tempol

Indianapolis Indiana Tempol

27 Ogis

?Olsem Wanem Mi Save Soem se Bodi blong Mi I Wan Tabu Presen we I Kam long God?

Fas Korin 1–7

kaonsel tugeta pikja bokis

Kaonsel Tugeta

Wan memba blong klas presidensi o kworom presidensi i lidim; kolosap 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo fasin blong kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk, 10.2, 11.2). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Wanem sam eksperiens we i jes pas we oli tekem yumi i go kolosap moa long Papa long Heven mo Jisas Kraes.

• Kea long olgeta we oli stap long nid. ?I gat wan we i jes muv i kam insaed long wod blong yumi, o i jes joenem Jos? ?Olsem wanem nao yumi save helpem olgeta blong filim we oli welkam?

• Invaetem evriwan blong akseptem gospel. ?Wanem aktiviti i stap kam we yumi save invaetem ol fren blong yumi blong kam long hem?

• Joenem ol famli blong taem we i no save finis. ?Wanem wok moa yumi save mekem blong raetem ol histri blong yumiwan?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

tijim doktrin pikja bokis

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Nomata hemia i wan gud samting o wan nogud samting, we i luk se oli save gud Ol Lata-dei Sent from ol samting we yumi no stap mekem. Plante long ol samting we “yumi no” stap mekem oli go wetem wei we yumi stap lukaotem bodi blong yumi. Biaen long wanwan long ol joes ia abaot wanem yumi mekem i gat ol trutok ia we oli no save finis—ol samting ia we yumi save. Taem we ol trutok we i no save finis oli stap lidim ol joes blong yumi, ol joes ia, oli kam moa isi blong mekem, i gat glad long ol, mo i gat moa paoa blong stap strong tru long olgeta. Ol trutok ia we oli no save finis, oli helpem yumi tu blong eksplenem ol joes we yumi mekem long ol fren blong yumi. Maet, antap long wei we oli save yumi from ol samting we yumi no stap mekem, bae oli save gud yumi from ol samting we yumi save.

Tingbaot ol trutok we oli no save finis we yu yu save abaot ol bodi blong yumi—from wanem yumi gat olgeta, mo olsem wanem nao God i stap filim abaot olgeta, mo olsem wanem Hem i wantem yumi blong filim abaot olgeta. ?Olsem wanem nao, taem yu save ol trutok ia, i bin blesem yu mo i bin lidim ol joes blong yu? ?Olsem wanem nao save ia i save blesem ol memba blong klas o blong kworom blong yu? Taem yu stap tingting hevi long hemia, ridim Jenesis 1:27; 1 Korin 6:19–20; mo atikol blong Presiden Russell M. Nelson: “Your Body: A Magnificent Gift to Cherish” (Liahona, Aug. 2019, 50–55).

Stap Lan Tugeta

Taem we ol memba blong klas o blong kworom oli stap stadi long ol skripja long wik ia, maet oli gat sam tingting abaot ol tijing blong Pol abaot ol bodi blong yumi, we i stap long 1 Korin 6. Wan wei blong invaetem olgeta blong serem ol tingting ia, i blong givim wanwan long olgeta wan pis pepa mo askem olgeta blong raetem tri posibol ansa long kwestin ia: “?Olsem wanem nao bodi blong yumi oli olsem ol tempol?” Leftemap tingting blong olgeta blong ridim 1 Korin 6:19–20 taem oli stap tingting hevi long kwestin ia. Afta, oli save serem ol ansa blong olgeta wetem wanwan long olgeta. ?Olsem wanem nao ol tijing blong Sevya abaot ol bodi blong yumi oli lidim ol joes we yumi stap mekem? Hemia samfala moa aedia blong aktiviti long saed blong topik ia; jusum wan aot long olgeta ia, o mekem plan blong aktiviti blong yuwan.

• Sapos yu wantem gat moa toktok storian abaot wei we Pol i komperem bodi mo tempol, tingting blong soem ol pikja blong ol defren tempol. Yu save faenem sam long temples.ChurchofJesusChrist.org. Ol memba blong klas o blong kworom oli save toktok raon long ol samting we i defren we oli luk insaed long ol tempol ia, wetem ol samting we oli luk se i semsemmak. Mo tu, oli save tokbaot tu olsem wanem oli filim taem oli stap insaed long tempol. ?Wanem nao i mekem se tempol i wan ples we Spirit i stap long hem, o i wan tabu ples? Afta, yu save leftemap tingting blong klas o blong kworom blong joenem ol samting we oli bin toktok raon long hem abaot ol tempol i go long bodi blong yumi. ?Olsem wanem ol tijing abaot ol tempol we i stap long Doktrin mo Ol Kavenan 97:15–16; 109:8, 12 oli go wetem ol bodi blong yumi?

• Ol memba blong klas o blong kworom blong yu, bae oli gat—o bae oli gat—ol janis blong eksplenem from wanem oli folem ol tijing blong Sevya abaot fasin blong stap kea long bodi blong olgeta. Yu save askem sam long olgeta wanem bae oli talem, sapos, eksampol, wan i askem olgeta from wanem oli no dring alkol, ti, o kofi, o from wanem oli no werem samfala kaen klos. ?Wanem nao sam long ol trutok aot long gospel blong Jisas Kraes we i jenisim wei we yumi stap tritim bodi blong yumi? Ol memba blong klas o blong kworom i save lukluk long sam long ol trutok ia anda long “Ol Sapot Risos.”

• Blong helpem olgeta we yu stap tijim blong oli gat wan moa dip respek from ol merikel bodi blong yumi, yu save soem vidio ia “God’s Greatest Creation” (luk tu long Russell M. Nelson, “Your Body: A Magnificent Gift to Cherish,” 50–55). ?Olsem wanem nao Papa long Heven mo Jisas Kraes oli wantem yumi blong filim abaot bodi blong yumi? Maet yu wantem toktok raon tu long ol wei we Setan i stap traem blong winim tingting blong yumi blong ting nating, o iven, blong no laekem bodi blong yumi. ?Wanem nao yumi save mekem blong winim ol giaman mo ol temtesen blong hem? ?Wanem trutok nao i save helpem yumi? Sam long ol risos ia, anda long “Ol Sapot Risos” oli save help.

yut we i stap ronron

Ol bodi blong yumi oli ol presen we oli kam long God; mo ol trutok blong gospel oli helpem yumi blong kea long ol bodi ia.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Jenesis 1:27; 1 Korin 6:19–20; Alma 11:42–44; 40:23; Doktrin mo Ol Kavenan 89; 130:22

• “Famli: Wan Ofisol Toktok I Go long Wol,” speseli ol fasfala tri paragraf

• “Bodi I Olsem Tempol,” STSP, pej 62.

• Ol atikol abaot ol bodi blong yumi we oli bin kamaot long Ogis 2019 long New Era o long Liahona

• Presiden Russell M. Nelson i tijim: “Taem Hem i givim yumi presen ia, we i bodi ia, God i letem yumi blong tekem wan impoten step evriwan blong kam moa olsem Hem. Setan i andastanem gud hemia. … From hemia, plante, o ating kolosap evriwan long ol temtesen we hem i putum long rod blong yumi, i mekem yumi stap abiusum bodi blong yumi, o bodi blong ol narawan. … Bodi blong yu i tempol blong yuwan, we oli bin krietem o mekem blong i stap olsem haos blong spirit blong yu we i no save finis [luk long 1 Korin 3:16–17; 6:18–20]. Hamas yu kea long tempol ia i impoten. Naoia, mi askem yufala: ?Yu yu intres moa blong dresemap mo mekem bodi blong yu blong wol i laekem yu bitim blong mekem God i glad long yu? Ansa blong yu long kwestin ia i sendem wan daerek mesej i go long Hem abaot ol filing blong yu long saed blong bigfala presen ia we Hem i givim long yu” (“We Can Do Better and Be Better,” Liahona, Mei 2019, 68).

• Elda D. Todd Christofferson i bin tijim: “Olgeta we oli biliv se bodi blong yumi oli no wan impoten samting, be oli wan janis blong samting i jenis, bae oli no filim se oli akaontebol long God o eni narawan from ol samting we oli mekem wetem bodi blong olgeta, o ol samting we oli mekem long bodi blong olgeta. Yumi, we yumi witnesem we i tru, se i gat wan laef bifo laef ia long wol, se i gat wan laef long wol ia, mo i gat laef afta laef long wol, bae i mas talemaot se yumi gat wan diuti long God long saed blong bigfala ajivmen ia we i kriesen blong bodi blong mit mo bun. … From se bodi blong yumi i tul ia blong spirit blong yumi, hem i impoten blong yumi kea long hem long bes wei we yumi save mekem. Yumi sapos blong givim evri paoa blong bodi ia blong givim seves mo mekem wok ia blong Kraes i go moa (“Reflections on a Consecrated Life,” Liahona, Nov. 2010, 17).

Tij Folem Wei blong Sevya

Lukaot gud long olgeta insaed long klas o kworom blong yu we oli gat disabiliti, o ol nara jalenj long saed blong bodi. Helpem olgeta blong andastanem se bodi blong evriwan i impoten mo i nidim respek. Lav, olsem hemia blong Kraes we yu soem long evriwan, i save lidim bigwan tingting blong klas o kworom blong yu long wei we oli lukluk long wanwan long olgeta mo olgetawan bakegen.