Jisas wetem ol man we oli stap folem Hem

Jisas mo Ol Disaepol blong Hem, © Balage Balogh/Art Resource, NY

23 Julae

?Wanem Nao I Minim blong Stap Olsem Wan Disaepol blong Jisas Kraes?

Ol Wok 10–15

kaonsel tugeta pikja bokis

Kaonsel Tugeta

Wan memba blong kworom o klas presidensi i lidim; kolosap 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo fasin blong kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk, 10.2, 11.2). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Long wanem wei nao yumi bin luk han blong God insaed long laef blong yumi?

• Kea long olgeta we oli stap long nid. ?Olsem wanem yumi save sapsapotem wanwan long yumi long ol samting we yumi stap gotru long hem?

• Invaetem evriwan blong akseptem gospel. ?Olsem wanem yumi save yusum teknoloji long wan wei we i gud moa, mo olsem wan tul blong stap serem gospel?

• Joenem ol famli blong taem we i no save finis. ?Wanem nao yumi stap mekem blong helpem ol famli blong yumi blong kam long Kraes?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

tijim doktrin pikja bokis

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Japta 11 blong Buk blong Ol Wok i talem se, blong fas taem, oli singaotem “ol disaepol se oli ol Kristin Man” (ves 26). Hem i wan tabu spesel janis mo responsabiliti blong oli save yu olsem wan disaepol blong Kraes, mo blong oli singaotem yu folem nem blong Hem. Olsem we Presiden M. Russell Ballard i talem: “?Yumi stap luksave blesing ia blong tekem nem blong Wan Pikinini ia nomo blong God we I lavem tumas? ?Yumi andastanem olsem wanem hemia i impoten? Nem blong Sevya i nem ia nomo long wol we man i save sef long hem” (“Hamas Nem I Impoten,” Liahona, Nov. 2011, 79).

?Wanem nao i minim long yu blong stap olsem wan Kristin Man—wan disaepol blong Jisas Kraes? ?Hem i minim wanem long ol memba blong klas o blong kworom blong yu? ?Olsem wanem taem yumi tekem nem blong Hem long yumi i lidim tingting blong yu? Yu save tingting long sam taem we yu bin kasem insperesen tru long eksampol blong wan we i bin mekem samting olsem wan tru disaepol blong Kraes.

Taem yu stap rere blong tij, ridim Ol Wok 10–15, mo tu, tingting blong ridim wan, o moa long wan mesej blong Jeneral Konfrens we i stap long “Ol Sapot Risos.”

Stap Lan Tugeta

Blong helpem ol memba blong klas o blong kworom blong yu blong oli andastanem wanem hem i minim blong stap olsem wan disaepol blong Jisas Kraes, yu save invaetem olgeta blong endem toktok ia: “Wan disaepol blong Jisas Kraes i wan man o wan woman we …” Oli save luklukbak long Ol Wok 11:19–26, mo lukaotem ol niu tingting insaed long ol ves 21, 23–24, 26 abaot wei we ol memba blong Jos oli bin soem se oli bin ol disaepol. ?Olsem wanem we, taem yumi stap olsem ol man blong stap folem Jisas Kraes, i save lidim ol tingting mo ol fasin blong yumi? Ol aktiviti olsem olgeta ia, oli save helpem moa toktok storian ia.

• Bae i save help blong toktok raon long wanem nao hem i wan disaepol blong Jisas Kraes (luk long toktok blong Elda Robert D. Hales we i stap long “Ol Sapot Risos”). Yu save askem ol yut blong oli serem sam tijing blong Jisas Kraes we i givim insperesen long olgeta, mo nara samting we oli bin lanem aot long eksampol blong Hem. Oli save luklukgud insaed long samfala skripja insaed long “Ol Sapot Risos,” o sam nara skripja we oli save, blong kasem sam aedia. Oli save raetemdaon lis long bod, blong ol samting we oli bin lanem abaot Sevya aot long ol skripja ia. Afta, oli save tokbaot sam wei we oli save folem, wetem tru tingting, ol tijing mo ol eksampol we oli stap long lis we i stap long bod.

• Askem ol memba blong klas o blong kworom blong tingting abaot wanem hem i mining blong stap wan Kristin man o woman. Oli save mekem wan lis blong ol kwaliti we oli ting se bae oli faenem long laef blong wan we i stap folem Jisas Kraes (eksampol, luk long Jon 13:34–35). Yu save serem grup long tu grup, mo askem wanwan grup blong ridim wan long olgeta mesej ia mo lukaotem sam moa kwaliti we bae oli ademap long lis blong olgeta: Elda Terence M. Vinson, “Ol Tru Disaepol blong Sevya” (Liahona, Nov 2019, 9–11) mo Elda Massimo De Feo, “Stret Lav: Tru Saen blong Evri Tru Disaepol blong Jisas Kraes” (Liahona, Mei 2018, 81–83). Invaetem ol yut blong oli tingting hevi long wan samting we i stap long lis we oli wantem wok long hem.

• Yu save askem ol memba blong klas o blong kworom se i minim wanem long olgeta blong oli singaotem olgeta long nem blong Jisas Kraes. Maet oli save serem wan eksperiens we oli bin gat, we wan i kam blong save se oli ol memba blong Jos Ia blong Jisas Kraes blong Ol Lata-dei Sent. ?Olsem wanem yumi filim blong save se, oli save yumi olsem ol man o woman we i stap folem Jisas Kraes, mo yumi ol memba blong Jos ia blong Hem? Ol yut oli save luklukgud insaed long samfala skripja, o wan long ol mesej ia insaed long “Ol Sapot Risos,” mo lukaotem sam niu tingting we bae i givim olgeta insperesen blong laef folem mak blong nem blong Jisas Kraes, we oli bin tekem long olgeta. ?Long wanem wei nao, taem we oli singaotem yu long nem blong Jisas Kraes, i jenisim ol joes we yu stap mekem?

sam yang woman oli stap wokbaot

Olsem ol memba blong Jos ia blong Kraes, yumi ol disaepol blong Hem, mo oli singaotem yumi tru long nem blong Hem.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Matiu 5:38–47; 6:19–21; 7:1–5; 25:31–40; Luk 10:25–37; Jon 13:34–35; 14:15 (ol tijing blong Jisas Kraes)

• Matiu 4:1–11; Mak 6:35–44; Luk 4:16–19; 22:39–42; 23:33–34; Ol Wok 10:38 (Eksampol blong Jisas Kraes)

• Jeremaea 15:16; Mosaea 5:7–15; Alma 46:12–15; 3 Nifae 27:3–8 (Stap tekem nem blong Sevya long yumiwan)

• Lisa L. Harkness, “Stap Ona long Nem blong Hem,” Liahona, Nov 2019, 60–62

• Paul B. Pieper, “Evriwan i Mas Tekem long Olgeta Nem we i Kam long Papa,” Liahona, Nov 2018, 43–45

• Elda Robert D. Hales i bin tijim: “?Hem i minim wanem blong stap wan disaepol blong Lod Jisas Kraes? Wan disaepol i wan we i kasem baptaes, mo i wantem blong tekem long hem, nem blong Sevya mo stap folem Hem. Wan disaepol i traehad blong kam olsem Kraes taem hem i stap obei long ol komanmen blong Hem blong laef long wol ia, semmak olsem wan man blong wok i wantem kam olsem masta blong hem.

  “Plante pipol oli harem toktok ia, disaepol mo oli ting se i minim “man blong folem.” Be wan tru disaepol i wan wei blong laef. Hemia i minim moa bitim blong stap stadi mo praktisim wan lis blong ol fasin. Ol disaepol oli laef blong mekem se ol fasin blong Kraes, oli wivim olgeta insaed long ol string blong bodi blong olgeta, mo i olsem wan mat long saed blong spirit.” (“Blong Kam Wan Disaepol blong Lod Jisas Kraes,” Liahona, May 2017, 46).

Tij Folem Wei blong Sevya

Olsem wan tija, yu save leftemap tingting blong gat ol toktok storian we i leftemap tingting, we olgeta ia we oli stap lan oli save serem ol eksperiens mo testemoni blong olgeta.