inahan ug mga anak nga babaye nagluto

Oktubre 8

Unsaon sa Ebanghelyo ni Jesukristo nga Makatabang Kanako sa Paglig-on sa Akong Pamilya?

Mga Taga-Efeso

icon sa pagtinambagay

Pagtinambagay

Gipangulohan sa usa ka sakop sa kapangulohan sa klase o sa korum; mga 10–20 minutos

Sa sinugdanan sa miting, balika pagsulti og dungan ang Tema sa Young Women o ang Tema sa Korum sa Aaronic nga Pagkapari. Dayon, agi og dugang ngadto sa pagtinambagay mahitungod sa piho nga mga buluhaton sa klase o sa korum mahimo nimong hisgotan ang mga panghunahuna ug mga tema gikan sa kinatibuk-ang komperensiya. Ang mosunod nga mga pangutana tingali makatabang.

• Unsa nga mga tema o mga mensahe ang mahinungdanon ngari kanato? Unsa ang nakapalig-on sa atong hugot nga pagtuo diha ni Jesukristo?

• Unsa ang nakapalig-on sa atong mga pagpamatuod bahin sa buhing mga propeta? Unsa nga pag-aghat ang atong gibati nga buhaton tungod sa unsay atong nakat-onan o gibati?

• Unsay kinahanglan natong buhaton isip usa ka klase o korum aron mahinumdoman ug malihok ang tambag nga atong nadungog sa kinatibuk-ang komperensiya?

Sa kataposan sa leksiyon, kon angay, buhata ang mosunod:

• Pagpamatuod sa mga baroganan nga gitudlo.

• Pahinumdomi ang mga sakop sa klase o sa korum mahitungod sa mga plano ug mga pagdapit nga gihimo atol sa miting.

icon sa itudlo ang doktrina

Itudlo ang Doktrina

Gipangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Ang pipila sa mga tawo diha sa imong klase o sa korum mahimong adunay lig-on, mahigugmaong mga pamilya nga nag-amuma og hugot nga pagtuo ug pagka-espirituhanon. Ang uban mahimong nag-inusara sa ilang mga paningkamot sa pagpuyo diha sa ebanghelyo, ug ang pipila mahimong nagsinati og panagbingkil ug kaguol sa panimalay. Apan walay usa sa imong klase o sa korum adunay perpekto nga pamilya, gawasnon sa mga hagit. Ug ang tanan maka-access sa gahom ni Jesukristo, diin makaayo ug makalig-on sa mga pamilya.

Ang Manluluwas gusto nga mopanalangin og mga pamilya. Usahay ang paagi nga Siya naghimo niini mao ang pinaagi sa gugma ug ehemplo sa usa ka batan-ong tawo kinsa naninguha sa pagsunod Kaniya ug sa pagpuyo sa Iyang ebanghelyo. Samtang ikaw nag-andam sa pagtudlo sa kabatan-onan mahitungod sa gahom nga anaa alang kanila ug sa ilang mga pamilya pinaagi ni Jesukristo, pamalandonga ang mga baroganan diha sa Mga Taga-Efeso nga makatabang kanato sa paglig-on og mga relasyon sa pamilya. Mahimo usab ninyong tun-an ang “Ang Pamilya: Usa ka Pamahayag ngadto sa Kalibotan” (ChurchofJesusChrist.org).

Pagkat-on og Dungan

Human maghatag sa sakop sa klase o sa korum og higayon sa pagpakigbahin kon unsa ang gitudlo sa Espiritu kanila niini nga semana samtang ilang gitun-an ang Mga Taga-Efeso, pangita alang sa mga paagi sa pagpaila sa hilisgotan kon unsaon ni Jesukristo nga makatabang kanato sa paglig-on sa atong mga pamilya. Sama pananglit, mahimo nimong dapiton ang kabatan-onan sa pagpangita ug sa pagpakigbahin og mga tudling diha sa Mga Taga-Efeso nga naglangkob og mga baroganan nga kita makagamit sa paglig-on og mga relasyon sa pamilya. Ang pipila sa mga ehemplo mahimong naglakip sa Mga Taga-Efeso 2:19–22; 3:14–19; 4:1–3, 25–26, 29–32; 5:1–2; 6:1–4. Unsaon sa mga tambag niini nga mga bersikulo makapanalangin og pamilya? Giunsa sa Manluluwas ug sa Iyang ebanghelyo paghimong usa ka panalangin sa atong mga panimalay? Ania ang pipila ka dugang nga mga ideya sa kalihokan nga kalabot ngadto niini nga hilisgotan.

• Kon ikaw gusto nga hisgotan ang sugo nga “tumahod ka sa imong amahan ug inahan” (Mga Taga-Efeso 6:2), mahimo nimong sugdan pinaagi sa pagpangutana sa mga sakop sa klase o sa korum kon unsa ang kahulogan sa pulong tahod ngadto kanila. Tingali usa ka tawo makapakigbahin sa katin-awan gikan sa usa ka diksyunaryo o sa Giya ngadto sa mga Kasulatan (scriptures.ChurchofJesusChrist.org). Dapita ang kabatan-onan sa pagpamulong mahitungod kon unsaon kaha nila ang paggamit niini nga sugo diha sa ilang kaugalingong mga kinabuhi. Kini makadasig usab sa pagsuhid kon giunsa ni Jesukristo pagtahod ang Iyang Amahan sa Langit ug ang Iyang inahan, si Maria (tan-awa, sama pananglit, sa Lucas 2:41–52; Juan 8:29; 19:25–27). Unsa ang atong makat-onan gikan sa ehemplo ni Jesus nga makapalig-on sa atong mga relasyon ngadto sa atong mga ginikanan?

• Mahimo kini nga makatabang ang pagpamulong mahitungod sa mga materyal nga gikinahanglan sa pagtukod og usa ka lig-on nga balay. Unsa ang pipila ka mga butang nga gikinahanglan sa pagtukod og usa ka lig-ong pamilya? Isip bahin niini nga panaghisgotan, mahimo nimong ipakigbahin kini nga pahayag ni Elder L. Whiney Clayton: “Unsay importante mao ang pangsulod nga kinaiya sa mga kalag sa nagpuyo, dili ang estraktura mismo” (“Ang Labing Nindot nga mga Panimalay,” Liahona, Mayo 2020, 107-9). Ikaw makahisgot usab sa upat ka sugyot nga gihatag ni Elder Clayton diha sa iyang mensahe alang sa unsaon pagtukod sa “labing nindot nga mga panimalay.”

• “Ang Pamilya: Usa ka Pamahayag ngadto sa Kalibotan” naglakip niini nga saad: “Ang kalipay diha sa kinabuhi sa pamilya labing may kalagmitan nga makab-ot kon gitukod diha sa mga pagtulon-an ni Ginoong Jesukristo.” Unsaon sa mga pagtulon-an sa Manluluwas pagmugna og pundasyon alang sa usa ka malipayong pamilya? Ang pamahayag sa pamilya ug sa mga kasulatan ubos sa “Suporta nga mga Kapanguhaan” naghatag og mga ehemplo. Unsaon nga makatabang sa usag usa ang mga sakop sa pamilya sa pagpuyo niini nga mga pagtulon-an?

pamilya nga nag-uban sa pagtuon

Ang mga pagtulon-an ni Jesukristo mao ang mga pundasyon alang sa kalipay diha sa kinabuhi sa pamilya.

Lihok diha sa Hugot nga Pagtuo

Awhaga ang mga sakop sa klase o sa korum sa pagpamalandong ug pagrekord sa unsay ilang buhaton sa paglihok sa mga panghunahuna nga ilang nadawat karong adlawa. Kon gusto sila, makahimo sila sa pagpakigbahin sa ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga panghunahuna makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Mateo 5:21–24, 38–42; 6:14; 7:1–5; 22:36–39; 3 Nephi 18:21; Moroni 7:33; Doktrina ug mga Pakigsaad 18:10–13

• Henry B. Eyring, “Usa Ka Panimalay Diin ang Espiritu sa Ginoo Mopuyo,” Liahona, Mayo 2019, 22–25

• “Gugma sa Panimalay,” “Panimalay Mahimo nga Langit sa Yuta,” Mga Himno, nus. 184, 186

Pagtudlo sumala sa Pamaagi sa Manluluwas

Kon mobati ang kabatan-onan nga misalig ka kanila, ang ilang pagsalig diha sa ilang balaan nga potensyal motubo, ug sila mosurprisa kanimo sa unsay ilang makab-ot. Tabangi sila nga makaangkon og panabot kon unsay nahibaloan sa Langitnong Amahan nga sila mamahimo.