Rum long Hotel
Long Ista ia, Jisas Kraes i stap invaetem yumi blong kam, olsem Hem, olsem wan gudfala Man Sameria, blong mekem Hotel blong Hem, (Jos blong Hem) i wan ples blong evriwan i save kam haed long hem.
Ol dia brata mo sista. Nomata we hem i pasawe 20 yia i pas finis, i gat samfala taem we mi misim papa blong mi. Ista i promesem se bambae mi luk hem bakegen.
Taem mi stap long hae skul long Inglan, papa blong mi i kam luk mi. Hat blong papa i bin save se mi misim hom.
Papa blong mi i laekem blong traem niu samting, be i no niu kaekae. Iven long Franis, we man i save gud gudfala kaekae blong hem, bae hem i talem: “Yumi go kakae Jaenis.” Hem i wan petriak long Jos we i stap longtaem, papa hem i gat Spirit o i gat lav mo sore. Wan naet, taem ol imejensi trak oli pas wetem laod noes tru long Paris, hem i talem: “Gerrit, ol krae ia, oli ol kil blong wan siti.”
Long wan trip, mi bin filim ol nara krae mo kil. Wan yang woman i stap salem aeskrim, i pusum wan smol wilkat. Flaoa kap blong hem i stret saes blong wan spun aeskrim. From sam risen, wan bigfala man i tok long yang woman. I singaotem mo pusum hem, i kapsaetem wilkat blong hem, mekem aeskrim flaoa kap blong hem i go olbaot. Mi no save mekem wan samting taem hem i purumbut antap long ol flaoa kap ia wetem but blong hem. Mi save luk yet, yang woman ia, we i nildaon long rod, i traem blong sevem ol pisis blong flaoa kap we i brokbrok, we wota blong wari i ron long fes blong hem. Pikja ia i stap wetem mi yet, i rimaenem mi long fasin we i no kaen, i no kea, i no gat andastaning, we fulap taem, yumi givim long narafala man.
Wan aftenun, kolosap long Paris, papa blong mi mo mi i bin visitim bigfala katedral long Jarts. Malcolm Miller,1 wan man we i save gud ol katedral, i poenem ol trifala kalkala windo. Hem i talem se oli talem wan stori.
Fas windo i soem Adam mo Iv i stap aot long Garen blong Iden.
Sekenwan i tokbaot parabol blong Gudfala Man Sameria.
Nambatri i soem Seken Kaming blong Lod.
Taem yu putum tugeta, ol trifala kalkala windo ia oli save tokbaot wokbaot blong laef blong yumi we i no save finis. Oli stap invaetem yumi evriwan blong yumi welkamem evriwan long wan rum long hotel blong Hem.2
iStock.com/digitalimagination
Semmak olsem Adam mo Iv, yumi kam long wan wol blong ropnil mo rabis gras.3
iStock.com/digitalimagination
Long rod blong das we i go long Jeriko, oli faetem yumi, givim kil mo oli lego yumi wetem sobodi.4
Nomata we yumi sapos blong helhelpem yumi, plante taem, yumi krosem rod, mo wokbaot longwe from sam risen.
Be, wetem lav mo sore, Gudfala Man Sameria ia i stop, i mekemgud ol kil blong yumi wetem waen mo oel. Ol simbol blong sakramen mo ol nara odinens, we oli waen mo oel, i poenem yumi i luk long hiling, long saed blong spirit, we i stap long Jisas Kraes.5 Gudfala Man Sameria i putum yumi antap long dongki blong Hem, o long sam stori long kalkala windo, i tekem yumi antap long ol solda blong Hem. Hem i tekem yumi i go long hotel, we i save ripresentem Jos blong Hem. Long Hotel ia, Gudfala Man Sameria i talem: “lukaot gud long hem. …, mo taem mi kambak, bambae mi pemaot yu.”6 Gudfala Man Sameria, simbol blong Sevya blong yumi, i promes se bae i kambak, be long taem ia, i kam wetem paoa mo glori.
iStock.com/digitalimagination
Long Ista taem ia, Jisas Kraes i stap invaetem yumi blong kam, olsem Hem, olsem wan gudfala Man Sameria, blong mekem hotel blong Hem, (Jos blong Hem) i wan ples blong evriwan i save kam haed long ol kil mo strong win blong laef.7 Yumi stap rere from Seken Kaming blong Hem we Hem i promesem, taem we, evri dei, yumi mekem samting long “hem we i moa daon” long yumi,8 semmak olsem we bae yumi mekem long Hem. “Wan we i moa daon ia,” i wanwan long yumi.
Taem yumi kam, wetem Gudfala Man Sameria, long Hotel ia, yumi lanem faef samting abaot Jisas Kraes, mo yumiwan bakegen.
Faswan, yumi kam long Hotel ia olsem we yumi stap, wetem ol smol wiknes mo ol samting we yumi no stret long olgeta. Yet, yumi evriwan i gat wan samting blong givim. Wokbaot blong yumi i go long God, yumi faenem tugeta. Yumi pat blong wan komuniti we i yunaet—we yumi fesem wol sik, ol strong win, ol wael faea, ol drae taem, o taem yumi lukluk long ol nid blong yumi long kwaet fasin. Yumi kasem insperesen taem yumi kaonsel tugeta, yumi stap lisin long wanwan, mo long wanwan sista tu, mo long Spirit.
Taem hat blong yumi i jenis, mo yumi kasem pikja blong Hem long fes blong yumi,9 yumi luk Hem mo yumiwan insaed long Jos blong Hem. Long Hem, yumi luk samting i klia, i no fasin blong no agri. Long Hem, yumi faenem risen blong mekem gud, blong stap gud man o woman, mo kasem moa paoa blong kam gud moa. Long Hem, yumi faenem fet we i stap, fasin blong no stap selfis we i mekem yumi fri, jenis wetem kea, mo tras long God. Long Hotel blong Hem, yumi faenem mo gat moa dip rilesensip wetem God, Papa blong yumi, mo wetem Jisas Kraes.
Hem i trastem yumi blong help blong mekem Hotel ia, i ples we Hem i nidim blong stap long hem. Taem yumi givim ol talen mo bes hadwok blong yumi, ol presen blong Hem long saed blong spirit blong Hem, oli stap mekem yumi kam strong moa mo i blesem yumi.10
Wan intepreta blong Spanis lanwis i talem long mi: “Elda Gong, mi bin save, tru long Spirit, se wanem we bae yu talem, bae mi save talem tru long presen blong toktok ol lanwis” fetful brata ia i talem.
Ol presen blong fet ia mo kwaet tingting oli kam, long ol defren wei folem ol defren situesen. Wan dia sista we i kasem kamfot long saed blong spirit taem hasban blong hem i pasawe from KOVID 19. Hem i talem: “Mi save se dia hasban mo mi, bae mitufala i stap tugeta bakegen.” Long wan defren KOVID situesen, wan nara dia sista i talem: “Mi filim se mi mas askem long Lod mo ol dokta blong oli givim hasban blong mi jes blong wan smol taem moa.”
Nambatu. Hem i askem yumi blong mekem Hotel blong Hem i wan ples blong kasem gladhat mo gat spes, we wanwan i save kam tugeta, mo i gat rum blong evriwan. Olsem ol disaepol blong Jisas Kraes, evriwan i ikwol, i no gat seken klas grup.
Evriwan i save kam long sakramen miting, ol nara miting long Sandei, mo ol sosol taem blong Jos.11 Yumi revren mo stap wosipim Sevya blong yumi, wetem tingting mo wetem wari long wanwan long yumi. Yumi luk mo luksave wanwan man mo woman. Yumi smael, yumi sidaon wetem olgeta we oli sidaon olgetawan, yumi lanem ol nem, wetem ol niu konvet, olgeta brata mo sista we oli kambak, ol yang woman mo yang man, wanwan dia pikinini blong Praemeri.
Spos yu gat pikja se yu yu stap long ples blong olgeta, bae yumi laekem blong gat ol fren we oli welkam, ol visita, ol niu man we oli muv i kam, we oli pulum olgeta i go long evri saed. Yumi krae sore, yumi glad, mo stap blong wanwan long yumi. Taem yumi no mekem evri samting, mo yumi hariap, gat jajmen, o tekem saed, yumi askem fogivnes long wanwan mo yumi mekem i gud moa.
Wan famli blong Afrika, we naoia i stap long Yunaeted Stet i talem: “Stat long fas dei, ol memba blong Jos we oli bin gud fren mo oli welkam. Evriwan i mekem mifala i filim se mifala i stap hom. I no gat wan i lukdaon long mifala.” Papa i talem: “Tabu Baebol i tijim se ol frut blong gospel oli kam long ol rus blong gospel.” “Mo ol misinari ia,” papa mo mama i talem, “mitufala i wantem boe mo gel blong mitufala i groap olsem ol misinari ia.” Ol brata mo sista. Bae yumi welkamem evriwan wetem open hat insaed long Hotel ia blong Hem.
Nambatri, insaed long Hotel ia blong Hem, yumi lanem se fasin we i stret evriwan, i stap long Jisas Kraes nomo, i no long fasin we i stret evriwan blong wol ia. Wanem i no ril mo i giaman, i wol blong “inaf blong Insta” we i mekem yumi filim se yumi no naf, yumi prisena blong ol fingga i glis, ol “laek” mo presprestem. Be long nara saed, Sevya blong yumi, Jisas Kraes, i save evri samting abaot yumi we yumi no wantem eni narawan i save, mo Hem i stil lavem yumi. Gospel ia, i wan gospel blong nambatu mo nambatri janis, we i posibol tru long sakrifaes blong Hem we i pemaot man.12 Hem i stap invaetem wanwan blong stap wan Gudfala Man Sameria, we i no jajem man tumas, mo i fogivim man moa, mo fogivim yumiwan bakegen, iven taem yumi stap traehad moa blong kipim ol komanmen blong Hem.
Yumi helpem yumiwan taem yumi stap helpem wanwan long yumi. Wan famli we mi save, i stap kolosap long wan rod we i bisi. Plante taem, man i stop blong askem help. Eli long wan moning, famli ia i harem wan hevi noknok long doa. Oli taed mo oli wari se hu bae i noknok long 2 klok moning, mo askem olgetawan sapos i gat wan narawan blong help, long tetaem ia nomo. Noknok long doa i gogohed, nao oli harem: “!Faea—i gat faea biaen long haos blong yufala!” Ol Gudfala Man Sameria oli stap helhelpem olgeta.
Nambafo, long Hotel blong Hem, yumi kam pat blong wan gospel komuniti ia we i lukluk nomo long Jisas Kraes, i hang strong long trutok we i kambak, ol profet mo aposol we oli laef i stap, mo wan nara testeman abaot Jisas Kraes—we i Buk blong Momon. Hem i tekem yumi i go long Hotel blong Hem, mo tu, long haos blong Hem—tabu tempol. Haos blong Lod i wan ples we, semmak olsem man we i karekil long rod i go long Jeriko, Gudfala Man Sameria i save klinim yumi mo putum klos long yumi, i mekem yumi rere blong gobak stap wetem God, mo i yunaetem yumi blong taem we i no save finis wetem famli blong God. Ol tempol blong Hem oli open long evriwan we i laef folem gospel blong Hem wetem fet mo fasin blong stap obei.
Blong stap glad long gospel i tekem tu blong gat gospel yuniti long medel blong plante laen, kalja, lanwis mo jeneresen. Taem oli brekem graon long Telasvil Yuta Tempol, Max Harker we i gat 17 yia, i serem laen blong bilif blong famli we i stat sikis jeneresen bifo, tru long bigbigfala bubuman blong hem, Joseph Harker, mo waef blong hem, Susannah Sneath. Insaed long gospel we i kambak blong Jisas Kraes, yumi save kam wan strong joen blong ol famli jeneresen blong yumi.
Laswan, we i nambafaef, yumi stap glad se God i lavem ol pikinini blong Hem wetem evri defren bakgraon mo situesen blong yumi, long evri nesen, famli, mo lanwis, wetem wan rum blong evriwan insaed long Hotel ia blong Hem.
Long ol las 40 yia, ol memba blong Jos oli kam fulap raon long wol. Stat long 1998, fulap long ol memba blong Jos oli stap aotsaed long Yunaeted Stet mo Kanada. Long 2025, mifala i ting se bae i gat sem namba long ol memba blong Jos we oli stap long Latin Amerika mo long Yunaeted Stet mo Kanada. Kam tugeta blong fetful laen blong Papa Lihae i stap mekem profesi ia i kamtru. Ol fetful Sent, wetem olgeta long taem blong paeonia, oli stap yet olsem wan bigfala tank blong givim olgetawan mo givim seves long Jos raon long wol.
Mo tu, bigfala namba blong ol adalt memba blong Jos naoia, oli no mared, oli wido, o oli divos. Hemia i wan impoten jenis. Hem i tekem moa long haf blong ol sista blong Rilif Sosaeti, mo moa long haf blong ol adalt prishud brata. Paten ia, raon long wol, i bin olsem long Jos raon long wol stat long 1992, mo long Jos long Yunaeted Stet mo Kanada, stat long 2019.
Fasin we yumi stanap long fes blong Lod mo Jos blong Hem, i no abaot hamas i mared o no, be blong yumi kam ol disaepol blong Jisas Kraes we yumi fetful mo strong.13 Ol adalt, oli wantem se oli luk olgeta olsem ol adalt, mo oli wantem gat responsabiliti mo givim samting olsem ol adalt. Ol disaepol blong Jisas Kraes oli kam long evri ples, oli evri sep, saes, kala, yia, we wanwan i gat talen, stret mo gud tingting, mo plante gud paoa blong blesem mo givim seves long man. Evri dei, yumi lukaot blong folem Jisas Kraes wetem fet blong sakem sin14 mo glad we i stap gohed.
Long laef ia, samtaem yumi stap wet long Lod. Maet yumi no stap yet long ples we yumi hop mo wantem stap long hem long fiuja. Wan strong sista i talem: “Blong stap fetful mo wet long Lod blong blesing blong Hem i kam, i wan hae tabu posisen o wei blong laef. Yumi no kasem ples ia wetem fasin blong ting nating long man, lukdaon long man, o jajem man, be, wetem ona.”15 Be blong wet kasem taem ia, yumi laef naoia, yumi no wet se laef bae i stat o tekof.
Aesea i promesem: “Be olgeta we oli stap luk long Hae God blong hem i givhan long olgeta, bambae oli luk we oltaem hem i stap givim paoa long olgeta, … oli girap olsem we oli gat wing olsem bigfala pijin ya igel. … oli save resis gogo, be leg blong olgeta i no save taed, mo oli save wokbaot i go longwe we longwe, be oli no save kam slak.”16
Gudfala Man Sameria i promes se bae i kambak. Ol merikel oli hapen taem yumi stap kea long wanwan long yumi long nem blong Hem. Taem yumi kam wetem ol hat we oli gat sore mo spirit we i wantem sakem sin,17 yumi faenem voes long Jisas Kraes, we yumi filim se ol han blong Hem we oli andastanem samting mo i putum yumi long sef ples, oli raonem yumi.18 Ol tabu odinens, oli givim wan ples blong stap tru long kavenan, mo “paoa ia olsem hemia blong God,”19 blong mekem i tabu wanem yumi filim insaed mo aksen we yumi mekem aotsaed. Wetem kaen fasin blong Hem we i gat lav mo i save stap strong, Jos blong Hem i kam Hotel blong yumi.
Taem yumi stap krietem rum insaed long Hotel blong Hem, yumi welkamem evriwan, Gudfala Man Sameria blong yumi i save hilim yumi long ol das rod blong wol ia. Wetem wan lav we i stret evriwan, Papa blong yumi wetem Pikinini blong Hem, Jisas Kraes, Tufala i bin promesem “pis long wol ia, mo laef we i no save finis long wol we bae i kam”20—“long weaples mi mi stap, bae yufala tu i stap long hem.”21 Mi glad blong mi witnes mo mi testifae olsem long tabu nem blong Jisas Kraes, amen.