Blesing blong Revelesen we I Stap Gogohed blong Go long Ol Profet mo Revelesen blong Yuwan blong Soem Rod blong Laef blong Yu
Revelesen we i stap gogohed, mifala i bin kasem mo mifala i bin kasem tru long ol rod we Lod i stanemap i stap.
Tedei bae mi tokbaot revelesen we i gogohed blong go long ol profet mo revelesen we i gogohed blong kam long yumiwan blong lidim laef blong yumi.
Samtaem, yumi kasem revelesen iven taem yumi no save ol stamba tingting blong Lod. Sot taem bifo bae oli singaotem Elda Jeffrey R. Holland i kam wan Aposol long Jun 1994, mi bin gat naes revelesen eksperiens ia se bae oli singaotem hem. Mi bin wan ripresentativ blong rijin mo mi no luk from wanem bae mi mi kasem save ia. Be mitufala i bin kompanion olsem ol yang misinari long Inglan long yia 1960, mo mi bin gat bigfala lav long hem. Mi bin tekem se eksperiens ia i wan kaen sore long mi. Long ol las yia, mi bin askem miwan sapos Lod i bin stap mekem mi mi rere blong mi kam wan Junia insaed long Olgeta Twelef long wan gudfala misinari kompanion we i bin junia kompanion blong mi taem mitufala i misinari.1 Samtaem mi givim woning long ol yang misinari blong oli mas kaen long ol junia kompanion blong olgeta from se oli neva save wetaem nao oli kam senia kompanion blong olgeta.
Mi gat wan strong testemoni se Jos ia we i kambak, Sevya Jisas Kraes nao i stap lidim. Hem i save huia blong singaotem olsem Ol Aposol blong Hem mo long wanem oda blong singaotem olgeta. Hem i save tu olsem wanem blong rere long senia Aposol blong Hem blong i stap profet mo Presiden blong Jos.
Long moning, yumi bin gat blesing blong harem profet we yumi lavem tumas, Presiden Russell M. Nelson, we i givim wan bigfala 200 yia ofisol toktok i go long wol long saed blong Restoresen blong gospel ia we i fulwan blong Jisas Kraes.2 Impoten ofisol toktok ia we i kam long Presiden Nelson, i mekem i klia se Jos Ia blong Jisas Kraes i kamaot wea, hao i laef mo wea nao hem i stap go long hem long fiuja folem prinsipol blong revelesen we i gogohed. Niufala ofisol toktok ia i ripresentem toktok blong wan Papa we i gat lav long ol pikinini blong Hem.
Long wan taem bifo, Presiden Spensa W. Kimbol i talemaot ol filing we mi filim tedei. Hem i talem: “ Aot long evri samting we yumi mas talem tangkyu from, i we ol heven oli open mo Jos Ia blong Jisas Kraes we i bin kambak i stanap antap long bigfala ston ia blong revelesen. Revelesen we i gogohed, i tru, i laef blad blong gospel blong Lod mo Sevya we i stap laef, Jisas Kraes.”3
Profet Inok i bin luk finis ol dei ia long taem we hem i bin stap laef. Lod i bin talemaot long Inok abaot bigfala rabis fasin we bae i stap mo i bin profesae abaot “ol bigfala hadtaem” we bae oli hapen. Be, Lod i bin promesem: “be bae mi mekem ol pipol blong mi oli stap sef.”4 “Mo stret mo gud fasin, bae mi sendem i kamdaon aot long heven; mo bae mi sendem trutok i go long wol, blong testifae abaot Wan Stret Pikinini Ia Nomo blong mi.”5
Presiden Esra Taf Benson i bin tij wetem bigfala paoa se Buk blong Momon, kiston blong relijin blong yumi, i bin kamaot long graon blong mekem anaonsmen blong Lod i go long Inok, i kamtru . Papa mo Pikinini, mo ol enjel mo ol profet we oli bin kamaot long Profet Josef Smit, “heven i lidim olgeta blong putumbak ol paoa we kingdom i nidim.”6
Profet Josef Smit i bin kasem wan revelesen folem wan moa revelesen. Sam oli tokbaot long konfrens ia. Plante long ol revelesen we Profet Josef i bin kasem oli stap gud insaed long Doktrin mo Ol Kavenan. Evri tabu buk blong Jos, insaed i gat tingting blong Lod mo wanem Hem i wantem blong yumi long las dispensesen ia.7
Antap long ol bigfala fandesen skripja ia, yumi gat blesing blong gat revelesen we i gogohed blong go long ol profet we oli stap laef. Ol profet, “oli kasem wok blong stap ol ejen blong Lod, we oli kasem raet blong toktok long bihaf blong Hem.”8
Sam revelesen, oli impoten bigwan, mo sam narawan oli mekem andastaning blong yumi i bigwan moa long saed blong ol tabu trutok mo oli soem rod blong taem blong yumi.9
Yumi talem tangkyu tumas from revelesen we i bin go long Presiden Spensa W. Kimbol blong givim prishud mo tempol blesing i go long evri man we oli klin inaf mo oli memba blong Jos ia, long 8 Jun 1978.10
Mi bin wok wetem plante long Olgeta Twelef we oli bin stap mo oli bin tekpat taem we impoten revelesen ia i bin kamaot. Wanwan long olgeta, long praevet storian, oli bin konfemem paoa mo spirit we Presiden Kimbol i gat blong mekem man i kam wan, mo wanem oli gotru long hem. Plante oli talem se i revelesen ia we i gat moa paoa we oli bin kasem bifo, o long tetaem ia.11
Olgeta long mifala we oli bin stap long Kworom blong Olgeta Twelef Aposol i bin gat blesing long taem blong mifala taem we ol impoten revelesen i bin kamaot tru long ol las profet.12 Presiden Russell M. Nelson, Lod i bin givim wok ia long hem blong i stap olsem ejen blong Hem, speseli long saed blong ol revelesen blong helpem ol famli blong bildim ol haos blong prea insaed long hom blong olgeta, blong mekem Isrel i kam tugeta long tugeta saed blong vel, mo blesem ol memba we oli endao long ol tabu tempol odinens.
Taem we oli bin anaonsem ol impoten jenis blong blesem ol hom blong yumi long Oktoba 2018 jeneral konfrens, mi bin testifae long yufala se “long ol fulap toktok blong Kaonsel blong Fas Presidensi mo Kworom blong Olgeta Twelef Aposol insaed long tempol, mo afta we profet blong yumi i askem Lod blong kasem revelesen … wan strong konfemesen i kam long mifala evriwan.”13
Long tetaem ia, oli bin kasem ol nara revelesen long saed blong ol tabu tempol odinens, be oli no bin anaonsem o stat blong yusum.14 Wok blong soem rod ia i bin stat blong kamaot tru long revelesen we i go stret long profet, Presiden Russell M. Nelson mo konfemesen, long naes wei, i go long olgeta we oli bin pat blong wok ia. Presiden Nelson i yusum stret ol sista we oli bin prisaed ova long Rilif Sosaeti, Ol Yang Woman, mo Praemeri oganaesesen. Las konfemesen, insaed long tempol, i go long Fas Presidensi mo Kworom blong Olgeta Twelef Aposol i bin strong long saed blong spirit mo i gat paoa. Mifala wanwan i bin save we mifala i bin kasem maen, tingting mo voes blong Lod.15
Mi talem, wetem evri tabu fasin, se revelesen we i stap gogohed, mifala i bin kasem mo mifala i bin kasem tru long ol rod we Lod i stanemap i stap. Mi testifae se niufala ofisol toktok we Presiden Nelson i bin givim long moning ia, i wan revelesen blong blesem evri pipol.
Mifala I Sendem Wan Invitesen long Evriwan blong Lafet long Tebol blong Lod
Mifala i talem tu, tingting blong hat blong mifala, blong joen bakegen wetem olgeta oli gat hadtaem wetem testemoni blong olgeta, we oli no aktiv tumas, o oli bin askem blong karemaot nem blong olgeta long ol rekod blong Jos. Mifala i wantem lafet wetem yufala mo kakae “ol toktok blong Kraes,” long tebol blong Lod, blong lanem ol samting we yumi evriwan i sapos blong mekem.16 !Mifala i nidim yufala! !Jos i nidim yufala! !Lod i nidim yufala! Prea blong hat blong mifala i blong yu joenem mifala blong stap wosipim Sevya blong wol. Mifala i save se sam long yufala, oli mekem nogud yufala, oli no bin kaen o mekem eni samting long yufala we i no fasin olsem hemia blong Kraes. Mifala i save tu se sam oli bin gat jalenj wetem bilif blong olgeta, mo ol narawan oli no andastanem, o stretem hemia.
Sam long ol memba blong yumi we oli strong mo fetful oli bin safa tru long wan jalenj long fet blong olgeta, blong sot taem. Mi lavem tru stori blong W. W. Fels, we i bin lego Jos mo i bin testifae agensem Profet Josef Smit long wan kot long Misuri. Afta we hem i bin sakem sin, hem i raet i go long Josef: “Mi save situesen blong mi, yu save, mo God i save; mo mi wantem se Lod i sevem mi sapos ol fren blong mi oli save helpem mi.”17 Josef i bin fogivim hem, i putum hem i gobak long wok, mo wetem lav, i raetem: “Ol fren long fas ples, bae oli fren long en.”18
Ol brata mo sista. I nomata long situesen blong yumi, plis yufala i mas save se Jos mo ol memba blong hem bae oli welkamem yu i kambak!
Revelesen blong Yumiwan blong Lidim Laef blong Yumi
Revelesen blong yuwan i stap blong evriwan we, wetem tingting i stap daon, oli lukaot blong Lod i soem rod. Hem i impoten, semmak olsem revelesen we i go long Profet. Revelesen we i blong yuwan, long saed blong spirit we i kam long Tabu Spirit, i mekem se plante milian oli bin kasem testemoni we i inaf blong kasem baptaes mo konfemesen olsem memba blong Jos Ia blong Jisas Kraes blong Ol Lata-dei Sent.
Revelesen blong yuwan i bigfala blesing ia we wan i kasem afta long baptaes, taem we yumi kam tabu from yumi kasem Tabu Spirit.19 Mi save tingbaot wan spesel revelesen long saed blong spirit taem mi bin 15 yia. Brata blong mi i bin lukaotem blong Lod i soem Hem wei blong toktok long dia papa blong mifala, we i no bin wantem blong brata blong mi i go long wan misin. Mi bin prea wetem tru tingting tu, mo mi bin kasem revelesen blong miwan se gospel ia i tru
Rol blong Tabu Spirit
Revelesen we i blong yuwan i stanap long ol trutok long saed blong spirit, we yu kasem long Tabu Spirit.20 Tabu Spirit i Hem we i talemaot mo i testifae abaot evri trutok, speseli abaot Sevya. Sapos i no Tabu Spirit, bae yumi no rili save se Jisas Hem i Kraes. Stamba rol blong Hem i blong stap olsem witnes blong Papa mo Pikinini, mo taetol blong Tufala mo glori blong tufala.
Tabu Spirit i save lidim tingting blong evriwan long wan wei we i gat paoa.21 Blong i lidim yumi bae i no hapen oltaem sapos wan i no kasem baptaes mo i kasem presen we i Tabu Spirit. Tabu Spirit i stap tu olsem wan ejen we i klinim yumi taem yumi stap sakem sin mo stap fogivim man.
Spirit i toktok long ol wei we i gudfala tumas. Lod i yusum ol naes toktok blong tokbaot hemia
“Yes, luk, bambae mi talem long yu insaed long maen mo insaed long hat blong yu, tru long Tabu Spirit, we bambae i kam insaed long yu mo bambae i stap insaed long hat blong yu.
“Nao luk, hemia i spirit blong revelesen.”22
Nomata se risal blong hem i save gat bigfala paoa, plante taem, i kam olsem wan kwaet smol voes.23 Ol skripja oli tekem plante long ol eksampol blong wei we Spirit i stap lidim ol maen, mo i talem pis long maen blong yumi24 i stap kipim maen i bisi,25 i givim laet long maen blong yumi,26 mo iven, i wan voes insaed long ol maen blong yumi.27
Samfala prinsipol we oli mekem yumi rere blong revelesen i go olsem:
-
Prea blong Spirit i soem rod long yu. Wetem respek mo tingting i stap daon, yumi nidim blong lukaotem mo askem28 mo save wet longtaem mo save folem tingting blong narawan.29
-
Stap rere from insperesen Hemia i nidim blong yumi wan wetem ol tijing blong Lod mo yumi folem gud ol komanmen blong Hem.
-
Stap klin inaf blong tekem sakramen. Taem yumi mekem hemia, yumi wan witnes mo yumi mekem kavenan wetem God se bae yumi tekem long yumiwan, nem ia blong Tabu Pikinini blong Hem, mo bae yumi tingbaot Hem mo obei long ol komanmen blong Hem.
Ol prinsipol ia oli mekem yumi rere blong kasem, luksave, mo folem ol kwaet toktok mo rod we Tabu Spirit i soem. Hemia i tekem “ol trutok … we bae oli givim pis—we oli tekem glad i kam, [mo] laef we i no save finis.”30
Fasin blong yumi rere long saed blong spirit i kam strong moa taem yumi stadi oltaem long ol skripja mo ol trutok blong gospel, mo stap tingting hevi long maen blong yumi abaot help ia we yumi stap lukaotem. Be tingbaot se yu mas gat longfala tingting mo yu mas trastem taem blong Lod. Fasin blong soem rod, i kam tru long wan Lod we i save evri samting, taem we, long tingting blong Hem, Hem i jusum blong mekem yu skul smol.”31
Revelesen long Ol Koling mo Ol Wok we Yumi Gat blong Mekem
Tabu Spirit bae i givim revelesen tu long ol koling mo ol wok we yumi gat blong mekem. Long eksperiens blong mi, bigfala help long saed blong spirit i kam plante taem yumi stap traem blong blesem ol narawan taem yumi mekem ol responsabiliti blong yumi.
Mi save tingbaot se, olsem wan yang bisop, mi bin kasem wan kol long wan kapol smol taem bifo mi mas kasem wan plen blong go mekem wok. Mi plis long Lod se bifo tufala i kam, bae mi save olsem wanem blong blesem tufala. Tru long revelesen, mi kasem wanem i problem, mo ansa we mi sapos blong givim. Help ia we i kam tru long revelesen i bin letem mi mekem ol tabu responsabiliti blong koling blong mi olsem wan bisop, nomata se mi gat smol taem nomo i stap. Ol bisop, raon long wol, olgeta tu oli gat ol semfala eksperiens olsem mi. Olsem wan stek presiden, mi no kasem ol impoten revelesen nomo, be tu, mi kasem ol samting we mi mas stretem long miwan blong save mekem ol stamba tingting blong Lod.
Mi save talem stret long yufala se help we i kam tru long revelesen, wanwan long yumi i save kasem taem we yumi putum tingting i stap daon mo wok long plantesen blong Lod. Plante long ol help, oli kam tru long Tabu Spirit. Samtaem, mo from sam stamba tingting, hem i kam stret long Lod. Mi testifae miwan se hemia i tru. Help Jos i wokbaot folem, i go long Presiden mo profet blong Jos.
Mifala, olsem Ol Aposol blong tedei, mifala i gat spesel janis ia blong wok mo travel wetem profet blong tedei, Presiden Nelson. Mi talem sot wanem we Wilfod Wudrof i bin talem abaot Profet Josef Smit; hem i tru semmak nomo wetem Presiden Nelson. Mi bin luk “ol wok blong Spirit blong God wetem hem, mo ol revelesen blong Jisas Kraes i kam long hem, mo mi luk we ol revelesen ia oli kamtru.”32
Mi askem wetem tingting i stap daon se, wanwan long yumi, bae i lukaotem revelesen we i gogohed blong kam blong lidim laef blong yumi, mo blong yumi folem Spirit taem yumi stap wosipim God we i Papa, long nem blong Sevya blong yumi, Jisas Kraes, we mi mi wan witnes blong Hem, long nem blong Jisas Kraes, amen.