22 Oktoba

?Olsem Wanem Mi Save Stap Strong long Komitmen blong Mi long Jisas Kraes?

Fas mo Seken Tesalonaeka

Kaonsel Tugeta

Wan memba blong klas presidensi o kworom presidensi i lidim; kolosap 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo fasin blong kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk, 10.2, 11.2). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Wanem eksperiens we yumi bin gat i no longtaem i pas we i bin mekem ol testemoni blong yumi oli kam strong moa?

• Kea long olgeta we oli stap long nid. ?Huia i nidim help mo ol prea blong yumi? ?Wanem nao yumi filim blong mekem blong helpem olgeta?

• Invaetem evriwan blong akseptem gospel. ?Olsem wanem yumi save stap olsem wan laet long ol nara memba blong famli o fren we oli no gat ol semfala bilif olsem yumi?

• Joenem ol famli blong taem we i no save finis. ?Olsem wanem yumi save soem moa lav mo sapot long ol famli blong yumi, mo mekem wan samting we i defren be i gud insaed long ol hom blong yumi?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Plante long yumi i save wan we, long wan taem, i luk se hem i komitim hem fulwan long Jisas Kraes, be naoia, i foldaon i go longwe long bilif blong olgeta. Hem i stret nomo blong stap askem yumiwan: “?Hemia i save hapen long mi?” Pol i bin presem Ol Sent long Tesalonaeka from oli bin stap fetful, be hem i bin filim insperesen blong givim woning long olgeta abaot ol giaman tijing mo ol nara paoa we i save mekem bilif blong olgeta i nomo strong. Nomata hamas yumi komitim yumi long Sevya naoia, oltaem i gat plante samting yumi save mekem blong “mekem bilif blong [yumi] i strong moa, long wanem samting we [yumi] sot long hem” (1 Tesalonaeka 3:10).

Taem yu stap prea abaot ol pipol insaed long klas o kworom blong yu, lisin long ol kwaet toktok we Lod i stap sendem i kam long yu. ?Wanem nao yu filim, we bae i helpem olgeta blong stap fetful long Sevya nomata wanem samting we i kam agensem olgeta? ?Wanem i bin save helpem yu? Taem yu stap rere blong tij, yu save luklukbak long mesej blong Elda Dale G. Renlund “Wan Komitmen we I No Muvmuv long Jisas Kraes” (Liahona, Nov 2019, 22–25) antap long 1 mo 2 Tesalonaeka.

Stap Lan Tugeta

Blong helpem ol yut blong luklukbak long wanem we oli bin ridim long 1 mo 2 Tesalonaeka mo presentem topik blong stap strong long komitmen blong yumi long Sevya, tugeta, yufala i save ridim 2 Tesalonaeka 2:1–3. Toktok raon long wanem, toktok ia, “foldaon” i save minim. Speseli, ?hem i minim wanem long wan man o woman blong foldaon i gowe long Jisas Kraes? Yu save komperem toktok ia wetem ol nara toktok we Pol i yusum olsem “stap stanap strong” (1 Tesalonaeka 3:8) mo “i no mas kam slak long ol gudfala wok blong yufala” (2 Tesalonaeka 3:13). Afta, yu save luklukbak long 1 Tesalonaeka 5:15–23. ?Olsem wanem nao, taem yumi stap folem kaonsel blong Pol we hem i givim long ol ves ia, i save helpem blong holemtaet yumi blong no foldaon i gowe long bilif blong yumi long Jisas Kraes—iven taem yumi fesem ol samting blong kam agens? Yusum wan aktiviti olsem wan long olgeta ia blong helpem ol memba blong klas o kworom blong stap strong long komitmen blong olgeta long Sevya.

• Blong lanem samting aot long ol eksampol blong ol narawan we oli kam we oli nomo save muvmuv long komitmen blong olgeta long Kraes, i save kam olsem wan insperesen. Eksampol, tugeta, yufala i save stadi long eksampol blong Ol Antae-Nifae-Lihae, we oli bin “wan pipol we i wael mo i bin mekem hat blong hem i kam strong mo i prapa wael” be “oli neva foldaon i go lus” afta we “oli jenisim laef blong olgeta i go long Lod” (Alma 17:14; 23:6–8). ?Wanem nao Alma 24:8–18 i talem olsem risen from wanem oli bin gohed blong stap fetful? ?Wanem ol ki joes nao oli bin mekem? ?Olsem wanem nao Sevya i bin helpem olgeta? Bae oli save faenem sam moa eksampol insaed long mesej blong Elda Dale G. Renlund “Komitmen we I No Muvmuv long Jisas Kraes.” Maet bae i gat sam yut we bae oli save ridim sam long ol eksampol ia, mo serem wanem we oli lanem abaot fasin blong stap tru long Kraes. ?Long wanem wei nao yumi bin stap komitim yumi long Lod nomata ol samting we yumi no mekem i stret long laef?

• Long ol hadwok blong yumi blong mekem bilif blong yumi i kam strong moa, bae i help blong savegud ol paoa we oli lukaot blong mekem bilif ia i nomo strong. Visen blong Lihae abaot tri blong laef i tokbaot sam long ol strong paoa ia. Maet yu save soem wan pikja blong visen ia(luk long Gospel Art Buk [2009], namba 69) mo tugeta, luklukbak long ol ditel we oli faenem long 1 Nifae 8:10–34. Long visen ?Wanem nao i stap blokem ol man blong stap laekem frut blong tri ia? ?Wanem nao i bin helpem ol pipol blong oli kasem tri ia mo stap longwe? ?Sam long ol samting ia oli stap soem wanem simbol insaed long laef blong yumi?

• Long mesej blong hem, “Paoa blong Winim Enemi” (Liahona, Nov 2019, 110–12), Elda Peter M. Johnson i givim wan lis blong trifala wei we Setan i stap traem blong mekem yumi nomo strong. Yu save givim wok long wanwan yut blong oli rid abaot wan long ol wei ia mo serem wetem klas o kworom ol eksampol blong wei we Setan i yusum tul ia agensem ol yut blong tedei. Afta, oli save ridim wanwan long ol fo tingting we Elda Johnson i givim blong winim ol trik blong enemi mo blong oli serem wanem we oli bin lanem.

Yu No Stap Fraet, i kam long Michael Malm

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• 1 Nifae 2:9–10; Alma 17:1–3; Hileman 5:12

• Jeffrey R. Holland, “Lod Mi Mi Biliv,” Jeneral Konfrens, Epril 2013, ChurchofJesusChrist.org/general-conference/conferences?lang=bis.

• Neil L. Andersen, “Neva Lego Hem,” Liahona, Nov 2010, 39–42

• Becky Craven, “Lukaotgud agens Lukaot Wanwan Taem,” Liahona, Mei 2019, 9–10

Tij Folem Wei blong Sevya

Long plante kes, maet bae i stret blong invaetem olgeta we oli stap lan blong oli helhelpem wanwan long olgeta blong oli faenem ol ansa long ol kwestin blong olgeta bakegen. Taem we Spirit i talem long yu, yu save disaed blong mekem hemia iven sapos yu filim se yu save ansa blong hem.