9 Epril

?Olsem Wanem Nao Mi Save Mekem Testemoni blong Mi I Kam Strong Moa long Saed blong Laef Bakegen long Ded blong Jisas Kraes?

Ista

Kaonsel Tugeta

Wan memba blong klas presidensi o kworom presidensi i lidim; kolosap 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, antap long kaonsel tugeta blong yufala abaot ol stret nid blong klas o ol bisnis blong kworom, ating yu wantem blong toktok raon long ol filing mo ol stamba toktok we oli kamaot long jeneral konfrens. Ol kwestin ia bae i save help:

• ?Wanem ol stamba tingting o ol mesej we oli kamaot klia long yumi? ?Wanem i mekem bilif blong yumi long Jisas Kraes i kam strong moa?

• ?Wanem nao i mekem ol testemoni blong yumi abaot ol profet we oli stap laef, oli kam strong moa? ?Wanem nao yumi filim se Spirit i talem long yumi blong go mekem from olgeta samting ia we yu bin lanem, o bin filim?

• ?Wanem nao yumi nidim blong mekem, olsem wan klas o kworom blong tingbaot mo tekem aksen folem kaonsel we yumi bin harem long jeneral konfrens?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Ol Aposol blong bifo, mo ol aposol blong tedei oli stap testifae se Jisas Kraes i stap laef! Hem i bin safa mo i bin ded long kros, oli bin berem Hem insaed long wan tumb, mo long nambatri dei, Hem i bin girap bakegen. From se Hem i winim ded, yumi tu, bae yumi evriwan i laef bakegen long ded. Laef Bakegen long Ded, blong Sevya, i tekem promes ia i kam, se bae man i nomo save ded, mo i karem hop ia blong kasem laef we i no save finis. Promes ia, i stap long hat blong Ista.

Olsem ol memba blong Jos Ia blong Jisas Kraes blong Ol Lata-dei Sent, yumi gat wan spesel risen blong biliv se Jisas Kraes i bin laef bakegen long ded. Antap long ol witnes blong ol pipol long taem blong Niu Testeman, yumi gat ol testemoni blong ol pipol we oli bin laef long taem blong Buk blong Momon, testemoni blong Profet Josef Smit, mo hemia blong ol profet mo ol aposol blong tedei we oli stap laef. Mo tu, yumi save kasem, yumiwan, wan witnes abaot Laef Bakegen long Ded, tru long Tabu Spirit. ?Olsem wanem yu save helpem ol yut blong mekem testemoni blong olgeta i kam strong moa, se Jisas Kraes i bin laef bakegen long ded? Taem yu stap rere, tingting blong stap stadi long mesej blong Sista Reyna I. Aburto: “Gref I No Save Win” (Liahona, Mei 2021, 85–86) mo mesej blong Elda S. Mark Palmer: “Harem Nogud blong Yumi bae i Tanem I Kam Glad” (Liahona, Mei 2021, 88–89).

Stap Lan Tugeta

Maet, yu save statem toktok storian abaot Laef Bakegen long Ded blong Jisas Kraes taem yu invaetem ol yut blong oli serem wanem we oli bin mekem long wik ia blong selebretem Ista. Yu save askem olgeta wanem nao oli bin stadi long hem, o wanem wanwan i bin mekem hemwan, o wetem famli blong hem, blong mekem testemoni blong olgeta i kam strong moa long saed blong Laef Bakegen long Ded blong Sevya. Andanit ia, i gat ol aktiviti blong helpem ol memba blong klas blong yu, o blong kworom blong yu, blong mekem testemoni blong olgeta i kam strong moa.

• Toktok storian tugeta blong tokbaot from wanem i impoten blong gat ol witnes long evri dei laef. Afta, mekem wan lis blong hamas witnes nao oli bin witnesem Laef Bakegen long Ded blong Jisas; we klas o kworom blong yu i save tingbaot. Wanwan i save jusum wan skripja aot long lis ia we i stap long “Ol Sapot Risos” blong oli lanem abaot sam long ol witnes ia. Invaetem ol memba blong klas o blong kworom blong oli serem wanem we oli bin lanem. Leftemap tingting blong olgeta blong oli serem olsem wanem ol witnes ia oli mekem testemoni blong olgeta i kam strong moa long saed blong Laef Bakegen long Ded blong Jisas Kraes.

• ?Wanem nao sam long ol situesen o taem ia, we yumi save serem testemoni blong yumi abaot Laef Bakegen long Ded blong Sevya? Sapos eniwan long klas o long kworom i bin gat wan eksperiens we hem i bin tokbaot Laef Bakegen long Ded blong Sevya long eniwan, tingting blong stap invaetem hem blong hem i serem eksperiens ia. Leftemap tingting blong ol memba blong klas o blong kworom blong oli tingting abaot wei we bae oli helpem wan blong i andastanem Laef Bakegen long Ded blong Jisas Kraes, mo kasem wan testemoni se, from Hem, bae yumi evriwan bae i laef bakegen long ded. ?Wanem nao oli ol impoten trutok abaot Laef Bakegen long Ded blong evri pipol, we bae i impoten blong tijim long ol nara man? Ol memba blong klas o blong kworom, oli save faenem ol ansa insaed long ol skripja we oli stap long “Ol Sapot Risos.”

• Taem we Ol Aposol oli bin talem long Tomas se oli bin luk Sevya we i bin laef bakegen long ded, Tomas i talem se bae hem i no biliv kasem taem hemwan bae i luk Sevya. Afta long hemia, Jisas i bin talem long Tomas: “Olgeta we oli no luk mi, be oli bilif , long mi, bambae oli save harem gud.” Tugeta, luklukbak long eksperiens blong Tomas we i stap long Jon 20:24–29. ?Long wanem wei nao yumi kasem blesing from we yumi stap biliv long Sevya, be yumi no luk Hem? ?Olsem wanem yumi save mekem bilif blong yumi i kam strong moa long Jisas Kraes? Invaetem ol memba blong klas o blong kworom blong luklukgud wan, o moa long mesej blong ol lida long “Ol Sapot Risos,” mo serem from wanem oli talem tangkyu from Laef Bakegen long Ded blong Sevya. ?Olsem wanem nao, save blong yumi, se bae yumi laef bakegen long ded wan dei, bae i jenisim fasin blong yumi tingting abaot ol bodi blong yumi, mo ol desisen we yumi stap mekem?

Blong Yufala I Mas Save, i kam long Gary L. Kapp

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Matiu 28:1–10; Luk 24:13–35; Luk 24:36–48; Jon 20:11–29; 1 Korin 15:3–8; 3 Nifae 11:1–15; Ita 12:38–39; Doktrin mo Ol Kavenan 76:19–24 (Ol Witnes blong Laef Bakegen long Ded)

• 2 Nifae 9:10–15; Mosaea 16:8–11; Alma 11:42–45; Alma 40:23–25; Doktrin mo Ol Kavenan 93:33–34 (Ol skripja we oli tij abaot Laef Bakegen long Ded blong evri pipol)

• D. Todd Christofferson, “The Resurrection of Jesus Christ,” Liahona, May 2014, 111–14

• Gerrit W. Gong, “Hosana mo Aleluia—Jisas Kraes we I Stap Laef: Stamba blong Restoresen mo Ista,” Liahona, Mei 2020, 52–55

• Reyna I. Aburto, “Gref I No Save Win,” Liahona, Mei 2021, 85–86

• S. Mark Palmer, “Harem Nogud blong Yumi Bae I Tanem I Kam Glad,” Liahona, Mei 2021, 88–89

• Ol Ista vidio, oli stap long ChurchofJesusChrist.org/study/video/easter-videos.

Tij Folem Wei blong Sevya

Wan we i save olsem wanem blong kasem mining aot long ol skripja, mo i lukluk insaed long ol skripja evri dei, bae i save kasem help we i kam long heven blong winim eni jalenj. Taem yu stap tij, askem ol kwestin we i mekem se, olgeta ia we oli stap lan, oli go faenem ol ansa insaed long ol skripja.