God long medel blong Yumi
God i stap long medel blong yumi—mo Hemwan i wok long laef blong yumi, mo i wok strong blong lidim ol pikinini blong Hem.
Truaot long ol yia, God i bin stap toktok long ol wokman blong Hem, ol profet.1 Tedei moning, yumi bin gat spesel janis ia blong lisin long profet blong God i toktok long ful wol. Mifala i lavem yu Presiden Nelson, mo mi leftemap tingting blong evriwan, long evri ples, blong stadi mo mekem folem ol toktok blong yu.
Bifo mi kasem 12 yia blong mi, famli blong i mas ronwe tu taem long hom blong mifala, mo stat bakegen long medel blong ol trabol, fraet, mo taem we i no sua from wo mo seraot long politik. Long mi, i wan taem blong wari, be ating i mowas long papa mo mama blong mi.
Mama mo papa blong mi i no tokbaot tumas hadtaem ia wetem mifala ol fofala pikinini. Tufala i tekem hadwok mo hadtaem ia olsem we tufala i bin save tekem blong tufala. Fraet i mas bigwan, i tekem fulap aoa mo daonem hop blong tufala.
Taem ia we i nogud, afta long Wol Wo 2 i lego wan mak i stap long wol. I putum wan mak i stap long mi.
Taem mi stap miwan, plante taem, mi askem miwan: “?i gat eni hop i stap blong wol ia?”
Ol Enjel long medel blong Yumi
Taem mi bin stap tingting long kwestin ia, mi tingting long ol yangfala misinari blong Amerika we oli bin givim seves long medel blong yumi long ol yia ia. Oli aot long sef haos blong olgeta, oli go raon haf long wol ia mo oli go long Jemani—graon ia blong ol las enemi blong olgeta—blong givim hop we i kam long heven i go long ol pipol blong mifala. Oli no kam blong blemem man, tok long man, o mekem oli sem. Oli givim yang laef blong olgeta, mo ting se bae oli benefit long wan samting, oli wantem nomo blong stap helpem ol narawan blong oli faenem glad mo pis we oli gat.
Long mi, ol yang man mo woman ia, oli stret evriwan. Mi sua se oli no stret evriwan, be i no long mi. Oltaem, mi tingting long olgeta se oli bigwan bitim laef—ol enjel blong laet mo glori, ol man blong lav mo sore, gud fasin mo trutok.
Taem we wol ia i stap draon long krangke fasin, konkon fasin, fasin blong no laekem man, mo fraet, eksampol mo ol tijing blong ol yang man ia, oli bin fulumap mi wetem hop. Gospel mesej we oli bin givim, i bitim evri politik, histri, kros, harem nogud, mo intres blong wanwan. Hem i givim ol tabu ansa long ol impoten kwestin we yumi bin gat long taem ia we ol samting i bin had.
Mesej ia, i we God i stap laef mo kea abaot yumi, iven long ol aoa blong trabol, konfius tingting mo prapa nogud taem. Se Hem i bin kamkamaot long taem blong yumi blong putumbak trutok mo laet—we i gospel mo Jos blong Hem. Se Hem i stap toktok bakegen long ol profet; se God i stap long medel blong yumi—mo Hemwan Hem i wok long laef blong yumi, mo i wok strong blong lidim ol pikinini blong Hem.
Bae yumi sek long wanem yumi lavem taem yumi lukluk i go kolosap moa long plan ia blong Papa blong fasin blong sevem man mo kam olsem wan god, plan ia blong stap glad, blong ol pikinini blong Hem. Taem yumi filim se yumi no impoten, oli sakemaot yumi, mo oli fogetem yumi, yumi lanem se maet bae yumi save se God i no fogetem yumi—be, Hem i givim, long evri pikinini blong Hem, wan samting we tingting i no kasem: blong yumi “joen long Kraes blong kasem haf long ol gudgudfala samting we God i putum olgeta oli tabu.”2
?Hemia i minim wanem?
Se bae yumi laef tugeta blong oltaem, kasem wan ful glad,3 mo gat janis blong save kasem “ol jea blong king, ol kingdom, ol ples blong prins i rul, mo ol paoa.”4
Hem i mekem tingting blong mi i stap daon blong save se fiuja ia we i naes mo i gat paoa, i posibol blong gat—i no from huia yumi, be from huia hem i God.
Taem yumi save hemia, ?hao nao bae yumi stap komplen o gohed blong stap kros? ?Olsem wanem nao bae yumi stap kipim ae blong yumi i stap long graon taem we King blong ol king i stap invaetem yumi blong flae i go long wan fiuja blong hapines long heven?5
Fasin blong Sevem Man long medel blong Yumi
From stret lav ia we God i gat long yumi, mo from sakrifaes we i no save finis blong Jisas Kraes, ol sin blong yumi—olgeta we oli bigwan mo olgeta we oli smol—bae oli karemaot mo bae oli nomo tingbaot olgeta.6 Yumi save stanap long fored blong Hem, we yumi klin gud, yumi klin inaf mo yumi kam tabu.
Hat blong mi i fulap tumas long tangkyu long Papa blong mi long Heven. Mi luksave se Hem i no putum se ol pikinini blong Hem bae oli stap folfoldaon tru long laef long wol ia, mo no gat hop ia from wan fiuja we i saen mo i no save finis. Hem i givim ol instraksen we i talemaot rod we i gobak long Hem. Mo long medel blong evri samting, i gat Wan Stret Pikinini Ia Nomo blong Hem, Jisas Kraes,, 7 mo sakrifaes blong Hem from yumi.
Bigfala Atonmen blong Sevya, i jenisim evriwan wei we yumi luk ol fasin blong yumi blong brekem loa mo ol samting we yumi no strong long ol. Be, yumi no mas stastap long olgeta samting ia, mo filim se Hem i no save pemaot yumi; yumi save lan aot long olgeta, mo filim hop ia.8 Presen ia we i fasin blong sakem sin, i klinim yumi, mo i letem yumi lego ol sin i stap biaen mo kamaot olsem wan niu man.9
From Jisas Kraes, ol mistek blong yumi oli no blong talemaot huia yumi. Oli save mekem yumi kam gud moa.
Olsem wan miusik man i stap praktisim tiun blong hem, yumi save luk ol step we yumi mestem, ol mistek, mo ol sin olsem ol janis blong savegud huia yumi, we bae yumi gat moa ones mo dip lav long ol narawan, mo yumi kam stret moa tru long fasin blong sakem sin.
Sapos yumi sakem sin, ol mistek blong yumi oli no mekem yumi no kwalifae. Oli pat blong progres blong yumi.
Yumi evriwan i ol pikinini sapos yumi komperem yumi long ol man blong glori ia we oli hae tumas, we Hem i putum se bae yumi kam olsem. I no gat man long wol i go fored, we i stat blong krip, i go wokbaot, i go ronron, be i no folfoldaon, i no kikim ston, mo i no karekil. Rod blong lanem samting i olsem.
Sapos yumi stap tru blong stap praktis, we oltaem yumi traehad blong obei long ol komanmen blong God, mo komitim yumi long ol hadwok blong stap sakem sin, stap strong, mo yusum wanem yumi lanem, laen folem laen, bambae yumi karem laet i kam long sol blong yumi.10 Mo nomata yumi no save andastanem naoia, ful paoa we yumi save gat, “wan samting yumi save. Taem Kraes i kamtru,” bambae yumi luk fes blong Hem long yumiwan, mo “save kam olsem hem, from we long taem ya, bambae yumi save luk hem stret long ae blong yumi.”11
!Hemia i wan gudfala promes!
Yes, wol i stap long trabol. Mo yes, yumi gat ol wiknes. Be yumi no nid blong hangem hed blong yumi mo lusum hop, from se yumi save trastem God, yumi save trastem Pikinini blong Hem, Jisas Kraes, mo yumi save akseptem presen ia, we i Spirit, blong i lidim yumi long rod ia i go long laef ia we i fulap long glad mo tabu hapines.12
Jisas long medel blong Yumi
Plante taem mi stap askem miwan: ?Bae Jisas i tijim mo mekem wanem sapos Hem i stap long medel blong yumi tedei?
Afta long Laef Bakegen long Ded, Jisas Kraes i mekem promes blong Hem blong visitim “ol nara sipsip blong Hem.”13
Buk blong Momon: Wan Narafala Testeman blong Jisas Kraes i tokbaot wan taem we Hem i bin kamaot long ol pipol long graon blong Amerika. Yumi gat histri ia we i stap olsem wan witnes blong wok ia blong Sevya.
Ol pipol long Buk blong Momon, oli bin laef long narasaed blong planet wol—histri, kalja, mo politik blong olgeta oli defren evriwan long ol pipol we Jisas i bin tijim olgeta long taem blong laef blong Hem long wol. Be yet, Hem i bin tijim olgeta plante long ol semfala samting we Hem i bin tijim taem Hem bin i stap long Holi Lan.
?From wanem bae Hem i mekem hemia?
Sevya i stap tijim oltaem ol trutok we oli yusum oltaem. Oli blong ol pipol we oli gat eni yia, mo eni situesen.
Mesej blong Hem i bin, mo hem i wan mesej blong hop, mo we yumi pat blong wan grup—wan testemoni se, God, Papa blong yumi long Heven, i no lego ol pikinini blong Hem.
!Se God i stap long medel blong Yumi!
Tu handred yia i pas, Sevya i kambak long wol ia. Tugeta, wetem God we i Papa, Hem i bin kamaot long Josef Smit we i gat 14 yia, mo i stat blong putumbak gospel, mo Jos Ia blong Jisas Kraes. Stat long dei ia i go, ol heven oli bin open, mo ol mesenja blong heven oli bin aot long ol ples blong glori oli kamdaon long wol. Laet mo save i aot long selestial hom i kapkapsaet i kam.
Lod Jisas Kraes, i toktok wan moa taem long wol.
?Hem i bin talem wanem?
I blesem yumi, mo plante long ol toktok blong Hem oli raetem i stap long Doktrin mo Ol Kavenan—i stap blong eniwan long wol we i wantem blong ridim mo stadi long olgeta. !Ol toktok ia oli no gat praes long yumi tedei!
Mo yumi no mas sapraes blong faenem Sevya i stap tijim stamba mesej blong gospel blong Hem: “Yu mas lavem Lod God blong yu wetem ful hat blong yu, wetem ful paoa blong tingting, ful maen mo ful paoa blong yu; mo long nem blong Jisas Kraes, bae yu mas wok blong hem.”14 Hem i stap givim insperesen long yumi blong lukaotem God15 mo laef folem ol tijing we Hem i bin talemaot tru long revelesen long ol wokman blong Hem, ol profet.16
Hem i stap tijim yumi blong lavlavem yumi,17 mo gat fulap jareti long ol man.18
Hem i stap invaetem yumi blong yumi ol han blong Hem, blong yumi go mekem gud.19 “I nogud yumi lavem man long toktok blong yumi nomo. Yumi mas mekem samting blong givhan long hem, blong soemaot we yumi lavem hem tru.”20
Hem i stap givim jalenj long yumi blong mekem folem bigfala wok ia we Hem i givim long yumi, we i: blong lavem man, blong serem samting, blong invaetem evriwan long gospel mo Jos blong Hem.21
Hem i stap givim komanmen long yumi blong yumi bildimap ol tabu tempol mo go insaed mo givim seves.22
Hem i stap tijim yumi blong kam ol disaepol blong Hem—se bae hat blong yumi i no traehad blong kasem paoa blong yumiwan, bigfala mane, man i agri wetem yumi, o gat posisen. Hem i stap tijim yumi blong “livim ol samting blong wol ia oli stap long saed, mo yu yu lukaotem ol samting blong wan wol we i moa gud.”23
Hem i askem strong yumi blong lukaotem glad, moa laet, pis, hapines24 mo promes ia blong gat nomo save ded mo kasem laef we i no save finis.25
Bae yumi tekem i go wan moa step. ?Sapos Jisas i kam long wod, branj, o hom blong yu tedei? ?Bae i olsem wanem?
Bae Hem i luk stret i go insaed long hat blong yu. Olsem wanem yumi luk aotsaed, bae i nomo impoten. Bae Hem i save yu olsem we yu stap. Bae Hem i save ol tingting blong hat blong yu.
Olgeta we oli no stap flas mo gat tingting i stap daon, bae Hem i leftemap olgeta.
Olgeta sikman, bae Hem i hilim olgeta.
Olgeta we oli gat tu tingting, bae Hem i mekem oli gat fet mo strong paoa long tingting blong save biliv.
Bae Hem i tijim yumi blong openem hat blong yumi long God mo go aot long ol narawan.
Bae Hem i luksave mo givim ona long ones fasin, tingting we i stap daon, tru fasin, fetful fasin, lav mo sore, mo jareti.
Bae yumi luk stret long ae blong Hem, mo bae yumi no semmak bakegen. Bae yumi jenis blong oltaem. Bae yumi jenis ia wetem bigfala luksave se, i tru, God i stap long medel blong yumi.
?Bambae Yumi Mekem Wanem?26
Mi luklukbak, wetem kaen fasin, long yang man ia we mi bin stap taem mi bin stap groap. Sapos mi save gobak long taem, bae mi givim kamfot long hem, mo talem hem se hem i stap long raet rod mo gohed blong lukaotem. Mo bae mi askem hem blong invaetem Jisas Kraes insaed long laef blong hem, !from se God i stap long medel blong yumi!
Long yufala, ol dia brata mo sista, ol dia fren blong mi, mo long evriwan we oli stap lukaotem ol ansa, trutok, mo hapines, mi stap givim semfala kaonsel ia: gohed blong lukaotem wetem fet mo wetem fasin blong save wet longtaem.27
Yufala i askem, mo bae yufala i kasem. Yufala i noknok, mo bae doa i open long yufala.28 Trastem Lod.29
Long evri dei laef blong yumi, Hem i nambawan wok blong yumi, mo wan janis we i wan blesing blong mitim God.
Taem yumi stap putum long saed, hae tingting, mo yumi kam long fored blong Jea blong King wetem wan hat we i gat sore mo wan tingting we i wantem sakem sin,30 bambae Hem i kam kolosap long yumi.31
Taem yumi stap folem Jisas Kraes, mo stap wokbaot long rod ia blong stap olsem disaepol, laen folem laen, dei ia bae i kam we bae yumi gat eksperiens ia blong kasem bigfala presen ia blong kasem wan ful glad.
Ol dia fren blong mi. Papa blong yu long Heven i lavem yu wetem wan stret lav. Hem i pruvum lav blong Hem long fulap wei, be antap long evriwan, i givim Wan Stret Pikinini blong Hem olsem wan sakrifaes mo olsem wan presen long ol pikinini blong Hem, blong mekem se blong gobak long papa mo mama long heven, i wan ril wokbaot.
Mi mi witnes se Papa blong yumi long Heven i stap laef, se Jisas Kraes i stap lidim Jos blong Hem, se Presiden Russell M. Nelson i profet blong Hem.
Mi sendem long yufala, lav mo blesing blong mi, long glad Ista taem ia. Openem hat blong yu long Sevya mo Ridima, i nomata wanem situesen, tes, safaring, o mistek blong yu, bae yu save kam blong save se Hem i stap laef, se Hem i lavem yu, mo from Hem, bambae yu neva stap yuwan.
God i stap long medel blong yumi.
Long hemia, mi mi wan witnes, long tabu nem blong Jisas Kraes, amen.