Aposol Pita i stap toktok long wan bigfala grup blong ol pipol

Afta long Laef Bakegen long Ded blong Hem, Sevya i bin lidim Jos blong Hem wetem long Ol Aposol blong Hem, mo wan long olgeta, hem i Pita.

9 Julae

?Olsem Wanem Nao Jisas Kraes I Stap Lidim Jos Ia blong Hem?

Ol Wok 1–5

kaonsel tugeta pikja bokis

Kaonsel Tugeta

Wan memba blong klas presidensi o kworom presidensi i lidim; kolosap 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo fasin blong kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk, 10.2, 11.2). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Wanem topik nao bisoprik i bin toktok raon long hem long wod yut kaonsel miting blong yumi? ?Wanem nao bae yumi mekem, olsem wan klas o wan kworom, folem ol toktok storian ia?

• Kea long olgeta we oli stap long nid. ?Olsem wanem nao yumi save openem han long ol pipol long ol wei we i olsem hemia blong Kraes taem se yumi luk se i gat wan nid, mo yumi no save wanem blong talem?

• Invaetem evriwan blong akseptem gospel. ?Wanem nao yumi faenem insaed long gospel blong Jisas Kraes we i tekem glad i kam long yumi? ?Olsem wanem nao yumi save serem glad ia wetem ol narawan?

• Joenem ol famli blong taem we i no save finis. ?Wanem nao yumi stap mekem blong faenem nem blong ol bubu blong yumi we oli nidim blong kasem ol odinens blong tempol? ?Wanem nao yumi save mekem blong helpem ol narawan blong oli faenem nem blong ol bubu blong olgeta?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

tijim doktrin pikja bokis

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Hem i wan samting blong save se Jos i gud, se Jos i stap tijim ol tru prinsipol, o se Jos i save helpem yu blong kam wan moa gud man o woman. Hem i wan nara samting blong save se, tedei, Jos i stret Jos Ia blong Jisas Kraes, we Hem nao i stanemap, mo Hem nao i stap lidim oltaem tru long wan profet we i stap laef. Buk ia blong Ol Wok i givim plante pruf se Sevya nao, Hem i stap insaed long wok ia blong lidim Jos ia blong Hem. Taem yu stap stadi long ol japta 1–5, lukaotem pruf ia, mo tingting hevi long hao nao, yu yu save se Hem i stap gohed blong lidim Jos blong Hem tedei. ?Olsem wanem nao save ia i bin blesem yu?

?Weswe? ?Ol yut ia we yu stap tijim olgeta, oli gat wan testemoni se Jos we oli memba long hem, Sevya nao Hemwan i stap lidim? ?Olsem wanem nao testemoni ia bae i save blesem olgeta? ?Olsem wanem nao yu save helpem olgeta blong kasem testemoni ia, mo mekem testemoni ia i kam strong moa? Antap long stadi blong yu long Buk blong Ol Wok 1–5, maet bae yu wantem ridim mesej blong Elda Quentin L. Cook “Blesing blong Revelesen we I Stap Gogohed we I Go long Ol Profet mo Revelesen blong Yuwan blong Soem Rod blong Laef blong Yu” (Liahona, May 2020, 96–100).

Stap Lan Tugeta

Blong statem toktok storian insaed long klas, yu save raetem hemia long bod: Jisas Kraes i bin lidim Jos blong Hem tru long revelesen we Hem i stap givim long Ol Aposol blong Hem. Ol memba blong klas o blong kworom oli save serem wan samting we oli faenem long taem we oli bin stadi long Ol Wok 1–5 we i sapotem tingting ia. (Sapos i nid, yu save lidim olgeta blong go long Buk blong Ol Wok 1:1–8; 2:36–39; 4:1–13, 31–33.) ?Wanem pruf nao yumi luk, we i soem se Jisas Kraes i stap lidim Jos blong Hem long sem wei tedei? Ol aktiviti olsem hemia we i kam afta i save helpem olgeta we yu stap tijim blong mekem fet blong olgeta i kam strong moa long saed blong impoten trutok ia.

• Yu save rere long samfala kwestin, olsem: ?Olsem wanem nao Jisas Kraes i stap lidim Jos ia blong Hem? ?Olsem wanem yumi save kam blong biliv moa se Jisas Kraes i stap lidim Jos ia blong Hem? ?From wanem yu yu stap trastem ol profet mo ol aposol blong Lod? Givim long wanwan memba blong klas o blong kworom ia, wan long ol kwestin ia, mo invaetem olgeta blong tingting hevi long kwestin ia, mo blong tingting long sam skripja we i save helpem olgeta blong ansa (sapos i nid, luk long “Ol Sapot Risos” blong gat sam aedia). Afta, givim taem long evriwan blong serem mo toktok raon long wanem we oli lanem.

• Blong helpem klas o kworom blong luk olsem wanem Lod i stap lidim Jos blong Hem tedei, yu save invaetem olgeta blong luklukbak long fas seksen blong mesej blong Elda Quentin L. Cook: “Blesing blong Revelesen we I Stap Gogohed we I Go long Ol Profet mo Revelesen blong Yuwan blong Soem Rod blong Laef blong Yu.” Mebi wanwan memba blong klas o blong kworom i save serem wan samting aot long mesej ia we i helpem olgeta blong save se Jisas Kraes i wok strong mo Hem nao i stap lidim Jos blong Hem. ?Wanem nara niu tingting nao yumi faenem insaed long ol skripja anda long “Ol Sapot Risos”?

• Bae i save helpem ol yut tu blong lanem moa abaot wei we Lod i stap lidim wod blong yu. Yu save askem ol yut blong serem ol eksampol abaot wei we Lod i stap lidim wanwan lida long wod, we i tekem tu presiden blong klas o blong kworom. Long wik bifo long klas, yu save askem sam lida blong wod blong oli serem—fes tu fes, o onlaen—samfala eksperiens we i soem olsem wanem Lod i stap lidim olgeta. Ol memba blong klas o blong kworom oli save faenem sam moa eksampol insaed long mesej blong Presiden Henry B. Eyring: “Lod I Stap Lidim Jos blong Hem” (Liahona, Nov. 2017, 81–84). ?From wanem nao hem i impoten blong gat fet se Lod i stap givim insperesen long ol lida blong wod blong yumi?

• Sam pipol oli filim se, sapos yumi ol gudfala pipol mo stap mekem ol gud samting, bae yumi no nidim wan jos. Yu save askem ol yut se bae oli ansa wanem long toktok ia. Long mesej blong hem, “Nid blong Gat wan Jos” (Liahona, Novemba 2021, 24–26), Presiden Dallin H. Oaks i givim samfala risen from wanem, ol jos, wetem jos ia blong Lod, we Hem i putumbak, oli impoten. Ol yut oli save luklukgud insaed long mesej ia, we oli sidaon tutu o long smol grup, o olsem wan klas o wan kworom, mo serem wanem we oli faenem.

ol yang man i miting

Lod i stap lidim Jos blong Hem tru long revelesen, we i tekem tu ol presidensi blong klas mo blong kworom.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Efesas 2:19–20; 4:11–15; Doktrin mo Ol Kavenan 1:38; 21:1–6; Ol Toktok blong Bilif 1:5–6

Tij Folem Wei blong Sevya

Blong invaetem Spirit i kam long tijing blong yu, leftemap tingting blong ol narawan blong oli serem witnes blong olgetawan long saed blong trutok ia we yufala i stap toktok raon long hem.