Gudfala Man Sameria, i kam long Annie Henrie Nader

23 Epril

?Olsem Wanem Nao Mi Save Soem Moa Bigfala Lav long Olgeta Raonabaot long Mi?

Matiu 18; Luk 10

Kaonsel Tugeta

Wan memba blong klas presidensi o kworom presidensi i lidim; kolosap 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo fasin blong kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk, 10.2, 11.2). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Wanem sam eksperiens we i jes pas we oli tekem yumi i go kolosap moa long Papa long Heven mo Jisas Kraes.

• Kea long olgeta we oli stap long nid. ?I gat wan we i jes muv i kam insaed long wod blong yumi, o i jes joenem Jos? ?Olsem wanem nao yumi save helpem olgeta blong filim se oli welkam?

• Invaetem evriwan blong akseptem gospel. ?Wanem aktiviti i stap kam we yumi save invaetem ol fren blong yumi blong kam long hem?

• Joenem ol famli blong taem we i no save finis. ?Wanem wok moa yumi save mekem blong raetem ol histri blong yumiwan?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Afta we Jisas i bin tijim wan man blong loa long saed blong tufala bigfala komanmen, se tufala i impoten—hemia blong lavem God mo lavem neba blong yumi—man blong loa ia i askem: “?Be hu ol man ya we oli stap raonabaot long mi, we Loa ya i tokbaot?” (luk long Luk 10:25–29; Matiu 22:35–40). Olsem ansa, Sevya i bin serem wan parabol abaot wan Man Sameria we i bin putum laef blong hem long denja blong i save kea long wan Man Jiu we i kasem kil, nao i tekem man ia i go long wan sef ples blong oli lukaotgud long hem, mo i pem blong oli lukaot long hem kasem taem bae hem i kam oraet bakegen. Man Sameria ia i no lukluk nating long wanem i bin defren bitwin hemwan mo man ia, we ol pipol blong hem oli tekem se i wan enemi, o hem i no bin jajem hem, o faenem sam eskius o risen blong no help. Hem i bin givim seves long man ia we i stap long nid, hemia nomata se i no stret tumas long hem, mo nomata bae i mekem wan sakrifaes, be long wei ia, hem i bin soem lav long man ia, mo long God. Taem yu stap tingting hevi long ol tijing blong Sevya we oli stap long Luk 10:25–37, tingting se, i rili minim wanem blong “lavem neba blong yu olsem yuwan” (ves 27).

?Olsem wanem bae yu helpem olgeta we yu stap tijim blong oli andastanem se, taem oli givim seves long olgeta raonabaot long olgeta, oli stap soem lav ia we oli gat long God? ?Wanem nao i save givim insperesen long olgeta blong lavem mo givim seves long ol narawan? Taem yu stap rere, yu save lukluk i gobak long mesej blong Presiden Russell M. Nelson: “Seken Hae Komanmen Ia” (Liahona, Novemba 2019, 96–100).

Stap Lan Tugeta

Blong stat blong toktok raon abaot fasin blong soem moa bigfala lav long olgeta raonabaot long yumi, yu save askem ol memba blong klas, o blong kworom, blong oli serem wanem we oli bin lanem abaot fasin blong lavem ol narawan, hemia aot long parabol blong gudfala Man Sameria, we i stap long Luk 10:25–37. ?Wanem nao yumi lanem abaot wanem i joenem fasfala mo nambatu hae komanmen we i stap long Luk 10:27 mo mesej blong Presiden Dallin H. Oaks we i stap long “Ol Sapot Risos”? Olgeta aedia ia we oli kam afta, oli save helpem yu blong gohed long wan toktok storian abaot fasin blong soem moa bigfala lav long olgeta raonabaot long yumi.

• Jisas Kraes i bigfala eksampol blong yumi blong stap soem lav we yumi gat long God taem yumi givim seves long ol narawan; mo ol memba blong klas mo blong kworom bae oli kasem insperesen taem oli stap stadi long eksampol blong Hem. Invaetem wanwan blong tingtingbak, blong longtaem long laef blong Jisas Kraes taem Hem i stap long wol ia, mo jusum wan eksperiens aot long laef blong Hem we bae i soem bigfala lav ia blong Hem we Hem i gat long ol nara pipol. Askem wanwan blong serem eksperiens we oli jusum, mo oli serem tu se from wanem eksperiens ia i gat wan mining long olgeta. Invaetem olgeta we yu stap tijim blong oli tingting long wan wei we bae oli wantem blong folem eksampol blong Sevya, we i eksampol blong lav. Mo tu, oli save serem ol tingting blong olgeta abaot wan we oli save we i stap folem eksampol ia.

• Serem mo toktok raon long hem wetem ol memba blong klas mo blong kworom long saed blong toktok blong Presiden Russell M. Nelson we i stap long “Ol Sapot Risos.” Yu save invaetem ol memba blong klas o blong kworom blong luklukbak long wan, o moa long wan, long ol mesej blong Jeneral Konfrens, we oli putum i stap long aotlaen ia, mo lukaotem ol tijing we oli save lidim yumi long ol hadwok blong yumi blong stap lavem ol nara man. Oli save lukluk long ol samting ia: ol eksampol blong wei blong givim seves, we i stap long “Seken Hae Komanmen Ia” we i kam long Presiden Nelson; ol seksen I, II, mo VI long mesej blong Presiden Oaks, “Lavem mo Laef Wetem Olgeta we Oli Defren long Yu”; mo stori abaot ol rabet mo kaonsel we i go long ol yut “Ol Hat we Oli Joen Tugeta” i kam long Elda Gary E. Stevenson. Tugeta, yufala i save ridim tu Mosaea 2:17 mo Moronae 7:45–48. Maet bae i help blong raetem long bod, ol tijing ia we ol yut oli stap toktok raon long ol. Afta, klas o kworom i save kaonsel tugeta abaot ol spesifik wei we oli save yusum ol tijing ia long rilesensip we oli gat wetem ol memba blong famli, wetem ol fren, mo wetem ol komuniti blong olgeta, iven taem we i luk se i had blong ol pipol oli lavem man.

• Ol hadwok we ol memba blong klas mo blong kworom oli mekem insaed long wok ia blong fasin blong sevem man mo fasin blong kam olsem wan god, bae oli gat moa mining mo bae i gat moa glad long hem sapos oli kam tru long lav ia we i givim insperesen from. Blong helpem olgeta blong luk olsem wanem wanwan pat blong wok ia blong fasin blong sevem man mo fasin blong kam olsem wan god (luk long Jeneral Hanbuk, 1.2), lav nao i stap biaen long hem; raetem ol fofala pat ia antap long bod. Afta, yu save askem ol yut blong toktok raon long wei, we, olsem wanem nao, taem oli gat wan hat we i fulap long lav long ol nara man, i save jenisim olsem wanem oli tekpat long wanwan pat ia. Maet bae oli gat sam eksperiens, insaed long laef blong olgeta, o long laef blong ol narawan, we bae oli save serem.

Presiden Russell M. Nelson i tijim: “Taem yumi lavem God wetem ful hat blong yumi, Hem i tanem hat blong yumi long gudlaef blong ol narawan.”

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Dallin H. Oaks, “Lavem mo Laef Wetem Olgeta we Oli Defren long Yu,” Jeneral Konfrens, Oktoba 2014, ChurchofJesusChrist.org/general-conference/conferences?lang=bis

• Gary E. Stevenson, “Ol Hat Oli Joen Tugeta,” Liahona, Mei 2021, 19–23

• “A Good Samaritan,” “The Greatest Commandment” (vidio), ChurchofJesusChrist.org

• Presiden Dallin H. Oaks i tijim: “Be, i no se yumi glad tumas blong mekem seken komanmen nao yumi fogetem blong mekem nambawan, blong lavem God wetem olgeta hat, laef mo tingting blong yumi. … Yumi mas traem blong obei tugeta hae komanmen. Blong mekem olsem, yumi wokbaot folem wan tintin laen bitwin loa mo lav—stap obei ol komanmen, mo wokbaot long kavenan rod ia, mo semtaem stap lavem ol neba blong yumi folem rod ia. Wokbaot ia, i askem yumi blong lukaotem insperesen we i kam long heven long saed blong wanem blong sapotem mo wanem blong agensem, mo hao blong lavem mo lisin, mo tij long semtaem i go. Wokbaot blong yumi i askem blong yumi no katemsot ol komanmen, be yumi soem we yumi andastanem mo lavem olgeta long ful mak blong olgeta” (“Tufala Hae Komanmen,” Liahona, Novemba 2019, 73–75).

• Presiden Russell M. Nelson i tijim: “Ol Lata-dei Sent, oli tru blong lukaotem blong laef folem fas mo seken bigfala komanmen. Taem yumi lavem God wetem ful hat blong yumi, Hem i tanem hat blong yumi long gudlaef blong ol narawan long wan sekol we i naes mo gat klin tingting. Stap givim help long ol narawan—blong hadwok moa wetem tingting blong kea long ol narawan semmak, o moa bitim we yumi stap kea long yumiwan—hemia nao glad blong yumi. Speseli, bae mi ademap, taem we i no stret long laef blong yumi, mo taem i tekem yumi aot long gud ples blong yumi. Blong stap laef folem nambatu bigfala komanmen ia, hem i ki blong stap kam wan tru disaepol blong Jisas Kraes” (“Seken Hae Komanmen Ia,” Liahona, Novemba 2019, 97, 100).

Tij Folem Wei blong Sevya

Eksperiens blong yuwan, blong stap laef folem gospel, bae i mekem se yu save talem strong witnes blong yu abaot ol prinsipol ia we yu stap tijim. From se yu stap laef folem olgeta prinsipol ia, Tabu Spirit bae i save witnesem se, wanem yu stap tijim, i tru.