ples blong baptaes

26 Novemba

?Olsem Wanem Mi Save Helpem Ol Bubu blong Mi blong Oli Kam Kolosap Moa long Jisas Kraes?

Fas mo Seken Pita

kaonsel tugeta pikja bokis

Kaonsel Tugeta

Wan memba blong klas presidensi o kworom presidensi i lidim; kolosap 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo fasin blong kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk, 10.2, 11.2). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Wanem topik nao bisoprik i bin toktok raon long hem long wod yut kaonsel miting blong yumi? ?Wanem nao bae yumi mekem, olsem wan klas o wan kworom, folem ol toktok storian ia?

• Kea long olgeta we oli stap long nid. ?Olsem wanem nao yumi save openem han long ol pipol long ol wei we i olsem hemia blong Kraes taem yumi luk se i gat wan nid, mo yumi no save wanem blong talem?

• Invaetem evriwan blong akseptem gospel. ?Wanem nao yumi faenem insaed long gospel blong Jisas Kraes we i tekem glad i kam long yumi? ?Olsem wanem nao yumi save serem glad ia wetem ol narawan?

• Joenem ol famli blong taem we i no save finis. ?Wanem nao yumi stap mekem blong faenem ol nem blong ol bubu blong yumi we oli nidim blong kasem ol odinens blong tempol? ?Wanem nao yumi save mekem blong helpem ol narawan blong oli faenem ol nem blong ol bubu blong olgeta?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

tijim doktrin pikja bokis

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

?Wanem nao i stap hapen long ol bilian pipol we oli ded, we oli no bin gat wan tru janis blong harem gospel blong Jisas Kraes, o blong kasem ol odinens blong sevem laef? Yumi save faenem sam pis ansa long 1 Pita 3:18–20; 4:6, taem we Pita i stap tokbaot gospel we oli stap prijim long olgeta dedman. Afta, Doktrin mo Ol Kavenan 138 i talemaot ful trutok—ol bubu blong yumi, oli save kam fulwan long Kraes sapos oli biliv long Hem mo sapos oli akseptem gospel blong Hem, mo yumi mekem ol odinens ia blong olgeta insaed long tempol. Blesing ia, i askem blong yumi—wan long laen blong olgeta we i gat gospel ia—i faenem nem blong olgeta, go long tempol, mo kasem ol odinens blong sevem laef long bihaf blong olgeta.

?Wanem eksperiens nao yu yu bin gat we yu bin helpem ol bubu blong yu blong oli kam kolosap moa long Kraes? ?Olsem wanem nao bae yu helpem olgeta we yu stap tijim blong kam moa glad abaot famli histri mo wok blong tempol, mo gat moa tras long paoa ia blong olgeta blong mekem hemia? Taem yu stap rere, yu save ridim mesej blong Elda Dale G. Renlund “Famli Histri mo Tempol Wok: Siling mo Hiling” (Liahona, Mei 2018, 46–49).

Stap Lan Tugeta

?Olsem wanem nao ol memba blong klas o blong kworom blong yu oli ansa long wan we i stap askem hemwan olsem wanem ol gud pipol we oli no bin gat wan janis blong kasem gospel, bae Lod i sevem olgeta? ?Wanem nao oli faenem insaed long 1 Pita 3:18–20; 4:6 blong helpem olgeta oli ansarem kwestin ia? Insaed long vidio: “Will I Do My Part?,” Elda Enrique R. Falabella i givim sam moa niu tingting. Yufala i save gohed blong toktok storian wetem wan o moa long wan long ol aktiviti ia.

• Doktrin ia, blong stap pemaot ol dedman, i spesel long Jos Ia blong Jisas Kraes blong Ol Lata-dei Sent. Invaetem ol memba blong klas o blong kworom blong stadi long Doktrin mo Ol Kavenan 138:25–39 olgeta wanwan, o olsem wan grup, mo afta, oli serem wanem we oli bin lanem (luk long “Ol Sapot Risos” blong gat sam moa skripja long saed blong topik ia). ?Wanem nao ol ves ia oli stap talem abaot wei we Papa long Heven i filim abaot evriwan long ol pikinini blong Hem? ?Olsem wanem nao baptaes long bihaf blong ol dedman i stap helpem ol bubu blong yumi blong kam kolosap moa long Kraes? ?Olsem wanem hemia i helpem yumi blong go kolosap moa long Kraes mo kam antap long fet we yumi gat long Hem?

• ?Wanem nao i save givim insperesen long ol yut blong oli mekem moa long saed blong tempol mo famli histri wok? Maet oli save wajem wan, o tufala vidio we i stap long “Ol Sapot Risos” mo lukaotem sam wei blong tempol mo famli histri wok i save blesem olgeta. Mo tu, oli save lukaotem ol promes blesing insaed long lis blong mesej blong Elda Dale G. Renlund, “Famli Histri mo Tempol Wok: Siling mo Hiling.” Invaetem olgeta blong serem wijwan blesing nao i gat moa mining long olgeta mo from wanem. Mo tu, yufala i save toktok raon long sam long ol samting we oli save blokem yumi blong stap tekpat long tempol mo famli histri wok. ?Olsem wanem Sevya i save helpem yumi blong winim ol samting ia we oli kam blong blokem rod?

• Sapos ol memba blong klas o blong kworom blong yu oli gat ol dijitol tul blong yusum, yu save tekem sam taem blong soem olgeta olsem wanem Lod i mekem i isi moa long olgeta, bitim bifo blong oli faenem ol bubu we oli nidim ol odinens blong sevem laef (luk long “Ol Sapot Risos”). Yu save invaetem konsalten blong wod long saed blong tempol mo famli histri wok, blong hem i helpem ol yut blong andastanem ol risos ia. Mo tu, yu save leftemap tingting blong ol yut blong oli mekem ol plan blong luklukgud long ol risos ia long hom mo blong oli ripot i kambak long wan fiuja miting.

sam yang woman oli stap toktok

Taem yumi stap mekem ol tabu odinens insaed long tempol, yumi stap help blong mekem ol blesing blong gospel oli stap blong olgeta we oli bin ded finis.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Malakae 4:5–6; Matiu 16:18–19; Jon 5:25; 1 Korin 15:29; Doktrin mo Ol Kavenan 137:7–9 (Doktrin blong fasin blong pemaot ol dedman)

• “The Promised Blessings of Family History 1” mo “The Promised Blessings of Family History 2” (vidio), ChurchofJesusChrist.org

• Family Tree ap (bae ol yut oli nidim blong login wetem Jos akaon blong olgeta)

• RootsTech (Ol yut oli save lukluk long ol sesen blong ol onlaen konfrens.)

• FamilySearch.org (Yu save visitim FamilySearch.org/discovery mo luklukgud long ol aktiviti ia tugeta.)

Tij Folem Wei blong Sevya

Taem yu invaetem ol yut blong tij, tekem taem blong helpem olgeta blong oli rere long wan stret wei. Eksplenem wanem yu stap mekem blong rere blong tij. Long wei ia, bae yu save helpem ol yut, i no jes blong wan lesen taem nomo, be blong wan laef taem blong stap tijim gospel long wei blong Sevya.