Praevet Wokbaot blong Wan Pikinini blong God
Olsem ol kavenan pikinini blong God, yumi lavem, givim ona, fidim, protektem, mo welkamem olgeta spirit ia we oli stap kam long laef bifo laef long wol ia.
Wanwan long yumi, wol sik ia i spolem hem, mo sam famli mo fren oli muv kwiktaem oli aot long wol ia i go. Bae mi wantem luksave tri long olgeta we yumi misim bigwan, we oli ripresentem olgeta we yumi lavem olgeta.
Hemia Brata Philippe mo Sista Germaine Nsondi. Brata Nsondi, we i stap olsem petriak blong Brasavil Ripablik blong Kongo Stek, taem hem i pasawe. Hem i wan medikol dokta we i serem talen blong hem bigwan wetem ol narawan.1
Hemia i Sista Klara Elisa Ruano de Vilaril we i blong Tulkaan, Ekuado. Hem i akseptem gospel ia we i kambak taem hem i bin gat 34 yia, mo i wan lida we oli lavem hem. Famli blong hem i talem tata taem oli singsing fevret hym blong hem: “Mi Save Ridima Hem i laef.”2
Hemia i Brata Rei Tuineau blong Yuta, wetem naes famli blong hem. Waef blong hem, Juliet, i talem: “Mi wantem ol boe blong mi blong oli tingbaot se papa blong olgeta, oltaem i traem blong putum God i kam faswan.”3
Lod i talem: “Bae yufala i mas laef tugeta wetem lav, mekem se bae yu krae from olgeta we oli ded.”4
Long taem we yumi stap krae, yumi stap glad tu long bigfala Laef Bakegen long Ded blong Sevya blong yumi. From Hem, olgeta we yumi lavem olgeta mo ol fren bambae oli gohed long wokbaot blong olgeta blong taem we i no save finis. Olsem we Presiden Josef F. Smit i eksplenem: “Yumi no save fogetem olgeta; yumi no stap stop blong lavem olgeta. … Oli bin muv fored; yumi stap muv fored; yumi stap groap olsem we oli stap groap.5 Presiden Russell M. Nelson i talem: “Wota blong harem nogud blong yumi … oli tanem i kam ol krae blong hop.”6
Yumi Save Abaot Laef Bifo Yumi Bon I Kam long Wol Ia
Lukluk blong yumi long taem we i no save finis i no mekem se andastaning blong yumi i go bigwan moa abaot olgeta ia we oli stap gohed long wokbaot blong olgeta afta long laef ia, be tu, i openem andastaning blong yumi abaot olgeta we oli eli long wokbaot blong olgeta mo oli jes kam long laef ia.
Wanwan we i kam long wol ia, i wan boe o gel blong God, we i no gat wan moa i semmak long hem.7 Wokbaot blong yumiwan, i no bin stat taem yumi bon i kam long wol ia. Bifo yumi bon i kam, yumi bin stap tugeta long wan wol we yumi bin stap rere, wan ples we yumi “bin kasem ol fas lesen blong [yumi] long wol blong ol spirit.”8 Jehova i bin talem long Jeremaea: “Taem mi mi no wokem yu yet long bel blong mama blong yu, be mi mi save yu finis. Mo taem yu no bon yet, … mi mekem yu yu tabu.”9
Sam bae oli save kwestinim se, laef i stat taem i wan smol bebet long bel, o taem hat i stat blong pam, o taem bebi i save laef aotsaed long bel, be long yumi, i no gat kwestin se ol spirit gel mo boe blong God oli stap long praevet wokbaot blong olgeta finis taem oli stap kam long wol blong kasem wan bodi mo go tru long laef we man i save ded.
Olsem ol kavenan pikinini blong God, yumi lavem, givim ona, fidim, protektem, mo welkamem olgeta spirit ia we oli stap kam long laef bifo laef long wol ia.
Bigfala Sapraes Kontribusen blong Ol Woman
Long wan woman, blong gat pikinini i save stap olsem wan bigfala sakrifaes long bodi, filing mo mane. Mifala i lavem mo givim ona long ol nambawan woman blong Jos ia. Wetem waes tingting mo waes, yufala i tekem ol hevi trabol blong famli blong yufala. Yufala i givim lav. Yufala i givim seves. Yufala i mekem sakrifaes. Yufala i mekem fet i kam strong moa, givhan long olgeta long nid, mo yufala i givim fulap i go long sosaeti.
Tabu Responsabiliti Ia blong Kipim Laef I Sef
Sam yia i pas, taem hem i gat bigfala wari long bigfala namba blong abosen long wol, Presiden Gordon B. Hinckley i toktok long ol woman blong Jos wetem ol toktok we i stret long taem blong yumi tedei. Hem i talem se: “Yufala we yufala i ol waef mo ol mama, yufala i ol angka blong famli. Yufala i tekem ol pikinini i kam long wol. Hemia i wan bigfala mo tabu responsabiliti. … ?Wanem i stap hapen long fasin blong yumi talem tangkyu from tabu laef blong man? Abosen o kilim bebi long bel, i wan devel wok, i no gud mo i wan rabis wok, we i stap swipim wol. Mi plis long ol woman blong Jos ia blong sakemaot fasin ia, blong ting hae moa bitim hemia, blong stap longwe long ol kaen situesen ia nomata yu luk se i gud. Bae i gat samfala situesen nomo we i save hapen olsem, be oli wanwan nomo.10 … Yufala nao yufala i ol mama blong ol boe mo ol gel blong God, we ol laef blong olgeta i tabu. Blong kipim olgeta i sef, i wan responsabiliti we God i givim we i no blong pusum i go long saed.11
Elda Marcus B. Nash i bin serem long mi stori blong wan dia woman we i gat 84 yia, we long taem blong baptaes intaviu blong hem, i “talem se hem i bin gat wan abosen plante yia i pas.” Wetem sore long hat hem i talem: “Mi bin karem hevi trabol ia blong gat wan abosen evri dei long laef blong mi blong 46 yia. … I no gat wan samting we mi mekem bae i karemaot soa mo sem ia long mi. Mi no gat hop kasem taem oli tijim tru Gospel blong Jisas Kraes. Mi bin lanem olsem wanem blong sakem sin … mo kwiktaem, mi fulap wetem hop. Mi kam blong save se mi save kasem fogivnes sapos mi sakem sin wetem tru hat.12
Mi talem tangkyu from ol tabu presen blong fasin blong sakem sin mo fogivnes.
?Wanem Nao Yumi Save Mekem?
?Wanem i responsabiliti blong yu olsem ol disaepol blong Jisas Kraes we i gat pis? Bae yumi laef folem ol komanmen blong God, tijim ol komanmen ia long ol pikinini blong yumi, mo serem olgeta wetem ol narawan we oli wantem lisin.13 Bae yumi serem ol dip filing blong yumi abaot hamas laef i tabu, wetem olgeta we oli mekem desisen long sosaeti. Maet bae oli no save andastanem fulwan wanem yumi stap biliv long hem, be yumi prea se bae oli kam blong andastanem moa, from wanem, long yumi, ol desisen ia i bitim wanem we wan i wantem blong laef blong hemwan.
Sapos i gat wan pikinini i stap kam, we oli no plan from, bae yumi go help, wetem lav, toktok blong leftemap tingting, mo taem i nid, help long mane, mo mekem wan mama i kam strong moa blong hem i letem pikinini blong hem i bon i kam mo i gohed long wokbaot blong hem long laef ia.14
Adopsen I Wan Samting we I Naes Tumas
Long famli blong mifala, mifala i bin gat bigfala blesing, taem we, twante yia i pas, wan yangwan blong 16 yia i lanem se hem i gat bel. Hem mo papa blong bebi i no mared, mo tufala i no luk se bae tufala i save stap tugeta. Yang woman ia i biliv se laef we i stap insaed long hem, i no blong spolem. Hem i bonem bebi gel ia mo i letem wan famli wetem stret mo gud fasin i adoptem bebi ia olsem i blong tufala. Long Bryce mo Jolinne, yang mama i ansa blong prea blong tufala. Tufala i singaotem bebi ia, Emily, mo tijim hem blong trastem Papa blong yumi long Heven mo Pikinini blong Hem, Jisas Kraes.
Emily i groap. Mitufala i talem tangkyu tumas se Emily mo apuboe blong mitufala, Christian, tufala i lavlavem tufala mo mared long haos blong Lod. Emily mo Christian, naoia tufala i gat wan smol gel blong tufala.
Emily i raetem: “Truaot ol las naen manis we mi gat bel, mi gat taem blong tingtingbak long ol taem we bae mi bon i kam long wol. Mi tingting long stret mama we i bonem mi, we i gat sikstin yia nomo. Taem mi gotru long sobodi mo jenis we i kam taem woman i gat bel, mi no save stop blong tingting se, hamas nao i bin had blong gat bel long 16 yia. … Wota blong ae i foldaon naoia taem mi tingting long stret mama blong mi, we i save se hem i no save givim mi laef ia we hem i wantem blong mi, mo i no selfis, i putum mi blong oli adoptem mi. Mi no save tingting nomo long wanem hem i go tru long hem long ol naen manis ia—we ol ae oli stap luk hem we oli stap jajem hem taem bodi blong hem i jenis; ol gud yang taem we hem i mestem, mo i save se, long en blong bigfala wok wetem lav blong wan mama, bae hem i putum mi long han blong wan narawan. Mi talem tangkyu tumas from joes blong hem, se hem i no jusum blong yusum fridom blong joes blong hem long wan wei we bae i tekemaot fridom blong joes blong mi.” Emily i talem laswan: “mi mi talem tangkyu tumas from plan ia blong Papa long Heven, from ol gudgudfala papa mo mama blong mi we tufala i lavem mo kea long mi, mo from ol tempol we yumi save silim ol famli blong yumi blong taem we i no save finis.”15
Sevya “i tekem wan pikinini, i putum hem i stanap long medel blong olgeta. Hem i putum han blong hem i goraon long pikinini ya, nao i talem long olgeta se, ‘Man we i wantem ona long mi, nao i tekem wan pikinini olsem, i stap lukaot gud long hem, i olsem we hem i tekem mi, i stap lukaot gud long mi.’”16
Taem we Oli Stret mo Gud Tingting blong Hat Oli No Hapen Yet
Mi talemaot lav mo sore blong mi from ol stret mo gud kapol we oli mared, mo oli no save gat pikinini we oli wantem tumas, mo olgeta woman mo man ia we oli no gat janis blong mared folem loa blong God. Ol drim blong laef ia we oli had blong andastanem, be nomo sapos yumi lukluk olgeta wetem lukluk long laef long wol ia. Olsem wan wokman blong Lod, mi promesem yufala se, taem yufala i stap fetful long Jisas Kraes mo ol kavenan blong yu, bambae yufala i kasem ol blesing long laef ia we oli bigwan semmak, mo ol stret mo gud tingting blong hat blong yufala bae yufala i kasem long taem laen we i no save finis, blong Lod.17 I save gat hapines long wokbaot blong laef long wol ia, iven taem evri stret mo gud hop blong yumi, oli no kamtru.18
Afta we oli bon i kam long wol, ol pikinini oli gohed blong nidim help blong yumi. Sam oli nidim help ia bigwan. Evri yia, tru long ol bisop we oli kea mo ol bigfala kontribusen blong fas ofring mo yumaniterian basket, laef blong ol milian mo ol milian pikinini oli kasem blesing. Fas Presidensi i jes anaonsem wan moa 20 milian dola blong helpem UNICEF long wol hadwok blong olgeta blong givimaot tu bilian stik meresin.19 Ol pikinini, God i lavem olgeta.
Tabu Desisen Ia blong Gat Wan Pikinini
Hem i wan wari we, long samfala kantri blong wol we oli gat gudlaef mo mane, i no gat tumas pikinini i bon.20 “Komanmen blong God long saed blong ol pikinini blong Hem, we i blong oli kam plante mo fulumap wol ia, i stap yet naoia.”21 Wetaem blong gat pikinini, mo hamas pikinini blong gat, i wan praevet desisen bitwin wan hasban mo waef mo Lod. Wetem fet mo prea, ol tabu desisen ia i save kam ol eksperiens we i naes, we i kam tru long revelesen.22
Mi serem stori blong Laing famli, long Saot Kalifonia. Sista Rebeka Laing i raetem:
“Long Samataem blong 2011, laef blong famli blong mifala i stret gud nomo. Mitufala i mared mo hapi wetem fo pikinini—we oli gat 9, 7, 5, mo 3 yia.
“Evri taem mi gat bel mo karem bebi, mi bin stap long denja … mo mitufala i filim blesing ia blong gat fo pikinini, mo ting se famli blong mitufala i fulwan ia nao. Long Oktoba, taem mi stap lisin long jeneral konfrens, mi filim filing ia we i no gat mistek long hem, se bae mitufala i mas gat wan moa bebi. Taem we LeGrand mo mi i tingting hevi mo prea from, … mitufala i bin save se God i gat wan defren plan long mitufala, be i no wanem mitufala i stap plan long hem.
“Afta wan nara taem blong gat bel mo karem bebi, we i bin had, mitufala i gat blesing ia blong gat wan naes bebi gel. Mitufala i singaotem hem, Brielle. Hem i bin wan merikel. Sam taem afta we hem i bon, mo mi stap yet long rum blong bonem bebi, mi harem voes blong Spirit i klia: ‘i gat wan moa.’
Tri yia afta, wan nara merikel i hapen, Mia. Brielle mo Mia, tufala i wan bigfala glad long famli blong mifala. Hem i talem laswan: “Blong stap open long daereksen blong Lod mo blong stap folem plan ia we Hem i gat long yumi, oltaem bae i tekem moa bigfala hapines i kam bitim blong stap dipen long harem save blong yumiwan bakegen.”23
Sevya i lavem wanwan impoten pikinini.
“Mo hem i bin tekem ol smol pikinini blong olgeta wan afta narawan, mo i bin blesem olgeta. …
“Mo … oli bin sakem ol ae blong olgeta i go long heven, mo … oli bin luk ol enjel i stap kamdaon aot long heven olsem we i stap long medel blong faea; mo oli bin kam daon mo oli bin raonem ol smol wan ia, … mo ol enjel i bin givhan long olgeta.”24
Mi testifae se praevet wokbaot blong yumi, olsem wan pikinini blong God, i no bin stat taem we fasfala win i kam insaed long lang blong yu, mo bae i no en taem we yu pulum las win blong yu long laef long wol ia.
Bae oltaem, bae yumi tingbaot se wanwan spirit pikinini blong God i stap kam long wol ia, i folem stret wokbaot blong hemwan.25 Bae yumi welkamem olgeta, protektem olgeta, mo oltaem lavem olgeta. Taem yu tekem mo akseptem ol impoten pikinini ia long nem blong Sevya, mo helpem olgeta long wokbaot blong olgeta we i no save finis, mi promesem yufala se Lod bae i blesem yufala, mo bae i mekem yufala i swim long lav mo glad blong Hem. Long nem blong Jisas Kraes, amen.