Oktubre 22

Unsaon Ko nga Makapabiling Lig-on sa Akong Pasalig ngadto ni Jesukristo?

1 ug 2 Mga Taga-Tesalonica

Pagtinambagay

Gipangulohan sa usa ka sakop sa kapangulohan sa klase o sa korum; mga 10–20 minutos

Sa sinugdanan sa miting, balika pagsulti og dungan ang Tema sa Young Women o ang Tema sa Korum sa Aaronic nga Pagkapari. Dayon pangulohi ang usa ka panaghisgotan mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Unsa nga bag-ong mga kasinatian ang nakapalig-on sa atong mga pagpamatuod?

• Mag-atiman alang niadtong nanginahanglan. Kinsa ang nagkinahanglan sa atong tabang ug mga pag-ampo? Unsa nga pagdani ang atong gibati nga buhaton aron sa pagtabang kanila?

• Magdapit sa tanan sa pagdawat sa ebanghelyo. Sa unsa nga paagi kita mahimong kahayag ngadto sa mga sakop sa pamilya o mga higala nga dili sama kanato og mga tinuohan?

• Maghiusa sa mga pamilya alang sa kahangtoran. Sa unsang paagi kita makapakita og dugang nga gugma og suporta alang sa atong mga pamilya ug makahimo og positibong kalainan diha sa atong mga panimalay?

Sa kataposan sa leksiyon, kon angay, buhata ang mosunod:

• Pagpamatuod sa mga baroganan nga gitudlo.

• Pahinumdomi ang mga sakop sa klase o sa korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Gipangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Kasagaran kanato nakaila og usa ka tawo kinsa sa usa ka higayon ingon og hingpit nga may pasalig ngadto ni Jesukristo apan mibiya gikan sa ilang pagtuo. Kini ordinaryo lamang nga mahibulong, “Mahitabo kaha kana kanako?” Gidayeg ni Pablo ang mga Santos nga taga Tesalonica alang sa ilang pagkamatinud-anon apan mibati og kadasig sa pagpasidaan kanila mahitungod sa sayop nga mga pagtulon-an ug ubang mga impluwensya nga makapaloya sa ilang hugot nga pagtuo. Walay pagsapayan unsa ka lig-on ang atong pasalig ngadto sa Manluluwas sa karon, kanunay kitang makahimo og daghan sa “[pag]sangkap sa nakulang diha sa [atong] pagtuo” (1 Mga Taga-Tesalonica 3:10).

Samtang ikaw mag-ampo mahitungod sa mga tawo sa imong klase o sa korum, paminaw alang sa mga pag-aghat nga ang Ginoo nagpadala kanimo. Unsa ang imong gibati nga motabang kanila sa pagpabiling matinud-anon ngadto sa Manluluwas walay pagsapayan sa oposisyon nga ilang atubangon? Unsay nagtabang kanimo? Samtang ikaw nag-andam sa pagtudlo, mahimo nimong rebyohon ang mensahe ni Elder Dale G. Renlund nga “Walay Pagkapaling nga Pasalig ngadto kang Jesukristo” (Liahona, Nob. 2019, 22–25) agi og dugang sa 1 ug 2 Mga Taga-Tesalonica.

Pagkat-on og Dungan

Sa pagtabang sa kabatan-onan sa pagrebyo kon unsa ang ilang nabasa sa 1 ug 2 Mga Taga-Tesalonica ug sa pagpaila sa hilisgotan nga magpabiling lig-on sa atong pasalig ngadto sa Manluluwas, makabasa mo nga magdungan sa 2 Mga Taga-Tesalonica 2:1–3. Paghisgot kon unsa ang pulong “mibiya” nagkahulogan. Sa piho, unsa ang kahulogan niini alang sa usa ka indibidwal nga mibiya gikan ni Jesukristo? Ikaw makahimo og kalainan niini nga pulong ngadto sa ubang mga hugpong sa mga pulong nga gigamit ni Pablo, sama sa “nagabarog nga malig-on diha sa Ginoo” (1 Mga Taga-Tesalonica 3:8) ug “ayaw pagkataka sa pagbuhat og maayo” (2 Mga Taga-Tesalonica 3:13). Ikaw makarebyo dayon sa 1 Mga Taga-Tesalonica 5:15–23. Unsaon nga ang pagsunod sa tambag ni Pablo niini nga mga bersikulo makatabang sa pagpugong kanato gikan sa pagbiya gikan sa atong pagtuo diha ni Jesukristo––bisan kon kita nagsinati og oposisyon? Gamit og mga kalihokan sama sa mosunod sa pagtabang sa mga sakop sa klase o sa korum nga magpabiling lig-on sa ilang pasalig ngadto sa Manluluwas.

• Kini makadasig sa pagkat-on gikan sa mga ehemplo sa uban kinsa nahimong dili matarog diha sa ilang pasalig ngadto ni Kristo. Sama pananglit, makatuon kamo og dungan sa ehemplo sa mga Anti-Nephi-Lehi, kinsa nahimong “usa ka luog ug magahi ug usa ka mabangis nga mga katawhan” apan “wala gayod mobiya” human sila “nakabig ngadto sa Ginoo” (Alma 17:14; 23:6–8). Unsa ang gisugyot sa Alma 24:8–18 mahitungod kon nganong sila mipabilin nga matinud-anon? Unsa nga importanting mga pagpili ang ilang gihimo? Giunsa pagtabang sa Ginoo kanila? Dugang nga mga ehemplo makaplagan sa mensahe ni Elder Dale G. Renlund “Walay Pagkapaling nga Pasalig ngadto kang Jesukristo.” Tingali pipila ka kabatan-onan makabasa sa pipila niini ka mga ehemplo ug ipakigbahin kon unsa ang ilang nakat-onan mahitungod sa pagpabiling tinuod ngadto ni Kristo. Giunsa nato sa pagpabiling may pasalig ngadto sa Ginoo bisan pa sa atong mga kasaypanan?

• Sa atong mga paningkamot sa paglig-on sa atong hugot nga pagtuo, kini makatabang nga mahimong makaila sa mga pwersa nga naninguha sa pagluya niini. Ang panan-awon ni Lehi sa kahoy sa kinabuhi naghulagway og pipila niini nga mga pwersa. Tingali ikaw makapakita og hulagway sa panan-awon (tan-awa sa Libro sa mga Hulagway sa Ebanghelyo [2009], nu. 69) ug pagdungan og rebyo sa mga detalye, nga makaplagan diha sa 1 Nephi 8:10–34. Diha sa panan-awon, unsa ang nagpugong sa mga tawo gikan sa pagpahimulos sa bunga sa kahoy? Unsa ang mitabang sa mga tawo nga moabot sa kahoy ug nagpabilin didto? Unsa ang gisimbolo niining mga butanga sa atong mga kinabuhi?

• Sa iyang mensahe “Gahom sa Pagbuntog sa Kaaway” (Liahona, Nob. 2019, 110–12), milista si Elder Peter M. Johnson og tulo ka paagi si Satanas naninguha sa pagluya kanato. Makapabuhat ka sa kada batan-on sa pagbasa mahitungod sa usa niini ug makigbahin ngadto sa klase o sa korum og mga ehemplo kon unsaon ni Satanas paggamit kini nga himan batok sa kabatan-onan karon. Dayon sila kada usa makabasa og usa sa upat ka sugyot ni Elder Johnson alang sa pagbuntog sa mga taktika sa kaaway ug makigbahin kon unsay ilang nakat-onan.

Be Not Afraid [Ayaw og Kahadlok], ni Michael Malm

Lihok diha sa Hugot nga Pagtuo

Awhaga ang mga sakop sa klase o sa korum sa pagpamalandong ug pagrekord sa unsay ilang buhaton sa paglihok sa mga panghunahuna nga ilang nadawat karong adlawa. Kon gusto sila, makahimo sila sa pagpakigbahin sa ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga panghunahuna makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• 1 Nephi 2:9–10; Alma 17:1–3; Helaman 5:12

• Jeffrey R. Holland, “Nagatuo Ako,” Liahona, Mayo 2013, 93–95

• Neil L. Andersen, “Ayaw Gayod Pagbiya Kaniya,” Liahona, Nob. 2010, 39–42

• Becky Craven, “Mabinantayon batok Dili Kaayo Magtagad,” Liahona, Mayo 2019, 9–11

Pagtudlo sumala sa Pamaagi sa Manluluwas

Sa daghang mga sitwasyon, tingali angay nga dapiton ang mga tigkat-on sa pagtabang sa usag usa sa pagpangita og mga tubag sa ilang mga pangutana. Kon giaghat sa Espiritu, mahimo ka nga modesisyon sa pagbuhat niini bisan kon gibati nimo nga nakahibalo ka sa tubag.