Hem I Kam Bakegen blong Hem I Rul mo Kam King, i kam long Mary R. Sauer

28 Mei

?Wanem Nao Mi Save Mekem Naoia blong Rere from Seken Kaming blong Sevya?

Josef Smit—Matiu 1; Matiu 24–25; Mak 12–13; Luk 21

Kaonsel Tugeta

Wan memba blong klas presidensi o kworom presidensi i lidim; kolosap 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo fasin blong kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk, 10.2, 11.2). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Wanem nao yumi bin toktok raon long hem long las taem? Mo ?Wanem invitesen nao o wanem wok nao oli bin givimaot? ?Wanem nao yumi bin mekem blong tekem aksen, blong muv folem ol invitesen ia o ol wok ia we oli bin givimaot olgeta?

• Kea long olgeta we oli stap long nid. ?Wanem nao yumi save talem o mekem blong go luk ol narawan we maet oli stap filim se oli stap olgetawan, o oli filim se oli stap longwe long Papa long Heven?

• Invaetem evriwan blong akseptem gospel. ?Wanem nao sam wei we yumi save helpem ol narawan blong oli filim lav blong Jisas Kraes?

• Joenem ol famli blong taem we i no save finis. ?Wanem aedia nao yumi save serem wetem wanwan long yumi blong helhelpem yumi blong mekem famli blong yumi i kam strong moa?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

?Long wanem wei nao, ol yut ia we yu stap tijim, oli stap filim abaot fasin blong stap laef long ol las dei bifo Seken Kaming blong Jisas Kraes? Hem i tru se taem naoia, oli ol taem blong denja, we fasin blong agens, o samting i kam agens, fasin nogud, mo fasin blong prapa spolem man o samting i makem taem blong yumi tedei. Be taem we Sevya i bin tokbaot taem blong yumi tedei long ol disaepol blong Hem, hemia kolosap long en blong laef blong Hem, Hem i bin givim hop long yumi. Hem i talem se bae i gat tudak i kam, be Hem i bin promesem se bae laet blong Hem i kam kavremap ful wol long taem ia we bae Hem i kambak (luk long Josef Smit—Matiu 1:22–26; luk tu long Doktrin mo Ol Kavenan 45:34–38).

?Olsem wanem nao yu save helpem ol yut blong oli andastanem gud moa ol blesing mo ol janis blong stap laef long ol las dei? Wanem nao yu save mekem blong givim insperesen long olgeta blong mekem olgetawan oli rere, mo mekem wol ia i rere from Seken Kaming blong Sevya? Antap long stadi blong yu long ol ves long skripja, tingting blong luklukbak long samfala risos we oli stap long lis we i stap long “Seken Kaming blong Jisas Kraes,” insaed long Gaed long Ol Skripja ([e-mail]).

Stap Lan Tugeta

Blong helpem ol yut blong luklukbak long wanem we oli bin ridim insaed long ol skripja long wik ia, yu save raetem ol heding ia long bod: Somber Prophecies mo Glorious Pronouncements (luk long Russell M. Nelson, “Embrace the Future with Faith,” Liahona, Nov. 2020, 73–76). Afta, wanwan i save luklukbak long Josef Smit—Matiu 1:22–37, mo mekem wan lis blong ol samting we oli tudak, o ol samting blong glori we bae i hapen bifo Sevya i stap kambak. ?From wanem i impoten blong yumi save abaot ol samting ia we oli hapen? Blong helpem ol yut blong oli lanem moa abaot wei blong rere from kaming blong Sevya, tingting long olgeta aktiviti ia, o wan long ol aktiviti blong yu.

• Ol skripja, insaed long “Ol Sapot Risos” oli save helpem ol yut blong oli andastanem olsem wanem Papa long Heven i stap mekem wan wei i rere blong Pikinini blong Hem i Kambak. Tingting blong raetem ol taem ia we oli tokbaot long ol skripja, long bod, mo askem wanwan blong ridim wanwan long ol skripja ia. Wanwan i save majem skripja blong hem i go long wan taem we yu raetem long bod, mo toktok raon long skripja ia wetem klas. ?Wanem nao ol taem ia oli stap talem abaot rol blong yumi blong stap rere from Seken Kaming blong Sevya? ?Wanem insperesen nao yumi kasem blong mekem olsem wan klas o wan kworom?

• Presiden Russell M. Nelson i givim kaonsel ia: ?Hao nao bae yumi mas dil wetem tugeta ia, ol dak profesi mo ol glori toktok we oli kamaot abaot taem blong yumi? Lod i bin talem long yumi, wetem stret kwaet toktok nomo:‘Sapos yufala i rere, bae yufala i no fraet” [Doktrin mo Ol Kavenan 38:30]” (“Embrace the Future with Faith,” 74). Blong helpem ol yut blong oli rere moa from kambak blong Sevya, tingting blong askem wanwan long olgeta blong ridim wan long olgeta trifala prinsipol ia blong fasin blong stap rere, we Presiden Nelson i bin serem long mesej blong hem. Invaetem olgeta blong serem wanem we oli bin lanem. ?Wanem insperesen nao yumi bin kasem blong mekem folem kaonsel ia blong Presiden Nelson?

• Long stat blong mesej blong hem we taetol i: “Preparing for the Lord’s Return,” Elda D. Todd Christofferson i tokbaot se wol ia bae i olsem wanem afta long Seken Kaming blong Jisas Kraes (Liahona, Mei 2019, 81–84). Invaetem ol yut blong luklukbak long wei we hem i tokbaot ol samting, mo komperem wetem wei we wol i stap long hem naoia. Oli save toktok raon long wanem yumi save mekem naoia blong stap rere blong laef long kaen wol ia we Elda Christofferson i stap tokbaot. (Ol fofala paragraf blong mesej blong hem i stat wetem “Fas samting mo samting we i impoten blong Lod i kambak;” maet hemia bae i save help). ?Olsem wanem nao Jos blong Sevya i stap help blong mekem yumi rere from Seken Kaming blong Hem? Elda Christofferson i raetemdaon trifala wei we Jos i spesel i no semmak long ol narawan, mo i kasem wok ia blong mekem ol samting we oli mas rere blong Seken Kaming blong Lod. Ol memba blong klas oli save faenemaot mo toktok raon long olgeta samting ia.

Sapos yumi rere, yumi no nid blong fraet from ol samting we bae oli hapen we bae i go kasem Seken Kaming blong Sevya.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Doktrin mo Ol Kavenan 65:1–2 (Restoresen blong gospel)

• Doktrin mo Ol Kavenan 20:8–12 (Taem Buk blong Momon bae i kamaot)

• Malakae 4:5–6; Doktrin mo Ol Kavenan 110:13–16 (Restoresen blong ol ki blong prishud)

• 3 Nifae 21:1, 8 (kam Tugeta blong Isrel)

• Josef Smit—Matiu 1:28–30 (Wo, raorao, mo nogud fasin)

• Josef Smit—Matiu 1:31 (oli prijim gospel raon long wol)

• Gary E. Stevenson, “Wan Gudfala Fandesen Agensem Taem we I Stap Kam,” Liahona, Mei 2020, 48–52

Tij Folem Wei blong Sevya

Tijim olgeta we oli stap lan, se, samtaem, Spirit bae i tijim olgeta ol samting long taem blong toktok storian insaed long wan klas, we oli neva stap talemaot laod.