Atonmen blong Sevya: Fandesen blong Tru Kristin Fasin, i kam long Kirk Richards

25 Jun

?Atonmen blong Jisas Kraes I Minim Wanem long Mi?

Matiu 27; Mak 15; Luk 23; Jon 19

Kaonsel Tugeta

Wan memba blong klas presidensi o kworom presidensi i lidim; kolosap 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo fasin blong kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk, 10.2, 11.2). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Hamas moa nao yumi muv i go kolosap moa long Sevya? ?Olsem wanem nao yumi stap traem blong kam moa olsem Hem?

• Kea long olgeta we oli stap long nid. ?Huia nao i bin stap long maen blong yumi long ol las dei we oli jes pas? ?Olsem wanem nao yumi save helpem wanwan long olgeta ia?

• Invaetem evriwan blong akseptem gospel. ?Olsem wanem nao bae yumi ansarem ol kwestin blong ol fren blong yumi abaot Jos long wan wei we i bildimap fet blong olgeta long Sevya?

• Joenem ol famli blong taem we i no save finis. ?Wanem nao samfala wei we yumi toktok o go kolosap moa wetem ol narafala memba blong famli, olsem ol bubu mo ol kasen brata mo sista?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Elda David A. Bednar i bin luk se, samfala long Ol Lata-dei Sent oli gat fet long Sevya, be oli no biliv long ol promes blesing we i stap blong oli kasem” (“Sapos Yu Bin Save Mi,” Jeneral Konfrens, Oktoba 2016). Long nara toktok, iven we yumi stap biliv long Jisas Kraes, se Hem i bin safa mo Hem i bin ded from ol sin blong wol ia, maet bae yumi askem yumiwan sapos Hem i bin safa mo i bin ded speseli from ol sin blong yumi. ?Yu yu filim olsem tu? ?Olsem wanem long ol pipol insaed long klas o kworom blong yu bae oli save tekem gud samting taem oli andastanem se Atonmen blong Sevya i blong wanwan long olgeta? ?Olsem wanem nao yu save helpem olgeta?

Tingting hevi long ol kwestin ia long wik ia, taem yu stap rid abaot taem ia we oli hangem Sevya antap long kros. Taem yu stap rere blong tij abaot wanem stret hem i Atonmen blong Kraes, bae yu wantem stadi long mesej blong Presiden Dallin H. Oaks, “?Wanem Nao Sevya I Bin Mekem blong Yumi?” (Liahona, Mei 2021, 75–77).

Stap Lan Tugeta

Invaetem ol memba blong klas o blong kworom blong oli serem wan samting we oli bin lanem long wik ia abaot taem we oli hangem Sevya long kros, mo filing blong olgeta abaot Sevya. Blong helpem olgeta blong stat, yu save askem wan kwestin olsem: “Wanem nao yumi lanem abaot Jisas Kraes aot long ol samting we Hem i bin talem mo mekem long ol las aoa blong laef blong Hem? Eksampol. Yu save luklukgud long samfala taem we Sevya, taem we Hem i bin stap safa blong evriwan, i stil lukluk olgeta raon long Hem wetem lav mo sore (eksampol, luk long Luk 23:34, 39–43; Jon 19:25–27). Hemia i save lidim yufala blong toktok raon long hao nao Atonmen blong Jisas Kraes hem i blong evriwan raon long wol, mo tu, i blong wanwan man, woman. Ol aktiviti olsem olgeta ia oli save helpem yufala blong toktok raon moa long Atonmen blong Sevya,

• Long fas paragraf blong mesej blong hem, “?Wanem Nao Sevya I Mekem blong Wanwan long Yumi?,” Presiden Dallin H. Oaks i tokbaot wan storian wetem wan woman we i no ting se Jisas Kraes i bin mekem eni samting blong hem. Ol memba blong klas o blong kworom oli save rid long paragraf ia, mo oli putum olgeta long sus blong Presiden Oaks. ?Wanem nao bae yumi talem long woman ia? Yu save givim wanwan memba blong klas o kworom wan long ol namba seksen blong mesej blong Presiden Oaks. Bae oli yusum wanem we oli bin lanem, mo eksperiens blong olgeta, blong save serem ansa blong olgetawan long kwestin ia: “?Wanem nao Jisas Kraes i mekem blong mi?”

• Blong givim insperesen blong toktok raon long wei we Atonmen blong Sevya i tajem yumiwan, yu save raetem wan sentens long bod, olsem From Jisas Kraes i bin safa mo i bin ded from evri pipol… . Ol memba blong klas o blong kworom oli save givim sam tingting abaot ol wei blong komplitim sentens ia. Afta, yu save jenisim sentens ia blong i rid i go olsem: From Jisas Kraes i bin safa mo i bin ded from mi… mo invaetem sam moa tingting. Taem ol memba blong klas ia mo blong kworom oli toktok raon long ol toktok ia, leftemap tingting blong olgeta blong ridim ol skripja long “Ol Sapot Risos.” ?Wanem nao ol skripja ia oli stap tijim yumi abaot paoa blong Atonmen blong Sevya insaed long laef blong yumi wanwan?

• Wan nara wei blong stadi long ol skripja we oli stap long “Ol Sapot Risos” i blong invaetem ol yut blong riplesem ol toktok insaed long ol ves ia blong mekem se ol ves ia, oli stap toktok stret long olgeta. ?Olsem wanem nao blong mekem hemia i jenisim ol filing blong yumi abaot ol trutok we oli stap long ol ves ia? ?Olsem wanem yumi save talem tangkyu long Sevya from sakrifaes blong Hem from yumi?

• Ol tabu miusik i save testifae strong abaot Jisas Kraes. Tingting blong invaetem ol memba blong klas o kworom blong kam long miting we oli rere blong serem ol hym we i stap helpem olgeta blong filim paoa blong Atonmen blong Sevya long laef blong olgeta. (Oli save lukluk long ol sakramen hym, o toktok ia “Jesus Christ—Savior” insaed long indeks blong ol topik blong Hymns.) Askem ol memba blong klas o blong kworom blong faenemaot ol sentens insaed long ol hym we i helpem olgeta blong filim lav ia blong Sevya, we Hem i gat speseli blong wanwan long olgeta. Mo tu, yufala i save tokbaot olsem wanem sakrifaes blong Sevya i save jenisim laef blong yumi evri dei. Eksampol, ?olsem wanem hemia i jenisim ol joes we yumi mekem?

Kraes long Getsemane, i kam long Dan Burr

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• 1 Korin 15:20–22; 2 Korin 12:7–9; Alma 7:11–12; 3 Nifae 11:10–11

• Tad R. Callister, “Atonmen blong Jisas Kraes,” Liahona, Mei 2019, 85–87

Tij Folem Wei blong Sevya

Ol tru wei blong soemaot lav olsem hemia blong Kraes i gat bigfala paoa blong mekem hat blong ol memba blong klas i sofsof; speseli olgeta we oli gat hadtaem wetem gospel. Plante taem, wanwan long olgeta ia oli nidim blong save se oli nidim mo lavem olgeta.