bunyaganan

November 26

Unsaon Ko nga Makatabang sa Akong mga Katigulangan nga Mas Mapaduol ngadto ni Jesukristo?

1 ug 2 Pedro

icon sa pagtinambagay

Pagtinambagay

Gipangulohan sa usa ka sakop sa kapangulohan sa klase o sa korum; mga 10–20 minutos

Sa sinugdanan sa miting, balika pagsulti og dungan ang Tema sa Young Women o ang Tema sa Korum sa Aaronic nga Pagkapari. Dayon pangulohi ang usa ka panaghisgotan mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Unsa nga mga hilisgotan ang gihisgotan sa bishopric diha sa atong mga miting sa konseho sa kabatan-onan sa ward? Unsay atong mahimo isip usa ka klase o korum base niana nga mga panaghisgot?

• Mag-atiman alang niadtong nanginahanglan. Sa unsang paagi kita makatabang ngadto sa mga tawo sa Kristohanong mga paagi kon makakita kita og panginahanglan ug wala makahibalo unsa ang isulti?

• Magdapit sa tanan sa pagdawat sa ebanghelyo. Unsa ang atong nakaplagan diha sa ebanghelyo ni Jesukristo nga nagdala kanato og hingpit nga kalipay? Sa unsang paagi kita makahimo sa pagpakigbahin niana nga kalipay ngadto sa uban?

• Maghiusa sa mga pamilya alang sa kahangtoran. Unsa ang atong gihimo aron makakita og mga ngalan sa atong mga katigulangan kinsa nagkinahanglan og mga ordinansa sa templo? Unsa ang atong mahimo sa pagtabang sa uban sa pagpangita sa mga ngalan sa ilang mga katigulangan?

Sa kataposan sa leksiyon, kon angay, buhata ang mosunod:

• Pagpamatuod sa mga baroganan nga gitudlo.

• Pahinumdomi ang mga sakop sa klase o sa korum mahitungod sa mga plano ug mga pagdapit nga gihimo atol sa miting.

icon sa itudlo ang doktrina

Itudlo ang Doktrina

Gipangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Unsa ang mahitabo ngadto sa binilyon ka tawo kinsa namatay nga walay tinuod nga oportunidad sa pagpaminaw sa ebanghelyo ni Jesukristo o sa pagdawat sa makaluwas nga mga ordinansa? Makakaplag kita og mga timailhan sa tubag diha sa 1 Pedro 3:18–20; 4:6, diin si Pedro namulong kabahin sa ebanghelyo nga gisangyaw ngadto sa mga patay. Dayon ang Doktrina ug mga Pakigsaad 138 nagbukhad sa hingpit nga kamatuoran––ang atong mga katigulangan makaduol sa hingpit ngadto ni Kristo kon sila adunay hugot nga pagtuo diha Kaniya ug modawat sa Iyang ebanghelyo ug kita maghimo sa mga ordinansa nga madawat nila diha sa templo. Kini nga panalangin nagkinahanglan nga kita––nga ilang mga kaliwatan kinsa adunay ebanghelyo––mosiksik sa ilang mga ngalan, moadto sa templo, ug modawat sa makaluwas nga mga ordinansa alang kanila.

Unsa nga mga kasinatian ikaw aduna sa pagtabang sa imong mga katigulangan nga mas mapaduol ngadto ni Kristo? Unsaon nimo nga makatabang niadtong imong gitudloan nga mahimong mas madasig mahitungod sa buhat sa family history ug sa templo ug mas masaligon sa ilang abilidad sa pagbuhat niini? Samtang ikaw mangandam, makabasa ka sa mensahe ni Elder Dale G. Renlund nga “Buhat sa Family History ug sa Templo: Pagsilyo ug Pagkaayo” (Liahona, Mayo 2018, 46–49).

Pagkat-on og Dungan

Unsaon sa mga sakop sa imong klase o sa korum sa pagtubag ngadto sa usa ka tawo kinsa naglibog kon unsaon sa buotang mga tawo kinsa walay higayon sa pagdawat sa ebanghelyo mahimong maluwas? Unsa ang ilang makaplagan diha sa 1 Pedro 3:18–20; 4:6 nga motabang og tubag niini nga pangutana? Makapadayon ka sa inyong panaghisgotan uban sa usa o dugang pa sa mosunod nga mga kalihokan.

• Ang doktrina sa pagtubos sa patay iya lamang sa Ang Simbahan ni Jesukristo sa mga Santos sa Ulahing mga Adlaw. Dapita ang mga sakop sa klase o sa korum sa pagtuon sa Doktrina ug mga Pakigsaad 138:25–39 isip mga indibidwal o mga grupo ug sa pagpakigbahin kon unsay ilang nakat-onan (tan-awa diha sa “Suporta nga mga Kapanguhaan” alang sa dugang nga mga kasulatan niini nga hilisgotan). Unsa ang gisugyot niini nga mga bersikulo mahitungod sa paagi ang Langitnong Amahan mibati sa tanan Niya nga mga anak? Unsaon sa bunyag alang sa patay pagtabang sa atong mga katigulangan nga mas maduol ngadto ni Kristo? Unsaon pagtabang niini kanato nga mas maduol ngadto ni Kristo ug pagdugang sa atong hugot nga pagtuo diha Kaniya?

• Unsa ang magdasig sa kabatan-onan nga mahimong mas maapil sa buhat sa templo ug family history? Makapangita usab sila alang sa gisaad nga mga panalangin diha sa lista nga gimarkahan og bullet nga mensahe ni Elder Dale G. Renlund nga “Buhat sa Family History ug Templo: Pagsilyo ug Pagkaayo.” Dapita sila sa pagpakigbahin hain nga mga panalangin ang makahuluganon ngadto kanila ug ngano. Mahimo usab nga ikaw maghisgot sa pipila ka mga babag nga mahimong magpugong kanato sa pag-apil diha sa buhat sa templo ug family history. Unsaon sa Manluluwas nga makatabang kanato sa pagbuntog niini nga mga babag?

• Kon ang mga sakop sa imong klase o sa korum adunay magamit nga digital nga mga himan, mahimo ka nga mogahin og pipila ka panahon sa pagpakita kanila kon giunsa sa Ginoo paghimo niini nga mas masayon sukad sa pagpangita sa mga katigulangan kinsa nagkinahanglan og makaluwas nga mga ordinansa (tan-awa diha sa “Suporta nga mga Kapanguhaan”). Makadapit ka og usa ka consultant sa ward temple ug family history sa pagtabang sa kabatan-onan sa pagsabot niini nga mga kapanguhaan. Makaawhag ka usab sa kabatan-onan sa paghimo og mga plano sa pagsuhid niini nga mga kapanguhaan diha sa panimalay ug pagreport og balik sa umaabot nga miting.

batan-ong mga babaye nagsulti

Samtang kita nagpahigayon og sagradong mga ordinansa diha sa templo, nagtabang kita sa paghimo sa mga panalangin sa ebanghelyo nga madawat ngadto niadtong kinsa namatay na.

Lihok diha sa Hugot nga Pagtuo

Awhaga ang mga sakop sa klase o sa korum sa pagpamalandong ug pagrekord sa unsay ilang buhaton sa paglihok sa mga panghunahuna nga ilang nadawat karong adlawa. Kon gusto sila, makahimo sila sa pagpakigbahin sa ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga panghunahuna makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Malaquias 4:5–6; Mateo 16:18–19; Juan 5:25; 1 Mga Taga-Corinto 15:29; Doktrina ug mga Pakigsaad 137:7–9 (Ang doktrina alang sa pagtubos sa mga patay)

• Ang Family Tree nga app (nagkinahanglan sa kabatan-onan sa pag-log in gamit ang ilang Church account)

• RootsTech (Ang kabatan-onan makasuhid og mga sesyon gikan sa virtual nga mga komperensiya.)

• FamilySearch.org (Ikaw makabisita sa FamilySearch.org/discovery ug mag-uban nga magsuhid niini nga mga kalihokan.)

Pagtudlo sumala sa Pamaagi sa Manluluwas

Kon imong dapiton ang kabatan-onan sa pagtudlo, paggahin og panahon sa pagtabang kanila nga tukma ang pagpangandam. Ipasabot kon unsa ang imong gibuhat sa pagpangandam sa pagtudlo. Niini nga paagi ikaw nagtabang sa kabatan-onan dili lamang alang sa usa ka leksiyon apan alang sa tibuok kinabuhi nga pagtudlo sa ebanghelyo sumala sa pamaagi sa Manluluwas.