8 Oktoba

?Olsem Wanem Nao Gospel blong Jisas Kraes I Save Helpem Mi blong Mekem Famli blong Mi I Kam Strong Moa?

Efesas

Kaonsel Tugeta

Wan memba blong klas presidensi o kworom presidensi i lidim; kolosap 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, antap long kaonsel tugeta abaot ol stret nid blong klas o blong bisnis blong kworom, ating yu wantem blong toktok raon long ol filing mo ol stamba toktok we oli kam long jeneral konfrens. Ol kwestin ia bae i save help:

• ?Wanem nao stamba tingting o mesej we i kamaot klia long yumi? ?Wanem i mekem bilif blong yumi long Jisas Kraes i kam strong moa?

• ?Wanem i mekem ol testemoni blong yumi abaot ol profet we oli stap laef oli kam strong moa? ?Wanem nao yumi filim se Spirit i talem long yumi blong mekem from olgeta samting ia we yumi bin lanem, o bin filim?

• ?Wanem nao yumi nidim blong mekem, olsem wan klas o kworom blong tingbaot mo tekem aksen folem kaonsel we yumi bin harem long jeneral konfrens?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Sam pipol insaed long klas o kworom blong yu oli gat ol strong famli we oli soem lav mo oli stap fidim fet mo fasin blong gat spirit. Ol narawan, maet oli stap olgetawan long ol hadwok blong olgeta blong stap laef folem gospel, mo sam oli save fesem raorao mo hat i soa long hom. Be i no gat wan insaed long klas o kworom blong yu we i gat wan famli we i stret gud, we i no stap fesem jalenj. Mo evriwan i gat akses long paoa blong Jisas Kraes, we i save hilim mo mekem ol famli oli kam strong moa.

Sevya i wantem blong blesem ol famli. Samtaem, wei we Hem i mekem hemia, i tru long lav mo eksampol blong wan yang man o woman we i stap traehad blong stap folem Hem mo stap laef folem gospel blong Hem. Taem yu stap rere blong tijim ol yut abaot paoa we i stap blong olgeta mo famli blong olgeta i yusum tru long Jisas Kraes, tingting hevi long olgeta prinsipol long Efesas wei save helpem yumi blong mekem ol famli rilesensip blong yumi oli kam strong moa. Yufala i save stadi tu long “Famli: Wan Ofisol Toktok I Go long Wol,” (ChurchofJesusChrist.org/study?lang=bis).

Stap Lan Tugeta

Afta we yu givim ol memba blong klas o blong kworom wan janis blong serem wanem we Spirit i tijim olgeta long wik ia taem oli bin stadi long Efesas, lukaotem sam wei blong presentem topik blong wei we Jisas Kraes i save helpem yumi mekem ol famli blong yumi oli kam strong moa. Eksampol, yu save invaetem ol yut blong faenem mo serem ol skripja long Efesas we i tekem ol prinsipol we yumi save yusum blong mekem ol famli rilesensip oli kam strong moa. I gat sam eksampol insaed long Efesas 2:19–22; 3:14–19; 4:1–3, 25–26, 29–32; 5:1–2; 6:1–4. ?Olsem wanem kaonsel long ol ves ia i save blesem wan famli? ?Olsem wanem Sevya mo gospel blong Hem i bin wan blesing long hom blong yumi? Hemia samfala aktiviti aedia we i go wetem topik ia.

• Sapos yu wantem blong toktok raon long komanmen ia blong “ona long papa mo mama blong yufala” (Efesas 6:2), yu save stat blong askem ol memba blong klas o blong kworom wanem toktok ia, ona i minim long olgeta. Maet wan i save serem mining we i stap long wan diksonari o long Gaed long Ol Skripja (olskripja.ChurchofJesusChrist.org). Invaetem ol yut blong tokbaot olsem wanem bae oli save praktisim komanmen ia insaed long laef blong olgeta. Mo tu, i wan insperesen blong luklukgud olsem wanem Jisas Kraes i bin ona long Papa blong Hem long Heven, mo long mama blong Hem, Meri (eksampol, luk long Luk 2:41–52; Josef Smit Translesen, Jon 2:4 [insaed long John 2:4, footnote a]; Jon 8:29; 19:25–27). ?Wanem nao yumi save lanem aot long eksampol blong Jisas we i save mekem rilesensip blong yumi wetem papa mo mama blong yumi i kam strong moa?

• Maet bae i save help blong tokbaot wanem tul yumi nidim blong bildim wan strong haos. ?Wanem sam long ol samting we yumi nidim blong bildim wan strong famli? Olsem pat blong toktok storian, yu save serem toktok ia we i kam long Elda L. Whitney Clayton: “Wanem we i impoten i disaen blong sol blong ol man we oli laef insaed long hem, be i no strakja blong hem nomo.” (“Ol Hom we Oli Nambawan Bitim Ol Narawan,” Liahona, Mei 2020, 107–9). Mo tu, yufala i save toktok raon long ol fofala tingting we Elda Clayton i bin givim long mesej blong hem abaot wei blong bildim “ol hom we oli nambawan bitim ol narawan.”

• “Famli: Wan Ofisol Toktok I Go long Wol” i tekem promes ia se: “Hapines insaed long famli laef i gat gudfala janis blong kamtru sapos laef insaed long famli i stanap long ol tijing blong Lod Jisas Kraes.” ?Olsem wanem nao ol tijing blong Sevya oli krietem fandesen blong wan hapi famli? Ofisol toktok blong famli mo ol skripja we oli stap anda long “Ol Sapot Risos” oli givim ol eksampol. ?Olsem wanem ol memba blong famli oli save helhelpem wanwan long olgeta blong stap laef folem ol tijing ia?

• Maet ol memba blong klas oli save lukluk vidio ia “Through Small Things,” we insaed long hem, i gat trifala brata sista we oli tokbaot fasin blong akseptem invitesen blong bisop blong olgeta blong oli tingting long sam wei blong mekem hom blong olgeta i wan ples we i moa tabu. ?Olsem wanem nao ol famli insaed long vidio ia i bin kasem blesing from aksen blong ol yut ia? ?Wanem nao i save mekem hom i kam wan tabu ples? Tingting blong invaetem ol yut blong akseptem semfala invitesen ia we bisop i bin givim. Blong helpem olgeta blong tingting long wanem bae oli mekem, yu save toktok raon long kwestin we i stap long vidio ia: “?Wanem nao yu yu glad blong mekem blong gat Spirit insaed long hom blong yu?

Ol tijing blong Jisas Kraes oli stamba blong hapines long famli laef.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Matiu 5:21–24, 38–42; 6:14; 7:1–5; 22:36–39; 3 Nifae 18:21; Moronae 7:33; Doktrin mo Ol Kavenan 18:10–13

• Henry B. Eyring, “Wan Hom we Spirit I Stastap long Hem,” Liahona, Mei 2019, 22–25

• “Lav long Hom,” “Home Can Be a Heaven on Earth,” STSP mo Hymns, pej 44, mo namba 298

Tij Folem Wei blong Sevya

Sapos ol yut oli filim se yu trastem olgeta, bae tras blong olgeta long tabu paoa ia we oli save kasem bae i gro, mo bambae oli mekem sapraes long yu wetem wanem oli save mekem. Helpem olgeta blong luk wan visen blong wanem we Papa long Heven i save huia oli save kam.