi, Jisas Kraes, amen.