Paoa blong Buk blong Momon long Fasin blong Jenisim Laef

I Kam long Elda Benjamin M. Z. Tai

Blong Olgeta Seventi

Buk blong Momon i givim kakae long saed blong spirit, i mekem wan plan blong aksen, mo joenem yumi wetem Tabu Spirit.

Afta we mi lukluk tru long ripot blong wan jekap blong bodi we mi bin mekem, mi lanem se mi nidim blong mekem sam jenis long fasin blong laef blong mi. Blong helpem mi, dokta blong mi i mekem wan plan blong kakae mo eksasaes, we, sapos mi jusum blong folem, bae i jenisim mi i kam long wan helti man.

Sapos wanwan long yumi i go tru long wan jekap long saed blong spirit, ?wanem nao bae yumi lanem abaot yumiwan? ?Wanem nao dokta blong yumi long saed blong spirit bae i stretem? Blong yumi kam huia yumi nid blong kam, i impoten blong yumi save wanem blong mekem mo mekem wanem we yumi save.

Jisas Kraes i Masta Dokta ia. ¹ Tru long Atonmen blong Hem, Hem i fasem ol soa, tekem long Hemwan ol harem nogud, mo hilim ol hat blong yumi we i brok. ² Tru long gladhat blong Hem ol wiknes blong yumi bae oli kam strong. ³ Hem i invaetem yumi blong folem Hem ⁴ taem yumi lanem samting aot long Hem, lisin long ol toktok blong Hem, mo wokbaot wetem fasin blong no stap flas we i kam long Spirit blong Hem. ⁵ Hem i bin promes blong helpem yumi ⁶ long rod ia blong jenis we i tekem ful laef, we bae i jenisim yumi mo karem glad we i no save finis. ⁷

Sevya i bin givim Buk blong Momon olsem wan tul we i gat paoa blong help long fasin ia blong jenisim laef. Buk blong Momon i givim kakae long saed blong spirit, i mekem wan plan blong aksen, mo joenem yumi wetem Tabu Spirit. Oli raetem blong yumi, ⁸ i holem ol toktok blong God ⁹ long wan fasin we i klia10mo i talem long yumi abaot aedentiti blong yumi, stamba tingting blong yumi long wol ia, mo ples we yumi stap go long hem. ¹⁰ Wetem Baebol, Buk blong Momon i testifae abaot Jisas Kraes ¹¹ 11zmo i tijim olsem wanem yumi save save trutok mo kam olsem Hem.

Brata Saw Polo i bin gat 58 yia taem oli introdiusum gospel ia blong Jisas Kraes we i kambak long wol. Taem mi bin save hem, hem i bin stap givim seves olsem wan branj presiden blong sam yia, be mi lanem se hem i neva ridim Buk blong Momon from se i no stap yet long stret lanwis blong hem long Burma. Taem mi askem hem olsem wanem hem i save se buk ia i tru we hem i neva ridim buk ia, hem i ansa se hem i bin stadi long Ol Stori long Buk blong Momon pikja buk evri dei taem hem i stap lukluk ol pikja droing, mo wetem wan diksonari blong transletem ol Inglis toktok, mo tekem gud not long ol samting we hem i lanem. Hem i eksplenem se, “Evri taem mi stadi, bae mi prea abaot wanem mi bin lanem, mo bae mi filim pis mo glad, maen blong mi bae i klia, mo hat blong mi bae i sopsop. Mi bin filim Tabu Spirit i stap testifae long mi se i tru. Mi save se Buk blong Momon i tok blong God.”

Olsem Brata Saw Polo, wanwan long yumi i save stadi Buk blong Momon folem ol situesen blong yumi. Taem yumi wantem blong biliv mo tingting hevi long ol tijing blong hem long hat blong yumi, yumi save askem God wetem fet sapos ol tijing ia oli tru. ¹² Sapos yumi stap tru long tingting blong hat blong yumi blong save mo wantem blong mekem folem, bae Hem i ansarem yumi long hat blong yumi tru long Tabu Spirit. Hem i tru long paoa blong Tabu Spirit we bae yumi save trutok long saed blong evri samting. ¹³ Taem yumi kasem wan tabu witnes ia tru long Tabu Spirit, bae yumi kam blong save tu, tru long sem paoa, se Jisas Kraes i Sevya blong wol, se Josef Smit i profet blong Hem, mo se Jos Ia blong Jisas Kraes blong Ol Lata-dei Sent i Jos blong Hem we i kambak bakegen long wol. ¹⁴

Olsem wan yang man we mi statem misinari seves blong mi, mi go long wan plen blong go long Ostrelia. Mi bin filim se mi stap miwan, mi wari, mo no inaf be from mi bin komitim miwan blong givim seves, mi rili nidim strong tingting ia se wanem we mi biliv long hem i tru. Mi bin prea mo ridim skripja blong mi oltaem, be taem plen i stap flae i go, tingting ia blong gat tu tingting long miwan i stap kam moa bigwan mo bodi blong mi i stat blong harem nogud. Afta we mi stap harem nogud blong sam aoa, wan man we i stap wok long plen i kam mo i stop narasaed long jea blong mi. Hem i karem Buk blong Momon we mi stap ridim aot long ol han blong mi. Hem i lukluk kova blong buk ia mo talem, “!Hemia wan gudfala buk!” mo afta i givimbak buk long mi mo gohed blong wokbaot i go. Mi neva luk hem bakegen.

Taem ol toktok blong hem i stap saon yet insaed long ol sora blong mi, mi bin harem klia mo filim long hat blong mi, “Mi mi stap ia, mo mi save wea yu stap. Jes mekem bes blong yu, from bae mi mi lukluk long evri nara samting.” Long plen ia antap long Bigfala Solwota blong Pasifik, mi bin kasem wan witnes blong miwan tru long stadi blong mi long Buk blong Momon mo ol toktok blong Tabu Spirit se Sevya blong mi i save huia mi mo we gospel ia i tru.

Elda David A. Bedna i bin tijim: “Blong stap save se gospel i tru, i laef blong wan testemoni. Blong stap tru oltaem long gospel, hem i laef blong fasin blong jenisim laef.” ¹⁵ Fasin blong jenisim laef i nidim yumi blong kam “ol man blong mekem folem toktok, be i no ol man blong harem toktok nomo.” ¹⁶ Aksen plan blong Lod long yumi i—doktrin ia blong Kraes—we oli tijim i klia gud moa insaed long Buk blong Momon. ¹⁷ Hemia i tekem tu:

• Faswan, stap praktisim fet long Jisas Kraes taem yumi trastem Hem, kipim ol komanmen blong Hem, mo save se bae Hem i helpem yumi. ¹⁸

• Nambatu, stap sakem sin evri dei from ol samting we yumi sot long hem mo eksperiensem glad mo pis taem Hem i fogivim yumi. ¹⁹ Fasin blong sakem sin i nidim yumi blong fogivim ol narawan ²⁰ mo helpem yumi blong muv i go fored. Sevya i bin promes blong fogivim yumi evri taem we yumi sakem sin. ²¹

• Nambatri, stap mekem mo kipim ol kavenan wetem God tru long ol odinens olsem baptaes. Hemia bae i holemtaet yumi long kavenan rod ia we i lid i go long Hem. ²²

• Nambafo, stap kasem presen ia we i Tabu Spirit. Presen ia i letem yumi blong gat kampani blong wan ia we i mekem yumi tabu, kamfotem mo gaedem yumi oltaem. ²³

• Namba faef, stanap strong kasem en taem yumi stap go strong long fored mo no muvmuv long semtaem we yumi stap kakae evri dei long tok blong Kraes. ²⁴ Taem yumi stap kakae aot long Buk blong Momon mo holemtaet strong ol tijing blong hem, yumi save winim ol temtesen mo kasem gaed mo proteksen truaot long laef blong yumi. ²⁵

Taem yumi stap praktisim doktrin blong Kraes oltaem long laef blong yumi, bae yumi winim fasin ia blong stap semmak nomo mo neva jenis, mo fraet ia we i stap blokem aksen. Bae yumi kasem revelesen blong yumiwan, from Tabu Spirit “bae i soem long yufala evri samting we bae yufala i mas mekem,” ²⁶ mo “ol toktok blong Kraes bae oli talem long yufala evri samting we yufala i mas mekem.” ²⁷

Blong 20 yia, Brata Huang Juncong i fesem hadtaem wetem alkol, sigaret, mo fasin blong plei from mane. Taem oli tokbaot fastaem Jisas Kraes mo gospel blong Hem we i kambak long wol long Brata Huang, hem i wantem blong jenis blong gud blong yangfala famli blong hem. Jalenj blong hem we i moa bigwan, hem i smok. Hem i wan man we i smok tumas, hem i bin traem blong stop fulap taem be i had. Wan dei, ol toktok ia blong Buk blong Momon i kam long tingting blong Hem: “wetem wan tru hat, wetem wan tru tingting blong wantem save.” ²⁸ Nomata we hem i bin traem fulap taem bifo mo no winim, hem i filim se maet hem i save jenis wetem help we i kam long Papa long Heven mo Jisas Kraes.

Ol fultaem misinari oli joenem fet blong olgeta wetem hem mo givim wan aksen plan blong helpem hem blong stop smok, wetem plante prea mo stadi long tok blong God. Wetem tru hat mo tru tingting, Brata Huang i folem plan ia wetem strong fet blong win mo faenem se taem hem i lukluk moa long ol niu fasin we hem i wantem developem, olsem stadi Buk blong Momon, hem i nomo lukluk tumas long ol fasin we hem i wantem lusum.

Luklukbak long eksperiens blong hem 15 yia i pas, hem i talem, “Mi no tingbaot stret taem we mi stop blong smok, be taem mi stap traehad evri dei blong mekem ol samting mi save se mi nid blong mekem blong invaetem Spirit blong Lod i kam insaed long laef blong mi mo gohed blong mekem, sigaret i nomo pulum tingting blong mi mo i nomo mekem stat long taem ia.” Laef blong Brata Huang i bin jenis taem hem i stap praktisim ol tijing blong Buk blong Momon, mo hem i bin kam wan hasban mo papa we i moa gud.

Presiden Russell M. Nelson i bin promes se: “Taem yufala i stap stadi long Buk blong Momon wetem prea, evri dei, bambae yufala i save mekem ol moa gud desisen—evri dei. Mi promesem yufala se taem yufala i stap tingting hevi long wanem yu stap stadi long Buk blong Momon, bambae ol windo blong heven oli open, mo bae yu kasem ol ansa blong kwestin blong yu, mo bae Hem i soem rod blong laef blong yu. Mi promes se, taem we, evri dei, yu draonem yuwan long Buk blong Momon, bae yu gat proteksen long ol ivel blong tedei, iven strong fos blong ponografi, mo ol nara adiksen we i mekem maen i nomo wok.” ²⁹

Ol dia fren. Buk blong Momon i tok blong God, mo bae yumi kam moa kolosap long Hem sapos yumi stadi long hem. ³⁰ Taem yumi stap faenemaot blong yumiwan, ol toktok blong hem,bae yumi kasem wan witnes blong trutok blong hem. ³¹ Taem yumi stap gohed oltaem blong laef folem ol tijing blong hem, bae yumi “nomo gat tingting blong mekem rabis samting.” ³² Hat blong yumi, fes mo fasin blong yumi bae i jenis blong kam moa olsem Sevya. ³³ Mi talem strong witnes blong mi se Jisas i Kraes, Sevya, Ridima mo Fren blong yumi. Long nem blong Jisas Kraes, amen.

Ol Not

1. Luk long Mak 2:17.

2. Luk long Sam 147:3; Aesea 53:4; Matiu 8:17.

3. Luk long 2 Nifae 25:23; Jekob 4:7; Ita 12:27.

4. Luk long Matiu 19:21; Mak 10:21; Luk 18:22; 2 Nifae 31:10.

5. Luk long Doktrin mo Ol Kavenan 19:23.

6. Luk long Aesea 41:10.

7. Luk long Mosaea 2:41; 3:19; 5:2.

8. Luk long 2 Nifae 25:8, 21–22; Momon 7:1; 8:35.

9. Luk long 2 Nifae 25:7; 31:2–3.

10. Luk long 2 Nifae 2:25; Alma 40.

11. Luk long Aesea 29:4, 11–18; Esikel 37:16–21; 2 Korin 13:1; 1 Nifae 13:38–42; 2 Nifae 3:12; 25:26.

12. Luk long Alma 32:26–43.

13. Luk long Moronae10:3–5.

14. Luk long Fas toktok long Buk blong Momon.

15. David A. Bednar, “Converted unto the Lord,” Liahona, Nov. 2012, 109.

16. Jemes 1:22.

17. Luk long 2 Nifae 31; 3 Nifae 11:31–40; 27:13–22.

18. Luk long 1 Nifae 3:7; Moronae 7:33.

19. Luk long Mosaea 4:3.

20. Luk long Matiu 18:21–35; Mak 11:25–26; Luk 6:37; 3 Nifae 13:14–15; Doktrin mo Ol Kavenan 64:10; 82:1.

21. Luk long Mosaea 26:30; Moronae 6:8.

22. Luk long 2 Nifae 31:17–18.

23. Luk long 1 Nifae 10:19; 2 Nifae 33:1; 3 Nifae 11:32; 28:11; Moronae 6:4.

24. Luk long 2 Nifae 31:20.

25. Luk long 1 Nifae 15:24.

26. 2 Nifae 32:5; oli ademap italik.

27. 2 Nifae 32:3; oli ademap italik.

28. Moronae 10:4.

29. Russell M. Nelson, “Buk blong Momon: ?Bae Laef blong Yu I Olsem Wanem Sapos Yu No Gat?” Liahona, Nov 2017, 62–63.

30. Profet Josef Smit i bin talem abaot Buk blong Momon se, “Wan man bae i kam moa kolosap long God sapos hem i folem ol tijing blong hem, bitim eni narafala buk” (fas toktok blong Buk blong Momon).

31. Luk long Jekob 6:7; Alma 32:26–43.

32. Alma 19:33.

33. Luk long 2 Korin 5:17; Mosaea 3:19; 5:2; Alma 5:14, 19.