11 Jun

?Olsem Wanem Nao Bae Mi Save Kam Kolosap Moa long Papa long Heven mo Jisas Kraes?

Jon 14–17

Kaonsel Tugeta

Wan memba blong klas presidensi o kworom presidensi i lidim; kolosap 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo fasin blong kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk, 10.2, 11.2). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Wanem eksperiens we yumi bin gat i no longtaem i pas we i bin mekem ol testemoni blong yumi oli kam strong moa?

• Kea long olgeta we oli stap long nid. ?Huia i nidim help mo ol prea blong yumi? ?Wanem nao yumi filim blong mekem blong helpem olgeta?

• Invaetem evriwan blong akseptem gospel. ?Olsem wanem yumi save stap olsem wan laet long ol memba blong famli o ol fren we oli no gat ol semfala bilif olsem yumi?

• Joenem ol famli blong taem we i no save finis. ?Olsem wanem yumi save soem moa lav mo sapot long ol famli blong yumi, mo mekem wan samting we i defren be i gud insaed long ol hom blong yumi?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Wan frut i no save gro long wan branj we i seperet long stret tri blong hem. Long sem wei, yumi no save kam antap long saed blong spirit sapos yumi seperet long God (luk long Jon 15:4-6). Be yet, i gat plante kaen fos we oli wantem blong seperetem yumi long Hem—samtaem, hem i hae tingting blong yumiwan nomo, o sam pua joes we yumi mekem, be plante taem, i jes ol situesen blong laef long wol ia nomo. Taem we Jisas i bin mit wetem ol disaepol blong Hem blong las taem, long wol ia, Hem i bin save se, bae i no longtaem, bae Hem i seperet long olgeta. Mekem se Hem i bin tijim olgeta hamas i impoten blong stap joen wetem Hem mo Papa blong Hem oltaem—blong oli wan wetem Tufala, semmak olsem wan branj i joen long tri. Hem i bin singaotem hemia se “blong stap” wetem Hem. Mo Hem i bin tijim ol disaepol blong Hem olsem wanem blong mekem hemia. Moa impoten long evri samting, tru long sakrifaes blong Hem we i pem praes, Hem i bin mekem hemia i posibol.

Tingting hevi long wei we yu yu joen wetem Papa long Heven mo Jisas Kraes taem yu stap stadi long Jon 14–17. Tingting tu abaot ol pipol we yu stap tijim, mo hamas oli wantem blong stap kam kolosap moa long God. ?Wanem nao bae yu mekem blong helpem olgeta? Bae yu save tingting hevi long Doktrin mo Ol Kavenan 88:62–68 taem yu stap rere blong tij.

Stap Lan Tugeta

Tingting long wei we bae yu givim insperesen long ol yut blong toktok raon long ol tijing blong Sevya abaot ol rop mo ol branj we i stap long Jon 15:1–12. Mebi yu save yusum wan droing, wan pikja, o wan ril branj blong helpem olgeta blong luksave wanem we Jisas i stap tijim. Yu save askem tu long olgeta pikinini blong storian abaot ol taem we oli bin filim se oli stap kolosap long Papa long Heven mo Jisas Kraes, o ol taem we taem oli filim se oli stap longwe long Tufala. ?Wanem nao ol ves ia oli tijim yumi, abaot hao blong stap kolosap long Tufala? Ol Aktiviti, olsem olgeta we oli stap ia, oli save help blong tekem toktok storian i go moa.

• Bae i gud tu blong save spendem sam taem blong lukluk gud long kwestin ia “?Wanem i stap seperetem yumi longwe long Papa long Heven mo Jisas Kraes?” Yu save raetem kwestin ia long bod mo askem blong oli ansarem. Maet yu save tokbaot wanem yumi mekem blong bildimap wan rilesensip wetem wan fren o wan memba blong famli. ?Olsem wanem hemia i semmak—mo defren—long wei we yumi bildimap rilesensip wetem Papa long Heven mo Jisas Kraes? ?Long wanem wei nao, Jisas Kraes i stap pulum yumi i go kolosap long Hem mo long Papa blong Hem? Leftemap tingting blong ol memba blong klas, mo blong kworom blong oli ridim ol skripja insaed long “Ol Sapot Risos” blong help olgeta i ansarem kwestin ia. Maet ol yut bae oli save lanem samting sapos oli sidaon tutu mo stadi long ol ves ia, mo afta, serem wanem oli lanem.

• I no gat wan i kolosap moa long God we I Papa bitim Stret Pikinini Ia blong Hem we Hem I Lavem Tumas, we i Jisas Kraes. ?Wanem nao yumi lanem aot long Sevya long saed blong stap kam kolosap moa long God? Ol memba blong klas mo blong kworom oli save tingting hevi long kwestin ia taem oli ridim Luk 22:41–43; Jon 6:38; 17:3, 20–23; 3 Nifae 11:11; Doktrin mo Ol Kavenan 50:43. ?Olsem wanem nao yumi save kam wan wetem Papa long Heven mo Jisas Kraes?

• Long mesej blong hem, “Sevya blong Yumiwan,” Elda Michael John U. Teh i tingbaot wan taem we hem i bin luksave se “Wanem mi save abaot Sevya, i bigwan moa bitim hamas mi rili save Hem” (Liahona, Mei 2021, 99). Maet yu save askem ol memba blong klas o blong kworom blong yu blong toktok raon long ol samting we oli defren bitwin blong save abaot Jisas Kraes mo blong save huia Hem. Oli save toktok abaot wanem we oli stap mekem blong save abaot Hem, mo wanem oli stap mekem blong rili save Hem. Afta, oli save luklukgud insaed long samfala pat blong mesej blong Elda Teh blong faenem kaonsel we hem i givim abaot fasin blong kam blong rili save Sevya. ?Olsem wanem nao yumi bin gat blesing long laef taem yumi stap lukaot blong save Hem?

• Long vidio “He Knows Me,” tufala yut blong Gana, tufala i tokbaot hadwok blong tufala blong kam kolosap moa long God. Mebi ol memba blong klas mo blong kworom oli save wajem vidio ia, mo taem oli stap mekem hemia, oli mekem wan lis blong ol aedia we vidio ia i givim long olgeta abaot wei we oli save kam antap long saed blong rilesensip blong olgeta wetem Papa we I Stap long Heven. Invaetem olgeta blong serem wan samting we i stap long lis blong olgeta. Sapos i posibol, oli save mekem wan sot vidio blong olgeta we i tokbaot olsem wanem oli kam kolosap moa long God.

Taem yumi stap kam blong save Sevya mo obei long ol komanmen blong Hem, bambae yumi stap long lav blong Hem (luk long Jon 15:10).

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Jon 14:6; 1 Timoti 2:5–6; Jekob 4:11; Mosaea 3:19; Doktrin mo Ol Kavenan 88:63; Moses 6:52

Tij Folem Wei blong Sevya

Sevya i bin mekem Hem i rere from seves blong Hem long wol ia taem Hem i bin stap prea mo stap livim kakae blong mekem se bae Hem i stap kolosap long Papa blong Hem (luk long Matiu 4:1–2; Luk 4:1–2). Taem yu stap rere blong tij, tekem taem blong askem Papa long Heven blong i soem rod long yu from se yu stap tijim ol pikinini blong Hem.