batang Jesus

Delivered [Gipanganak], ni Jenedy Paige

Disyembre 24

Giunsa ni Jesukristo Pagpakita ang Iyang Gugma alang Kanako?

Pasko

icon sa pagtinambagay

Pagtinambagay

Gipangulohan sa usa ka sakop sa kapangulohan sa klase o sa korum; mga 10–20 minutos

Sa sinugdanan sa miting, balika pagsulti og dungan ang Tema sa Young Women o ang Tema sa Korum sa Aaronic nga Pagkapari. Dayon pangulohi ang usa ka panaghisgotan mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Sa unsang paagi kita nagkaplag og hingpit nga kalipay pinaagi sa pagsunod ni Jesukristo?

• Mag-atiman alang niadtong nanginahanglan. Kinsa sa atong ward o komunidad ang nagkinahanglan sa atong tabang? Sa unsang paagi kita makatabang kanila?

• Magdapit sa tanan sa pagdawat sa ebanghelyo. Sa unsang paagi kita makatabang sa usag usa nga maandam alang sa misyonaryo nga pagserbisyo?

• Maghiusa sa mga pamilya alang sa kahangtoran. Sa unsang paagi kita makatampo sa mga paningkamot sa ward sa paghimo sa buhat sa family history ug sa templo?

Sa kataposan sa leksiyon, kon angay, buhata ang mosunod:

• Pagpamatuod sa mga baroganan nga gitudlo.

• Pahinumdomi ang mga sakop sa klase o sa korum mahitungod sa mga plano ug mga pagdapit nga gihimo atol sa miting.

icon sa itudlo ang doktrina

Itudlo ang Doktrina

Gipangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Sa wala pa Siya matawo, si Jesukristo nailhan isip ang halangdong Jehova. Siya mao ang “Hinigugma ug Pinili sukad sa sinugdanan” sa Amahan (Moises 4:2), puno sa himaya, grasya, ug kamatuoran (tan-awa sa Juan 17:5; Doktrina ug mga Pakigsaad 93:11). Ug gani sa dihang Siya natawo, si Maria “mipahigda kaniya sa pasungan, kay wala na may luna alang kanila sa balay abotanan” (Lucas 2:7). Nganong si Jesukristo andam nga modawat sa Iyang tahas isip ang Manluluwas bisan tuod kini mipasabot sa pag-anhi sa yuta diha sa labing ubos sa mga kahimtang? Ang yano nga tubag mao nga Siya nahigugma kanato. Sa dihang nakita ni Nephi ang pagkatawo sa Manluluwas diha sa panan-awon, iyang gipamatuod “ang gugma sa Dios, nga makatag sa tibuok kalibotan diha sa mga kasingkasing sa mga anak sa mga katawhan; busa, mao kini ang labing madanihon sa tanan nga mga butang” (1 Nephi 11:22).

Ang Pasko usa ka espesyal nga panahon sa pagpamalandong kon giunsa sa pagkatawo sa Manluluwas ug sa Iyang maulaong sakripisyo pagpakita sa Iyang gugma alang kanimo. Samtang ikaw nangandam sa pagtabang sa kabatan-onan nga imong tudloan sa pagbati sa gugma sa Manluluwas, hunahunaa ang pagrebyo sa Lucas 4:16–21; Juan 3:16–17; 3 Nephi 27:13–16; ug sa mensahe ni Elder D. Todd Christofferson nga “Ang Gugma sa Dios” (Liahona, Nob. 2021, 16–19).

Pagkat-on og Dungan

Samtang ang imong klase o korum nagsingabot sa kataposan sa pagtuon sa Bag-ong Tugon niining tuiga, mahimo nimong hangyoon ang kabatan-onan sa pagpakigbahin og pipila ka kinaham nga mga istorya sa Bag-ong Tugon diin ang Manluluwas mipakita sa Iyang gugma alang niadtong naglibot Kaniya. Kamo makahimo gani sa pagbasa og dungan niini nga mga istorya. Unsa ang gitudlo niini nga mga istorya mahitungod sa gugma sa Manluluwas alang kanato? Sa pagtabang pa kanimo og dugang sa paghisgot sa gugma sa Manluluwas, gamit og mga kalihokan sama sa mosunod.

• Dapita ang mga sakop sa imong klase o sa korum sa paghunahuna sa gugma nga ang Langitnong Amahan ug si Jesukristo aduna alang kanato isip usa ka nindot nga pongpong sa mga bulak. Hunahunaa ang paghatag sa kada tawo og usa ka bulak nga ginunting sa papel ug sa paghangyo sa kada usa kanila sa pagbasa og usa sa mga tudling sa kasulatan diha sa “Suporta nga mga Kapanguhaan.” Hangyoa sila sa pagsulat diha sa ilang mga bulak kon unsa ang ilang nakat-onan mahitungod sa gugma sa Langitnong Amahan ug ni Jesus nga aduna alang kanato. Samtang sila nakigbahin kon unsay ilang nakat-onan, makaipon sila sa ilang mga bulak sa paghimo og usa ka pongpong sa bulak. Unsaon nato nga mas makaila sa mga paagi ang Langitnong Amahan ug si Jesus nagpakita sa Ilang gugma alang kanato?

• Pipila ka mga himno naghulagway sa mga paagi nga ang Manluluwas nagpakita sa Iyang gugma alang kanato (tan-awa, sama pananglit, sa “Buhi ang Manunubos Ko, Niini Nasayod Ako,” Mga Himno, nu. 80). Ang mga sakop sa klase o sa korum makapili og usa ka himno ug makigbahin og mga kasinatian sa dihang sila mibati sa gugma sa Manluluwas sa mga paagi nga susama ngadto niadtong gihulagway diha sa himno. Unsa ang pipila sa ubang mga paagi ang Manunubos nagpakita sa Iyang gugma alang kanato? Isip mga sumusunod ni Kristo, unsaon nato nga makatabang sa uban sa pagbati sa Iyang gugma?

• Adunay daghang dili tinuod nga mga ideya sa kalibotan mahitungod sa gugma sa Dios alang kanato. Sama pananglit, ang pipila mahimong maghunahuna nga kon ang tawo adunahan o mauswagon, kini nagpasabot nga ang Dios nahigugma kaniya labaw kay sa uban. Ang pipila mahimong mobati nga kon ang Dios tinuod nga nahigugma kanamo, Siya modawat kanamo ingon nga kami mao ug dili mosugo kanamo sa pag-usab. Unsang dili tinuod nga mga mensahe mahitungod sa gugma sa Dios ang atong nadungog? Sa pagtabang og sumbalik niining dili tinuod nga mga mensahe, mahimong ikaw mohangyo sa kabatan-onan sa pagrebyo sa mensahe ni Elder D. Todd Christofferson nga “Ang Gugma sa Dios” o sa mensahe ni Presidente Dallin H. Oaks “Gugma ug Balaod” (Liahona, Nob 2009, 26–29). Unsa nga mga kamatuoran ang atong makita dinhi niini nga mga mensahe nga nagtabang kanato sa pagsabot sa gugma sa Dios alang kanato?

mga bulak

Ang gugma sa Langitnong Amahan ug ni Jesukristo ikatandi ngadto sa usa ka matahom nga pongpong sa mga bulak.

Lihok diha sa Hugot nga Pagtuo

Awhaga ang mga sakop sa klase o sa korum sa pagpamalandong ug pagrekord sa unsay ilang buhaton sa paglihok sa mga panghunahuna nga ilang nadawat karong adlawa. Kon gusto sila, makahimo sila sa pagpakigbahin sa ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga panghunahuna makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Juan 3:16–17; 15:9–13; Mga Taga-Roma 8:35–39; Mga Hebreohanon 12:5–6, 9–11; 1 Nephi 11:21–23; Alma 7:11–12; 3 Nephi 11:13–17; Moroni 7:45–48

• Michael John U. Teh, “Atong Personal nga Manluluwas,” Liahona, Mayo 2021, 99–101

• Taniela B. Wakolo, “Ang Dios Nahigugma sa Iyang mga Anak,” Liahona, May 2021, 94–96

Pagtudlo sumala sa Pamaagi sa Manluluwas

Ang tanan nga gihimo sa Manluluwas sa tibuok Niyang yutan-ong pangalagad nadasig sa gugma—ang Iyang gugma alang sa Iyang Amahan ug ang Iyang gugma alang kanatong tanan. Uban sa Kristohanong gugma diha sa atong mga kasingkasing, mangita kita sa matag posible nga paagi sa pagtabang sa uban nga makakat-on kabahin ni Kristo ug moduol ngadto Kaniya. Ang gugma maoy mahimong rason ug tinguha sa atong pagtudlo.