batan-ong lalaki nga nagpaambit sa sakramento

November 12

Unsaon Ko nga Mas Mapaduol ngadto ni Jesukristo pinaagi sa Sagradong mga Ordinansa ug mga Pakigsaad?

Mga Hebreohanon 7–13

icon sa pagtinambagay

Pagtinambagay

Gipangulohan sa usa ka sakop sa kapangulohan sa klase o sa korum; mga 10–20 minutos

Sa sinugdanan sa miting, balika pagsulti og dungan ang Tema sa Young Women o ang Tema sa Korum sa Aaronic nga Pagkapari. Dayon pangulohi ang usa ka panaghisgotan mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Sa unsang paagi kita mas napaduol ngadto sa Manluluwas? Sa unsang paagi kita naningkamot nga mahimong mas mahisama Kaniya?

• Mag-atiman alang niadtong nanginahanglan. Kinsa ang anaa sa atong hunahuna sa bag-ohay lamang? Sa unsang paagi kita makatabang niini nga mga indibidwal?

• Magdapit sa tanan sa pagdawat sa ebanghelyo. Sa unsang paagi kita makatubag sa mga pangutana sa atong mga higala mahitungod sa Simbahan sa paagi nga maglig-on sa ilang hugot nga pagtuo diha sa Manluluwas?

• Maghiusa sa mga pamilya alang sa kahangtoran. Unsa ang pipila ka mga paagi nga kita mas makakonektar sa mga sakop sa kaliwat sa pamilya sama sa mga apohan ug mga ig-agaw?

Sa kataposan sa leksiyon, kon angay, buhata ang mosunod:

• Pagpamatuod sa mga baroganan nga gitudlo.

• Pahinumdomi ang mga sakop sa klase o sa korum mahitungod sa mga plano ug mga pagdapit nga gihimo atol sa miting.

icon sa itudlo ang doktrina

Itudlo ang Doktrina

Gipangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Sulod sa gatosan ka tuig, ang mga anak sa Israel, usahay gitawag og mga Hebreohanon, kanunay nga makugihong nag-apil sa mga ordinansa nga konektado ngadto sa tabernakulo ug sa balaod ni Moises. Ug apan daghan kanila wala makaamgo nga kining mga butanga mga “hulad sa mga langitnong butang”––“landong sa mga maayong butang nga umaabot” (Mga Hebreohanon 9:23; 10:1). Ang mga ordinansa tanan gituyo sa pagtudlo kanila mahitungod ni Jesukristo. Mao kini ang gipasabot ni Pablo diha sa iyang Epistola ngadto sa mga Hebreohanon. Ang iyang mensahe importante usab kanato karon tungod kay kita usab adunay sagradong mga ordinansa nga adunay sama nga katuyoan. Busa angay nga pangutan-on ang atong mga kaugalingon niini nga mga pangutana: Kini nga mga ordinansa nagtabang ba kanato sa paghinumdom ni Jesukristo? Aduna pa bay dugang natong mabuhat sa pagsinati sa gahom ni Jesukristo pinaagi sa mga ordinansa sa ebanghelyo? O kita ba, sama sa karaang mga Hebreohanon, napakyas ang mas lawom nga kahulogan niini?

Pamalandonga kini nga mga pangutana samtang imong basahon ang Mga Hebreohanon 7–13 ug samtang ikaw nag-andam sa pagtudlo mahitungod kon unsaon sa mga ordinansa ug mga pakigsaad pagdala kanato nga mas mapaduol ngadto ni Jesukristo. Mahimo usab nimong tun-an ang pipila sa mga mensahe sa kinatibuk-ang komperensiya nga gihisgotan dinhi niini nga latid.

Pagkat-on og Dungan

Sa pagtabang niadtong imong gitudloan tan-awa kon unsaon nila nga mas mapaduol ngadto ni Jesukristo pinaagi sa mga ordinansa ug mga pakigsaad sa Iyang ebanghelyo, ikaw makadapit kanila sa paglista og pipila ka mga ordinansa sa ebanghelyo ug sa ilang kalabot nga mga pakigsaad diha sa pisara (tan-awa sa Giya ngadto sa mga Kasulatan, “Mga Ordinansa,” “Pakigsaad,” topics.ChurchofJesusChrist.org). Unsa ang gitudlo kanato niini nga mga ordinansa ug mga pakigsaad mahitungod ni Kristo ug sa Iyang Pag-ula? Ang pahayag ni Elder David A. Bednar diha sa “Suporta nga mga Kapanguhaan” naghatag og katin-awan sa mga ordinansa ug ubang importanting mga panabot. Ang mga kalihokan sama sa mosunod makatabang usab.

• Makadapit ka sa mga kabatan-onan sa pagbasa sa Doktrina ug mga Pakigsaad 84:19–22 ug paghisgot sa mga pangutana nga sama niini: Unsa ang kahulogan sa “ang gahom sa pagkadiosnon”? Giunsa sa mga ordinansa ug mga pakigsaad pagtabang kanato sa pagsinati niana nga gahom? Unsa nga kalainan ang nahimo sa mga ordinansa ug mga pakigsaad sa atong kinabuhi? Giunsa niini pagtabang kanato nga magpabiling konektado ngadto sa Manluluwas? Sa pagtabang og tubag niini nga mga pangutana, ang kabatan-onan makabasa sa unang upat ka mga parapo sa mensahe ni Elder Kent F. Richard “Ang Gahom sa Pagkadiosnon” (Liahona, Mayo 2016, 118) o sa mensahe ni Elder Bednar “Himoa Kini nga Balay nga Matukod ngadto sa Akong Ngalan” (Liahona, Mayo 2020, 84–87), ilabi na ang seksiyon sa “Gikan sa sulod Paingon sa Gawas.”

• Maghunahuna sa pagpangutana niadtong imong gitudloan kon unsaon nila sa pagpasabot ang ordinansa sa sakramento ngadto sa usa ka tawo kinsa walay nahibaloan og bisan unsa mahitungod niini. Ang seksiyon nga “Kasinatian ug Pagpamatuod” sa mensahe ni Elder Taniela B. Wakolo “Ang Makaluwas nga mga Ordinansa Magdala Kanato og Talagsaong Kahayag” (Liahona, Mayo 2018, 39–41) naghatag og ehemplo. Ang kabatan-onan mahimo usab nga makakaplag og importanting mga pagtulon-an diha sa video nga “Always Remember Him” (ChurchofJesusChrist.org). Giunsa sa sakramento pagdala kanato nga mas maduol ngadto ni Jesukristo? Unsa nga mga oportunidad kita aduna sa pagtudlo sa uban mahitungod niini?

• Magrebyo sa lima ka sugyot sa mensahe ni Elder Peter F. Meurs “Ang Sakramento Makatabang Kanato nga Mahimong Balaan” (Liahona, Nob. 2016, 85–87) makatabang sa kabatan-onan sa pagsabot kon unsaon nga mas makaandam og maayo alang sa sakramento. Hisgoti kon giunsa niining sagrado nga mga ordinansa ug sa ilang kalabot nga mga pakigsaad nga makatabang sa pagdala kanato nga mas maduol ngadto sa Manluluwas.

• Maghunahuna sa pagsulat sa mga pulong Sakramento, Bunyag, ug Templo diha sa pisara. Ubos sa matag usa, dapita ang kabatan-onan sa paglista sa mga pakigsaad nga atong ghimo. Ang mga pakisayran nga nakaplagan diha sa “Suporta nga mga Kapanguhaan” makatabang. Pag-uban og hisgot kon giunsa niini nga mga pakigsaad pagtabang kanato nga mas maduol ngadto ni Jesukristo.

• Makahimo ka sa pagbahin sa imong klase o korum ngadto sa mga grupo ug ipahimo sa matag grupo ang pagrebyo sa usa ka seksiyon sa bisan hain nga mensahe ni Elder Ronald A. Rasband “Barugan ang Atong mga Saad ug mga Pakigsaad” (Liahona, Nob. 2019, 53–56) o ang mensahe ni Elder D. Todd Christofferson “Nganong Mahinungdanon ang Dalan sa Pakigsaad” (Liahona, Mayo 2021, 116–19). Awhaga sila sa pagpakigbahin kon unsa ang ilang nakat-onan mahitungod kon unsaon nga ang paghupot sa ilang mga pakigsaad maglig-on sa ilang relasyon ngadto ni Jesukristo.

batan-ong mga babaye nga naglakaw sa gawas sa templo

Sagradong mga ordinansa sa ebanghelyo nagdala “sa gahom sa pagkadiosnon” nganhi sa atong mga kinabuhi (tan-awa sa Doktrina ug mga Pakigsaad 84:19–22).

Lihok diha sa Hugot nga Pagtuo

Awhaga ang mga sakop sa klase o sa korum sa pagpamalandong ug pagrekord sa unsay ilang buhaton sa paglihok sa mga panghunahuna nga ilang nadawat karong adlawa. Kon gusto sila, makahimo sila sa pagpakigbahin sa ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga panghunahuna makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Mosiah 18:8–10 (Pakigsaad sa bunyag)

• Moroni 4–5 (Pakigsaad sa sakramento)

• Si Elder David A. Bednar mitudlo: “Ang balaang mga ordinansa mahinungdanon kaayo sa ebanghelyo sa Manluluwas ug diha sa proseso sa pagduol ngadto Kaniya ug pagpangita og espirituhanong pagkatawo og usab. Ang mga ordinansa sagradong mga buhat nga may espiritwal nga katuyoan, mahangturong kahulogan, ug may kalabotan sa mga balaod sa Dios ug mga lagda. …

  “Ang mga ordinansa sa kaluwasan ug kahimayaan nga gipangalagad sa gipahiuli nga Simbahan sa Ginoo mas labaw pa kay sa mga ritwal o simbolikanhong mga buhat. Hinoon, kini naglangkob sa awtorisadong paagi diin ang mga panalangin ug gahom sa langit modagayday sa atong tagsa-tagsa nga kinabuhi. …

  “Ang mga ordinansa nga nadawat ug gitahod uban sa integridad importante sa pag-angkon sa gahom sa pagkadiosnon ug sa tanang panalangin nga anaa pinaagi sa Pag-ula sa Manluluwas” (“Kanunay nga Magbaton og Kapasayloan sa Inyong mga Sala,” Liahona, Mayo 2016, 59–60).

Pagtudlo sumala sa Pamaagi sa Manluluwas

Samtang imong dapiton kadtong imong gitudloan sa paglihok pinasikad sa tinuod nga doktrina, imo silang gitabangan nga ilugway ang kasinatian sa pagkat-on ngadto sa ilang mga panimalay ug inadlaw nga kinabuhi.