13 Ogis

?Olsem Wanem Nao Jisas Kraes I Save Helpem Mi blong Jenis?

Rom 1– 6

Kaonsel Tugeta

Wan memba blong klas presidensi o kworom presidensi i lidim; kolosap 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo fasin blong kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk, 10.2, 11.2). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Olsem wanem nao yumi stap gat glad taem yumi biaen long Jisas Kraes?

• Kea long olgeta we oli stap long nid. ?Huia long wod o blong komuniti blong yumi i nidim help blong yumi? ?Olsem wanem nao yumi save helpem olgeta?

• Invaetem evriwan blong akseptem gospel. ?Olsem wanem yumi save helpem wanwan long yumi blong rere from misinari seves?

• Joenem ol famli blong taem we i no save finis. ?Olsem wanem nao yumi save tekpat long ol hadwok blong wod blong yumi blong mekem wok blong famli histri mo tempol?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

“!Gospel blong Jisas Kraes i wan gospel we man i save jenis!” Presiden Russell M. Nelson i talem (“Decisions for Eternity,” Liahona, Nov. 2013, 108). Semmak, Aposol Pol i bin eksplenem se taem we yumi kasem baptaes, yumi “wokbaot long niufala laef ya” (Rom 6:4). From Jisas Kraes, evri dei—i no jes long dei we yumi kasem baptaes—yumi save “wokbaot long niufala laef”, o yumi gat wan janis blong wokbaot i go moa longwe long sin, mo kolosap moa long God. Blong stap laef folem gospel blong Jisas Kraes, hem i minim blong sakem sin, mo blong go kolosap moa long God—we yumi no stop, mo sloslo i go—we yumi save se ol hadwok blong yumi bae oli lidim yumi i go long wan glad we i fulwan.

Tingting hevi long wei we Sevya i stap jenisim yu mo ol pipol ia we yu stap tijim. ?Olsem wanem yu save akseptem moa fulwan paoa blong Sevya blong jenisim yu? Tingting long hemia taem yu stap ridim Rom 1–6 mo taem yu stap rere blong tij. Bae yufala i save luklukbak long mesej blong Presiden Russell M. Nelson “Yumi Save Mekem Gud Moa mo Stap Gud Moa” (Liahona, Mei 2019, 67–69) o mesej blong Sista Becky Craven, “Holemtaet Jenis Ia” (Liahona, Nov 2020, 58–60).

Stap Lan Tugeta

Long sam long yumi, “niufala laef ia” we Kraes i givim (Rom 6:4) i had blong luksave from se i hapen sloslo, be long sam narawan, i hapen hariap moa. Yu save invaetem ol memba blong klas o blong kworom blong serem wanem ia blong “wokbaot long niufala laef” i minim long olgeta. ?Wanem nao sam long ol toktok mo ol sentens we oli kamaot long Rom 6 we oli tokbaot laef blong yumi wetem Sevya i lidim yumi, mo laef blong yumi we Sevya i no lidim yumi? (Sapos ol yut oli nidim help, oli save lukluk long ol ves 6, 11, 22–23.) ?Wanem ol nara toktok mo sentens nao yumi save tingting long hem? ?Olsem wanem nao Sevya i givim yumi help blong yumi jenis? Ol aktiviti olsem olgeta we oli stap ia oli save lidim yumi blong toktok i go moa long saed blong topik ia.

• Blong helpem klas o kworom blong tingbaot ol jenis we Sevya i save helpem olgeta wetem, invaetem olgeta blong ridim mining we i stap anda long “Sakem Sin, Fasin blong Sakem Sin” insaed long Gaed long Ol Skripja (olskripja.ChurchofJesusChrist.org). Mo tu, oli save toktok raon long mining blong fasin blong sakem sin we Presiden Russell M. Nelson i givim long ol seven fasfala paragraf blong mesej blong hem “Yumi Save Mekem Gud Moa mo Stap Gud Moa.” ?Wanem impoten trutok nao yumi lanem abaot fasin blong sakem sin aot long ol mining ia? Mo tu, yu save givim, long klas o kworom, lis blong Presiden Nelson abaot ol samting we Jisas i bin askem yumi blong mekem blong jenis (long nambafaef paragraf blong mesej blong hem). Leftemap tingting blong olgeta blong raetemdaon wan spesifik samting we oli filim strong blong jenisim long laef blong olgeta. Talem testemoni blong yu abaot paoa blong Sevya blong helpem yumi blong sakem sin mo jenis.

• Sista Becky Craven i talem se ol fren blong hem, blong laef blong hem bifo, samtaem oli talem long hem: “!Yu no jenis nating!” Yu save serem ol tingting blong Sista Craven long saed blong poen ia (luk long “Holemtaet Jenis ia,” 59–60). Askem ol memba blong klas o blong kworom blong oli traem tingting se long faef o ten yia taem, bae oli fas long wan fren blong olgeta, blong laef blong olgeta bifo. ?Wanem jenis nao bae i kamaot klia long ol fren blong yumi? ?Long wanem wei nao yumi hop se bae yumi jenis? ?Olsem wanem nao fet long Jisas Kraes i stap helpem yumi blong jenis? (luk long Mosaea 5:2–5, 7; Alma 5:11–13; Ita 12:27, o “paten blong jenis we i gogohed” we Sista Craven i tokbaot long ol fofala paragraf blong mesej ia blong hem we i stat wetem “Taem mi yangfala”). Yu save askem ol yut blong serem eni eksperiens abaot wan taem we Jisas Kraes i bin helpem olgeta blong jenisim fasin blong olgeta.

• Samtaem, yumi save tingting se man i wantem luk yumi mekem ol jenis o kam antap long laef blong yumi, wetem paoa blong yumiwan nomo. ?Olsem wanem hemia i defren long tru fasin blong sakem sin? Blong helpem klas o kworom blong yu blong toktok raon long kwestin ia, yu save luklukbak, tugeta, long ol toktok insaed long “Ol Sapot Risos.” ?Wanem nao yumi save mekem naoia blong lukaotem help blong Sevya mo paoa blong Hem blong mekem se ol jenis ia bae oli stap olwe mo bae oli wan glad? Hemia i save kam wan gudfala janis blong ol yut oli tingting long ol gol blong olgeta blong developem olgetawan. ?Olsem wanem yumi save putum Sevya i kam insaed long ol gol blong yumi?

Fet long Jisas Kraes i save helpem yumi blong sakem sin mo kam moa olsem Hem evri dei.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Presiden Russell M. Nelson i eksplenem se: “Yumi save jenisim ol fasin blong yumi. Ol samting we yumi wantem tumas, oli save jenis. ?Olsem wanem? I gat wan wei nomo. Tru jenis long laef—jenis we i stap oltaem—i save kam nomo tru long paoa blong Atonmen blong Jisas Kraes we i save hilim man, klinim man, mo mekem man i save mekem samting. !Hem i lavem yufala—wanwan long yufala! Hem i letem yumi blong kasem paoa blong Hem taem yumi stap obei long ol komanmen blong Hem, wetem tru hat, tingting mo fasin blong obei stret” (“Decisions for Eternity,” 108).

• Elda Dale G. Renlund i bin tijim: “Paoa ia we i mekem se i posibol blong sakem sin, hem i sakrifaes blong Sevya blong yumi, we i pem praes. Tru fasin blong sakem sin, i mas tekem fet long Lod Jisas Kraes, fet se bae Hem i save jenisim yumi, fet se Hem i save fogivim yumi, mo fet ia se bambae Hem i helpem yumi blong stap longwe long fasin blong mekem moa mistek. Kaen fet ia, i mekem se Atonmen blong Hem i wok insaed long laef blong yumi. Taem we bae yumi “tanem raon” o [sakem sin] wetem help blong Sevya, bae yumi save filim hop ia insaed long ol promes blong Hem mo tru glad ia blong fasin blong fogiv. Taem i no gat Ridima, hop mo glad we i kam wetem, i go lus nomo, mo fasin blong sakem sin i kam nomo olsem wan jenis we i no gat mining. Be taem yumi praktisim fet long Hem, yumi kam blong jenisim yumi, mo yumi tekem paoa mo hat blong fogivim sin” (Dale G. Renlund, “Repentance: A Joyful Choice,” Liahona, Nov. 2016, 122).

Tij Folem Wei blong Sevya

Ol aktiviti we oli stap long aotlaen ia oli givim sam posibol rod blong helpem klas o kworom blong yu blong oli lanem tugeta abaot Sevya mo paoa blong Hem blong helpem yumi blong jenis. I gat ol narafala samting we yuwan yu save mekem we bae i wok moa gud long ol situesen blong olgeta we yu stap tijim. Wetem prea, lukaotem blong Spirit i lidim yu taem yu stap mekem ol plan blong bildimap fet long Jisas Kraes.