ol woman oli stap wokbaot

10 Septemba

?Olsem Wanem Mi Save Faenem Kamfot long Jisas Kraes Taem Wan we Mi Lavem I Ded?

Fas Korin 14–16

kaonsel tugeta pikja bokis

Kaonsel Tugeta

Wan memba blong klas presidensi o kworom presidensi i lidim; kolosap 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo fasin blong kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk, 10.2, 11.2). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Olsem wanem nao taem yumi stap tanem yumi i go long Lod, i helpem yumi blong fesem ol jalenj mo ol tes blong yumi?

• Kea long olgeta we oli stap long nid. ?Huia ia nao yumi save we i nidim prea mo frensip blong yumi?

• Invaetem evriwan blong akseptem gospel. ?Insaed long wod yut kaonsel miting blong yufala, wanem plan blong serem gospel nao yumi bin toktok raon long hem? ?Olsem wanem nao klas o kworom blong yumi i save pat insaed?”

• Joenem ol famli blong taem we i no save finis. ?Olsem wanem fasin blong mekem famli histri wok i mekem rilesensip blong yumi wetem Papa long Heven mo Jisas Kraes i kam strong moa?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

tijim doktrin pikja bokis

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Taem i gat wan we yumi kea tumas long hem i ded, i save prapa spolem yumi. Taem yumi seperet long olgeta we yumi lavem, i mekem se yumi harem bigfala krae sore mo yumi no glad nating. Be Pol i bin tijim se, long en, “ded bae i lus mo viktri bae i win” (1 Korin 15:54) from se Jisas Kraes i laef bakegen long ded. Long nara toktok “harem nogud blong ded”—sobodi mo fasin blong lusum hop long wol ia—”i lus long Kraes” (Mosaea 16:7–8; luk tu long 1 Korin 15:54–57).

Long sam poen, evriwan bae i fesem taem blong lusum wan we hem i lavem. ?Olsem wanem nao bae yu save helpem olgeta we yu stap tijim blong faenem kamfot long ol taem ia we oli had tru long bilif we oli gat long Jisas Kraes? Tingting long kwestin ia taem yu stap rere blong tij, mo taem yu stap ridim 1 Korin 15, Mosaea 16:7–9, mo Doktrin mo Ol Kavenan 42:44–46.

Stap Lan Tugeta

Yu save invaetem ol memba blong klas o blong kworom blong serem abaot wan taem we oli bin filim wan samting we i mekem oli harem nogud. Yu save askem olgeta from wanem Pol i yusum toktok ia “harem nogud” o “spolem” we i tokbaot ded (luk long 1 Korin 15:54–56). Givim sam taem long olgeta blong oli luklukbak long 1 Korin 15 mo serem ol trutok we oli faenem abaot olsem wanem Lod i winim rop blong ded, o harem nogud blong ded. Afta, tingting long ol aktiviti olsem olgeta andanit ia blong helpem ol yut blong oli andastanem moa olsem wanem Sevya i save givim kamfot long yumi taem wan we yumi kea long hem, i stap ded.

• Yu save serem ol memba blong klas o blong kworom blong oli sidaon tutu, mo askem wanwan smol grup ia blong luklukbak tugeta long sam long ol skripja insaed long “Ol Sapot Risos.” Oli save raetem ol ansa long wan kwestin olsem “?Wanem impoten trutok nao mi hop se bae mi tingbaot taem bae mi lusum wan we mi lavem?” Askem olgeta blong yusum infomesen we i stap long ol skripja taem oli ansa. Afta, invaetem olgeta blong serem wetem klas, ol trutok ia we oli gat moa mining long olgeta mo from wanem.

• Tingting blong, tugeta, yufala i luklukbak long wan stori blong jeneral konfrens we i soem wan we i faenem hop long Jisas Kraes taem wan we oli kea long hem, i ded. Ol eksampol ia, i tekem mesej blong Sista Reyna I. Aburto: “Gref I No Save Win” (Liahona, Mei 2021, 85–86) o mesej blong Elda S. Mark Palmer: “Harem Nogud blong Yumi Bae I Tanem I Kam Glad Nao” (Liahona, Mei 2021, 88–89). Bae yu save filim strong blong serem eksperiens blong yuwan, o blong invaetem ol yut blong serem olsem wanem oli faenem kamfot mo hop long Jisas Kraes afta we wan we oli lavem i ded.

• Afta we oli lukluk long ol nid blong ol memba blong klas o blong kworom blong yu, soem wan o moa long ol vidio ia we i stap long “Ol Sapot Risos.” Invaetem ol yut blong serem ol filing mo tingting blong olgeta. ?Olsem wanem nao, taem yu save se Jisas Kraes i bin laef bakegen long ded, i jenisim wei we yu lukluk ded. Invaetem ol memba blong klas o blong kworom blong oli serem ol testemoni blong olgeta abaot Sevya mo Laef Bakegen long Ded blong Hem, mo olsem wanem nao, save ia i givim hop long olgeta.

• Jon 11 i tokbaot eksperiens blong Sevya wetem ded blong wan we Hem i lavem—fren blong Hem, Lasaros. Maet ol memba blong klas o blong kworom oli save ridim ol ves 1–45 tugeta, mo taem oli stap rid i go, oli save serem sam samting we oli bin lavem aot long eksampol blong Sevya. ?Wanem nao yumi save lanem aot long stori ia we i givim yumi kamfot taem wan we yumi kea long hem i ded? ?Long wanem wei nao, yumi save folem eksampol blong Sevya blong krae wetem olgeta we oli krae, mo givim kamfot long olgeta we oli nidim kamfot? (Mosaea 18:9) ?Wanem nao yumi lanem aot long Doktrin mo Ol Kavenan 42:45–46 we i save helpem yumi blong mekem hemia? Yu save soem vidio ia: “One-on-One (Ministering with Love)” (ChurchofJesusChrist.org).

yang man i stap tingting hevi

Testemoni blong yumi, se Jisas Kraes i laef bakegen long ded, i givim hop taem wan we yumi lavem i ded.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Aesea 25:8; 1 Korin 15:20–22; Mosaea 16:7–9; Alma 7:11–12; 11:42–44; 22:14; 28:12–14; 40:11–12

• Dallin H. Oaks, “?Wanem Nao Sevya I Bin Mekem blong Yumi?,” Liahona, Mei 2021, 75–77

• Moisés Villanueva, “Lod I Blesem Mi Bigwan Oltaem long Ol Dei blong Mi,” Liahona, Nov 2021, 44–46

• Ol vidio: “Dealing with Death: Sunday Will Come,” “Finding Hope through the Resurrection of Christ,” “He Will Give You Help,” “Until We Meet Again” (ChurchofJesusChrist.org)

Tij Folem Wei blong Sevya

Blong stap tij, i tekem tu blong stap givhan wetem lav, mo stap helpem ol narawan blong kasem ol blesing blong gospel, mo help ia, plante taem i wanem wan lesaktiv memba blong klas, i nidim. Yumi evriwan i nid blong wok tugeta blong go kasem olgeta we oli gat hadtaem, mo olsem wan tija, bae i wan ples we yuwan nomo i save help.