24 Septemba

?Olsem Wanem Mi Save Folem Eksampol blong Sevya blong Stap Helpem Olgeta we Oli Stap long Nid?

Seken Korin 8–13

Kaonsel Tugeta

Wan memba blong klas presidensi o kworom presidensi i lidim; kolosap 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo fasin blong kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk, 10.2, 11.2). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Wanem nao yumi bin toktok raon long hem long las taem? Mo ?Wanem invitesen nao o wanem wok nao oli bin givimaot? ?Wanem nao yumi bin mekem blong tekem aksen, blong muv folem ol invitesen ia o ol wok ia we oli bin givimaot olgeta?

• Kea long olgeta we oli stap long nid. ?Wanem nao yumi save talem o mekem blong go luk ol narawan we maet oli stap filim se oli stap olgetawan, o oli filim se oli stap longwe long Papa long Heven?

• Invaetem evriwan blong akseptem gospel. ?Wanem nao sam long ol wei we yumi save helpem ol narawan blong oli filim lav blong Jisas Kraes?

• Joenem ol famli blong taem we i no save finis. ?Wanem aedia nao yumi save serem wetem wanwan long yumi blong helhelpem yumi blong mekem famli blong yumi i kam strong moa?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

?Wanem janis nao, yu, mo ol memba blong klas mo blong kworom i gat blong givim seves long olgeta we oli stap long nid raon long yu? Long wan taem we Ol Sent long Jerusalem oli stap safa mo nidim help, Pol i bin raet i go long Ol Man Korin blong leftemap tingting blong olgeta blong givim wetem gladhat, “i no givim samting long sore nomo, no from we hem i harem olsem we olgeta oli fosem hem, from we God i lavem man we i save givim samting long gladhat blong hem.” Hem i bin promes se, taem bae oli mekem hemia, bae God “i givim ol gudgudfala samting long [olgeta], we bambae i plante we plante. Nao bambae oli … givhan long ol gudgudfala wok” (2 Korin 9:7–8).

Pol i poen i go long eksampol blong Jisas Kraes, we “Hem i rij, be from yufala, hem i kam pua. Mo from we hem i kam pua, taswe yufala i save kam rij” (2 Korin 8:9). Sevya, i bin gat gladhat blong mekem sakrifaes long ol rij samting blong heven blong Hem i save givim seves long yumi, mo mekem se bae yumi rij blong taem we i no save finis. Tingting long sam eksampol, aot long laef blong Hem, taem Hem i bin go aot blong givim seves long olgeta raonabaot long Hem. Taem yu stap rere blong tij, antap long riding blong yu long 2 Korin 8–9 tingting blong ridim mesej blong Sista Michelle D. Craig “Ol Ae blong Luk” (Liahona, Nov 2020, 15–17).

Stap Lan Tugeta

Blong statem toktok storian ia, askem klas o kworom blong mekem wan lis blong sam long ol risen from wanem wan bae i no save givim seves long ol narawan we oli stap long nid. ?Wanem nao yumi lanem aot long ol tijing blong Pol we oli stap long 2 Korin 8:9; 9:7–8 we i givim insperesen long yumi blong mekem moa bitim blong givim seves long olgeta we oli stap long nid? Olgeta aktiviti ia oli save helpem olgeta we yu stap tijim blong oli andastanem moa gud olsem wanem blong help blong kea long olgeta raon long olgeta.

• Plante taem, insaed long ol skripja, Lod i tijim yumi olsem wanem nao Hem i stap filim blong stap kea long olgeta we oli pua mo olgeta we oli stap long nid. Sam eksampol oli stap long “Ol Sapot Risos.” Wan wei blong luklukbak long ol tijing ia, hem i blong serem klas o kworom blong yu blong oli sidaon tutu mo askem wanwan smol grup ia blong stadi long sam skripja. Askem olgeta blong toktok raon long wanem nao ol skripja ia oli stap tijim abaot fasin blong stap kea long olgeta we oli pua mo olgeta we oli stap long nid. ?From wanem, blong stap kea long olgeta we oli pua mo olgeta we oli stap long nid i impoten long Papa long Heven mo long Jisas Kraes? Invaetem ol yut blong oli mekem ol plan blong gat sam wei we, wanwan, bae i save helpem olgeta we oli stap long nid.

• Samtaem, yumi stap bisi tumas wetem ol wari blong yumi, mekem se yumi mestem blong luksave ol nid blong olgeta raon long yumi. Long mesej blong hem, “Ol Ae blong Luk,” Sista Michelle D. Craig i luklukbak long stori blong God we i openem ae blong wan yang man (luk long 2 King 6:15–17). ?Wanem nao yumi save lanem aot long stori ia? ?Wanem nao yumi save lanem aot long ol nara stori we hem i bin serem abaot wei blong luksave ol nid blong ol narawan mo helpem olgeta? (Luk tu long vidio ia: “Pray for Eyes to See as He Sees” long ChurchofJesusChrist.org). Ol memba blong klas o blong kworom oli save serem tu sam eksperiens abaot taem wan i bin luksave nid blong olgeta mo i bin helpem olgeta. ?Wetaem nao yumi bin luksave nid blong ol narawan mo givhan long olgeta? ?Olsem wanem nao yumi filim taem yumi kasem wan givhan, o taem we yumi givim wan givhan?

• ?Weswe long ol memba blong klas o blong kworom blong yu? ?Oli andastanem olsem wanem blong mekem diuti blong olgeta blong help blong kea long olgeta we oli stap long nid? Tingting blong yufala evriwan tugeta i toktok raon long Mosaea 4:16–21 mo 18:8–10, mo tu, blong toktok raon long sam seksen blong Jeneral Hanbuk (10.2.2 long saed blong ol kworom blong Aronik Prishud, o 11.2.2 long saed blong ol yang woman). ?Wanem insperesen nao yumi filim blong go mekem olsem risal blong stadi blong yu long ol risos ia? Tingting blong mekem plan blong gat sam wei blong wok tugeta blong go luk olgeta we oli stap long nid insaed long klas o kworom, wod, o komuniti. Ol vidio we oli stap long “Ol Sapot Risos” oli givim sam moa aedia. Blong gat sam seves janis long eria blong yu, luk long JustServe.org.

Seves blong yumi we i olsem hemia blong Kraes i save blesem laef blong olgeta raon long yumi.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Matiu 25:31–45; Jemes 1:27; Mosaea 2:17; Alma 34:27–28; Momon 8:35–39; Doktrin mo Ol Kavenan 104:14–18 (Hamas i impoten blong kea long olgeta we oli pua mo olgeta we oli stap long nid)

• Jeffrey R. Holland, “Are We Not All Beggars?,” Liahona, Nov. 2014, 40–42

• “Michelle’s Story,” “Caring for the Poor and Needy,” “I Was a Stranger: Love One Another,” “Fast Offerings: Are We Not All Beggars” (vidio), ChurchofJesusChrist.org

Tij Folem Wei blong Sevya

“Ol skripja mo ol toktok blong ol lata-dei profet mo aposol oli stamba blong ol trutok we yumi stap tijim. Yusum evri janis blong givim insperesen long olgeta we yu stap tijim blong oli tanem olgeta i go long toktok blong God blong i soem rod long olgeta, blong i ansarem ol kwestin mo blong i givim sapot.