Tij Folem Wei blong Sevya
Responsabiliti ia, i skwea i stap antap long wanwan long yumi, blong yumi folem eksampol blong Masta mo tij semmak olsem Hem.
Ol Nambawan Tija we Oli No Olsem Ol Narawan
Sam manis i pas, wan foma skul fren blong mi we i blong homtaon blong Ovaton, Nevada, i talem se mitufala i putum wan Krismes presen blong kindi tija blong mitufala we i jes selebretem 98 betdei blong hem. Hem i bin tijim mifala blong stap kaen, se i impoten blong gat medeldei slip, glad blong gat wan glas melek mo strong biskit, mo blong lavlavem wanwan long mifala. Tangkyu Sista Davis, from yu bin wan gudfala tija.
Mi bin gat wan nara nambawan tija taem mi bin go long Riks Kolej plante yia i pas. Mi bin stap rere blong givim seves long wan misin, mo mi ting se bae i help blong go long klas blong rere ol misinari. Wanem mi bin gotru long hem, i bin jenisim laef blong mi.
Stat long fas dei blong klas, mi bin luksave se mi mi stap wetem wan masta tija wantaem. Tija ia, hem i Brata F. Melvin Hammond. Mi bin save se Brata Hammond i lavem Lod, mo hem i bin lavem mi. Mi bin save luk hemia long fes blong hem, mo harem long voes blong hem. Taem hem i stap tij, Spirit i stap givim moa laet long maen blong mi. Hem i bin tijim doktrin, be tu, hem i invaetem mi blong lanem hemia miwan. Invitesen ia i bin helpem mi blong luk klia se i responsabiliti blong mi blong lanem doktrin blong Lod, blong miwan. Eksperiens ia i jenisim mi blong oltaem. Tangkyu Brata Hammond, blong stap tij folem wei blong Sevya.
Ol brata mo sista. Evriwan i wantem gat kaen eksperiens ia blong lanem samting, tugeta, long hom mo long Jos.
Taem oli presentem Kam Folem Mi, hemia i givim wan visen abaot wanem tijing olsem hemia blong Kraes i save mekem long laef. Insaed i talem se: “Stamba blong lanem mo tijim gospel i blong jenisim laef moa i go long Jisas Kraes, mo blong helpem yumi kam moa olsem Hem. … Be kaen wei ia blong lanem gospel, we i stap mekem fet blong yumi i kam strong moa, mo i stap lidim yumi long merikel ia blong jenisim yumi, i no hapen evriwan long wan taem ia nomo. Kaen wei ia, i go i bitim klasrum mo i go kasem hat mo hom blong wanwan.”1
Ol skripja oli talem se, seves ia blong Sevya long Amerika blong bifo, i bin tajem laef mo evriwan, mekem se “evri pipol oli bin jenisim laef i go long Lod, long ful fes blong graon, Ol Man blong Nifae tugeta wetem Ol Man blong Leman, mo i no bin gat ol faet mo ol rao long medel blong olgeta, mo evri man i gat gudfala fasin, wan wetem narawan.”2
?Olsem wanem tijing blong yumi i save tajem olgeta yumi lavem long semmak wei? ?Olsem wanem yumi save kam moa olsem Sevya mo helpem ol narawan blong oli kam blong jenisim laef blong olgeta moa? Letem mi givim yufala samfala tingting.
Mekem Olsem Sevya
Faswan mo impoten wan, yu tekem long yuwan diuti blong lanem evri samting we yu save lanem abaot Masta Tija. ?Olsem wanem nao Hem i bin soemaot lav long ol narafala man? ?Oli bin filim olsem wanem taem Hem i bin stap tij? ?Wanem nao Hem i bin stap tijim? ?Wanem nao Hem i wantem luk olgeta we Hem i stap tijim, oli mekem? Afta we yu luklukgud long ol kwestin olsem, skelem mo stretem wei blong yu blong stap tij blong i kam moa olsem wei blong Hem.
Jos i givim plante risos blong tij long Gospel Library Ap mo long ChurchofJesusChrist.org. Wan risos ia, taetol blong hem i Tij Folem Wei blong Sevya. Mi stap invaetem yu blong ridim mo stadi evri toktok blong buk ia. Olgeta prinsipol ia, bambae oli helpem yufala long ol hadwok blong yufala blong kam moa olsem Kraes long tijing blong yufala.
Openem Doa long Paoa blong Ol Famli
Nekis tingting blong mi, bae mi save soemaot wetem wan eksperiens we mi bin gat, sam manis i pas, taem mi bin stop blong visitim wan gud fren blong mi. Mi save harem waef blong hem long bak, we i stap toktok wetem wan, mekem se mi talem tata kwiktaem blong hem i save gobak long famli blong hem.
Wan aoa afta olsem, mi kasem wan teks mesej we i kam long swit waef blong hem: “Brata Newman, tangkyu tumas blong kam pas. Mitufala i sapos blong invaetem yu i kam insaed, be mi wantem talem wanem mitufala i bin stap mekem. Stat long wol sik ia, mifala i bin stap toktok raon long Kam Folem Mi wetem ol adalt pikinini blong mitufala evri Sandei tru long Sum (Zoom). Hemia i bin mekem ol merikel stret. Mi ting se, hemia i fas taem we gel blong mitufala i bin ridim Buk blong Momon hemwan. Tedei, hem i las lesen abaot Buk blong Momon, mo mifala i jes stap finis taem yu kam pas. … Mi bin ting se bae yu intres blong harem olsem wanem Kam Folem Mi, Sum, mo wan wol sik i bin givim wan janis long wan stret taem blong jenisim wan hat. Hemia i mekem se mi askem miwan se, hamas moa smol merikel nao i bin stap tekem ples long defren kaen taem ia.
Long mi, i saon olsem promes blong Presiden Russell M. Nelson i stap kamtru, hemia promes blong Oktoba 2018. Hem i talem se, blong fasin blong lanem gospel long hom we i senta mo Jos i sapotem, “i gat paoa blong openem doa long paoa blong ol famli, taem we wanwan famli i folem hemia wetem ful tingting mo kea blong jenisim hom blong olgeta i kam wan tabu ples blong fet. Mi promes se taem yu stap wok strong blong jenisim hom blong yu i kam wan senta blong lanem gospel, wetem taem, bae ol Sabat dei blong yufala bae oli kam wan tru glad. Mifala i wantem luk se ol pikinini blong yufala oli glad tumas blong lanem samting, mo blong laef folem ol tijing blong Sevya. … Ol jenis insaed long famli blong yufala bae i bigwan mo i sapotem yufala.”3 !Hemia i wan gudfala promes!
Blong i jenisim laef tru, jenis ia long Jisas Kraes, i mas tekem ful sol blong yumi, mo i mas kavremap evri eria blong laef blong yumi. From hemia nao, bae i mas lukluk nomo long senta blong laef blong yumi—ol famli mo hom blong yumi.
Tingbaot se Fasin blong Jenisim Laef, I Wok blong Yuwan
Las tingting blong mi, i blong tingbaot se fasin blong jenisim laef i mas kam long insaedhat. Olsem we oli soem long parabol blong ol ten yangfala gel, yumi no save givim long wan narawan, oel ia we i jenisim laef blong yumi, plante olsem we maet yumi wantem mekem. Olsem we Elda David A. Bednar i bin tijim: “Gud mo impoten oel ia, oli kasem wan smol drop long wan taem … wetem fasin blong wet longtaem mo hadwok. I no gat sotkat i stap; i no gat las minit wok blong rere we i posibol.”4
Kam Folem Mi i folem trutok ia. Mi stap komperem hemia long enjel ia we i bin helpem Nifae blong hem i lanem abaot Jisas Kraes taem i talem long hem: “!Luk!”5 Olsem enjel ia, Kam Folem Mi i stap invaetem yumi blong lukluk long ol skripja mo ol toktok blong ol profet blong tedei blong save faenem Sevya mo harem Hem. Olsem Nifae, bae Spirit i tijim yumi stret taem yumi stap ridim, mo tingting hevi long toktok blong God. Kam Folem Mi i springbod ia we i letem mifala blong daev dip long ol wota we oli stap laef blong doktrin ia blong Kraes.
Responsabiliti blong wan papa mo mama, i semmak long plante defren wei. Ol pikinini oli karem plante samting aot long papa mo mama blong olgeta, be wan testemoni, i no wan long olgeta samting ia. Yumi no save givim wan testemoni long ol pikinini blong yumi moa bitim we yumi save mekem wan sid i gro. Be yumi save givim wan ples blong kaekae, wetem gudfala graon, we i fri long ropnil we bae i “jokem toktok ia.” Yumi save traehad blong krietem ol gudfala situesen blong mekem se, ol pikinini blong yumi—mo ol narawan we yumi lavem—i save faenem wan ples blong sid ia, “i lisin [long toktok] mo i save mining blong hem,”6 mo oli faenem olgetawan se “sid ia hem i wan gudfala sid.”7
Sam yia i pas, boe blong mi, Jack, mo mi, i bin gat janis blong plei long Olfala Kos long Sent Andru long Skotlan, ples we golf gem i stat long hem. !Hem i rili wan gudfala samting! Taem mi kambak, mi traem blong talem ol narawan se eksperiens blong mi i bin gud evriwan. Be mi no save mekem. Ol foto, ol vidio, mo ol bes toktok blong mi, oli no naf blong tokbaot. Laswan nao, mi luksave se, wan wei nomo blong wan i save se i gud hamas blong go long Sent Andru, hem i blong hemwan i go—blong luk ol bigfala ples, pulum gud win, filim win long fes, mo kilim smol balong i go aotsaed smol long hol blong graon, i go long bus mo ol dak bus, mo mifala i save mekem gud hemia.
I semmak olsem wetem toktok blong God. Yumi save tijim, yumi save prijim, yumi save eksplenem. Yumi save tokbaot, yumi save tokbaot gud evri saed, yumi save testifae tu abaot hemia. Be kasem taem we wan i filim tabu tok ia blong God we i stap draon sloslo insaed long sol blong hem, semmak olsem ol smolsmol ren we oli kam long heven tru long paoa blong Spirit,8 bae i olsem se yu stap lukluk long wan poskad, o holidei foto blong wan. Yuwan, yu mas go long ples ia. Fasin blong jenisim laef, i wan wokbaot blong yuwan—wan wokbaot blong kam tugeta wanples.
Evriwan we i stap tij long hom mo long jos, i save givim long narawan, janis ia blong gat eksperiens blong olgetawan long saed blong spirit. Tru long ol eksperiens ia, bae oli kam blong “save trutok long saed blong evri samting” olgetawan.9 Presiden Nelson i tijim: “Sapos yu gat ol tru kwestin abaot gospel o Jos, taem yu stap jusum blong letem God i stap win, bae yu stap wokbaot blong faenem mo andastanem ol ful trutok we oli no save finis we bae oli lidim laef blong yu, mo bae oli helpem yu blong stap strong long kavenan rod ia.”10
Kam Antap Bigwan blong Stap Tij
Mi invaetem ol lida mo ol tija long evri oganaesesen blong Jos blong oli kaonsel tugeta wetem ol papa mo mama mo ol yut blong save kam antap bigwan long fasin blong stap tij long evri level—long ol stek, long ol wod, mo long ol hom. Yumi mekem hemia i hapen taem bae yumi tijim doktrin mo stap invaetem blong gat ol storian we i fulap wetem Spirit abaot ol trutok we Tabu Spirit i bin tijim yumi long ol kwaet taem blong stadi blong yumiwan.
Ol dia fren blong mi long Kraes. Responsabiliti ia, i skwea i stap long wanwan long yumi, blong yumi folem eksampol blong Masta mo tij semmak olsem Hem. !Wei blong Hem, i tru wei ia nao! Taem yumi stap folem Hem, “taem we bae hem i kamkamaot, bae yumi stap olsem hem, from bae yumi luk hem olsem we hem i stap; blong yumi save gat hop ia; blong yumi save kam klin evriwan olsem we hem i klin evriwan.”11 Long nem blong Hem we i bin girap, Masta Tija Hemwan, we i Jisas Kraes, amen.