kapol aotsaed long tempol

14 Mei

?Olsem Wanem Nao Lod I Helpem Ol Man mo Ol Woman blong Wok Wan insaed long Mared?

Matiu 19–20; Mak 10; Luk 18

kaonsel tugeta pikja bokis

Kaonsel Tugeta

Wan memba blong klas presidensi o kworom presidensi i lidim; kolosap 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo fasin blong kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk, 10.2, 11.2). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Olsem wanem nao taem yumi stap tanem yumi i go long Lod, i helpem yumi blong fesem ol jalenj mo ol tes blong yumi?

• Kea long olgeta we oli stap long nid. ?Huia ia nao yumi save we i nidim prea mo frensip blong yumi?

• Invaetem evriwan blong akseptem gospel. ?Insaed long wod yut kaonsel miting blong yufala, wanem plan blong serem gospel nao yumi bin toktok raon long hem? ?Olsem wanem klas o kworom i pat insaed?”

• Joenem ol famli blong taem we i no save finis. ?Olsem wanem fasin blong mekem famli histri wok i mekem rilesensip blong yumi wetem Papa long Heven mo Jisas Kraes i kam strong moa?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

tijim doktrin pikja bokis

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Wetem Adam mo Iv, long stat, Papa long Heven mo Jisas Kraes, Tufala i bin wantem blong mekem se i gat strong yuniti bitwin ol waef mo ol hasban long wan mared laef. Sevya i bin tijim: “From samting ya, bambae man i mas aot long papa mo mama blong hem, i mas go joen wetem woman blong hem. Nao tufala bambae i kam olsem wan bodi nomo” (Matiu 19:5). Long semtaem, Setan i stap mekem evri samting we hem i save mekem blong mekem ol mared oli brokbrok, mo hem i prapa spolem gud ol famli. Ol memba blong klas, o blong kworom blong yu, bae oli save gud long ol plante jalenj we ol mared pipol oli stap fesem tedei. Maet oli bin luk tu, ol waef mo ol hasban we oli wok tugeta mo oli stap lukaotem help we i kam long heven blong oli gat yuniti oltaem. Tingting hevi abaot ol eksperiens ia, mo olsem wanem i tijim olgeta abaot wanem i nidim blong mekem blong kasem yuniti insaed long wan mared. ?Wanem nao yu yu save mekem blong tijim olgeta hamas i impoten blong stap rere naoia blong gat ol fiuja mared rilesensip?

Las wik, ol memba blong klas o blong kworom oli bin gat janis blong ridim ol tijing blong Sevya long saed blong mared, we i stap long Matiu 19:4–6. Blong rere blong tij, stadi long ol ves ia, wetem mesej blong Presiden Dieter F. Uchtdorf “In Praise of Those Who Save” (Liahona, May 2016, 77–80) o ol nara mesej we oli putum i stap insaed long aotlaen ia.

Stap Lan Tugeta

Maet mared i no wan samting we i stap long maen blong plante yut. Be, i wan samting we i impoten, mekem se i nidim blong wan i mas lukaotgud blong stap rere. Maet yu save invaetem ol yut blong traem gat pikja long maen blong olgeta, se oli stap nildaon long wan oltaem insaed long tempol, blong oli sil, mo man we bae i mekem siling i bin givim kaonsel long tufala blong go stadi long Matiu19:4–6. ?Wanem trutok nao yumi faenem long ol ves ia we i save helpem wan niu mared kapol? ?Long wanem wei nao wan hasban mo wan waef i kam “wan”? ?Olsem wanem nao Sevya i stap help? Ol aktiviti olsem olgeta ia, oli save helpem klas blong yu, o kworom blong yu blong andastanem olsem wanem blong gat yuniti insaed long mared laef.

• Adam mo Iv, tufala i givim bigfala eksampol blong wan hasban mo waef, we tufala i wok tugeta wetem yuniti. Yu save soem wan pikja blong tufala (luk long Gospel Art Buk [2009], namba 5) mo askem klas o kworom blong yu blong ridim Moses 5:1–12; nao oli lukaotem ol wei we Adam mo Iv, tufala i bin wok tugeta wetem yuniti. ?Wanem nao oli bin mekem blong mekem se God i save blesem rilesensip blong tufala? Blong help ol yut blong oli lanem moa abaot yuniti insaed long mared, oli save stadi ol skripja we oli stap long “Ol Sapot Risos.”

• Presiden Dieter F. Uchtdorf i tijim se insaed long plante sosaeti tedei, “evri samting, bae oli save sakem nomo.” Be fasin ia, oli no mas yusum insaed long ol mared mo famli blong yumi; be, yumi mas “givim evri hadwok blong yumi blong save sevem mo mekem ol mared mo famli ia oli kam rij” (“In Praise of Those Who Save,” 77). Blong help blong soemaot poen ia, yu save invaetem ol yut blong tingting long wan samting we i bin brok, o i go nogud, o i nomo gud, we oli jes riplesem. ?From wanem nao ol mared oli defren, be oli no olsem ol samting we yu save riplesem? Klas o kworom i save ridim seksen blong mesej blong Presiden Uchtdorf we taetol blong hem i “Saving Our Marriages” mo serem ol wei we ol hasban mo waef oli save wok tugeta, mo wok wetem Sevya blong mekem ol mared blong olgeta oli save kam strong moa. ?Wanem nao yumi save mekem naoia blong rere blong gat ol mared we oli strong mo i gat yuniti long olgeta?

• Tingting blong stap raetem Yuniti Insaed long Mared long bod, mo invaetem ol yut blong mekem wan lis blong ol samting we ol waef mo ol hasban oli save mekem blong oli kam wan. Afta, askem ol yut blong luklukgud long “Famli: Wan Ofisol Toktok I Go long Wol” (ChurchofJesusChrist.org/study?lang=bis) blong gat moa aedia we bae oli save ademap i go long lis blong olgeta. ?Wanem kwaliti nao ol memba blong klas, o blong kworom blong yu oli luk long wanwan long olgeta, o long ol mared kapol we oli save gud olgeta, we oli ting se i impoten blong gat yuniti insaed long mared? ?From wanem nao hem i impoten blong developem mo yusum olgeta prinsipol ia insaed long ol rilesensip blong yumi naoia? Ol vidio we oli stap insaed long “Ol Sapot Risos” oli givim sam eksampol blong olgeta kwaliti ia we oli putum long aksen.

• Sapos ol memba blong klas, o blong kworom blong yu oli gat ol kwestin o wari abaot divos, tingting blong, tugeta, yufala i luklukbak long samfala pat blong mesej blong Presiden Dallin H. Oaks “Divorce” (Liahona, May 2007, 70–73).

wan kapol i stap hag

Wetem Adam mo Iv, long stat, Papa long Heven mo Jisas Kraes, Tufala i bin wantem blong mekem se i gat strong yuniti bitwin ol waef mo ol hasban long wan mared laef.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• 1 Korin 11:11; Doktrin mo Ol Kavenan 42:22; 49:15–17; Moses 3:18, 21–24 (Hamas i impoten blong gat yuniti long mared)

• “Renaissance of Marriage,” “Let Us Be Men,” “Expressions of Love” (vidio), ChurchofJesusChrist.org

Tij Folem Wei blong Sevya

Taem wan i soemaot tru lav olsem hemia blong Kraes, hemia i save gat bigfala paoa blong mekem hat blong ol memba blong klas we oli stap gat hadtaem, i kam daon. Blong helpem ol memba blong klas blong filim se oli nidim olgeta, mo oli lavem olgeta, yu save askem olgeta blong tekpat long wan lesen we bae i stap kam taem oli serem wan eksperiens, o taem oli serem filing blong olgeta abaot wan skripja.