Hop long Kraes
Mifala i wantem tumas blong helpem olgeta we oli filim se oli stap olgetawan o oli filim se oli no pat. Letem mi talem, speseli long olgeta we oli singgel naoia i stap.
Ol brata mo sista. Long taem ia blong Ista yumi lukluk nomo long glori taem blong Laef Bakegen long Ded blong Lod mo Sevya blong yumi, Jisas Kraes. Yumi tingbaot invitesen blong Hem blong “kam long mi, yufala evriwan we yufala i stap hadwok tumas, mo yufala i stap karem ol hevi samting, mo bae mi mekem yufala i spel gud.
“Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan long mi, nao bambae yufala i save faenem pis long laef blong yufala.
From we yok blong mi i isi nomo, mo oli no hevi.”1
Invitesen blong Sevya blong kam long Hem i wan invitesen blong evriwan, blong no kam long Hem nomo, be tu, blong kam memba long Jos blong Hem.
Long ol ves bifo long invitesen ia, Jisas i tijim olsem wanem yumi save mekem hemia taem yumi wantem blong folem Hem. Hem i talem: “Mi mi pikinini blong Hem, mo i no gat man i save mi. Mo i no gat man [o woman] tu i save Papa blong mi, mi wetem ol man [o woman] we mi jusumaot olgeta blong soemaot hem long olgeta, mifala nomo i save Hem.”2
Jisas i wantem yumi blong save se, God, i wan Papa long Heven we i gat lav.
Taem yumi save se Papa blong yumi long Heven i lavem yumi, bae i helpem yumi blong save huia i yumi, mo we yumi blong bigfala famli blong Hem we i no save finis.
Mayo Clinic i talem: “Blong gat filing ia se yu pat long wan samting i impoten tumas. … Kolosap evri smosmol pat blong laef blong yumi i oganaes raon long pat blong wan samting.”3 Ripot ia i talem, “ Hem i impoten blong gat filing ia blong stap pat blong samting, Yumi no save seperetem filing ia long helt blong bodi mo blong maen”3—mo bae mi ademap, helt blong spirit.
Long naet bifo Hem i safa long Getsemane mo i ded long kros, Sevya i mit wetem ol disaepol blong Hem blong gat Las Sapa. Hem i talem long olgeta: “Long wol ya bambae yufala i harem nogud tumas: be yufala i no fraet; Mi mi winim paoa blong olgeta samting blong wol ia finis.”4 Bifo san i go daon long nekis dei, Jisas Kraes i bin safa mo i “ded [long kros] from ol sin blong yumi.”5
Mi stap tingting long ol fetful man mo woman we oli stap folem Hem, oli mas filim se oli stap olgetawan taem san i go daon mo tudak mo fraet i kavremap olgeta long Jerusalem.76
Olsem ol disaepol ia blong 2,000 yia i pas, plante long yufala i filim se oli stap olgetawan plante taem. Mi eksperiensem filing ia blong stap miwan long taem waef blong mi, Barbara i ded ova tu mo haf yia i pas finis. Mi save wanem i minim blong stap long medel blong ol memba blong famli, ol fren, mo ol grup be yet yu filim se yu stap yuwan—from se lav blong mi long laef ia i nomo stap wetem mi.
KOVID 19 wol sik i bin mekem plante oli stap olgetawan. I nomata wanem jalenj yumi fesem long laef, olsem fas moning blong Ista, yumi save wekap long wan niufala laef long Kraes wetem ol niufala janis mo ol tru laef we i ril, taem yumi tanem yumi i go long Lod blong gat hop mo filing blong stap pat wetem Hem.
Mi filim harem nogud blong olgeta we oli filim se oli no pat long samting. Taem mi stap wajem nius raon long wol mi luk plante we oli stap eksperiensem fasin blong stap olgetawan. Mi ting se, blong plante, hem i from se oli no maet save se Papa long Heven i lavem olgeta mo we yumi evriwan i pat blong famli blong Hem we i no save finis. Taem yumi bilivim se God i lavem yumi mo we yumi ol pikinini blong Hem, i givim yumi kamfot mo sekiuriti.
From se yumi ol spirit pikinini blong God, evriwan i kam long God, i gat wan gudfala fasin, mo bae yumi gobak long Hem. Wanwan long yumi i spirit pikinini boe o gel blong papa mo mama long heven.”7 !Hemia i talemaot huia yumi! !Hemia nao huia yumi stret!
Aedentiti blong yumi long saed blong spirit i kam antap taem yumi andastanem plante aedentiti blong yumi long laef ia olsem, wan grup, wan kalja, o nesen.
Filing ia blong aedentiti, lav mo yu pat long saed blong spirit mo kalja, i save mekem se yu gat hop mo lav long Jisas Kraes.
Mi tokbaot hop long Kraes i no olsem wan drim blong tingting nomo. Be mi tokbaot hop, we i semmak long wan tru tingting we bae i hapen. Hop ia i wan nid blong yumi gat blong winim wok blong Setan, blong mekem spirit laef blong yumi i kam strong moa, mo blong kam blong save se Papa blong yumi we i no save finis i lavem yumi mo we yumi ol pikinini blong Hem we yumi pat long famli blong Hem.
Taem yumi gat hop long Kraes, yumi kam blong save se taem i kam blong yumi mekem mo kipim ol tabu kavenan, bae Hem i mekem ol dip tingting blong hat mo drim blong yumi i kam tru.
Kworom blong Olgeta Twelef Aposol oli bin kaonsel tugeta long wan spirit blong prea mo wetem wan hat blong wantem andastanem olsem wanem blong helpem evriwan we oli filim se oli stap olgetawan mo oli no pat, speseli olgeta we oli singgel. Mifala i wantem tumas blong helpem evriwan we oli filim wei ia. Letem mi talem, speseli long olgeta we oli singgel naoia i stap.
Ol brata mo sista. Ova long haf blong ol adalt long Jos tedei oli wido, divos, o neva mared. Sam oli stap tingting abaot janis mo ples blong olgeta insaed long plan blong God mo insaed long Jos. Yumi nid blong andastanem se laef we i no save finis hem i no wan simpol kwestin nomo abaot level blong mared we yu stap long hem naoia, be i blong stap olsem disaepol mo gat wan “strong testemoni abaot Jisas.”8 Hop blong evriwan we oli singgel i semmak long hop blong ol memba blong Jos blong Lod we i kambak—gat raet blong kasem gladhat blong Kraes tru long fasin blong “stap obei long ol loa mo ol odinens blong Gospel.”9
Mi stap proposem se i gat sam impoten prinsipol we yumi nid blong andastanem.
Faswan, ol skripja mo ol profet blong ol las dei ia oli konfemem se evriwan we oli fetful blong kipim ol kavenan blong gospel bae oli gat janis blong laef olsem wan god Presiden Russell M. Nelson i bin tijim: “Long taem mo wei blong Lod, bae evri fetful Sent blong Hem bae oli kasem blesing. Lod bae i jajem mo i givim praes long wanwan man mo woman folem wanem hat blong olgeta i filim mo wantem, mo wok blong olgeta tu.”10
Seken, stret taem mo stret fasin blong man i kasem blesing blong kam wan god oli no bin rivilim evriwan, be nomata long hemia bae i hapen11 Presiden Dallin H. Oaks i bin eksplenem se sam long ol situesen blong “laef ia bae oli stretem long taem blong Mileniom, we hem i taem blong stretem mo finisim evri wok we i no finis long taem ia blong bigfala plan blong hapines blong evri pikinini blong Papa we oli klin inaf.”12
Hemia i no minim se evri blesing bae i holemtaet kasem taem blong Mileniom nomo: sam oli kasem finis mo ol narawan oli stap gohed blong kasem gogo kasem dei ia i kam.13
Nambatri, blong stap wet long Lod i minim blong gohed blong obei mo kam antap long fored blong Hem Blong stap wet long Lod i no stap kakae taem blong wan man. Yu neva mas filim se yu stap insaed long wan rum blong stap wet.
Blong stap wet long Lod i minim aksen. Mi bin lanem blong plante yia se yumi bildimap hop blong yumi long Kraes, taem yumi givim seves long ol narafala man. Blong stap givim seves olsem Jisas, i bildimap stret hop blong yumi long Hem.
Hamas yu save gro taem yu stap wet long Lod mo ol promes blong Hem, i wan plan blong Lod long yumi wanwan we i tabu, mo valiu blong hem i bigwan tumas. Naoia i gat bigfala nid blong wan i kontribiut blong help bildimap Jos long wol. I nomata sapos man i mared o i singgel, i no gat samting i blokem hem blong i givim seves. Lod i givim ona long olgeta we oli givim seves mo wet long Hem wetem longfala tingting mo fet.14
Nambafo, God i givim laef we i no save finis long evri pikinini blong Hem Evriwan we oli akseptem presen blong Sevya blong sakem sin, mo laef folem ol komanmen blong Hem, bae i kasem laef we i no save finis, nomata oli no kasem evri fasin blong hem mo kam stret evriwan long laef ia. Olgeta we oli sakem sin bae oli eksperiensem fasin ia blong Lod we hem i rere blong fogiv: “Yes, mo evri taem we ol pipol blong mi oli sakem sin, bae mi fogivim olgeta long ol rong blong olgeta agensem mi.”15
Taem yumi tingting long evri samting, hamas paoa, tingting long hat mo janis wan i gat long saed blong fridom blong mekem joes mo ol joes blong hem, wetem fasin blong kwalifae from ol blesing blong taem we i no save finis, oli ol mata ia we Lod nomo i save jajem.
Nambafaef, tras blong yumi long ol prinsipol ia i fasgud long fet blong yumi long Jisas Kraes, we tru long gladhat blong Hem, evri samting we i blong laef ia i kam stret16 Evri promes blesing oli kam posibol nomo tru long Hem, we tru long Atonmen blong Hem, “i go daon bitim evri samting”17 mo hem i winim wol.”18 Hem “i sidaon long raet han blong God, blong askem long Papa ol raet blong sore blong hem, we hem i gat long ol pikinini blong ol man … taswe, hem i toktok from stamba tingting blong ol pikinini blong ol man.”19 Long en, “olgeta sent bae oli fulap wetem glori blong hem, mo oli kasem ples blong olgeta”20 we oli “joen long Kraes.”21
Tingting long hat blong mifala, i we, ol prinsipol ia bae i helpem evriwan blong leftemap hop blong olgeta long Kraes mo filim se oli pat.
Neva fogetem se yu yu wan pikinini blong God, Papa blong yumi We I No Save Finis, naoia mo blong oltaem. Hem i lavem yu, mo Jos i wantem mo i nidim yu. !Yes, mifala i nidim yu! Mifala nidim voes,, talen, skil, mo stret mo gud fasin blong yufala.
Blong plante yia, yumi tokbaot “ol yang singgel adalt,” “ol singgel adalt,” mo “ol adalt.” Ol toktok ia oli helpem yumi blong mekem wok long sam taem, be yumi save sek se oli save jenisim wei we yumi lukluk ol narawan.
?I gat wan wei we yumi save kamaot long fasin ia we i save seperetem yumi long ol narawan?
Presiden Nelson i askem yumi blong yumi lukluk long yumiwan olsem ol memba blong Jos Ia blong Jisas Kraes blong Ol Lata-dei Sent. ?Hemia i kavremap yumi evriwan, hemia i tru?
Gospel blong Jisas Kraes i gat paoa blong yunaetem yumi. Yumi semmak, moa bitim we yumi defren. Olsem ol memba blong famli blong God, yumi ol tru brata mo sista. Pol i talem: “Bifo we bifo olgeta, [God] i mekem wan man nomo, nao olgeta man long wol oli kamaot long man ya, mo hem i putum olgeta oli stap long evri ples long wol.”22
Long yufala ol stek presiden, ol bisop, mo kworom mo ol sista lida, mi askem yufala blong tingbaot evri memba blong stek blong yufala, wod, kworom, o oganaesesen olsem wan memba we i save kontribiut mo givim seves long ol koling mo save tekpat long plante wei.
Evri memba long kworom blong yumi, ol oganaesesen, ol wod, mo ol stek oli ol presen mo talen we God i givim blong help bildimap kingdom blong Hem naoia.
Letem yumi singaotem ol memba blong yumi we oli singgel blong oli givim seves, leftemap, mo tij. Sakemaot ol tingting mo aedia we, samtaem, oli kontribiut long ol filing blong olgeta blong stap olgetawan, mo we oli no pat, o no save givim seves.
Mi witnes, long Ista wiken ia, blong Sevya Jisas Kraes mo hop we i no save finis Hem i givim long mi mo evriwan we oli biliv long nem blong Hem. Mo mi talem testemoni ia, wetem tingting i stap daon, long tabu nem blong Hem, we i Jisas Kraes, amen.