Disyembre 10

Unsaon ni Jesukristo Paghimo sa Plano sa Langitnong Amahan nga Posible?

Pinadayag 1–5

Pagtinambagay

Gipangulohan sa usa ka sakop sa kapangulohan sa klase o sa korum; mga 10–20 minutos

Sa sinugdanan sa miting, balika pagsulti og dungan ang Tema sa Young Women o ang Tema sa Korum sa Aaronic nga Pagkapari. Dayon pangulohi ang usa ka panaghisgotan mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Giunsa nato pagkakita sa kamot sa Ginoo diha sa atong mga kinabuhi?

• Mag-atiman alang niadtong nanginahanglan. Unsaon nato sa pagsuporta ang matag usa diha sa mga butang nga atong gisagubang?

• Magdapit sa tanan sa pagdawat sa ebanghelyo. Sa unsa nga paagi kita mas makagamit sa teknolohiya isip usa ka himan sa pagpakigbahin sa ebanghelyo?

• Maghiusa sa mga pamilya alang sa kahangtoran. Unsa ang atong gibuhat sa pagtabang sa atong mga pamilya nga moduol ngadto ni Kristo?

Sa kataposan sa leksiyon, kon angay, buhata ang mosunod:

• Pagpamatuod sa mga baroganan nga gitudlo.

• Pahinumdomi ang mga sakop sa klase o sa korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Gipangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Sa usa ka panan-awon, si Juan nga Tigpadayag nakakita og usa ka basahon nga “walay mausa sa langit o sa yuta o sa ilalom sa yuta” nga takos moabli, ug kini nakapahilak kaniya (tan-awa sa Pinadayag 5:3–4). Ang basahon mi-representar “sa mga buhat sa Dios,” lakip ang Iyang plano alang sa atong temporal ug kinabuhing dayon (tan-awa sa Doktrina ug mga Pakigsaad 77:6; Moises 1:39). Apan diha sa panan-awon ni Juan, usa ka Kordero nakaplagang “takos sa pagkuha sa basahon, ug sa pag-abli sa mga timbri” (Pinadayag 5:9). Kining mahimayaong balita nakahimo sa “kapid-an ka mga kapid-an ug libo ka mga linibo” nga mga anghel sa pag-awit ug pagsinggit tungod sa hingpit nga kalipay (Pinadayag 5:11). Si Jesukristo, ang Kordero sa Dios, “ang gipatay ug pinaagi sa [Iyang] dugo gilukat mo ang mga tawo alang sa Dios” (Pinadayag 5:9) ug nahimong posible ang mga panalangin sa plano sa Langitnong Amahan.

Pamalandonga kon unsa ang nabuhat ni Jesukristo alang kanimo. Mibati ka ba sukad og sama niadtong diha sa panan-awon ni Juan kinsa “mihapa ug nanagsimba kaniya”? (Pinadayag 5:14). Hunahunaa kon unsaon nimo pagtabang ang mga miyembro sa imong klase o sa korum nga mas makasabot sa importanting tahas ni Jesukristo diha sa plano sa Langitnong Amahan. Agi og dugang ngadto sa Pinadayag 1–5, makabasa ka usab sa 2 Nephi 9; “Ang Buhi nga Kristo: Ang Pagpamatuod sa Mga Apostoles” (ChurchofJesusChrist.org); ug sa mensahe ni Elder Ulisses Soares “Jesukristo: Ang Tig-atiman sa Atong Kalag” (Liahona, Mayo 2021, 82–84).

Pagkat-on og Dungan

Ang mga sakop sa imong klase o sa korum mahimong magpakaaron ingnon nga nalingaw nga mahimong mga tigpagula og pelikula kinsa gihangyo sa paghimo og sine sa panan-awon ni Juan diha sa Pinadayag 5. Hatagi sila og pipila ka minuto sa pagrebyo sa kapitulo ug pagpiho hain nga mga talan-awon ilang gusto nga himoan og pelikula. Unsa ang ilang gihunahuna nga mahimong labing gamhanan nga mga tipik sa panahon? Unsaon niini nga pelikula pagtukod og hugot nga pagtuo diha sa Manluluwas? Sa pagpadayon og tabang sa imong klase o sa korum sa pagkat-on mahitungod sa tahas ni Jesukristo diha sa plano sa Langitnong Amahan sa kaluwasan, ania ang pipila ka mga sugyot:

• Makasulat ka sa mosunod nga mga ulohan diha sa pisara: Kinabuhi sa Wala pa Dinhi sa Yuta, Kinabuhi Dinhi sa Yuta, ug Kinabuhi Human sa Kamatayon. Dapita ang mga kabatan-onan sa pagrebyo sa mga tudling sa kasulatan ubos sa “Suporta nga mga Kapanguhaan” sa pagkat-on kon giunsa sa Manluluwas ang Iyang misyon sa kinabuhi nga wala pa dinhi sa yuta, sa panahon sa Iyang kinabuhi dinhi sa yuta, ug human sa Iyang Pagkabanhaw naghimo sa plano sa Amahan nga posible. Maka-summarize sila sa unsay ilang nakat-onan ubos sa mga ulohan diha sa pisara. Hatagi ang mga sakop sa imong klase o korum og oportunidad sa pagpakigbahin sa ilang mga pagbati mahitungod kon unsa ang nabuhat sa Manluluwas alang kanila.

• Sa pagtabang sa mga kabatan-onan nga imong gitudloan nga mas makasabot kon unsa ang gihimo ni Jesukristo sa paghimo sa plano sa Langitnong Amahan nga posible, pagdrowing og dalan diha sa pisara nga nagrepresentar sa atong panaw balik ngadto sa atong Amahan sa Langit. Pagdrowing og mga babag diha sa dalan nga ginganlan og yutan-on nga kamatayon ug espirituhanon nga kamatayon. (Kon gikinahanglan, ang mga kabatan-onan makabasa sa mga katin-awan sa ubos sa “Kamatayon, Yutan-on” ug “Kamatayon, Espirituhanon” diha sa Giya ngadto sa mga Kasulatan [scriptures.ChurchofJesusChrist.org]). Giunsa sa Manluluwas paghimo nga posible alang kanato sa pagbuntog niini nga mga babag? (tan-awa sa 2 Nephi 9:7–10). Ang kabatan-onan makarebyo sa mensahe ni Elder Ulisses Soares nga “Jesukristo: Ang Tig-atiman sa Atong Kalag” ug makasulat og mga kapahayag gikan sa mensahe tupad sa dalan nga nagpakita kon giunsa nato pagbalik ngadto sa Dios.

• Kon ang ubang mga tawo mangutana kanato mahitungod sa atong mga tinuohan ug sa mga pagpili nga kita naghimo, makagahin kita og oportunidad sa pagpakigbahin kon nganong si Jesukristo importante kanato. Usa ka paagi sa pag-andam sa kabatan-onan sa ingon nga oportunidad mao ang pagdapit kanila sa pagrebyo sa mensahe ni Elder Dieter Uchtdorf nga “Tan-awa ania ra ang Tawo!” (Liahona, Mayo 2018, 107–10) mangita og mga kamatuoran nga ikapakigbahin mahitungod ni Jesukristo. Mahimo nimong ilista ang pipila niini nga mga kamatuoran diha sa pisara. Makahatag ka sa mga kabatan-onan og higayon sa pagpraktis og pagpasabot ngadto sa usag usa kon nganong kita nagkinahanglan ni Jesukristo ug unsa ka napanalanginan ang ilang mga kinabuhi tungod kay sila nakaila sa Manluluwas.

The Crucifixion of Christ [Ang Paglansang kang Kristo diha sa Krus], ni Louise Parker

Lihok diha sa Hugot nga Pagtuo

Awhaga ang mga sakop sa klase o sa korum sa pagpamalandong ug pagrekord sa unsay ilang buhaton sa paglihok sa mga panghunahuna nga ilang nadawat karong adlawa. Kon gusto sila, makahimo sila sa pagpakigbahin sa ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga panghunahuna makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Juan 1:1–3, 10; Ether 3:14; Moises 4:1–2 (Ang misyon sa Manluluwas didto sa kinabuhi nga wala pa dinhi sa yuta)

• Mosiah 3:5–11; Alma 7:11–13; Doktrina ug mga Pakigsaad 19:16–19 (Ang misyon sa Manluluwas sa panahon sa Iyang mortal nga kinabuhi)

• Juan 14:2–3; 2 Nephi 9:15–17; Doktrina ug mga Pakigsaad 45:3–5; 138:28–31 (Ang misyon sa Manluluwas human sa Iyang kamatayon ug Pagkabanhaw)

Pagtudlo sumala sa Pamaagi sa Manluluwas

Ang matag indibidwal sa imong klase usa ka naghingapin nga tinubdan sa pagpamatuod, mga panabot, ug mga kasinatian sa pagpuyo sa ebanghelyo. Dapita sila sa pagpakigbahin ug pagbayaw sa usag usa.