Welkam Mesej
Welkam long Jeneral konfrens mo long spesel janis ia blong stap harem voes blong Lod.
Ol dia brata, mo sista, mo fren raon long wol. Mi talem welkam blong mi long yufala long jeneral konfrens ia. Yumi kam tugeta olsem wan bigfala wol famli we i wantem wosipim Lod mo Sevya blong yumi, Jisas Kraes. Tangkyu blong joenem mifala.
Las yia, oli makem plante rekod long buk blong ol rekod. From hemia, wanwan i bin lanem ol samting we hem i no bin save bifo. Sam lesen we mi bin save bifo, mi raetem long hat blong mi long sam niu wei we i tijim mi.
Eksampol. Mi save se i tru evriwan, se Lod i stap lidim ol afea blong Jos blong Hem. Hem i talem: “Bambae mi soem long yu se mi mi save mekem wok blong mi.”1
Plante taem, ol kaonsela blong mi mo mi i bin luk, tru long ae we i fulap long wota, taem Hem i bin kam, long ol taem blong bigfala jalenj, afta we mifala i bin mekem evri samting mo nomo save mekem i go moa. I tru, mifala i sapraes i stap.
Mi andastan moa gud nao wanem Hem i minim taem Hem i talem: “Bambae mi mekem wok blong mi i muv hariap moa long stret taem.”2 Bakegen mo bakegen, mi mi bin glad taem Hem i bin daerektem mo mekem wok ia blong Hem i go hariap—iven long taem blong wol sik ia.
Ol dia brata mo sista. Paoa blong Jos i stap long ol hadwok mo ol testemoni we oli gohed blong kam strong, blong ol memba. Ol testemoni, oli stap mekem olgeta oli kam antap insaed long hom. Long ol yia we i pas, plante long yufala i kam antap bigwan long stadi blong gospel insaed long hom blong yufala. Mi talem tangkyu, mo ol pikinini blong yufala bae oli talem tangkyu.
Bigfala projek blong mekem Sol Lek Tempol i niu bakegen i stap gohed. Long ofis blong mi, mi gat wan jea we i stap long fored stret, blong mi stap luk wok ia i tekem ples long tempol ples.
Taem mi stap luk ol wokman oli digimaot ol olfala tri, karemaot ol wota paep, lektrisiti rop, mo wan springwota we i lik, mi bin tingting abaot nid ia blong wanwan long yumi i mas karemaot, wetem help blong Sevya, ol olfala doti insaed long laef blong yumi.
Gospel ia blong Jisas Kraes i wan gospel blong sakem sin.3 From Atonmen ia blong Sevya, gospel blong Hem i givim wan invitesen blong gohed blong jenis, blong stap kam antap, mo kam moa klin gud. Hem i wan gospel blong hop, hiling, mo progres. From hemia, !gospel i wan mesej blong glad! Spirit blong yumi i stap glad long evri smol step we yumi mekem i go fored.
Pat blong kam tugeta blong Isrel ia, we i wan impoten pat, i wok ia we Hem i givim long yumi, olsem wan pipol, blong yumi stap klin inaf mo blong yumi wantem help blong mekem wol ia i rere from Seken Kaming blong Lod.
Taem yumi stap lisin long ol mesej we ol lida blong yumi oli rere gud anda long daereksen blong Tabu Spirit, mi stap invaetem yu blong prea blong faenemaot ol olfala doti we yu mas karemaot long laef blong yu blong mekem se yu save kam moa klin inaf.
Mi lavem yufala, ol dia brata mo sista, mo stap testifae se Papa blong yumi long Heven mo Pikinini blong Hem we Hem i Lavem, Tufala i save wanwan long yufala mo i lavem yufala wanwan. Tufala i stanap we Tufala i rere blong helpem yu long evri step i go fored we bae yu tekem. Welkam long Jeneral konfrens mo long spesel janis ia blong stap harem voes blong Lod. Long nem blong Jisas Kraes, amen.