yang man i stap pasem sakramen

12 Novemba

?Olsem Wanem Nao Mi Save Go Kolosap Moa long Jisas Kraes Tru long Ol Tabu Odinens mo Kavenan?

Hibrus 7–13

kaonsel tugeta pikja bokis

Kaonsel Tugeta

Wan memba blong klas presidensi o kworom presidensi i lidim; kolosap 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo fasin blong kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk, 10.2, 11.2). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Hamas moa nao yumi muv i go kolosap moa long Sevya? ?Olsem wanem nao yumi stap traem blong kam moa olsem Hem?

• Kea long olgeta we oli stap long nid. ?Huia nao i bin stap long maen blong yumi long ol las dei we oli jes pas? ?Olsem wanem nao yumi save helpem wanwan long olgeta ia?

• Invaetem evriwan blong akseptem gospel. ?Olsem wanem nao bae yumi save ansarem ol kwestin blong ol fren blong yumi abaot Jos long wan wei we bae i bildimap fet blong olgeta long Sevya?

• Joenem ol famli blong taem we i no save finis. ?Wanem nao samfala wei we yumi save toktok o go kolosap moa wetem ol narafala memba blong famli, olsem ol bubu mo ol kasen brata mo sista?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

tijim doktrin pikja bokis

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Blong plante handred yia, ol pikinini blong Isrel, we samtaem oli singaotem olgeta Ol Hibrus, oli bin wok strong blong tekpat long ol odinens we oli go wetem tabenakol mo loa blong Moses. Be yet, plante long olgeta oli no bin luksave se, olgeta samting ia, “oli olsem pikja blong ol samting ya we oli stap long heven,”—“i olsem sado nomo blong ol gudgudfala samting, we bambae i kamtru” (Hibrus 9:23; 10:1). Ol odinens, evriwan i blong tijim olgeta long saed blong Jisas Kraes. Hemia wanem we Pol i bin eksplenem long Leta blong hem i go long Ol Man Hibrus? Mesej blong hem i impoten tu long yumi tedei, from se yumi tu, yumi gat ol tabu odinens wetem semfala stamba tingting biaen long ol. Mekem se i gud blong askem yumiwan ol kwestin ia: ?Ol odinens ia oli stap helpem yumi blong tingbaot Jisas Kraes, o no? ?I gat moa samting we yumi save mekem blong gat eksperiens ia long paoa blong Jisas Kraes tru long ol odinens blong gospel? ?O yumi, semmak olsem Ol Man Hibrus bifo, yumi mestem dip mining blong olgeta?

Tingting hevi long ol kwestin ia taem yu stap ridim Hibrus 7–13 mo taem yu stap rere blong tij abaot hao ol odinens mo kavenan oli stap tekem yumi i go kolosap moa long Jisas Kraes. Mo tu, yu save stadi sam long ol mesej blong jeneral konfrens we oli putum long aotlaen ia.

Stap Lan Tugeta

Blong helpem olgeta we yu stap tijim blong luk olsem wanem oli save go kolosap moa long Jisas Kraes tru long ol odinens mo kavenan blong gospel blong Hem, yu save invaetem olgeta blong mekem wan lis blong ol odinens blong gospel mo ol kavenan we i go wetem olgeta odinens ia; raetem lis ia long bod (luk long Gaed long Ol Skripja, “Odinens,” “Kavenan,” olskripja.ChurchofJesusChrist.org). ?Wanem nao ol odinens mo kavenan ia oli stap tijim yumi abaot Kraes mo Atonmen blong Hem? Toktok ia we i kam long Elda David A. Bednar we i stap long “Ol Sapot Risos” i givim wan mining blong ol odinens ia mo ol nara impoten wei blong lukluk hemia. Ol aktiviti olsem olgeta ia oli save help tu.

• Yu save invaetem ol yut blong oli ridim Doktrin mo Ol Kavenan 84:19–22 mo toktok raon long ol kwestin olsem: ?Wanem nao “paoa we i olsem hemia blong God” i minim? ?Olsem wanem nao ol odinens mo ol kavenan oli bin helpem yumi blong eksperiensem paoa ia? ?Wanem samting defren nao ol odinens mo ol kavenan oli mekem insaed long laef blong yumi? ?Olsem wanem nao oli helpem yumi blong yumi joen i stap wetem Sevya? Blong help blong ansarem ol kwestin ia, ol yut oli save ridim ol fas fofala paragraf blong mesej blong Elda Kent F. Richards: “The Power of Godliness” (Liahona, May 2016, 118) o mesej blong Elda Bednar: “Yufala I Mas Bildim Haos Ia long Nem blong Mi” (Liahona, Mei 2020, 84–87), speseli, ridim seksen ia, “Stat long Insaed I Go Aotsaed.”

• Tingting blong askem olgeta we yu stap tijim, olsem wanem nao bae oli eksplenem odinens blong sakramen long wan we i no save nating abaot hemia. Seksen ia, “Eksperiens mo Testemoni” insaed long mesej blong Elda Taniela B. Wakolo: “Ol Odinens blong Stap Sevem Man Bae I Givim Yumi Gudfala Laet” (Liahona, Mei 2018, 39–41) i givim wan eksampol. Ol yut oli save faenem sam impoten tijing tu long vidio ia, “Always Remember Him” (ChurchofJesusChrist.org). ?Olsem wanem nao sakramen i tekem yumi i go kolosap moa long Jisas Kraes? ?Wanem janis nao i stap blong yumi save tijim ol narawan abaot hemia?

• Taem yufala i luklukbak long ol faevfala tingting insaed long mesej blong Elda Peter F. Meurs: “The Sacrament Can Help Us Become Holy” (Liahona, Nov. 2016, 85–87) bae i save helpem ol yut blong oli andastanem olsem wanem blong rere gud moa from sakramen. O, sapos i gat sam yut we oli stap rere blong kasem endaomen blong olgeta, tugeta, luklukbak long seksen ia we taetol blong hem i: “About the Temple Endowment” long temples.ChurchofJesusChrist.org. Toktok raon long olsem wanem nao ol tabu odinens ia, mo ol kavenan we oli go wetem oli save help blong tekem yumi i go kolosap moa long Sevya.

• Tingting blong raetem ol toktok ia Sakramen, Baptaes, mo Tempol long bod. Anda long wanwan, invaetem ol yut blong mekem wan lis blong ol kavenan we yumi stap mekem. Ol refrens we oli stap long “Ol Sapot Risos” oli save help tu. Tugeta, toktok raon long wei we ol kavenan ia oli stap helpem yumi blong kam kolosap moa long Jisas Kraes.

• Yu save serem klas o kworom blong yu long ol grup mo givim wok long wanwan grup blong luklukbak long wan seksen blong mesej blong Ronald A. Rasband “Stanap long Ol Promes mo Ol Kavenan blong Yumi” (Liahona, Nov 2019, 53–56) o mesej blong Elda D. Todd Christofferson: “Stap Wokbaot long Kavenan Rod” (Liahona, Mei 2021, 116–19). Leftemap tingting blong olgeta blong serem wanem oli bin lanem abaot, hao nao, taem oli stap obei long ol kavenan blong olgeta i mekem rilesensip we oli gat wetem Jisas Kraes i kam strong moa.

ol yang woman oli stap wokbaot aotsaed long tempol

Ol tabu odinens blong gospel oli tekem “paoa olsem hemia blong God” i kam insaed long laef blong yumi (luk long Doktrin mo Ol Kavenan 84:19–22).

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Mosaea 18:8–10 (kavenan blong baptaes)

• Moronae–5 (kavenan blong sakramen)

• Elda David A. Bednar i tijim: “Ol tabu odinens oli stap long hat blong gospel blong Sevya, mo oli stap tu long rod ia blong go long Hem mo lukaotem blong bon bakegen long saed blong spirit. Ol odinens oli ol tabu aksen we oli gat stamba tingting long saed blong spirit, mining we i no save finis, mo oli joen i go wetem ol loa mo rul blong God. …

  “Ol odinens blong sevem man mo kam olsem god we oli stap givimaot insaed long Jos we i kambak blong Lod, oli moa bitim ol seremoni o ol seremoni wetem wan saen. Be, oli olsem ol rod blong atoriti, we ol blesing mo ol paoa blong heven oli kam folem insaed long wanwan laef blong yumi. …

  Ol odinens we yumi kasem mo ona long olgeta wetem tru fasin oli mas stap blong kasem paoa olsem hemia blong God mo evri blesing we i save kam tru long Atonmen blong Sevya” (“Always Retain a Remission of Your Sins,” Liahona, May 2016, 59–60).

Tij Folem Wei blong Sevya

Taem yu stap invaetem olgeta we yu stap tijim blong tekem aksen folem wan doktrin we i tru, yu helpem olgeta blong gohed blong lan olsem insaed long hom mo evri dei laef blong olgeta.