Faenem Sef Ples long Taem blong Ol Strong Win blong Laef
Jisas Kraes mo Atonmen blong Hem oli ol ples blong haed we yumi evriwan i nidim, nomata wanem kaen strong win yumi stap fesem long laef blong yumi.
Long medel blong ol yia naenti, long taem we mi stap go long kolej yet, mi bin pat blong Nambafo Kampani blong Santiago Faea Dipatmen long Jile. Taem mi stap wok long we, mi stap slip long faea stesen olsem pat blong stap gad long naet. Taem i stap go from en blong yia, oli talem long mi se bae mi mas stap long faea stesen long naet bifo Niu Yia from se long dei ia, oltaem i stap gat sam imejensi. Mi sek, mi ansa, “?Tru?”
So, mi tingbaot mi stap wet wetem ol fren blong wok taem, long medel naet, oli stat blong sutum faea wok, long taon blong Santiago. Mifala i stat blong haggem mifala blong wisim mifala wanwan ol gud samting blong niu yia ia. Sek nomo ol bel blong faea stesen i stat ring, we i soem se i gat wan imejensi. Mifala i jenis i go long ol tul blong wok mo jiam i go long faea trak. Long rod blong mifala i go long ples we imejensi i stap long hem, taem mifala i pasem ol grup blong ol man we oli stap selebretem niu yia, mi luk save se oli no wari mo oli no kea. Oli spel nomo mo gat wan gud taem long sama naet ia. Be yet samples kolosap, ol pipol we mifala i stap hariap blong go helpem oli stap long wan series problem.
Eksperiens ia i helpem mi luksave se nomata se ol laef blong yumi oli go gud nomo sam taem, bae i gat wan taem we bae i kam blong wanwan long yumi we bae yumi fesem ol jalenj mo ol strong win we yumi sek nomo se i kam we bae oli pusum yumi go bitim paoa blong yumi blong stanap strong. Ol jalenj long saed blong bodi, tingting, famli mo wok; ol disasta; mo ol narafala problem blong laef o ded, oli sam long ol eksampol blong ol strong win we yumi stap fesem long laef ia.
Taem yumi fesem ol strong win ia, oltaem bae yumi eksperiensem ol filing blong harem nogud o fraet. Presiden Russel M. Nelson i talem,”Fet hem i mersin blong fraet”—fet long Lod blong yumi Jisas Kraes (“Let Your Faith Show,” Liahona, May 2014, 29). Olsem we mi bin luk ol strong win ia we i spolem laef blong ol pipol, mi kam blong luksave se nomata wanem kaen strong win i stap kilim yumi—i nomata sapos i gat wan ansa long hem o sapos i gat wan en we yumi save luk—i gat wan ples blong haed nomo, mo hem i semmak blong evri defren kaen strong win. Wan ples ia nomo blong haed long hem we Papa blong yumi long Heven i givim hem i Lod blong yumi Jisas Kraes mo Atonmen blong Hem.
Nogat wan long yumi bae i no fesem ol strong win ia. Hileman, wan profet blong Buk blong Momon, i tijim yumi hemia: “Tingbaot se hem i long ston blong Ridima blong yumi, we i Kraes, Pikinini blong God, we yutufala i mas bildim fandesen blong yutufala; blong mekem se taem we devel bae i sendem aot ol strongfala win blong hem, yes, ol spia blong hem long wael win, yes, taem we ol ston blong aes blong hem mo strong win blong hem bae i foldaon long yutufala, bae i no gat paoa ova long yutufala blong pulum yutufala i go daon long bigfala hol blong sore mo sore tumas we i no gat en, from ston; long hem we yutufala i bin bildimap yutufala, we i wan sua fandesen, wan fandesen, long hem we sapos ol man i bildimap olgeta long hem oli no save foldaon” (Hileman 5:12).
Elda Robert D. Hales, we i gat ol eksperiens blong hemwan we hem i stanap strong long ol strong win ia, i talem, “Blong stap harem nogud hem i blong ful wol; olsem wanem yumi ansa long ol harem nogud ia i blong wanwan long yumi. Blong stap harem nogud i save tekem wan long ol tu wei ia. I save stap olsem eksperiens ia we i mekem yumi kam strong moa mo klin moa tugeta wetem fet, o i save stap olsem wan fos we i prapa spolem laef blong yumi sapos yumi nogat fet long sakrifaes blong atonmen blong Lod,” (“Your Sorrow Shall Be Turned to Joy,” Ensign, Nov. 1983, 66).
Blong save stap glad long ples blong haed we Jisas Kraes mo Atonmen we Hem i givim, yumi mas gat fet long hem—wan fet we i letem yumi blong winim evri harem nogud blong wol ia we i blong sot taem. Hem i promesem yumi se bae Hem i mekem ol hadtaem blong yumi i kam laet sapos yumi kam long Hem long evri samting yumi mekem.
“Yufala i kam long mi,” hem i talem, “yufala evriwan we yufala i stap hadwok tumas, mo we yufala i stap karem ol hevi samting, nao mi bambae mi tekemaot ol hevi samting ya, mi mekem we yufala i spel gud.”
“Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan long mi, nao bambae yufala i save faenem pis long laef blong yufala.
“Ol samting we bambae mi givim long yufala blong yufala i karem, oli no hevi” (Matiu 11:28–30; luk tu long Mosaea 24:14–15).
Oli talem se “long hem we i gat fet, i no nid blong eksplenem. Long hem we i nogat fet, i nogat wan eksplenesen we i posibol. (Toktok ia, oli talem se Thomas Aquina i bin talem, be hem i pat wan sentens blong ol samting we hem i tijim.) Be yet, yumi gat smol save long ol samting we i hapen long wol ia, mo samtaem yumi nogat ol ansa long kwestin ia from wanem. ?From wanem hemia stap hapen? ?From wanem hemia i stap hapen long mi ?Wanem nao mi sapos blong lanem? Taem yumi no faenem ol ansa, long taem ia nao, yumi save yusum fulwan ol toktok we Sevya blong yumi i talem long Josef Smit long Kalabus blong Libeti.
“Boe blong mi, bae pis i stap long sol blong yu; ol samting we oli kam agensem yu mo ol hadtaem blong yu, oli blong smol taem nomo;
“Mo afta, sapos yu mekem gud blong stap strong, God bae i leftemap nem blong yu long heven” (Doktrin mo Ol Kavenan 121:7–8).
Nomata we i gat fulap man i biliv long Jisas Kraes, ki kwestin hem i sapos yumi biliv long Hem mo sapos yumi biliv long ol samting we Hem i tijim yumi mo askem yumi blong mekem. Maet bae wan man i tingting olsem, “?Wanem nao Jisas Kraes i save abaot wanem i stap hapen long mi? ?Olsem wanem nao Hem i save wanem mi nidim blong stap glad?” I tru nomo, se Hem i Ridima mo Medieta blong yumi we profet Aesea i stap tokbaot taem hem i talem se:
“Nao yumi lukluk nogud long hem, yumi tanem baksaed blong yumi long hem, Hem i wan man we harem nogud plante taem. …
“Olgeta samting we i stap mekem yumi harem nogud, hem i karem olgeta evriwan, mo ol sobodi hem i karem olgeta evriwan. …
“Be ol man oli stap wipim hem from ol fasin nogud ya blong yumi, oli mekem hem karekil from ol sin ya blong yumi. Nao ol sobodi we hem i karem i mekem yumi kam gud bakegen. Panis ya we hem i kasem i mekem yumi gat pis” (Aesea 53:3–5).
Aposol Pita i tijim yumi tu, abaot Sevya, hem i talem,”Taem hem i go long kros, hem i karem olgeta sin blong yumi long bodi blong hem, blong yumi save ded long fasin blong mekem nogud, nao yumi save laef long fasin blong mekem i stret. Ol sobodi ia we hem i karem, i mekem yufala gud bakegen” (1 Pita 2:24).
Nomata long taem we kolosap ded blong Pita i stap kam, ol toktok blong hem i no fulap wetem fraet o tu tingting; be, hem i tijim ol Sent blong stap “glad,” iven sapos oli stap “harem nogud from plante samting.” Pita i givim kaonsel long yumi blong tingbaot se “ol samting i stap soemaot fasin blong bilif blong [yumi], … be oli mas bonem wetem faea,” bae i lid i go long taem we“Jisas Kraes i kamtru long [yumi], God bae i givim ona long [yumi], i presem [yumi] nao leftemap nem blong [yumi]” mo i kasem taem “we God bae i sevem laef blong [yumi]” (1 Pita 1:6-7,9).
Pita i gohed:
“Ol fren. I nogud yufala i sapraes long ol strong samting ya we oli kam blong traem bilif blong yufala. Ol samting olsem, i no yufala nomo i kasem:
Yufala i harem gud, from we yufala i joen long Kraes*, mo yufala i stap kasem haf blong ol samting ya we i mekem hem i harem nogud. Nao taem ol gudgudfala samting blong Kraes oli kamtru, bambae yufala i glad tumas” (1 Pita 4:12-13).
Presiden Russell M. Nelson i tijim: “Ol Sent oli save stap hapi long eni kaen situesen.… Taem we, long laef blong yumi, yumi stap lukluk nomo long plan blong God blong fasin blong sevem man, mo Jisas Kraes mo gospel blong Hem, yumi save filim glad nomata wanem i stap hapen—o i no stap hapen—long laef blong yumi. Glad i kam long Hem mo from Hem. Hem i stamba blong evri glad” (“Joy and Spiritual Survival,” Liahona, Nov. 2016, 82).
Yes i tru, hem i isi blong talem ol samting ia taem yumi no stap long medel blong wan strong win bitim blong stap laef mo mekem folem long taem blong ol strong win ia. Be olsem brata blong yu, mi hop se yu save filim se mi wantem tumas blong serem wetem yu, olsem wanem hem i impoten blong save se Jisas Kraes mo Atonmen blong Hem oli ol ples blong haed we yumi evriwan i nidim, nomata wanem kaen strong win yumi stap fesem long laef blong yumi.
Mi save se yumi evriwan i ol pikinini blong God mo Hem i lavem yumi, mo yumi no stap yumiwan. Mi invaetem yufala blong kam mo luk se Hem i save mekem ol harem nogud blong yu i kam laet mo kam wan ples blong haed we yu stap lukaotem. Kam mo helpem ol narawan blong faenem ples blong haed we oli wantem tumas. Kam mo stap wetem mifala long ples blong haed ia, we bae i helpem yu blong faetem ol strong win blong laef. I nogat tu tingting long hat blong mi se sapos yu kam, bae yu luk, bae yu help, mo bae yu stap.
Profet Alma i testifae hemia long pikinini boe blong hem Hileman: “Mi save se eni man we bae i putum tras blong hem long God, bae God i sapotem olgeta long ol tes blong olgeta, mo trabol blong olgeta, mo ol hadtaem blong olgeta, mo bae God i leftemap olgeta long las dei” (Alma 36:3).
Sevya Hemwan i bin tijim:
From hemia, leftemap tingting blong hat blong yufala long saed blong Saeon; from we evri samting we i laef i stap long han blong mi; stap kwaet mo save se, mi, mi God.
“Taswe, no fraet nomata sapos i go kasem ded; from we long wol ia, glad blong yu i no fulwan, be long mi, glad blong yu i fulwan” (Doktrin mo Ol Kavenan 101:16, 36).
Hym ia “Stap Kwaet, Sol blong Mi,” we i tajem hat blong mi fulap taem, i gat wan mesej blong kamfot long sol blong yumi. Ol toktok blong singsing ia i go olsem:
Stap kwaet, sol blong mi: Taem i stap kam hariap
Taem yumi stap wetem Lod long wan taem we i no save finis,
Taem harem nogud, krae, mo fraet i lus,
Yumi fogetem ol harem nogud, klin lav blong glad i kambak.
Stap kwaet, sol blong mi: Taem jenis mo ol wota blong ae i nomo gat,
Evriwan i sef mo gat blesing taem bae yumi mit bakegen. (Hymns, no. 124)
Taem yumi fesem ol strong win blong laef, Mi save se sapos yumi mekem bes efot blong yumi mo dipen long Jisas Kraes mo long Atonmen blong Hem olsem ples blong haed, bae oli blesem yumi wetem harem gud, kamfot, paoa, fasin blong wet, mo pis we yumi stap lukaotem, wetem tru save long hat blong yumi se long en blong taem blong yumi long wol ia, bae yumi harem ol toktok blong Masta: “!Ei, yu yu mekem wan gudfala wok! Yu yu wan gudfala man we yu lukaot gud long ol wok blong mi: Yu kam joen long lafet blong mi.” (Matiu 25:21 Long nem blong Jisas Kraes, amen.