!Hemia I Taem blong Yumi!
God i bin sendem yumi long ples ia, naoia, long spesel taem ia long histri.
Long 1978, mi bin stanap long futbol fil long wan stadiom we i fas long 65,000 sapota. Long fored blong mi i bin gat sam bigfala man we i luk olsem se oli wantem karemaot hed blong mi nomo. I bin fas gem blong mi olsem wan fas kwotabak long Nasonal Futbol Lig, mo mifala i stap plei agensem jampion tim blong Supa Bol Tunamen. Blong talem tru, se mi kwestinim miwan sapos mi gud inaf o no blong stap long fil. Mi arier smol blong sakem fas balong blong mi, mo taem mi sakemaot balong, oli bangem strong mi we i moa strong bitim bifo. Long taem ia, mi slip andanit long wan hip blong ol bigbigfala spotman, mo stap tingting se mi stap mekem wanem ia. Mi gat wan joes blong mekem. ?Bae mi lego ol tu tingting i winim mi, o bae mi faenem strong tingting mo paoa blong girap mo gohed?
Associated Press
Mi no bin luksave long taem ia hao nao eksperiens ia bae i priperem mi from ol fiuja janis. Mi nidim blong lanem se mi save stap strong mo leftemap hed long fored blong ol had situesen.
Wan futbol gem ating i no impoten tumas olsem ol jalenj we bae yu fesem. Long plante kes, bae i no gat wan stadiom we i fulap long ol sapota. Be ol gudfala desisen blong yu bae i impoten tumas blong laef ia we i no save finis.
Ating yumi no filim oltaem se yumi naf blong tekem jalenj ia. Be Papa blong yumi long Heven i luk yumi olsem wokman blong Hem we oli no fraet blong bildim kingdom blong Hem. Hemia i from wanem Hem i sendem yumi i kam long wan impoten taem blong histri blong wol. !Hemia i taem blong yumi!
Lisin long wanem Presiden Russell M. Nelson i bin talem smol taem afta we hem i kam Presiden blong Jos: “Sevya mo Ridima blong yumi, Jisas Kraes, bambae i mekem sam bigbigfala wok bitwin naoia mo taem we bae Hem i kambak bakegen. Tru long merikel, bae yumi luk ol saen we God Papa, mo Pikinini blong Hem, Jisas Kraes, Tufala i prisaed ova long Jos ia wetem hae paoa mo glori” (“Revelesen blong Jos, Revelesen blong Laef blong Yumi,” Liahona, Mei 2018, 96).
?Ol bigbigfala wok? ?Ol saen blong ol merikel? ?Hemia bae i luk olsem wanem ia? ?Wanem pat nao bae yumi plei, mo hao nao bae yumi andastanem wanem blong mekem? Mi no save evri ansa, !be mi save nomo se Lod i nidim yumi, blong yumi stap rere! Blong stap klin inaf blong yusum prishud paoa i moa impoten tedei bitim bifo.
?Yumi biliv long profet blong God? ?Yumi save faenem mo mekem kasem fiuja ples blong yumi? !Yes yumi save, mo yes yumi mas, from hemia i taem blong yumi!
Taem yumi harem ol stori blong ol wokman blong hae God blong yumi we oli kam fastaem long yumi—olsem Moses, Meri, Moronae, Alma, Esta, Josef, mo plante narawan—oli moa impoten. Be oli no defren nomo long yumi. Oli ol nomol man nomo we oli fesem ol jalenj. Oli trastem Lod. Oli mekem ol raet joes long ol impoten taem. Mo wetem fet long Jisas Kraes, oli mekem ol wok folem taem we i nidim.
Goodsalt
Tingbaot Josua, hiro ia blong OlTesteman. Hem i bin wan man we i strong blong Moses, wan long ol impoten lida long histri. Afta we Moses i aot, i givim taem naoia long Joshua. Lod i bin askem hem blong lidim ol pikinini blong Isrel i go long promes graon. ?Hao nao bae hem i mekem? Joshua i bin bon mo groap olsem wan slef long Ijip. Hem i no gat hanbuk o ol vidio instraksen blong helpem hem. !Hem i no iven gat wan smatfon! Be hem i bin gat promes ia long Lod:
“Mi bambae mi stap lukaot long yu, olsem we mi stap lukaot long Moses bifo. Mo bambae mi stap wetem yu oltaem, we neva bambae mi lego yu samtaem.
“Tingting blong yu i mas strong, mo yu no mas fraet, yu mas stanap strong oltaem,” (Josua 1:5–6).
Taem we mi jes kam wan niu Seventi, mi bin kasem wan ejen mesej long fon we i kam long Ofis blong Fas Presidensi, we oli askem sapos mi save ripresentem profet blong visitim wan yang man long hospital—naoia nomo. Nem blong yangfala man ia Sak. Hem i stap rere blong kam wan misinari be i bin kasem wan aksiden mo hed blong hem i bin kasem wan bigfala kil.
Taem mi bin stap draev i go long hospital, maen blong mi i wok kwik. ?Wan wok blong profet—i tru ia? ?Wanem nao bae mi fesem? ?Hao nao bae mi helpem yangfala ia? ?Mi mi gat inaf fet? Strong prea mo save ia se mi gat atoriti blong tabu prishud i bin kam angka blong mi.
Taem mi kasem hospital, Sak i stap slip long wan bed blong hospital. Wan wokman blong hospital i rere blong pusum hem i go long operesen rum blong ol dokta i save operetem bren blong hem. Mi luk mama blong hem we i krae mo wan fren we i fraet mo stap stanap long saed blong hem, mo mi bin save se Sak i nidim wan prishud blesing. Fren blong hem i jes kasem Melkesedek Prishud, mo mi askem hem blong helpem mi. Mi bin filim paoa blong prishud taem mifala i givim wan blesing long Sak. Afta oli pusum hem kwik i go long operesen, mo wan filing blong pis i bin konfem se Sevya bae i handelem ol samting long wei blong Hem.
Ol medikol staf i bin mekem wan las eksre bifo stret operesen. Oli bin faenemaot, wetem sapraes se i no nid blong gat operesen.
Afta plante eksasaes, Sak i bin lanem blong wokbaot mo toktok bakegen. Hem i bin go long misin wetem sakses mo naoia i gat wan naesfala famli.
I tru, yumi no stap luk tumas ol kaen ansa olsem. Mi bin givim ol nara prishud blesing olsem wetem sem fet, mo Lod i no bin givim ful hiling olsem long laef ia. Yumi trastem stamba tingting blong Hem mo lego ol ansa long Hem. Yumi no save jusum ol ansa blong ol aksen blong yumi, be yumi save jusum blong stap rere blong mekem samting.
Bae Fas Presidensi i neva askem yu blong ripresentem olgeta long wan situesen we i putum laef long denja. Be oli singaotem yumi blong mekem jenis long laef, olsem wan we i ripresentem Lod. Bambae Hem i no save lego yumi. !Hemia i taem blong yumi!
Pita, jif Aposol blong Sevya i bin stap long wan sip long solwota taem hem i luk Jisas i stap wokbaot long wota. Hem i wantem joenem Hem, mo Sevya i talem se: “Kam.” Wetem strong tingting mo merikel, Pita i aot long bot mo stat blong wokbaot i go long Sevya. Be taem hem i harem we win i strong, hem i lusum fet. “Hem i fraet; nao i stat draon, mo i singaot se: ‘Masta plis yu sevem mi.’ “Nao wantaem nomo, Jisas i stretem han blong hem, i holem hem.” (Luk long Matiu 14:22–33.)
?Taem ol win oli blo long ol laef blong yumi, lukluk blong yumi i stap wea? Tingbaot se oltaem i gat wan ples blong karem paoa long bodi mo strong paoa long tingting, we yumi save dipen long hem. Jisas i pusum moa han blong Hem i kam long yumi, olsem we Hem i bin mekem long Pita. Taem yumi go long Hem, bae Hem i sevem yumi wetem lav. Yumi blong Hem. Hem i talem se: “Yufala i no mas fraet: Mi mi sevem yufala finis, mi mekem yufala i fri. Mi stap singaot yufala long nem blong yufala. Yufala i man blong mi” (Aesea 43:1). Bae Hem i win long laef blong yu sapos yu letem Hem. !Joes i blong yu! (Luk long Russell M. Nelson, “Letem God I Win,” LiahonaNov 2020, 93.)
Long en blong laef blong hem, Josua i serem wetem ol pipol blong hem, “Be naoia yufala i mas jusumaot wanem god we yufala i wantem; … Be mi, wetem ol famli blong mi, bambae mifala i biaen long Hae God nomo.” (Josua 24:15). From ol joes we hem i bin mekem blong givim seves long Lod, Josua i bin kam wan impoten lida long taem ia! Ol dia fren blong mi, !hemia i taem blong yumi! Mo ol joes blong yumi bae oli mekem yumi kwalifae from ples blong yumi (luk long Thomas S. Monson, “Decisions Determine Destiny” [Brigham Young University fireside, Nov. 6, 2005], speeches.byu.edu).
Taem mi bin stap olsem wan bisop, mifala i bin gat wan moto long wod blong mifala: Gudfala Joes ikwol hapines—we i no save finis. Ol yut taem oli bitim mi aotsaed bae oli talem se: “Bisop, !mi stap mekem gudfala joes!” !Hemia drim blong wan Bisop!
?Wanem nao yumi minim long toktok ia “ol gudfala joes”? Wan man i bin askem Jisas: “Masta, ?Wanem loa blong God nao i hae moa long ol narafala loa, i winim olgeta evriwan?” Hem i ansa:
“Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.
“Hemia nao loa ya we i hae moa long ol narafala loa, mo i nambawan blong folem.
“Mo narawan, we kolosap i semmak, i talem se: ‘Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu” (Matiu 22:36–39).
Mi no save abaot yu, be taem mi ridim tufala bigfala komanmen ia, mi faenem wan nambatri komanmen aot long tufala: blong lavem yuwan.
?Yu bin gat tingting ia se blong lavem yuwan i olsem wan komanmen? ?Yumi save lavem God mo ol pikinini blong Hem sapos yumi no save lavem yumiwan?
Wan waes lida i bin givim wan kaonsel long wan man we i stap traem blong winim ol yia we hem i bin mekem ol nogud joes. Man ia i filim sem, gat tu tingting se hem i no gud inaf blong kasem lav blong ol nara man.
Lida blong hem i talem se: “Lod i save yu, i lavem yu, mo hem i glad long yu wetem ol step ia we yu stap tekem.” Be afta hem i talem moa: “[Yu] nidim blong harem komanmen ia blong lavem yuwan so yu save filim lav blong [God] mo lavem ol narafala man.”
Taem brata ia i harem kaonsel ia, hem i luk laef wetem ol niu ae. Afta hem i talem se: “mi bin spendem ful laef blong mi blong traem faenem pis mo blong oli save akseptem mi. Mi bin lukaotem ol samting ia long plante rong ples. Tru nomo long lav blong Papa long Heven mo long Sevya nao mi save faenem kamfot. Mi save se oli wantem mi blong lavem miwan, hem i wei ia nomo we i tru we mi save filim lav blong olgeta long mi.”
Papa blong yumi long Heven i wantem yumi blong lavlavem yumiwan—i no blong gat hae tingting o putum yu faswan, be blong luk yumiwan olsem we Hem i luk yumi: Hem i laekem ol pikinini. Taem ol trutok ia oli draon gud insaed long ol hat blong yumi, lav blong yumi long God i gro. Taem yumi luk yumiwan wetem bigfala respek, ol hat blong yumi oli open blong save mekem sem samting long ol narawan tu. Moa yumi luksave hamas yumi tabu, moa yumi andastanem tabu trutok ia: se God i bin sendem yumi kam stret long ples ia, naoia, long taem ia blong histri, so yumi save mekem ol gudfala samting wetem ol talem mo presen we yumi gat. !Hemia i taem blong yumi! (Luk long Russell M. Nelson, “Becoming True Millennials” [wol divosen blong ol yang adalt, 10 Jenuware 2016], broadcasts.ChurchofJesusChrist.org.)
Josef Smit i bin tijim se evri profet, long evri yia, “i luk fored wetem glad long dei we yumi laef; … oli bin singsing mo raetem mo profesae abaot dei ia blong yumi; … yumi ol pipol we God i laekem mo i [jusum] blong mekem i hapen Lata-dei glori ia” (Teachings of Presidents of the Church: Joseph Smith [2007], 186).
Taem yu fesem ol evri dei jalenj blong yu, tingbaot toktok blong kamfot we Elda Jeffrey R. Holland i bin givim: “I gat plante tumas long solda blong yumi, be bae i wan eksperiens we i fulap wetem glori mo sakses. … Viktri blong las kompetisen ia, oli bin singaotem finis. Viktri ia i stap finis long ol rekod buk ia … , ol skripja! (“Be Not Afraid, Only Believe” [toktok i go long ol eduketa blong Relijin blong Jos Edukesen Sistem, 6 Feb 2015], broadcasts.ChurchofJesusChrist.org).
Long naes Ista wiken ia, mi save mekem invitesen ia blong yumi evri wan i prea blong luksave mo mekem wetem ol wok blong yumi wetem gladhat, taem yumi stap rere from dei blong glori ia taem Sevya bae i kam bakegen. !Lod i lavem yumi moa bitim we yumi save andastanem, mo bae Hem i ansarem ol prea blong yumi! Nomata se yumi stap long futbol fil, long wan rum blong hospital, o long eni nara ples, yumi save stap wan impoten pat blong ol naesfala taem ia—from !hemia i taem blong yumi! Long nem blong Jisas Kraes, amen.