Blesem Wan long Nem blong Hem
Stamba tingting blong yumi kasem prishud, i blong letem yumi blesem ol pipol long bihaf blong Lod, mo mekem hemia long nem blong Hem.
Ol dia brata, ol fren wokman long prishud blong God. Hem i wan ona blong mi toktok long yufala tedei. Mi givim hae respek mo tangkyu blong mi. Taem mi stap toktok wetem yufala mo harem abaot bigfala bilif blong yufala, mi mi biliv se i wan paoa blong prishud we i stap kam bigwan moa long wol, mo i gat moa strong kworom mo moa fetful man we i holem prishud.
Long smol taem blong mi wetem yufala tedei naet, bambae mi toktok long yufala we i wantem kam gud moa long prishud seves blong yuwan. Yu save wok ia we yu gat blong yu givim ona mo wok strong long singaot ia blong givim seves.1 Be ating yu askem yuwan se, long yu, bae blong givim ona mo wok strong long koling ia, i minim wanem.
Bae mi stat wetem ol niu dikon, from se, maet olgeta nao oli no savegud se i minim wanem blong givim ona mo wok strong long prishud seves. Ol elda we oli jes odenem olgeta, olgeta tu maet oli wantem lisin. Maet wan bisop we i jes statem seves blong hem bae i intres tu.
Mi lanem fulap taem mi lukbak long ol taem blong mi olsem wan dikon. Sapos nomo wan i bin talem long mi wanem we bae mi talem naoia. Maet bae mi help long evri prishud wok we oli bin givim long mi stat long tetaem ia—iven olgeta ia we mi stap kasem tedei.
Oli odenem mi kam dikon long wan branj we i smol, we miwan nomo mi dikon mo brata blong mi, Ted, i wan tija nomo. Mifala ia, i wan famli nomo insaed long branj ia. Ful branj i mit insaed long hom blong mifala. Prishud lida blong brata blong mi mo mi, i wan niu konvet we hem i jes kasem prishud tu. Mi bin biliv long tetaem ia se, prishud diuti blong mi, i blong pasem sakramen long rum blong kakae long haos blong mi.
Taem famli blong mi i muv i go long Yuta, mi stap long wan bigfala wod wetem plante dikon. Long fas sakramen miting longwe, mi lukluk ol dikon—i luk olsem wan ami—oli muv wetem ol stret muv taem oli stap pasem sakramen, oli olsem wan tim we oli trenem gud olgeta.
Mi fraet tumas, mekem se long Sandei afta, mi go eli long bilding blong wod, blong mekem se mi stap miwan, i no gat man i luk mi. Mi tingbaot se hem i long Yelkres Wod long Sol Lek Siti, mo i gat wan statiu long yad ia. Mi go biaen long statiu ia, mo mi prea strong blong kasem help blong save hao bae mi no mestem rod taem mi tekem ples blong mi blong pasem sakramen. Prea blong mi i kasem ansa.
Mi bin save se i gat wan moa gud wei blong prea mo tingting taem yumi stap traem blong groap long prishud seves blong yumi. Mi kam blong andastanem se from wanem, wanwan, i kasem prishud. Stamba tingting blong yumi kasem prishud, i blong letem yumi blesem ol pipol long bihaf blong Lod, mo mekem hemia long nem blong Hem.2
Plante yia afta we mi kam dikon we mi jes lanem gud se hemia i minim wanem stret. Olsem wan hae pris, oli givim wok long mi blong mi visitim wan kea senta sakramen miting. Oli bin askem mi blong pasem sakramen. Be, mi no tingting long wei o stret wei blong pasem sakramen; be mi lukluk fes blong wanwan olfala ia. Mi luk plante oli stap krae. Wan woman i holem han blong sot blong mi, i lukluk i kam, i talem laod: “O, tangkyu, tangkyu.”
Lod i bin blesem seves blong mi we mi givim long nem blong Hem. Long dei ia, mi bin prea from kaen merikel ia blong kam, be i no blong prea se bae mi mekem pat blong mi i gud evriwan. Mi bin prea se ol pipol bae oli filim lav blong Lod tru long seves blong lav blong mi. Mi bin lanem se hemia nao stret ki blong stap givim seves, mo blesem ol narawan long nem blong Hem.
Mi bin harem abaot wan eksperiens we i mekem mi tingbaot kaen lav ia. Taem we oli stopem evri miting blong Jos from KOVID-19 wol sik ia, wan givhan brata i akseptem wok we i kam long presiden blong kworom blong ol elda blong hem i blesem mo pasem sakramen long wan sista we hem i stap givhan long hem. Taem brata i ring long sista ia blong tekem sakramen i kam, hem i akseptem be wetem hevi hat, i no wantem blong brata i aot long hom blong hem long wan denja taem olsem, mo tu, mo stap biliv se ol samting bae oli kambak nomol kwiktaem.
Taem brata i kasem hom blong sista long Sandei moning, sista i askem wan samting. ?Bae tufala i save wokbaot i go long nekis haos mo gat sakramen wetem neba we i gat 87 yia? Wetem raet blong bisop, brata i agri.
Blong plante, plante wik, mo wetem bigfala kea blong stap longwe long wanwan long olgeta mo ol nara sefti rul, smol grup blong Ol Sent ia oli bin kam tugeta, evri Sandei, blong gat wan simpol sakramen seves. Samfala pis blong bred we i brokbrok, mo sam kap wota—be plante wota i krae from gudfasin blong wan God we i laef i stap.
Wetem taem, givhan brata ia, famli blong hem mo sista we hem i givhan long hem, oli bin save gobak long Jos. Be wido blong 87 yia, we i neba, from hem i mas lukaotgud, i mas stap long hom. Givhan brata ia—i tingbaot se wok blong hem i long neba blong hem, mo i no long givhan sista ia nomo—kasem tedei, i stap go kwaet long hom blong wido ia evri Sandei, i holem ol skripja mo smol pis bred ia, blong blesem mo pasem sakramen blong Lod Sapa.
Prishud seves blong Hem, semmak olsem hemia blong mi long kea senta ia, hem i givim from lav we hem i filim. Wanem i tru, i we, i no longtaem i pas, givhan brata ia i bin askem bisop sapos i gat sam narawan moa long wod we bae hem i mas givhan long olgeta. Hat blong hem blong wantem givim ona mo wok strong long prishud seves blong hem, i gro bigwan taem hem i bin stap givim seves long nem blong Lod, mo long wan wei we i blong Lod nomo. Mi no save sapos givhan brata ia i bin prea, olsem mi, from olgeta ia we hem i stap givim seves long olgeta, blong oli save abaot lav ia blong Lod, be from hem i mekem seves ia long nem blong Lod, risal i bin semmak.
Ol sem gudfala risal oli kam taem mi prea from bifo mi givim wan prishud blesing long wan we i sik, o i stap long wan taem blong nid. Hem i bin hapen wan taem long wan hospital taem we ol dokta we oli no save wet, oli hariap long mi, no, oli—givim oda—blong mi givim wan prishud blesing, mo kamaot long rod blong olgeta. Oli bin wantem mekem wok blong olgeta, be i no blong givim mi wan janis blong givim prishud blesing. Mi stap mo givim blesing. Mo smol gel ia we mi blesem long dei ia, we ol dokta oli ting se bae hem i ded, i bin laef. Mi glad tedei, se long dei ia, mi no letem ol filing blong mi oli blokem rod, be mi filim se Lod i wantem smol gel ia blong i kasem blesing. Mo mi bin save wanem blesing blong givim: mi blesem hem se bae hem i hil. Mo hem i kam oraet.
I bin hapen long mi plante taem, taem we mi bin givim blesing long wan we i stap kolosap long ded, wetem ol memba blong famli oli raonem bed, we oli hop from wan blesing blong hiling. Iven sapos mi gat smol taem nomo, oltaem mi prea blong save wanem blesing Lod i gat we mi save givim long nem blong Hem. Mo tu, mi askem blong save olsem wanem Hem i wantem mi blong blesem man o woman ia, mo i no wanem we mi, o ol nara pipol long saed, oli wantem. Eksperiens blong mi, i we, iven taem we blesing ia i no wanem we ol narawan oli wantem blong olgetawan, o olgeta we oli lavem, Spirit i tajem hat blong oli gat eksperiens ia blong akseptem wanem i stap, mo gat kamfot, be i no blong harem nogud.
Semfala insperesen i kam taem we ol petriak oli livim kakae mo prea blong Lod i soem long olgeta blong givim blesing we Lod i wantem blong man o woman ia. Bakegen, mi bin harem ol blesing we oli givim, we oli mekem mi sapraes, mo tu, i mekem sapraes long hem we i kasem blesing ia. I klia se, blesing ia i kam long Lod—tugeta ol woning we i stap long hem, mo tu, ol promes we petriak i givim long nem blong Hem. From prea mo livim kakae blong petriak, Lod i givim praes long hem.
Olsem wan bisop, mi bin lanem, taem mi stap holem ol intaviu blong faenem wan i klin inaf, blong mi prea long Lod blong Hem i letem mi filim wanem Hem i wantem from man o woman ia, mo bae Hem i kipim eni insperesen we bae Hem i givim, i klia, we jajmen blong mi bae i no kavremap. Hemia i had, sapos Lod, wetem lav, i wantem blesem wan wetem fasin blong stretem hem. Hem i tekem hadwok blong luksave wanem Lod i wantem, mo wanem we yu mo narawan i wantem.
Mi biliv se yumi save wok strong moa long prishud seves blong yumi ova long wan laeftaem, mo maet i bitim laef ia. Bae i dipen long hamas nao yumi traehad blong stap strong blong save tingting blong Lod, mo hamas yumi mekem blong lisingud long voes blong Hem, blong mekem se yumi save gud moa wanem Hem i wantem blong man o woman ia we yumi stap givim seves long Hem. Hamas yumi wok strong ia, bae i kam long ol smol step. Bae i save kam sloslo, be bae i kam. Lod i promesem hemia long yumi:
“From we huia i fetful blong kasem tufala prishud ia we mi bin tokbaot, mo oli givim ona mo wok strong long koling blong olgeta, oli kam tabu tru long Spirit blong mekem bodi blong olgeta i kam niu bakegen.
“Oli kam ol boe blong Moses mo blong Eron, mo laen blong Ebraham, mo blong jos mo blong kingdom, mo olgeta we God i jusum olgeta.
“Mo tu, olgeta evriwan we oli kasem prishud ia, oli akseptem mi, Lod i talem.”3
Hem i witnes blong mi se ol ki blong prishud ia, oli putumbak long Profet Josef Smit. Ol wokman blong Lod oli bin kamkamaot, oli aot long heven i kam blong putumbak prishud ia from ol bigfala taem we oli open finis, mo oli stap long fored blong yumi. Isrel bae i kam tugeta. Ol pipol blong Lod bae oli rere from Seken Kaming blong glori ia. Restoresen bae i gohed. Lod bae i talemaot moa abaot tingting blong Hem long saed blong ol profet blong Hem, mo ol wokman blong Hem.
Maet bae yu filim smol komperem long bigfala swip ia blong wanem Lod bae i mekem. Sapos yu filim olsem, mi invaetem yu blong askem, wetem prea, olsem wanem Lod i stap luk yu. Hem i save huia stret yu, Hem i bin givim prishud long yu, mo hamas yu girap mo hamas yu givim ona mo wok strong wetem prishud ia, i impoten long Hem from se Hem i lavem yu, mo Hem i trastem yu blong blesem ol pipol we Hem i lavem long nem blong Hem.
Mi blesem yufala,naoia, blong yufala i save filim lav blong Hem mo tras blong Hem, long nem blong Lod Jisas Kraes, amen.